MATIUS 19

Ha' tebaraa' tong kelunan éh juk petat

(Mrk. 10:1-12)

1La'o Yésus bara' kekat ha' néh inah ngan réh, lakau éh jin Galilia tai tana' Yudea kepéh, éh dipa baa' Yordan. 2Pinaa' kelunan kivu éh tai sinah ngan pu'un éh peka'o réh.

3La'ah tuai kuraa' kelunan Parisi pané ngan néh ke' réh omok pesala' éh. Ka' ha' réh ngan néh, Tong ukum tebaraa' lu', ineu' sala' éh neu' kelunan éh ke' néh omok petat jin redo néh, ha' réh.

4 # Kej. 1:27, 5:2 Ha' Yésus mipa réh, Bé' keh pu'un purung lem surat Tuhan tong ha' éh bara' ka', bu'un-bu'un sahau Allah suai lakei' ngan suai redo, 5#Kej. 2:24 naneu' inah adang éh lakei' tekep pokoo' tamen tinen néh ke' néh tai pemung ngan redo néh, inah rawah jah awah kenin, kenat ha' Allah nah. Inah maneu' rawah bé' duah usah la'ah. 6Uban néh kenat ineu'-ineu' éh lepah pepemung Allah, mai buhaa' kelunan pepetat éh, ha' néh.

7 # Ula. 24:1-4, Mat. 5:31 Ha' irah Parisi kepéh, Hun néh kenat kineu' Musa nyohoo' mé' maneu' surat bara' mé' juk petat, ha' réh.

8Ha' Yésus kepéh, Pu'un éh kenat sohoo' Musa ngan keh uban keh mahéng kenin. Bang bu'un-bu'un Allah suai kelunan bé' éh nyohoo' éh kenat. 9#Mat. 5:32, 1 Kor. 7:10-11 Inah Akeu' bara' ngan keh, séé'-séé' éh petat jin redo néh, hun redo inah bé' pu'un tavin kelunan éh jah, hun néh petat awah jin néh ngan alaa' redo éh jah, inah iah petuyang, ha' néh.

10Ha' irah bakéh Yésus ngan néh, Hun néh kenat tong lakei' éh pu'un redo, pelapah jian mokoo' tengéé' awah mai kawin, ha' réh.

11Ka' ha' Yésus mipa ha' irah bakéh néh, Bé' éh kekat kelunan omok ngeretep mokoo' kenat, bang irah éh neu' Allah omok mokoo' kenat, inah awah éh omok. 12Uban jelua' kelunan bé' réh kawin, uban jin bu'un lohoo' réh pohoo' réh bé' keloo' kawin. Jelua' kepéh bé' omok kawin uban naneu' kelunan éh jah irah nyalun. Jelua' kepéh bé' réh kawin uban irah maneu' kereja' ké'. Séé'-séé' éh omok nesen, jian iah alaa' ha' tebaraa' iteu', ha' néh.

Tong Yésus mapai ojoo' néh tong irah anak

(Mrk. 10:13-16, Luk. 18:15-17)

13La'ah pu'un kelunan mihin anak réh tavin Yésus ke' néh mapai ojoo' Néh tong réh ngan sebayang réh. Bang irah bakéh Yésus sa'at ha' maneu' réh. 14Boh Yésus pané ngan réh, ka' ha' néh, Kejeraa' kekat irah anak tavin Akeu', mai keh meta' réh, uban kelunan séé'-séé' éh barei' anak inah, inah éh kelunan éh pu'un lem nihau Allah, ha' néh.

15Boh éh mapai ojoo' néh tong réh. La'o inah piso éh jin sinah.

Tong jah pengeja'au éh kaya'

(Mrk. 10:17-31, Luk. 18:18-30)

16La'ah pu'un jah kelunan tavin Yésus, ka' ha' néh ngan néh, O Guru, penganeu' ineu' éh jian ké' maneu' dokoo' ké' omok alaa' urip pelinguh, ha' néh.

17Ha' Yésus mipa éh, Kineu' ke' neteng Akeu' tong éh jian, jah awah éh jian, inah éh Allah. Hun ko' juk alaa' urip pelinguh, jian ke' mihau jah poloo' sohoo' Allah, ha' néh.

18 # Kel. 20:13-16, Ula. 5:17-20 Ha' lakei' inah kepéh, Ineu' sohoo' néh éh tekep ké' mihau, ha' néh.

Ha' Yésus kepéh, Mai ke' mematai kelunan, mai ke' nuyang, mai ke' nekau, mai ke' kenyo, 19#Kel. 20:12, Ima. 19:18, Ula. 5:16 ngerera' tong tinen tamen ko', ngan murung padéé' ko' pekua' ke' murung usah ko' tengéé', ha' néh.

20Ha' lakei' inah kepéh, Kekat sohoo' néh inah pu'un ku' kivu éh rai, ha' néh. Ineu' la'ah éh tekep ké' maneu' kepéh, ha' néh ngan Yésus.

21Ha' Yésus ngan néh, Hun ko' juk alaa' kenin éh jian mu'un, jian ke' tai melih kekat livah ko' ngan mena' kekat rigit ko' ngan kelunan kari, boh ke' pu'un pengekaya' tong seruga. La'o ko' maneu' kekat inah, jian ke' tuai kivu Akeu', ha' néh.

22Mujah kenin néh menéng ha' Yésus pané kenat uban néh kaya' mu'un.

23La'o inah Yésus pané ngan irah bakéh néh, ka' ha' néh, Ma'an mu'un ngan kelunan kaya' tavin Allah ke' néh Pengeja'au néh. 24Lumang jah usah unta masek lem luvang bena jin kelunan kaya' omok tavin Allah ke' néh Pengeja'au néh, ha' néh.

25Hun irah bakéh néh menéng ha' néh kenat, melak réh seruh ngan peteteng réh belah irah ke', ha' réh, Hun néh kenat ida' séé' omok alaa' urip Tuhan, ha' réh.

26Yésus kepuh réh ngan Iah bara', Adang kelunan bé' omok maneu' kenat, bang Allah omok maneu' ineu'-ineu' péh, ha' néh.

27Boh Péterus bara' ngan néh, ha néh, Pu'un mé' pokoo' kekat ineu'-ineu' éh anah mé', ke' mé' kivu Ke', ineu' éh oléé' ngan mé' kepéh da', ha' néh.

28 # Mat. 25:31, Luk. 22:30 Ha' Yésus ngan réh, Akeu' bara' ngan ka'ah, hun Anak Kelunan tuai Pengeja'au sioo' urip maréng, ka'ah bakéh ké' iteu' éh jah poloo' duah usah nah, omok keh pengeja'au kepéh ngan petuneng jah poloo' duah betah pohoo' Israel. 29La'ah siget-siget usah éh pokoo' lamin néh, barang éh padéé' néh lakei' ngan padéé' néh redo, barang éh tinen tamen néh, barang éh anak néh ngan térék néh, uban néh maneu' kereja' Ké' ngan perengah Akeu', adang néh pu'un alaa' éh ngan pelapah pinaa' jin éh lepah pokoo' néh, ngan alaa' urip pelinguh kepéh. 30#Mat. 20:16, Luk. 13:30 Bang pinaa' kelunan éh saa' tana' hun iteu', irah pu'un tai saa' murin kepéh, ngan irah éh saa' murin hun iteu', irah juk tai saa' tana' kepéh ha' néh.

Currently Selected:

MATIUS 19: PNT

Highlight

Copy