Génesis 49

Jacobpa ichi jai–idaai naaweda jarada

1Ma tꞌẽepai Jacobpa chi warrarã jõmaweda tꞌɨ̃ pëiji Tachi Akꞌõrepa jarapi bɨkꞌa ãramaa jaraitꞌee. Mãgaji:

—Kꞌaitꞌa chedapáde aji, mɨa jaraitꞌee perã ne–inaa tꞌẽepai pꞌasaitꞌee. 2Mɨ warrarã, kꞌaitꞌa chedapáde aji. Ũridapáde aji, parã akꞌõre Israel pedee bɨ misa.

3’Pɨ Rubén, mɨ warra naapemada aji. Tꞌoji mɨ kꞌapꞌɨa pia, juataura bakꞌãri. Pɨ awaraarã kꞌãyaara waibɨara pakꞌaji. 4Mamĩda ɨ̃rá chi naapemakꞌa bee–eda aji. Kꞌida chaaree pꞌoyaa tꞌɨdɨkꞌadakꞌaakꞌa, mãga pɨkꞌa pɨa kꞌachia pꞌoyaa tꞌɨdɨkꞌa–e paji mɨ wẽra kꞌãipari ome kꞌãikꞌãri.

5’Ichiaba pia nipada–eda aji, Simeón mãikꞌaapa Leví, kꞌĩsia iru pꞌanadapꞌedaa perã awaraarãmaa ne–inaa kꞌachia oodaitꞌee. 6Parã chipꞌepatamãi mɨ baamaa bɨ kꞌĩrau pꞌanadakꞌãri, pãchi kꞌinia eperãarã peedapꞌedaa perã mãikꞌaapa pꞌakꞌa bɨɨrɨ pariatua kꞌõrakꞌoodapꞌedaa perã. 7¡Mãgá kꞌĩraudaipata perã, Tachi Akꞌõrepa parã kꞌachia ooipia bɨ! Parãpa mãgá kꞌĩrau pꞌoyaada–e pꞌanadapꞌedaa perã, parãdeepa uchiadaitꞌeerã awara–awaraa pꞌanadaitꞌee, pꞌuuru chokꞌara–ee.

8’Judá, pɨdeepa uchiadaitꞌeerã pɨ ɨ̃pemaarãdeepa uchiadaitꞌeerã kꞌãyaara waibɨara padaitꞌeeda aji. Ãchi kꞌĩra unuamaa iru pꞌanapataarã pꞌoyaadaitꞌee. Pɨ ɨ̃pemaarãdeepa uchiadaitꞌeerã ãra kꞌĩrapite bedabaidaitꞌee. 9Mɨ warra Judá, pɨdeepa uchiadaitꞌeerã juataura pꞌanadaitꞌee awaraarã kꞌãyaara. León kꞌũtrãaweda baparikꞌa pꞌanadaitꞌee, awaraa ne–animal jita atakꞌãri kꞌoitꞌee. Ẽpꞌepꞌeda, eujãde batꞌatꞌaapari león chonaapa batꞌaparikꞌa. Mãpai kꞌopꞌeda, ãpɨtee wãpari ichi temaa. ¿Kꞌairãpa pɨdeepa uchiadaitꞌeerã ome pꞌoyaadaima? 10Pɨdeepa reyrã cetro juade iru pꞌanapataarã uchiadaitꞌeeda aji. Eperãarã ãra jua ekꞌari pꞌanapataadaitꞌee, jõmaarã reyrã kꞌãyaara waibɨara bɨ cheru misa. Eperãarãpa iru pedeeta ũridaitꞌee mãikꞌaapa iru jua ekꞌari ichita pꞌanapataadaitꞌee. 11Pɨdeepa uchiadaitꞌeerãpa ãchi burro jɨ̃daitꞌee uva kꞌarrade, uva uuda waibɨa iru pꞌanadaitꞌee perã. Madeepa vino waibɨa oodaitꞌee. Aɨde pꞌaru tꞌõkꞌajida, waibɨa iru pꞌanadaitꞌee perã. 12Pɨdeepa uchiadaitꞌeerã tau jã vino kꞌãyaara tau pꞌãimaara pꞌanadaitꞌee mãikꞌaapa ãchi kꞌida pꞌakꞌa juba kꞌãyaara tꞌorroora pꞌanadaitꞌee.’

13’Zabulondeepa uchiadaitꞌeerã pꞌusa ide pꞌanapataadaitꞌeeda aji. Barco choma bee wiibaidaitꞌee ãramãi. Ãra eujã Sidón pꞌuurumaa paitꞌee.

14’Isacardeepa uchiadaitꞌeerã chaaree pꞌanadaitꞌeeda aji, burro chaaree baparikꞌa. Ma burro mãgá chaaree bɨ mĩda, pꞌoyaa pꞌirabaikꞌaa ichi ekꞌarrade ne–inaa chɨkꞌɨa bɨdakꞌãri. 15Eujã pia unudakꞌãri, aɨde ɨ̃i kꞌinia pꞌanadaitꞌee. Mamĩda esclavoorã pꞌanadaitꞌee, burropa ichi ekꞌarra eburukꞌukꞌuaparikꞌa aɨde ne–inaa chɨkꞌɨa bɨdamerã.

16’Dandeepa uchiadaitꞌeerã pꞌanadaitꞌee ichi jua ekꞌari apema Israeldeepa uchiadaitꞌeerã pꞌanapataadaitꞌeekꞌa ãchi chonaarã jua ekꞌari. 17Ãra pꞌanadaitꞌee taama o bide bɨkꞌa. Caballo wãyaa wãde chi bɨɨrɨde kꞌaatꞌaakꞌãri, eperã aɨ ɨ̃rɨ wã tudú padaipari.

18Mãpai Jacobpa mãgaji:

—Aai Akꞌõre Waibɨa, ¡mɨ kꞌaripáji!

19Maapꞌeda chi warrarãmaa waya pedeemaa beeji:

—Gaddeepa uchiadaitꞌeerãpa soldaorã pꞌoyaadaitꞌeeda aji, ãchi eujã jãri chedakꞌãri.

20’Aserdeepa uchiadaitꞌeerãpa chikꞌo pia iru pꞌanadaitꞌeeda aji, reyrãpa iru pꞌanapatakꞌa.

21’Neftalideepa uchiadaitꞌeerã pꞌanadaitꞌee bigi chi wã kꞌiniamaa wãparikꞌa. Mãgee bigi warrarã pi–ia beepari.

22’Josedeepa uchiadaitꞌeerã pꞌanadaitꞌee ne–inaa kꞌarra to ide uudakꞌa. Nejõ chokꞌara chaupari mãikꞌaapa chi jua chokꞌara uchiapata muralla tꞌapꞌarumaa. 23Ãra kꞌĩra unuamaa iru pꞌanapataarã ematrɨma panau chedaitꞌee ãra ome chõode. 24Mamĩda awaraarãmaa pꞌoyaapida–e paitꞌee. Choodaitꞌee, Jacobpa ijãada Akꞌõre Waibɨapa kꞌaripaitꞌee perã; mãgɨ́ ichiaba tꞌɨ̃jarapata Israelitaarã Akꞌɨpari. ¡Irumaa gracias jarátɨ! 25¡Gracias jaráji pɨchi akꞌõre Akꞌõre Waibɨamaa, irua pɨdeepa uchiadaitꞌeerã kꞌaripaitꞌee perã! Iruata ãra ɨtꞌariipa pia akꞌɨ bapariitꞌee. Iruata ãramaa pania eujã ekꞌariipa teeitꞌee. Iruata ãramaa warrarã pia tꞌopiitꞌee; ãra ne–animalaarã paara. 26Mɨ chonaarãpa mɨmaa pedee pia jaradapꞌedaa piara bɨ ee ichita ɨtꞌɨa jẽra bee kꞌãyaara. Ma pedee pia aukꞌa pɨmaa jara bɨ, mɨa pɨ jɨrɨtꞌerada perã.

27’Benjamindeepa uchiadaitꞌeerã lobokꞌa chõoyaa pꞌanadaitꞌeeda aji. Ãstaawa, kꞌewaraa paara lobopa peepari mãikꞌaapa ichia peeda kꞌopari.

28Mãga paji Israelpa chi warrarã docemaa jarada. Ma chaachaa pedee jaraji Tachi Akꞌõrepa jarapidakꞌa.

Jacob jai–idaada

29-30Tꞌẽepai Jacobpa chi warrarãmaa mãgaji:

—Mɨ jai–idaaitꞌeeda aji. Mɨ ɨadapáde aji, Canaande mɨ chonaarã ɨadapꞌedaamãi Macpela mãu te uriade. Ma eujã Mamré kꞌaitꞌa Abrahampa netoji hitita pida Efrón juakꞌaawa, aɨde iru ëreerã ɨadamerã. 31Mama ɨajida Abraham mãikꞌaapa chi wẽra Sara; Isaac mãikꞌaapa chi wẽra Rebeca mãikꞌaapa mama mɨa Lea ɨaji. 32Ma eujã ma mãu te uria paara tachi ëreerãdeda aji, netoda hititaarã juakꞌaawa.

33Mãga jarada tꞌẽepai, Jacob jẽra beeji mãikꞌaapa jai–idaaji.

Currently Selected:

Génesis 49: sjaB

Highlight

Copy