MATIUS 21

Tong réh ngajung Yésus tovoo' néh tai leboo' Yérusalem

(Mrk. 11:1-11, Luk. 19:28-40, Yoh. 12:12-19)

1La'ah hun Yésus ngan irah pinaa' nah éh kivu éh avéé' danii' tong leboo' Yérusalem, inah éh hun réh avéé' tong leboo' Betpage éh déhéé' tokong Saitun, Yésus nyohoo' duah bakéh néh lakau tenah. 2Ha' néh ngan roh, Jian kawah tai leboo' inah. Hun koh avéé' sinah da', pu'un jah keledai éh tenelun réh ta'an koh, pu'un anak néh ngan néh. Jian koh muka telun néh mihin keledai ngan anak néh tuai. 3Hun pu'un kelunan neteng koh, Kineu' koh alaa' éh, jian koh bara' ngan néh ka', Uban Tuhan juk pakai éh ne'. Hun koh pané kenat ngan réh, boh irah kejeraa' koh alaa' éh, ha' néh.

4Pu'un éh kenat dokoo' pesukup ha' éh benara' jah nabi Tuhan ngan kelunan sahau, ka' ha' néh,

5 # Sak. 9:9 Jian keh bara' ngan irah tong leboo' Yérusalem,

Raja' keh tuai tavin keh,

pu'un éh dawai kenin, ngan pu'un éh tuai bau jah keldai,

Iah menyun bau jah keldai danak, ha' néh.

6Boh rawah bakéh Yésus lakau tenah ngan alaa' keledai nah kivu sohoo' néh. 7Pu'un réh alaa' keledai nah ngan anak néh, ngan mena' pakai réh tong néh dokoo' Yésus menyun tong néh. 8Boh kelunan pinaa' nah pejat pakai réh tong jalan nah, ngan jelua' réh alaa' da'an betan maneu' tong jalan totoo' ke' réh ngajung Yésus. 9Irah éh lakau saa' tenah Yésus nah ngelahap, kenat ke' irah jin murin kepéh, ka' ha' réh, Mejing Anak Daud. Jian Allah mena' pengejian néh tong iah éh tuai lem ngaran Tuhan. Mejing Allah, ha' réh.

10Hun Yésus avéé' tong leboo' Yérusalem kekat kelunan pinaa' sinah betéé' kenin, bé' réh jam uban ineu' réh ngelahap kenat. Ja'au-ja'au ha' réh pané, séé' énéh, ha' réh.

11Irah pinaa' éh kivu éh tai leboo' Yérusalem nah mipa ha' réh, ka' ha' réh, Jah nabi, Yésus ngaran néh, éh jin leboo' Nasaret tong tana' Galilia, ha' réh.

Tong Tuhan Yésus tai Umaa' Allah

(Mrk. 11:15-19, Luk. 19:45-48, Yoh. 2:13-22)

12La'ah la'o réh avéé' tong leboo' Yérusalem tai Yésus tong Umaa' Allah ke' néh pekelap kelunan éh pebelih sinah. La'ah iah muit mija jalan réh keliwah rigit, kenat péh éh muit nyun irah éh pebelih juhit éh barei' juhit punai. 13#Yes. 56:7, Yer. 7:11 Ka' ha' néh ngan réh, Pu'un ha' lem surat Allah éh bara' ka', Ha' Allah bara', Umaa' ké' pu'un nateng réh lamin sebayang, bang ka'ah maneu' éh barei' lamin jalan okoo' kelunan éh nekau ngan ngebuyuk awah, ha' néh.

14La'ah kelunan éh peseu' ngan irah éh paket tavin Yésus tong Umaa' Allah nah ngan Iah peka'o réh. 15La'ah irah pengeja'au imam ngan irah guru éh nebaraa' tong sohoo' lem Surat Musa, merek réh na'at kekat penganeu' néh éh jian nah. Sa'at kenin réh menéng ha' irah anak mejing Yésus ngan ja'au ha' tong Umaa' Allah, uban ka' ha' irah anak nah, Mejing Anak Daud, ha' réh.

16 # Msm. 8:3 Boh irah imam ngan irah guru bara' ngan Yésus, ha' réh, Nenéng ko' ha' réh? Kineu' ke' bé' meta' réh, ha' réh. Ha' Yésus mipa réh, Oo', nenéng ké' ke' éh, bang kineu' keh, bé' keh jam ha' lem surat Allah éh bara' ka' rai, O Allah, Ka'au' éh maneu' irah anak si'ik ngan irah éh météé' péh pu'un mejing ka'au', ha' Yésus ngan réh.

17La'o inah Yésus musit jin Umaa' Allah lakau jin Yérusalem tai leboo' Betania, sinah éh mokoo' merem inah.

Yésus pané menoo' jah inan buaa' ara

(Mrk. 11:12-14,20-24)

18Barei' dau ngivun sagam kepéh, hun Yésus moléé' tai Yérusalem, la'au' éh. 19La'ah Iah na'at inan ara déhéé' jalan totoo' inah. Tai éh juk alaa' buaa' néh, bang bé' pu'un buaa' néh, ujung néh awah pu'un. La'ah Yésus pané menoo' kayeu' inah, ka' ha' néh, bé' pu'un buaa' jin inan ko' kepéh, ha' néh. Kayeu' inah tioo melayeu'.

20Hun irah bakéh néh jam éh kenat, béé kenin réh, boh réh neteng Yésus, ha' réh, Kineu' kayeu' inah tioo melayeu' kenat, ha' réh.

21 # Mat. 17:20, 1 Kor. 13:2 Ha' Yésus ngan réh, Akeu' bara' mu'un ngan keh, hun keh ngelan tong Allah mu'un, boh keh omok maneu' éh barei' éh neu' Ké' tong kayeu' inah, bang bé' makat éh kenat awah, bang omok keh bara' ka' tong tokong iteu', Petéé' ke' pekaléng tong baa' banget; adang néh pu'un kenat mu'un. 22Ineu'-ineu' éh pengenyat keh jin Allah, hun keh ngelan tong Iah mu'un, adang néh mena' éh ngan keh kepéh, ha' néh.

Tong réh neteng tong penyukat Yésus

(Mrk. 11:27-33, Luk. 20:1-8)

23La'ah moléé' Yésus tai tong Umaa' Allah kepéh tovoo' néh nebaraa' kelunan, tuai irah pengeja'au imam ngan irah pengeja'au kelunan Yahudi ke' réh neteng éh, ka', séé' mena' penyukat ngan ko' ke ko' omok maneu' kekat penganeu' ko' inah? Séé' nyohoo' ke' maneu' éh, ha' réh.

24Ha' Yésus mipa réh, Akeu' péh keloo' neteng ka'ah tenah, hun keh mipa ha' ké' da', boh ku' omok mipa ha' keh kepéh, ha' néh. 25Inah éh ha' ké', tong Yohanes Batis rai, séé' nyohoo' éh ngebatis kelunan, kineu', Allah, kineu', kelunan awah, ha' néh.

Boh irah pesakat belah irah ke', ka' ha' réh, Kineu' lu' omok mipa ha' néh kenat. Hun lu' bara', Allah éh nyohoo' éh, adang néh pesala' uleu' ngan bara', Hun néh kenat kineu' keh bé' ngelan tong Yohanes nah, ha' néh pesala' tam dat, ha' réh. 26La'ah hun lu' bara', kelunan éh nyohoo' éh, bé' lu' omok kenat ha' kepéh. Medai lu' tong irah pinaa' nah, uban irah seruh Yohanes nah jah nabi Tuhan, ha' réh. 27Boh réh bara' ngan Yésus, Bé' mé' jam séé' nyohoo' Yohanes ngebatis kelunan, ha' réh.

Ha' Yésus ngan réh kepéh, Hun néh kenat bé' Akeu' omok bara' séé' nyohoo' Akeu' maneu' kekat kereja' ké' iteu', ha' néh.

Ha' tapan tong kelunan éh pu'un duah anak

28La'ah ha' Yésus, Jian keh menéng ha' tapan Ké' iteu' da', ineu' éh seneruh keh tong néh. Inah éh, Jah kelunan pu'un duah anak lakei'. Iah tai tavin anak néh tuken ke' néh nyohoo' éh tai kereja'. Ka' ha' néh, O nak, Jian ke' tai kereja' dau iteu' tong pulah buaa' agun tam, ha' néh. 29Ha' anak néh mipa éh, Leko akeu' tai ne', bé' akeu' tai dat, ha' néh. La'o inah boh éh petesen kenin kepéh, tai éh kereja' tong pulah inah. 30La'ah tamen néh tavin anak néh tadin ke' néh pané kenat kepéh ngan néh, nyohoo' éh kereja'. La'ah anak tadin nah mipa ha' néh, Jian, tai ke' ku' dat, ha' néh. Bang bé' iah tai. 31La'ah ha' Yésus neteng réh, séé' jin rawah anak iteu' éh kivu sohoo' tamen roh, ha' néh. Ha' réh mipa éh,

Anak néh tuken, ha' réh.

La'ah ha' Yésus, Kelunan éh alaa' sukai ngan irah redo éh petuyang, irah inah éh pu'un tai lem nihau Allah saa' tenah jin ka'ah. 32#Luk. 3:12, 7:29-30 Uban Yohanes Batis rai pu'un éh tuai ke' néh bara' jalan éh ngepayoo' kenin Allah ngan ka'ah, bang bé' ka'ah ngelan ha' néh, bang irah éh alaa' sukai ngan irah redo éh petuyang, pu'un réh ngelan ha' néh. Na' péh keh jam irah inah pu'un ngelan, bé' keh piso kenin ngan ngelan tong éh benara' néh, ha' Yésus ngan réh.

Ha' tapan tong kelunan éh mihau pulah buaa' agun

(Mrk. 12:1-12, Luk. 20:9-19)

33 # Yes. 5:1-2 Ha' Yésus ngan réh kepéh, Menéng keh tong jah ha' tapan ké' kepéh. Pu'un jah kelunan maneu' pulah agun. Iah memagin pulah inah ngan maneu' luvang tana' jalan néh meték buaa' inah, ngan maneu' jah lamin bau ke' néh petitau kekat pulah inah. La'o inah iah nyohoo' kelunan éh jah mihau pulah inah kelebéé' néh lakau. 34Tovoo' pulah inah bu'an, iah nyohoo' kelunan sohoo' néh tai tavin irah éh mihau pulah nah dokoo' néh omok alaa' tulat agun nah. 35Bang sa'at kenin irah éh mihau pulah nah, irah maneu' kelunan éh sohoo' lakei' éh pu'un pulah inah. Jelua' réh nipok réh, jelua' réh penatai réh, jelua' kepéh benateu' réh. 36Boh lakei' ja'au inah nyohoo' irah éh jah kepéh tai, pinaa' jin irah éh bu'un nah, bang kenat ke' réh maneu' irah inah kepéh. 37La'o inah kepéh iah nyohoo' anak usah néh tai. Adang réh pu'un ngerera' tong anak ké' iteu' da', kelem néh. 38Bang bé' irah alaa' éh. Hun irah éh mihau pulah nah na'at éh tuai, irah tioo bara', Inah savéé' anak lakei' ja'au, tai tam mematai éh, boh pulah iteu' omok anah uleu' mu'un, ha' réh. 39Kenat péh irah ngamit éh, ngan mematai éh, ngan bet éh jin pulah inah, ha' Yésus.

40Boh Yésus neteng réh, Hun réh maneu' éh kenat, kineu' kenin lakei' ja'au nah tong irah éh mihau pulah nah, ha' néh.

41Ha' réh mipa éh, Adang néh mematai réh da' uban réh sa'at, boh éh tebai kelunan éh jah kepéh mihau pulah inah. Irah éh maréng tenebai néh nah, adang réh keloo' mena' tulat buaa' ngan néh sioo' néh pu'un buaa', ha' réh.

42 # Msm. 118:22-23 Ha' Yésus ngan réh kepéh, Kineu' keh, bé' keh purung ha' lem surat Allah éh bara' ka',

Bateu' éh nebet tukeng lamin uban réh seruh éh bé' jian,

bateu' inah éh matek jian mu'un,

Tuhan éh maneu' éh jian mu'un.

Jian mu'un penganeu' néh kenat.

43Ha' Yésus kepéh, Ka'ah éh kevéléé' Allah dokoo' keh pu'un lem nihau Allah, bang bé' keh omok tai lem nihau néh. Iah juk bet keh awah ngan alaa' kelunan éh jah kepéh lem nihau néh ke' réh ngebuaa' ngan buaa' éh jian. 44La'ah tong bateu' éh jian nah, séé'-séé' éh tekaleu' tong néh, suhat ja'au éh ngan bekat usah néh, bang hun bateu' inah pelohoo' tong iah, adang iah pepa' banya', ha' Yésus ngan réh.

45Irah pengeja'au imam ngan irah Parisi éh menéng ha' tapan éh benara' Yésus nah, kejam réh ha' néh inah ha' néh maneu' irah ke'. 46Inah irah pitah jalan juk ngamit éh, bang medai réh kelunan pinaa' nah, uban irah pinaa' nah seruh Yésus nah nabi Tuhan.

Currently Selected:

MATIUS 21: PNT

Highlight

Copy