Génesis 50

Jacob ɨadapꞌedaa

1José baji chi akꞌõre jai–idaakꞌãri. Chi akꞌõre kꞌapꞌɨa piuda wëre atapꞌeda, kꞌĩra ɨ̃tꞌaaji mãikꞌaapa jẽedachi. 2Tꞌẽepai jaraji ichi jua ekꞌari pꞌanadapꞌedaa Egiptodepema medicoorãmaa chi akꞌõre Israel kꞌapꞌɨa piuda ome oodamerã Egipto pidaarãpa ɨadai naaweda oopatapꞌedaakꞌa. 3Ãrapa oopatapꞌedaakꞌa kꞌãima cuarenta taarãjida mãga oomaa pꞌanɨ. Kꞌãima setenta wãyaarude Egipto pidaarã chi–ɨajida Israel–itꞌee.

4Maapꞌeda Josepa mãgaji Faraón palaciodepemaarãmaa:

—Parãpa mɨ pia akꞌɨ pꞌanɨ pɨrã, mɨ pari Faraonmaa nãga jaranadapáde aji: 5“Mɨ akꞌõre jai–idaai naaweda, mɨmaa chupɨria iidiji mɨa ichi ɨamerã Canaán eujãde chi chonaarã ɨadapꞌedaamãi. Tachi Akꞌõre Waibɨa kꞌĩrapite mɨa mãga ooitꞌeeda aji. Mapa enenee nɨ̃bɨ pɨa mɨ wãpimerã mɨ akꞌõre ɨade. Mãga oopꞌeda, waya cheitꞌeeda” aji.

6Mãga nepɨrɨnadakꞌãri, Faraonpa mãgaji:

—Wãpáde aji, pɨ akꞌõre ɨade pɨa jaradakꞌa.

7-8Mãgá José ichideerã ome, chi ɨ̃pemaarã ãchideerã ome mãikꞌaapa Faraón palaciodepema poro waibɨarã ũkꞌuru wãjida Canaandee iru akꞌõre ɨade. Ãchi warrarã, ne–animalaarã aupai Gosén eujãde atabëijida. 9Awaraa eperãarã carretade mãikꞌaapa caballode aukꞌa wãjida José ome. Ãra chokꞌara paji.

10Jordán to oriente eere panadakꞌãri trigo ãyaa atapatapꞌedaa chi edeepa Hatad apatapꞌedaamãi, jarajẽejida Jacob–itꞌee. Mama kꞌãima siete wãyaarude José chi–ɨaji.

11Cananeorãpa mãga unudakꞌãri, jarajida:

—Jã Egipto pidaarã tꞌãri pꞌua pꞌanɨda ajida, eperã piuda chi–ɨa pꞌanɨ perã.

Mapa ãra pꞌanadapꞌedaamãi tꞌɨ̃ bɨjida Abel Misrayin; jara kꞌinia bɨ “Egipto pidaarã chi–ɨadapꞌedaamãi”.

12Jacob warrarãpa oojida jõma irua jaradakꞌa oodamerã. 13Iru kꞌapꞌɨa piuda ateejida Canaán eujãdee mãikꞌaapa ɨanajida Macpela mãu te uriade; Abrahampa netodamãi hitita pida Efrón juakꞌaawa, aɨde ichi ëreerã ɨadamerã. Ma eujã mãu te ome Mamré eujã oriente eere bɨ. 14Chi akꞌõre ɨapꞌeda, José chi ɨ̃pemaarã, chi kꞌõpꞌãyoorã nipadapꞌedaarã ome waya Egiptodee chejida.

Josepa chi ɨ̃pemaarãmaa jarada

15Jacob ɨadapꞌedaadeepa Egiptode pachedakꞌãri, José ɨ̃pemaarãpa kꞌĩsia pꞌaneejida: “¿Josepa tachi kꞌĩra unuamaa iru bai–epaa mãikꞌaapa tachi ome kꞌĩra jõ–e bai–epaa, tachia iru kꞌachia oodapꞌedaa perã?” 16Maperã Josemaa nãga jara pëijida: “Pɨ akꞌõre jai–idaai naaweda, nãga jaraji 17pɨmaa jaradamerã: ‘Pɨ ɨ̃pemaarã chupɨria kꞌawaapáde aji, mãikꞌaapa ãrapa pɨmaa kꞌachia ooda perdonaapáde’ aji. Mapa taipa pɨmaa chupɨria iidi kꞌinia pꞌanɨ pɨa ma kꞌachia oodapꞌedaa perdonaamerã, ɨ̃rá tai pɨ akꞌõre Akꞌõre Waibɨa mimiapataarã perã.”

Ma jara chedapꞌedaarãpa pedee pꞌanɨ misa, José jẽedachi.

18Ma tꞌẽepai chi ɨ̃pemaarã ãchi kꞌapꞌɨakꞌɨ pachejida. Bedabaidapꞌeda tau bɨɨrɨ te jãde tꞌõbairutamaa, mãgajida:

—Nama pꞌanɨda ajida. Tai pɨ esclavoorãda ajida.

19Mamĩda Josepa pꞌanauji:

—Waaweenaadapáde aji. Mɨ Tachi Akꞌõre–e parãpa oopatapꞌedaa akꞌɨmerã. 20Parãpa mɨmaa ne–inaa kꞌachia oo kꞌinia pꞌanajidada aji. Mamĩda Tachi Akꞌõrépata ma kꞌachia tꞌerabaiji pia uchiamerã. Irua oo kꞌinia baji tachia idi unu pꞌanɨ. Ma kꞌaurepa eperãarã chokꞌara kꞌaripa kꞌinia baji chokꞌai uchiadamerã. 21Maperã waaweenaadapáde aji. Mɨa atꞌãri parãmaa mãikꞌaapa pãchideerãmaa chikꞌo teeitꞌee.

Mãgá tꞌãri pia pedeeda perã, chi ɨ̃pemaarãpa kꞌawajida irua ãchimaa ne–inaa kꞌachia oo–e paitꞌee.

José jai–idaada

22José chi ëreerã ome Egipto eujãde pꞌaneejida. José ciento diez años baji na pꞌekꞌau eujãde. 23Ichi warra Efraín ãichakꞌeerã warrarã unuji.

Ma awara chi warra Manasés warra Maquir warrarã tꞌodakꞌãri, mãgaji:

—Nãgɨ́ warrarã ichiaba mɨchideerãda aji.

24José chonaa pakꞌãri, chi ɨ̃pemaarãmaa mãgaji:

—Taarã–e nɨde mɨ jai–idaaitꞌeeda aji. Mamĩda Tachi Akꞌõrepa parã kꞌaripaitꞌee mãikꞌaapa na eujãdeepa waya ateeitꞌee Canaán eujãdee; ma eujã irua jaradakꞌa teeitꞌee Abrahammaa, Isaacmaa mãikꞌaapa Jacobmaa.

25Mãpai jaraji ãrapa Tachi Akꞌõre kꞌĩrapite juraadamerã ichi ɨadaitꞌee Canaán eujãde. Mãga juraajida.

Mãpai Josepa mãgaji:

—Wãara Tachi Akꞌõrepa parã kꞌaripa cheitꞌeeda aji. Maapai mɨ bɨɨrɨ ateedapáde aji, parã ome aukꞌa, Canaandee wãdakꞌãri.

26José Egiptode jai–idaaji, ciento diez años iru bakꞌãri. Egiptodepema medicoorãpa oojida ãchia oopatapꞌedaakꞌa chi kꞌapꞌɨa piuda ome. Maapꞌeda ataudde ɨa bɨjida.

Currently Selected:

Génesis 50: sjaB

Highlight

Copy