Jonás 1
1
Jonapa oo–e pada Tachi Akꞌõrepa jaradakꞌa
1Jonás, Amitay warra, Tachi Akꞌõre pedee jarapari paji. Ewari aba Tachi Akꞌõrepa irumaa mãgaji: 2“Wã́ji pꞌuuru waibɨa Ninivedee mãikꞌaapa jaráji mɨa ne–inaa kꞌachia ooitꞌee, mɨ baparimãiipa mɨa unu bairã ãchia ne–inaa kꞌachia ooi awaa pꞌanapata.”
Jonás miruda
3Mamĩda Jonás Tachi Akꞌõre kꞌĩrapiteepa miru kꞌiniapa, Tarsis pꞌuurudee wãji. Mamaa wãrude Jope pꞌuuru, pꞌusa ide badamaa wãji. Mama panakꞌãri, unuji barco Tarsis pꞌuurudee wãitꞌee bɨ. Mãpai ichi pasaje pꞌaapꞌeda, ma barcode batauji aɨde wã nipadapꞌedaarã ome. 4Mamĩda ma wãrude Tachi Akꞌõrepa nãumia golpe pꞌuapiji. Pꞌusara tꞌo nɨ̃beekꞌãri, ma barco tꞌoopꞌedariikꞌa nɨ̃beeji.
5Mãpai ma barcode mimiapataarã pꞌera jõnɨpa ãchi chaachaa ɨtꞌaa tꞌɨ̃maa pꞌaneejida ãchi akꞌõre waibɨa apatapꞌedaamaa. Mãga oojida ma pꞌusa tꞌumãtɨi jĩakꞌaapa. Ma awara netꞌaa ma barcode atee wãdapꞌedaa toidaa batꞌakꞌoojida barco wẽsaadaimerã. Mamĩda aɨ naaweda Jonás barcode edú wãpꞌeda, pia kꞌãi nɨ̃baji.
6Maperã ma barco pꞌerapari irumaa wãpꞌeda, mãgaji:
—¿Sãapꞌeda pɨ nama kꞌãi nɨ̃bɨma? ¡Pꞌirabáiji mãikꞌaapa ɨtꞌaa tꞌɨ̃́ji pɨchi Akꞌõre Waibɨamaa! Mãgá irua tachi chupɨria kꞌawaaiskꞌa piunaadamerã.
7Mãɨmisa ma barcode mimiapataarãpa ãchi pitapai mãgajida:
—Suerte jemenedáma kꞌawaadaitꞌee kꞌai kꞌaurépata tachi nãgá na kꞌachiade pꞌanɨ.
Mãga oodakꞌãri, Jonamaata uchiaji. Mãgá kꞌawaajida iru kꞌaurépata ma kꞌachiade pꞌanɨ. 8Mapa irumaa mãgajida:
—Jaráji sãapꞌeda tachi na kꞌachiade pꞌanɨ. ¿Pɨ kꞌãare mimiata ooparima? ¿Sãmãikꞌaapa cheruma? ¿Pɨ sãpemama? ¿Pɨ chisãgɨ́ pꞌuurudepemama? ajida.
9Mãpai Jonapa pꞌanauji:
—Mɨ hebreo. Mɨa ɨtꞌaripema Akꞌõre Waibɨade ijãapari. Iruata pꞌusa mãikꞌaapa eujã oojida aji.
10Mãpai Jonapa ma barcode mimiapataarãmaa nepɨrɨji ichi Tachi Akꞌõre ikꞌaawaapa miru wã. Mãga ũridakꞌãri, audupɨara pꞌeradachida mãikꞌaapa iidijida:
—¿Sãapꞌeda mãga oojima? ajida.
11Mãɨmisa pꞌusa audupɨara tꞌo nɨ̃beeji. Mapa irumaa iidijida:
—¿Pɨ ome kꞌãata oodaitꞌeema ajida, na pꞌusa ipꞌii ũu beemerã?
Jonás chikꞌo choma bɨpa mitꞌaada
12Mãpai Jonapa mãgaji:
—Parã chupɨria jõnɨ na nãumia kꞌaurepa mãikꞌaapa pꞌusa tꞌo nɨ̃bɨ kꞌaurepa. Mɨa pia kꞌawa bɨ mɨ kꞌaurépata nãga jõnɨ. Mɨ jita atadapꞌeda, pꞌusa jãde batꞌatꞌáatɨ. Mãgá pꞌusa ipꞌii ũu beeyada aji.
13Mamĩda ma barcode mimiapataarãpa audupɨara wiijida ma barco to idee ateedaitꞌee. Mamĩda pꞌoyaada–e paji waapɨara pꞌusara nɨ̃beeda perã. 14Mãpai Tachi Akꞌõremaa chupɨria iidijida: “Tachi Akꞌõre, pɨa oopari pɨchia kꞌinia bɨkꞌa. Maperã tai piupináaji na eperã piuru kꞌaurepa. Ma awara ichia ne–inaa kꞌachia oo–e paji pɨrã, taipa ooruta kꞌachia bɨda anaapáde” ajida.
15Mãga jaradapꞌeda, Jonás jita atajida mãikꞌaapa toidú batꞌatꞌaajida. Mãgá pꞌusa ipꞌii ũu beeji. 16Mãga unudakꞌãri, ma barcode mimiapataarãpa Tachi Akꞌõre waawee pꞌaneejida mãikꞌaapa pꞌusa ide wiibaidapꞌeda, ne–animal peejida mãikꞌaapa iru–itꞌee paajida. Ichiaba ãchia jarajida ne–inaa iru–itꞌee oodaitꞌee.
17Aɨ naaweda chikꞌo choma Tachi Akꞌõrepa jɨrɨtꞌera iru badapa Jonás mitꞌaaji. Jonás kꞌãima õpee ma chikꞌo bide baji.
Currently Selected:
Jonás 1: sjaB
Highlight
Share
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.
