Daniel 12

Tachi Akꞌõre ewari waibɨa ewate

1’Maapai pɨchi aukꞌaarã akꞌɨpari, angeleerã poro waibɨa Miguelpa kꞌaripade cheitꞌee. Eperãarã audú chupɨria chitoonadaitꞌee. Na eujãdepemaarã awara–awaraa pꞌaneedakꞌãriipa ma ewate parumaa, eperãarã audupɨara chupɨria chitoonada–e paitꞌee. Maapai Tachi Akꞌõrepa pɨchi aukꞌaarã kꞌaripaitꞌee; chi ɨtꞌaripema chokꞌai pꞌanɨɨrã librode tꞌɨ̃ pꞌã iru pꞌanɨɨrã. 2Piudapꞌedaarã cho–kꞌara jãɨrade yooro pꞌora padai pꞌanɨɨrã chokꞌai pꞌirabaidaitꞌee. Eperãarã kꞌãi pꞌanadapꞌeda, ɨ̃rɨmapatakꞌa, mãga pɨkꞌa mãɨrã ũkꞌuru pꞌirabaidaitꞌee mãikꞌaapa ɨtꞌari pꞌananadaitꞌee. Awaraarã kꞌĩra nejasia pꞌaneedaitꞌee mãikꞌaapa ichita kꞌachiade pꞌanadaitꞌee. 3Kꞌĩsia kꞌawaa beerã, chi eperãarãmaa o pia akꞌɨpidapꞌedaarã, kꞌĩra wãree pꞌaneedaitꞌee ɨtꞌaripema kꞌĩra wãreekꞌa. ¡Ichita pi–ia ɨ̃daapariidaitꞌee lucero ɨ̃daaparikꞌa!

4’Mamĩda Daniel, mɨa pedee jarada pɨa pꞌãmaa bɨ pɨráji mãikꞌaapa sellopa kꞌara bɨ́ji, mɨa jaradakꞌa parumaa. Maapai eperãarã chokꞌara awara–awaraa eujãdee wãdaitꞌee ne–inaa kꞌĩra tꞌãdoo, mɨa pɨmaa jarada paara, waapɨara kꞌawaa kꞌiniapa.

5Mãpai mɨ, Danielpa awaraa eperãkꞌa bee omé unuji; aba to ide bainɨ̃ baji, chi apema to kꞌĩraikꞌa eere bainɨ̃ baji. 6Mãga nɨde ma ángel pꞌaru linodee jɨ̃ bada ma to ɨ̃rɨ bainɨ̃ baji.

Mãpai ma omeedepema abaapa irumaa iidiji:

—¿Sãapai pꞌasaitꞌeema aji, ma ne–inaa tachi pꞌera pɨkꞌapipari?

7Mãpai mɨa akꞌɨji ma eperãkꞌa pꞌaru linodee jɨ̃ bada to ɨ̃rɨ bainɨ̃ bɨ. Mãgɨpa ichi jua omeeweda ɨtꞌaa ɨakꞌãri, mɨa ũri baji irua nãga juraakꞌãri chi ichita bapari kꞌĩrapite:

—Año õpee apꞌeda esa–aukꞌa wãyaaitꞌee Tachi Akꞌõre eperãarã juatau wẽe pꞌaneerutamaa. Maapai ma jõma jõitꞌeeda aji.

8Mɨa ũriji irua jarada. Mamĩda maarepida kꞌawa–e paji kꞌãata jara kꞌinia baji. Mapa irumaa iidiji:

—Tachi Waibɨa, ¿tꞌẽepai kꞌãata pꞌasaitꞌeema? aji.

9Mãpai irua pꞌanauji:

—Daniel, waa kꞌĩsia nɨ̃bɨnáaji. Tachi Akꞌõrede ijãaparíiji. Mɨa jarada jaraikꞌaraa bɨ, mɨa jaradakꞌa pꞌasai naaweda. 10Eperãarã chokꞌara chupɨria chitooneedaitꞌee ma pedeede jaradakꞌa kꞌachiarã juade baaidakꞌãri. Mamĩda madeepa uchiadakꞌãri, pꞌekꞌau kꞌachia wẽe pꞌaneedaitꞌee mãikꞌaapa ne–inaa kꞌachia oodakꞌaa paitꞌee. Jõdee ne–inaa kꞌachia ooyaa beerãpa ne–inaa kꞌachia oopataadaitꞌee. Mãɨrãdepema apidaapa ma pedee jarada maarepida kꞌawada–e paitꞌee. Mamĩda kꞌĩsia kꞌawaa beerãpa jõmaweda kꞌawaadaitꞌee. 11Waa ne–animalaarã ewari chaa paanaadamerã jaradakꞌãriipa mãikꞌaapa ma ne–inaa audú kꞌachia Tachi Akꞌõre tede bɨdakꞌãriipa ewari#12.11 Ewari akꞌãri, jara kꞌinia–e bɨ veinticuatro horas tachia ewari kꞌawaapatakꞌa. mil doscientos noventa wãyaaitꞌee. 12O–ĩa baitꞌee chi choo bɨ Tachi Akꞌõrede ijãa bɨde ewari#12.12 Ewari akꞌãri, jara kꞌinia–e bɨ veinticuatro horas tachia ewari kꞌawaapatakꞌa. mil trescientos treinta y cinco wãyaaru misa. 13Mamĩda pɨ, Daniel, Tachi Akꞌõrede ijãaparíiji pɨchi piurumaa. Mãpai pɨ ɨ̃iitꞌee. Tachi Akꞌõre ewari waibɨa ewate pakꞌãri, pɨ chokꞌai pꞌirabaiitꞌee mãikꞌaapa ataitꞌee ne–inaa pi–ia Tachi Akꞌõrepa kꞌĩsia iru bɨdepema ichideerã–itꞌee.

Currently Selected:

Daniel 12: sjaB

Highlight

Copy