MATIUS 18

Tong réh paneu' seruh, séé' mé' omok ja'au

(Mrk. 9:33-37, Luk. 9:46-48)

1 # Luk. 22:24 Tovoo' Yésus pané ngan Péterus, tuai irah bakéh Yésus neteng éh, ha' réh, séé' mé' omok ja'au jin belah kekat mé' tong retek Allah Pengeja'au, ha' réh. 2Boh Yésus tebai jah anak ke' néh petekedéng éh tong jumen réh béé, 3#Mrk. 10:15, Luk. 18:17 ka' ha' néh, Akeu' bara' mu'un ngan keh, hun keh bé' paléu' kenin barei' kenin irah anak, bé' keh omok tai lem nihau Allah. 4Kelunan éh omok ja'au tong retek Allah Pengeja'au, inah éh kelunan éh ngediva' kenin néh éh barei' kenin anak iteu'. 5La'ah séé'-séé' éh alaa' anak kenat lem ngaran Ké', inah iah alaa' Akeu', ha' néh.

Tong ineu'-ineu' éh mihin kelunan petat maneu' penyala'

(Mrk. 9:42-48, Luk. 17:1-2)

6Ha' Yésus kepéh, La'ah tong irah anak si'ik iteu' éh ngelan tong Akeu', hun néh pu'un séé'-séé' éh mihin réh petat, pelapah jian réh marau kelunan inah tai tana' éh jah, jin néh mokoo' ngan murip belah pohoo' néh ngan mihin réh petat kenat. 7Pika kelunan tong tana' iteu' uban pinaa' arong-arong jalan éh omok pepetat réh. Adang néh pu'un kenat, bang pika kelunan éh mihin réh petat kenat, uban ja'au mu'un penusah tong iah.

8 # Mat. 5:30 Hun néh ojoo' ko', barang gem ko', éh mihin ke' petat, jian ke' mugen éh. Pelapah jian ke' murip ngan jebila' ojoo' ngan jebila' gem ko' awah, jin hun ko' tai luten meraka ketem duah ojoo' ngan gem. 9#Mat. 5:29 Kenat péh hun néh maten ko' éh mihin ke' petat, jian ke' nirok mega' éh, pelapah jian ke' murip ngan jebila' maten ko' awah, jin hun ko' tai luten meraka ketem duah maten, ha' Yésus ngan réh.

Ha' tapan tong domba éh tawang

(Luk. 15:3-7)

10Ha' Yésus kepéh, Mai keh muau irah anak si'ik. Akeu' bara' ngan keh, meliket réh éh tong seruga ngelayau réh pu'un tong jumen Tamen ké' tong seruga.

11Uban Anak Kelunan pu'un tuai dokoo' néh pitah kekat irah éh tawang.

12Jian keh seruh, hun néh pu'un kelunan éh pu'un jah ato domba, ngan pu'un jah usah éh tawang, kineu' tepun néh? Adang tepun néh pokoo' domba éh pinaa' nah tong tokong ke' néh tai pitah éh tawang nah. 13Hun néh jam éh kepéh, murung kenin néh tong néh jin kemurung néh tong domba éh pinaa' nah éh bé' tawang. 14Barei' inah péh Tamen keh tong seruga, bé' Iah keloo' jah-jah usah anak si'ik tawang, ha' néh.

Tong padéé' ko' éh maneu' penyala'

15 # Luk. 17:3 La'ah ha' Yésus, Hun padéé' ko' dalem Tuhan maneu' ineu'-ineu' éh bé' teneng, Jian Ké' tai pané ngan néh ke' néh nesen penyala' néh. Bang jian ke' tai tengéé' selem-selem pané ngan néh. Hun iah pu'un kivu ha' ko', inah ké' pu'un mihin éh moléé' kenin kepéh tong Tuhan. 16#Ula. 19:15 Bang hun néh bé' keloo' mihau ha' ko', jian ke' mihin jah-duah usah kepéh ngan ko', dokoo' éh pu'un barei' ha' lem surat Allah éh bara' ka', Hun kelunan bara' tong kesa'at kelunan, tekep éh pu'un duah-teleu' usah kepéh éh bara' tong néh, dokoo' jam éh pu'un kenat mu'un, ha' lem surat Tuhan. 17Bang hun néh bé' keloo' mihau ha' duah-teleu' usah keh inah, boh bara' éh ngan kekat kelunan sidang kepéh. Hun néh bé' keloo' mihau ha' irah sidang, boh keh bet éh awah, ngioo' éh barei' kelunan éh bé' ngelan, barei' irah éh alaa' sukai awah, ha' Yésus ngan réh.

Tong éh bé' tekep lu' maneu' ngan tong éh tekep lu' maneu'

18 # Mat. 16:19, Yoh. 20:23 Ha' Yésus ngan réh, Akeu' bara' ngan keh, tong ineu'-ineu' éh bé' buhaa' keh neu' kelunan tong tana' iteu' éh bé' teneng ngan éh bé' jian, kenat péh éh tong seruga kepéh, bé' kelunan omok maneu' éh. Kenat péh tong ineu'-ineu' éh keh buhaa' kelunan maneu' tong tana' iteu', kenat péh éh tong seruga, omok réh maneu' éh, ha' néh.

19Ha' néh kepéh, La'ah Akeu' bara' ngan keh, hun duah usah tong tana' sebayang menyat ineu'-ineu' ngan pekua' kenin tong néh, adang Tamen ké' tong seruga pu'un maneu' pekua' pengenyat roh inah. 20Uban semah-semah pu'un duah-teleu' usah petipun dalem ngaran ké', sinah ke' Akeu' pu'un, ha' néh.

Ha' tapan tong kelunan sohoo' éh bé' pika padéé' néh

21Boh Péterus tuai tavin Yésus ngan neteng éh, ka' ha' néh, O Tuhan, hun padéé' ké' maneu' éh bé' teneng ngan ngesa'at kenin ké', kuraa' koléé' ku' tekep pika éh awah ngan mega' penyala' néh? Kineu', avéé' tujuu' koléé', ha' Péterus ngan néh.

22 # Luk. 17:3-4 #Kej. 4:24 Ha' Yésus mipa éh, Bé' makat éh tujuu' koléé' awah, bang avéé' tujuu' poloo' koléé' tujuu'. 23Uban tong retek Allah Pengeja'au, inah éh barei' ha' tapan tong jah raja' éh nyohoo' kekat irah éh pu'un utang ngan néh, mematai utang néh. 24Lem néh nyohoo' réh kenat, pu'un réh mihin jah kelunan tavin éh, éh pu'un utang juta-juta rigit. 25Bang kelunan éh pu'un utang nah bé' pu'un ineu'-ineu' palaa' néh omok mematai utang néh inah. Boh pengeja'au néh nyohoo' réh mihin éh tai jalan pebelih ke' réh melih usah néh, ngan redo néh, ngan anak néh, ngan kekat livah néh béé, palaa' néh mematai utang néh. 26Boh kelunan sohoo' inah ngejekuu' lep néh tong jumen pengeja'au néh, ka' ha' néh, Jian ke' kebit kenin ngan ké', ko' pika akeu', akeu' ke' mematai kekat utang ké' inah da', ha' néh. 27Boh pengeja'au inah pika éh ngan bet kekat utang néh ngan ngelepu éh.

28Ha' Yésus kepéh, La'ah hun kelunan sohoo' nah musit, temeu' éh ngan jah kelunan sohoo' éh jah kepéh éh pu'un utang ngan néh, si'ik awah utang néh. Boh éh ngamit bakéh néh nah ke' néh mahat batok néh. Ka' ha' néh, Jian ke' pelapah mematai utang ko', ha' néh. 29La'ah bakéh néh inah ngejekuu' lep tong jumen néh ngan menyat pika ngan néh. Ka' ha' néh, Jian ke' kebit kenin ngan ké', akeu' ke' mematai kekat utang ké' inah da', ha' néh. 30Bang kelunan sohoo' nah, bé' iah pika éh, iah nyohoo' réh bet éh awah lem lamin tutup, avéé' néh mematai utang néh. 31Mujah kenin irah kelunan sohoo' éh jah jam kenin néh bé' pu'un pika kenat. Irah tioo tai tavin pengeja'au réh bara' éh ngan néh. 32Boh pengeja'au nah tebai kelunan sohoo' nah kepéh, ka' ha' néh ngan néh, Kelunan Sohoo' éh Sa'at. Uban ko' menyat akeu' pika ke', pu'un ku' pika ke' ngan bet kekat utang ko' awah. 33Kineu' ke' bé' jam pika bakéh ko' barei' akeu' pu'un pika ke' nah, ha' néh. 34Merek mu'un pengeja'au néh ngan néh. Pu'un éh nyohoo' réh mena' éh tong lamin tutup avéé' néh mematai kekat utang néh, ha' Yésus ngan réh.

35La'ah ha' néh kepéh, Kenat péh penganeu' Tamen ké' tong seruga tong siget-siget usah keh hun keh bé' jam pika padéé' keh jin kenin keh mu'un, ha' néh.

Currently Selected:

MATIUS 18: PNT

Highlight

Copy