Luukeꞌ 2

Jiisuu' Ponto'aru'na'

(Mat 1:18-25)

1Tenang Jooni ponto'aru'noo'keta nii'ning batei tankinura otoko tee daurarong˜, Siisa', miring Akastasie botonang sipuu'nung ookutuning nantoong tarevuriko'ning-koo biikaang miring daariarii'naang bakaang buuku-koo. 2Aung tee tutuna'namu' miring daari nkoaru'nung tenang Sairiniasi' Siiria-nameensi'koo ovoring deempari otoko'nang. 3Ee'noko ookara tee biikanairu porou'nairu siompai nanau'nung miring daariarii'naang. 4Ee'noko Josepa' tee'ke, Kaaleli'koonoo'keta, Nasareti'keta, deto Judia'navaro-koonoo'aape nanuu'nunge Beeteleema', te' Deevita' bakanavuntu' deemparako, ai' tee tee Deevita' baurukaa' bakanamuiaang-koong. 5Tee teni ninka Meeri' ninka ba'aang ninka nari' nanuretu'nung miring daariaree'naang. Teni tee tooto'po'nani. 6Ee'noko teke otoreko tooto' ponto'koong bateinang makotuu'nung. 7Ee'noko tenie tooto' tutuna'nung paravuu' donkaani, ee'noko baaronge korovui dai'ura kau' karenaumonanka biikanava-koo otoroi karaasi' maa'aako'navaro-koo bempuu', po'nupo'nuka biikanava'koo doona otoaruio'.

Sipisipi' Tanatanukai Jiisuu' Beero'au'na'

8Ee'noko teke Beeteleema'keta due'ke nii'ning sipisipi' tanatanuka otoroko' muunga biikaning sipisipi' binaa'koo tanatavaarima. 9Ee'noko narung koosinung Ovoring bakaang teing-ankoi tavo'aru', ee'noko Ovoring bakaang meenasi teing korovuri arakavaru' ee'noko tenang avoro' pankainge maanto'uru'. 10Ee'noko koosinunge aa'puru', “Aroreriauka', ninge doorenang tampara po'antarerompimang doturotu-koong dii' ookara nantoong-koo basiaravaing. 11Aa'noing e'mung dii'ankoi teke Deevita' bakanavuntu'koo narung Domang-anta ponto'aring, tee Ovoring Pako'pari'nii', Kumponinge teroita maraka-antarurio' nemperimaung. 12Taa'ni'anta ee' ooverira masikung tasi'periaing: Narung nerakau' baaronge koroari dai'nii' nako'bo-koo bempari otoko ooverii'naang.”

13Ee'noko namu'ke ta'nina', tee ninka koosinung ninka paning-nupoong-koonavitu karika' nari' tapo'eu' Kumponing daangampaama ee' minkuaama, 14“Kumponing paning-koo siroong otomaung daangampampimaang, ai' mooa tee kansi'koo poing nantoong tampa' nkovuriko aroo'arimaing-koo.”

15Tenang koosinunanka paning-aape toroaririo' sipisipi' tanatanukai aa'pau' bii'ka kareaama, “Aia', Beeteleema' du'marira, ooampiai tee kapoo' nkoaring Ovoringe nau-antamuring nii'.” 16Ee'noko teing iri'narung berora ooaaru' teing, aa'noko Meeri', Josepa' ee'noko tee tooto' nako'bo-koo bempari otoko. 17Ee'noko tenang teinge ooaara tee sira'pau' tee minkunaa tooto' minkuari otoing koosinunge nauvuru'nung. 18Ee'noko ookara taaravau'ninge tee minkunaa avutevu'ai noru'au' sipisipi' tanatanukai teing nauaario'. 19Teka Meeri'ke teing aing kapoo'nanka kinkompura bakaang domang-koo norunoru'uko'. 20Ee'noko teing sipisipi' tanatanuka toroariru' biikanairu-koo Kumponing daangampaama, bakaang meenasi sira'pai kapoo'nanka teinge taaravaama ooau'ning-koo tee' ee'na' teie koosinunge nauvuru'na' teing.

Simioni' Naankai Aana' Jiisuu' Onkeonke'uretu'na'

21Ee'noko Jiisuu' ponto'aru'na'mung-eta ˜beenang-taa doong deemparako tenang dopa' napu'au'nang tee, miring Jiisuu' tampau', tee ee'nara koosinunge tampuu'nung tee miring tenang mme' poontoaravaruko˜ ke'de-koo. 22Ee'noko Meeri'ke tooto' paravuu'noo'keta meekava-koo be'koo untu'anta-koong batei makotuio', tee' Moosesi bakaang botoi tampui otoina', teringe Jiisuu' tavo'uretu' Jerusalema'aape Ovoring oko-antavuree'naang teie botoi napo' minkuvui otoina' aa'puma,

23“Ookara toire' donkaang tutung ponto'ariaining Ovoring bakaning meekupoong tang-koong.” (Toro 13:2,12)

24Ee'noko untu'anta-koo boontunamparii'naang berou' botoi Ovoring bakaange tampui otoina' aa'puma,

“Urareng-koo˜ manta'nisining ninka boonturariaing nii'noo' nii'namurii' kuukuu'koo koo'nening keura.” (Boontu 12:8)

25Tenang teke Jerusalema' naning narung otoko'nung bakaang miring tee Simioni'. Aung tee naning koonto' Kumponing-koo mee'du'piari otoko'nung. Nempui besi'uko'nung Isireeli-koong Dun-sirunsinara˜ tavo'aravaing, ee'noko Tanuaang Meekung tee tee-koo otoko'nung. 26Ee'noko Tanuaang Meekunge tee tee-koo sira'puu' tee booauka'nung teie mme' oovua' tee Domang-anta Ovoringe tero Pako'pari'uu'nung˜. 27Ee'noko Tanuaang Meekunge nau-antavuio' dootuu'nava pankava-koo kuung tumparu'; 28Ee'noko tenang tee tooto' Jiisuu' baumararinge kuung po'antavuretu'nang botoi minkuvumana' aarumo nkovuree'naang, teie pora birenge nkavura biraankevuma Kumponing-koo aa'puu', 29-31“Ovoring ee, emu' tee ning dakaang botovotonaa' mooa ninka bakemari moompaing makosi, tee' temu' marakarari naumeu'na', ai' ninge tee emu' ooansing nkaang dutai Tee Domamuriaing dake maamu-antaveu'nung nantoong-koo dutakanoo'ka. 32Teie Arakai teing Isireeli-eta taapo'nupoong kapoo' masikung bii'ka noru'aavaruko'nung sirapo'evuriaing ee'noko Isireeli-nupoong meenasi kong-antavuriai.” 33Ee'noko Jiisuu' baumararing ta'ninuretu' teing-koo kapoo'nanka Jiisuu'koo minkuvuu'ning-koo.

34Ee'noko Simioni'ke tekang biraankevurira Meeri' nauvuma aa'puu' teni Jiisuu' bauko, “Ani ee, aung tooto' tee miru'ari otoing mmau' nantoong Isireeli-nupoong-kooning aa'noaing nii'ning dua'antavuriai ee'noko napo' nii'ning daa'antavuriai; 35Ee'noko napo' tee tee taa'ni'anta deempari otoo'naang miru'ari otong nantoonge tompimpaavaing, ee'noko tee' tompimpaako nantoong mmau' biikaang domang-eta onounanka sira'paravai. Ee'noko da' bainatu-pina' orarunsie domang too'duainanie.”

36Ee'noko napo' nii'nani manikuma nakaronani teke otoko' miring Aana', Panuele baurang, Aasia bakanamuiaang-koonani. Teni ba'ung ninka mare' ˜kemare'ka-taa otoretu'nani nampeesiaru'noo'keta, ee'noko emu' beenaumo kivora-ita karemareu ookara mare' bakaning; 37Ee'noko ani teni pava dootuu'nava pankava-ita tokoo bearuko'nani; teke otoi unkumoarama kunsiarama dootuu'arako'nani muunga ee'noko doonga. 38Tenang tee-koo batei-koo pora Kumponing tampara tampuu'nung ee'noko tee tooto'koo nantoong minkuvuru' teing Tee Poaing nempai besi'aako'ning Jerusalema'nupoong dai'ariri otoromanoo'keta napo' moo'uriaing Ovoringe maraka-antavuru'nung.

39Ee'noko tenang ookara kapoo'nanka nkovureta botoi Ovoring bakaange minkuvui otoina' tekang toroariru'nung Kaaleli'navaro-aape bera biikanoo' osi Nasareti' tavo'ariru'nung. 40Ee'noko tooto' panka'parara purimparu'nung mataue maanto'nii', ee'noko Kumponinge tampa' oovui otoko' biraankevui.

Tee Nemaka Jiisuu' Datavou'na' Dootuu'nava Pankava-koo

41Emu' tee, ookara mare'koo tee Paroro Baari'koong˜ nkoaako'nang baumararing tee Jerusalema'aape bereko'nung. 42Ee'noko tenang tee kivora-ita kemare'ka mare' makotuu'nang tee nari' berou' baumararing ninka, tering nanureko'na' nari'. 43Tenang paroro bakearako nantoong toroariko tee nemaka Jiisuu' teke otou'nung Jerusalema'ke. Baumararinge tee noru'urea'. 44Te'mung nanaama ee' noru'ureko', nii'ning ninka poromang. Ee'noko taunga muumpuru'noo'ka besi'uretu' bee'marang-ankoa ee'noko ookara teringe noru'aaresining-ankoa. 45Teka oovurearuta toroaretu' Jerusalema'aape tee besi'uree'naang. 46Teketa beenang doong tankinuko daa'uretu' teka dootuu'nava pankava-koo boto naunuka-koo meu' ba'nanuio' taaravuritaa' otoko niania'nanka nia'urima. 47Ee'noko teing taaravau'ning bakei asikovorou' tee-koo bakaang norukasi'koo ee'noko makumaku'koo. 48Ee'noko tee baumararinge oovureta ta'ninuretu', ee'noko baukoi aa'puu', “Nnuring, arekee'koo dake nee' tee' nkomeresi? Aung ee, nee'daring pore'moresing da' besi'koo noru' manki'moresitaa'.” 49Ee'noko teie aa'puretu', “Ning aming-koo besi'koo pore'doremang? Dee'ke ee noru'erea' tee ning Mma' bakanava-koo o'noaing?” 50Tee'puresio' teringe tasi'purearuu' bakaang kara. 51Ee'noko teie tee tering siompuresi tekang Nasareti'aape doonko berou', ee'noko otoi osie kara siompuko' tering beekaang. Ee'noko baukoi aing ookara kapoo'nanka domang-koo kinkompuu'.

52Ee'noko Jiisuu' panka'paru'nung matau ninka nari'. Kumponinge ee'noko nantoonge deto tampa' nari' ooaako'.

Currently Selected:

Luukeꞌ 2: nasNTpo

Highlight

Copy