Luukeꞌ 1

Jiisuu' Naning-naumpo' Taa'ni'poi A' Kansi'koo Pou'na'

(1:1–4:13)

1Aung ee, pankaing, Teopilasi'; 2Mmau' nantoonge teing kapoo'nanka nii'ankoi nkoaru'ning daariau'nung taaravaara teinge tutuntoma-ita dutai ooau'ning-eta teing kara sira'nuka deempariko tee-koong minkunaa pare'aama naumaarimaing-eta; 3Daariaako ooamirai'nange ninge tee' nari' napo' da' Teopilasi'anko daarireroma'naang piamoing, io' tutung kapoo'nanka okora'keta, tampa' pukeansi kenkumpamira˜; 4Ee'pina' piamoma, dake tee kara tero nau-antarau'ning toomosiario' tampa' noru'era masikung-pina' tasi'pee'naang. Aung tee kara.

Jooni Minkinara Ponto'aravaing Uro'ke Sira'paru'na'

5Tenang teie dauraronge˜ Eeroti'ke Judia'navaro tarevuko'nang narung piristi' otoko' miring Sakaraia', piristi'nanka-koo Abaisia' bakanavitu-koong. Teie ba'aang Eeroni ba'dompenkuri-koonani, miring Elisabeta'. 6Ee'noko tering ookaring koonto'daring Kumponing-koo dutakanoo'ke, ookara boto siompureko'naring Ovoring bakaang, tuumpi otorea'. 7Teka tooto' otorea'naring teni Elisabeta' bisiira deemparako, ee'noko tering ookaring aa'na' pankaring.

8Nii'na'mung biikaang batei dootuu' tare-koong makotuio' Sakaraia' bakanavitu ninka teke dootuu'nava pankava-koo piristi'nanka biikaang nko-nko nkoaako'nung. 9Ee'noko tee' piristi'nanka miru'aariko'na'koong aarumo siompai, teinge Sakaraia' miru'au'nung pava dootuu'nava pankava-koo meekavaro-koo kuung tumparara boontunamparaa'naang ii tampa' nuuraa' bereng-antavui. 10Ee'noko tenang tee kapoo' tampa' nuuraa' paro'koong batei makotuio' teie kuunge paro'uko nantoong karika' teing dama'du-navaro-koo kunsiariko'. 11Ee'noko teie tee' nkovuko Ovoring bakaning-koo narung koosinung˜ tee-ankoi oro'paru' batanang boonturoma-koo tampavine-aapei donkonui. 12Ee'noko Sakaraia'ke oovura tee domang puraanura avorou'.

13Teka teie koosinunge aa'puu' tee, “Aroreauka' Sakaraia'. Kumponinge dakaang kunsi tee taaravuu'nung. Da'aange Elisabeta'ke tee dauring parareruu'naang, ee'noko dake tee miring Jooni#1:13 Iiburu-nupoong biikaang kara-koo miring “Iokanan” tee “Kumponing piaaeevooni',” miru'ari otong. Kiriki'nupoonge Ioanen tampaako'. tampeaing. 14Ee'noko da' tee doturarama do'dero'de'daravaing tee-koo, ee'noko nantoong mmau' dotuariainge ponto'arako. 15Ai' tee tee naning pankaing deemparavaing Ovoring-koo dutakanoo'ke. Uaini dovang teing nainai purinto' poteario' naivuauka'nunge. Tanuaang Meekung narunge maanto'ui otoaing ke'de-koo otoko-ita. 16Mmau' Isireeli-nupoong teie tee Ovoring-koo napo' bere'antavuriaing tee-koo biikaang Kumponing-koo. 17Ee'noko tee tee Ovoring-koo uro'kanoo'ke nantoong doorevurima nanuaing Eliasi-pina' bakaang aarumo ee'noko iri' nari' kompui. Biumaraang domang biurukaa'aape bere'antavurii'naang ee'noko teing taarapiikanuka koonto'nuka biikaang matau-koo. Tee' nari' nerivuri maamu-antavuriaing nantoong Ovoring poaing-koo.”

18Ee'noko Sakaraia'ke koosinung nia'uma aa'puu', “Ninge arekee' tasi'pampeu' tee masikung deeko'? Ai' ning tee pankara ee'noko nnaang teni pankaa'ke.”

19Ee'noko koosinunge maku'uma aa'puu', “Ning tee Kepareli' Kumponing-koo uro'kanoo'ke donkonansi o'nomaung. Teie ee'narai ning da'anko botomuing da' kara-koo tee aung doorenang tampara nauramaang. 20Aung ee, ninge nauransina' masika' nkoaravaing batei makotuainang, teka da'aange dauring parareruu'naang masika'antavearuing-koo Kumponinge da' enang-eta ka'duu-antaruio' karearoo'naang bera aing nauransining tavo'aravainoo'ke basi.”

21Ee'noko nantoonge nempai otoko'nung Sakaraia', paapaa'arima ana'ario' dootuu'nava pankava-koo kuunge. 22Ee'noko tenang amakoari siarara teie teing kara-koo makotuaruu'nung, teka bireng narunge tee' nari' karavuriko teinge tasi'paara aa'pau', “Kapoo'ke apaikovuio' kara karoarui.” 23Ee'noko tenang bakaang nko-nko nkonang opario' bakanoo' osi duparu'.

24Tee-koo dama'due ba'aang Elisabeta' tooto' nkoaru'nung, ee'noko kaara pa'noko'naveraa'ka-koo pava-koo kuung naro'ke otoko' teni, ee' noru'uma: 25Aung tee Ovoringe ning-koo nko-antavuing; piaamukotaa' ning tee' nkomuing maia' tonta'memuu'naang.

Koosinung˜ Kepareli'ke Jiisuu' Ponto'aravaing Sira'puu'na'

26Ee'noko tenang Elisabeta' ˜nau-taa kaara deemparako kempo'kuu'noo'keta tee koosinung Kepareli' napo' Kumponinge osi nii'namono-koo botovuu' Kaaleli'navaro-koonoo' miring Nasareti'namono. 27Nani manikuma nerai'na' kuukuma˜anko botovuu'nung miring Meeri'anko. Aninoo' teni miru'nii' naning-koo miring Josepa', Daurarong˜ Deevita' ba'dompenkuri-koong-koo. 28Ee'noko tee koosinung teni-anko bera aa'puu'nung, “Ani ee, da' bakei Kumponinge domange tampa' noru'dui otomai. Ovoring tee da' ninka otong. Maniku'koo meu'ka biraankenani da'.”

29Tee' minkuvuio' teni noru' paapaa'arara avitoitoi noru'aru'nung aa'puma, “Aung kara aremurii' tee' minku?” 30Ee'noko koosinunge aa'puu' teni, “Ee Meeri', aroreauka'nung, ai' da' teni domange tampa' noru' Kumponinge. 31Da'koo tooto' poontoaraa'naang˜ ke'de-koo, ee'noko tee dauring donkaani paravee'naang, ee'noko dake tee miring Jiisuu'#1:31 Iiburu-nupoong biikaang kara-koo tee miring “Iesua” tee “Kumponing niikaang Domang-anta” miru'ari otong. tampeaing. 32Tee tee ee'nung pankaing deempari otoaing ee'noko tee tee Ovoring Deto Basi Bauring tampaavaing. Ee'noko Ovoring Kumponinge tee Daurarong deeng-antavuaing bakaaka Deevita' paari-antavui. 33Ee'noko teie Jeekopi' bakanariong, teing Isireeli-nupoong tanatavuriaing ookutunung batei-koo, ee'noko bakaang muu' tee bakearavauka'nung.”

34Ee'noko Meeri'ke koosinung tana'uma aa'puu', “Tee aung kapoo' arekee' nkoaravaing tee' ning kuukuma o'noko?” 35Ee'noko teie koosinunge teni maku'uma aa'puu', “Tee Tanuaang Meekung da'koo poko ee'noko tee purinto' Ovoring Deto Basi bakaange daka'duaing da'. Tee'koo tee ee'nung tooto' ponto'aravaing meekung tampaavaing, tee Kumponing Bauring. 36Ani ee, da'maasie Elisabeta'ke pankaa'ke tooto' poontoari˜ otong. Emu' tee kaara ˜nau-taa deemparamang teni-koo bisiira tampaako'nani-koo; 37Ai' Kumponinge tee kapoo' nkovuarupeu'nung otoa'.”

38Ee'noko Meeri'ke maku'uma aa'puu', “Aung ee, ning masika' Ovoring bakanani botovotonaa'. Makosi, tee' minkueina' nkoaravaing ning-koo.” Ee'noko tenang tenkenuu' tee koosinung teni-ankoita.

Meeri'ke Elisabeta' Beero'uu'na'

39Teketa' pankaroompuaruko Meeri' daa'arara nanuu'nung iri'narung iu'po'navora'ke deto bera Sakaraia' bakanoo' osi Judia'navaro-koonavuntu'koo. 40Ee'noko Sakaraia' bakanava'ke tumparara Elisabeta'koo tampara tampuu'. 41Ee'noko tenang Elisabeta'ke tee tampa' tang Meeri'keta taaravuko tooto' ke'de-koo kuunge to'dinuu'; 42Ee'noko Elisabeta' Tanuaang Meekunge maanto'ura duuru'kuma aa'na' karoma aa'puu', “Biraankerarinani da' ee'nani maniku'koo dau basina', ee'noko napo' tee tooto' dakaang ke'de-koo biraankearinge. 43Oi baka'e, ning piaaru' arekee' noru'mei beero'mei nkaang Ovoring baukoi? 44Ani ee, tenang dake ning-koo tampa' tampeko tee tooto' ning-koo ke'de-koo dotue to'ding-antavuing. 45Da' teni biraankenani Kumponing bakaang kara dupearaa'naang masika'antaveinani!”

46Ee'noko Meeri'ke maku'uma aa'puu', 47“Nkaang domange Ovoring pankaing-antavansi otong, ee'noko nkaang tanuaang doturotuaramaung Kumponing-koo tee ning domaang moo'muu'nung-koo, ai' teie tee ning norunoru'muing ning boonko tamung botovotonaa' deemari o'nomai; 48Bakei, emu'keta deto tee ning teni ookarai avatevarange doturotue biraankenani tammaamaa'noainani teie Kumponing Purinto'po'nunge kapoo' pankaing ning-koo nkovuing-koo; 49Ee'noko miring bakaang meekunge. 50Teie tee piaavurimaung teing bakaang kara dimpa'koo avoreaamaing. 51Bakaang iirakuta bakaang birenge nkovuu'ning-koo sira'pario' oro'antavumaung, ee'noko purarenka'antavurikoo' teing baka daanganuka ee'noko onou-koo pankainanka-pina' ooarimaing. 52Teie tee dauraronanka iirakutananka kosi'urikoo' biikaning ba'nava'nani' dovang-eta, ee'noko teing boong-koo noru'arimaing pankaing-antavurikoo'. 53Teing peera-nupoong poo-antavurikoo' kapoo'ke tampenge ee'noko kapoo' mmau'po'nupoong tang torovurikoo' kapoo' avuria'. 54-55Teie tee nii' bakaning bautaranuka pakuvurikoo', nii' Isireeli-nupoong, tee piaa-etanung unaa-anta noru'ui niikakatauro-koo maraka-antavuu'nung, aa'ning-koo Eebaraami' ee'noko baurukaa' avatevarang-koo doompeto tee' nari'.”

56Ee'noko Meeri' Elisabeta' ninka nari' otoretu'nung teke. Beekuri kaara-pina' otoreta toroaru' bakanoo' osi-aape.

Jooni Minkinara Ponto'aru'na'

57Emu' tee batei makotuu'nung Elisabeta'ke tooto' para-koong ee'noko tooto' tenie donkaani paravuu'. 58Ee'noko teni ninka nari' otoroko'ninge napo' ba'marange taaravau'nung Ovoringe piaa pankaing teni-koo oro'antavuu'na' ee'noko teing dotuariru'nung teni ninka. 59Ee'noko teketa ˜beenang-taa doong tankinuko porou'nung tee tooto' dopa' napu'aava'naang; 60Teka bauma Sakaraia' namirimpaava'naang tampaako baukoi aa'puu'nung, “A, tee' deea', tee Jooni tang-koong.” 61Ee'noko teinge aa'pau' teni, “Naning da'maiko' tee' boku otoa'.” 62Ee'noko teinge bauma birenge tamung nia'au'nung arekee' tampuaina' tee bauring. 63Ee'noko teie bentang daari-koonavento' eentavuru'nung ee'noko ee' daarivuu', “Bakaang miring tee Jooni.” Ee'noko ookara ta'ninau'. 64Ee'noko tenau'ka Kumponinge kara-koo taura'puio' karou' Kumponing biraankevuma. 65Ee'noko ookara bee'marang asikovorou' tee-koo ee'noko tee aung kapoo' minkuaama nanau'nung avitoitoi iu'nairu-kooning-koo teka Judia'navaro-koo. 66Ee'noko Kumponinge tee' oro'ning taa'ni'antananka Jooni ponto'aru'noo'ke nkovuio' ookarai tee aung taaravau'ninge norunoru'aama aa'paako'nung, “Aung tooto' aremurii' deemparavaing?”

Sakaraia'ke Nakaronara-pina' Kara Sira'puu'na'

67Aung kara tee Sakaraia'ke Kumponing daangampui minkuvuu'nung Jiisuu' ponto'aravaing minkuvuma. Teie Tanuaang Meekunge maanto'ura karantavuko˜ aa'puu', 68“Biraankeampiaing tee Ovoring Kumponing nii' Isireeli-nupoong niikaang, ai' teie nii' beero'murira enang narung daurarong deto i'ampuu'naang domamuriaing nii'; 69Ee'noko teie nii' bakaning nantoong boorimurira napo' moo'murii'naang dai'mariri o'norimanoo'keta. Tee ee'nara Kumponing bakaang muu' tarenung, Deevita', ba'dompenkuri-koong pakumuriaing; 70Tee' Kumponinge uripo'keta minkuvuko'na' bakaning nakaronuka˜ meekupoong karantavurima˜.#1:70 Ooveai 2 Samuela' 7:8-16. 71Kumponinge tee' naumuru'nung ee'narai dauraronge te'nemurii'naang niikaning kare-nupoong-eta', teing munte'maarimaing biikaang bireng-eta. 72Ee'noko napo' bakaang piaa-eta unaa-antamurii'naang maraka-antavuu'na', tee kara meekung niikakatauro ninka naroong-antavuu'nung noru'ui. 73-75Tee aa'nou'naare: niikaaka Eebaraami'koo tumpearama˜ maraka-antavuu' taaru'murii'naang niikaning kare-nupoong biikaang bireng-eta, ee'noko puring-antamurii'naang amorompia' tampa' siompampimatoaina', meeka'mariri, koonto'nuka o'nori tee-ankoi, ookara doong domamariri o'norianing-koo. 76Ee'noko da' tooto' tee Ovoring Deto Basi Bakaang Nakaronara tantaavaing, ai' da' tee urei nanima Ovoring-koo maamu-antaveaing bakaang taung. 77Teing bakaning nantoong teie domampuriaing-koong kara nau-eriaing biikaang oraka'nko pankaruntoonge piaavuri tonta'antavuriaing nauerima; 78-79Aa'noaing: Siroong-eta siimpooromurira˜ araka-antamurii'naang nii' mutaanang-koo o'norimaing boo'aapenameng-koong uu'aa'koo, niikaang pe'naa' koong-antamurima tevung mooa-aapenavung-koo.” Tee'puu' Sakaraia'ke.

80Ee'noko dama'ke tee tooto' panka'parara tanuaang purimparu', ee'noko tee mee'bora' sirakamaa'koo otoko' bera tee batei makotuu' Isireeli-nupoong-koo karika'koo dutakanoo' tavo'kuu'nung.

Currently Selected:

Luukeꞌ 1: nasNTpo

Highlight

Copy