ÉPESUS 2
2
Tong jalan alaa' urip maréng
1 #
Kol. 2:13
La'ah hun sahau ka'ah pu'un matai neu' kekat kesa'at ngan penyala' keh. 2Tovoo' inah pu'un keh kivu jalan éh kemalai kelunan éh bé' jam Tuhan. Pu'un keh kivu sohoo' pengeja'au kekat balei', pengeja'au balei' nah pu'un éh ngamit kelunan éh bé' kivu sohoo' Tuhan pah avéé' hun iteu'. 3La'ah hun sahau uleu' béé péh pu'un barei' inah, pohoo' lu' sa'at awah, pu'un lu' maneu' ineu'-ineu' éh pengeloo' usah ngan kenin lu', uleu' péh teneng kenukum Allah pekua' kelunan inah.
4Bang pu'un Allah pika lu' mu'un, ja'au mu'un penika Néh, bé' éh omok benara' lu', 5uban tovoo' uleu' matai neu' kesa'at lu', Iah pepurip lu' pemung ngan Kristus, uban neu' penika Néh awah ka'ah pu'un piso jin ukum penyala'. 6Neu' pengelan lu' tong Kristus Yésus, Iah lepah pebetéé' uleu' pemung ngan Néh dokoo' lu' omok pengeja'au pemung ngan Néh tong seruga. 7Pu'un Iah maneu' kenat dokoo' penika Néh ngan lu' dalem Kristus, éh ja'au mu'un, éh bé' omok benara' lu', pu'un poléng pelinguh. 8Uban naneu' penika Allah awah ka'ah pu'un pelepu jin ukum penyala', neu' pengelan keh tong Iah. Bé' éh neu' ineu'-ineu' penganeu' keh, bang neu' pengena' Allah ngan keh awah. 9Bé' keh omok ngajung usah keh, uban bé' keh pu'un pelepu jin ukum penyala' neu' ineu'-ineu' éh penganeu' keh. 10Uban uleu' éh senuai Allah, ngan murip petem lem Kristus Yésus, Iah suai lu' kelu' omok murip ngan maneu' kuraa'-kuraa' kereja' éh jian, éh lepah petenup Néh ngan lu'.
Uleu' pu'un jah awah lem Kristus
11La'ah ka'ah éh tengéé' pohoo' jin pohoo' Yahudi, éh keleko irah uban keh bé' kivu adet sunat, uban irah Yahudi seruh irah pu'un jian uban réh kivu adet inah. Bang pesunat inah éh bara' tong penganeu' réh tong usah réh awah. Jian keh seruh tong urip keh sahau. 12Sahau bé' keh jam Kristus. Ka'ah barei' kelunan éh tejeu', bé' keh jam ineu'-ineu' tong adet sebayang Yahudi, bé' keh pu'un pemung ngan pohoo' kelunan éh kevéléé' Allah. Bé' keh pu'un lem jajii' Allah ngan irah éh anah nah. Pu'un keh murip tong tana' iteu', bé' keh pu'un pengelan ngan bé' keh jam Allah. Kenat keh sahau rai. 13Bang hun iteu' kepéh neu' urip keh petem lem Kristus Yésus, ka'ah éh bé' jam Allah sahau rai, hun iteu' neu' dahaa' Kristus ka'ah jam éh, ngan pu'un Iah mihin keh tavin Allah. 14Uban Kristus pu'un mihin tunuk neu' Néh mihin kelunan Yahudi ngan kelunan éh tengéé' pohoo' jah awah, bé' kéh duah arong la'ah. Neu' usah Néh tengéé' Iah nasa' apat éh mihin keh petengéé' kenin ngan bé' omok pepadéé'. 15#Kol. 2:14 Neu' pematai Néh, nebet Néh kekat adet lem Surat Musa pemung ngan kekat sohoo' ngan penganeu' Néh, uban neu' adet inah, kelunan Yahudi ngan kelunan éh tengéé' pohoo' pu'un tengéé' kenin. La'ah pu'un éh maneu' kelunan Yahudi ngan kelunan éh tengéé' pohoo', jah arong éh maréng dalem usah Néh. Neu' Néh maneu' kenat inah Iah mihin keh tunuk. 16#Kol. 1:20 Neu' pengematai Néh tong salib, Kristus pu'un kebéé kekat kenin kelunan éh pekeleko, éh maneu' réh bé' omok pepadéé', naneu' salib Néh, Iah mihin duah arong inah jah kenin awah ngan mihin éh moléé' tavin Allah kepéh. 17#Yes. 57:19 La'ah kenat péh Kristus tuai ke' Néh bara' Rengah Jian tong jalan kelunan omok tunuk ngan Allah, kenat péh ka'ah éh tengéé' pohoo' éh juu' jin Allah sahau rai, kenat péh kelunan Yahudi éh pu'un lepah danii' tong Iah. 18Uban neu' Kristus kekat uleu' béé, kelunan Yahudi ngan kelunan éh tengéé' pohoo' péh, omok tavin Tamen lu' neu' Sahéé' éh jah awah.
19Ka'ah éh tengéé' pohoo' jin améé' bé' keh barei' kelunan éh tejeu' éh bé' jam Allah, bang ka'ah péh paléu pekua' pohoo' kelunan éh pu'un lem nihau Néh, pu'un keh pepadéé' ngan Allah éh Tamen lu' béé. 20Ka'ah péh petok réh bau balun éh neu' irah lawah ngan neu' irah nabi, la'ah bateu' éh lihei' néh, inah éh Kristus Yésus mu'un. 21La'ah neu' Kristus, kekat éh lem lamin inah pu'un éh pepetok dalem Tuhan ke' néh omok sukup ngan omok pesuai mu'un ke' néh omok umaa' Allah éh ni'ai. 22La'ah pemung ngan Néh ka'ah péh pu'un petok pemung ngan kekat irah éh jah ke' néh omok jah lamin éh jalan pengokoo' Sahéé' Néh.
Currently Selected:
ÉPESUS 2: PNT
Highlight
Share
Copy
Want to have your highlights saved across all your devices? Sign up or sign in
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia
