Jonás Introducción
Introducción
Libro Jonás awaraa libro kꞌãyaara nepɨrɨ bɨ eperã Tachi Akꞌõrepa jaradakꞌa oo–e padamaa pꞌasada. Na libro leedakꞌãri, unudai Tachi Akꞌõre pedee jarapari Jonapa oo kꞌinia–e pada Tachi Akꞌõrepa jaradakꞌa. Irua jaraji Jonás wãmerã Nínive pidaarãmaa jarade ãchia pꞌekꞌau kꞌachia oopatapꞌedaa oo amaadamerã (cap. 1). Mamĩda Jonapa oo kꞌinia–e paji. Ma kꞌaurepa perá pꞌusade piuitꞌee paji. Mãgá perá piu wãde Jonapa jaraji ooitꞌee Tachi Akꞌõrepa jaradakꞌa. Wãji jarade Nínive pidaarãmaa Tachi Akꞌõrepa ooitꞌee bada ãchi ome. Ijãajida mãikꞌaapa waa ooda–e paji ãchia pꞌekꞌau kꞌachia oopatapꞌedaa. Mapa Tachi Akꞌõrepa ma pꞌuuru pidaarã chupɨria kꞌawaaji (cap. 2–3). Jonapa mãga unukꞌãri, kꞌĩraudachi Tachi Akꞌõre ome, oo–e pada perã ichia jaradakꞌa (cap. 4).
Na librode unudai Tachi Akꞌõre jõmaarã kꞌãyaara waibɨara bɨ mãikꞌaapa chupɨria kꞌawaayaa bapari. Tachi Akꞌõrepa chupɨria kꞌawaapari pꞌuuru pidaarã ãrapa ne–inaa kꞌachia oo pꞌanɨ oo amaadakꞌãri mãikꞌaapa wãara tꞌãripa irude ijãadakꞌãri mãikꞌaapa oodakꞌãri irua jara bɨkꞌa. Irua pꞌuuru pidaarã mãgá chupɨria kꞌawaapari, mãgɨɨrã ichi pꞌuuru pidaarã–e mĩda.
Currently Selected:
Jonás Introducción: sjaB
Highlight
Share
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.