Jooni 21

Jiisuu' ˜Kenaanka-taa-anko Bakaning Barevare-nupoong-anko Tavo'aru'na'

1Jiisuu' napo' taa'ni'poi sira'antavaru'na' nii' bakaning barevare-nupoong Kaaleli'naru'koo o'noriko tee' ee' nkoaru': 2Saimoni' Piita, Toomasi (Pauroong tampampiko'nung), Natanielo' (Kana-namono-nung, Kaaleli'nameng-koonoo'), nee' Siebedi-baurinketa, ee'noko nii'naanka kenaankara bakaning barevare-nupoong-koonaanka nii' nari' o'noriko. 3Saimoni' Piitai nii'ning aa'muru', “Ning kapa'koo nanang.” Nii'ke aa'pampiru', “Ee', tee aa' nii' morii'naang.” Teketa bakaasi-koo aa'emarira te'mung ee'na'mung ootukuna'mung muunganang kapa'kampima nau asi'nu barankampia'.

4Duaa' mme' tavo'arako Jiisuu' donkonuu' teru'koo tapiru. Ee'noko nii'ke bakaning barevare-nupoonge ooampia' tee Jiisuu'pina'. 5Ee'noko teie aa'muru', “Ee aing nemaa', dii' ee barankiriaruing?”

Nii'ke aa'pampiru', “Ee', barankampia'.”

6Ee'noko Jiisuu'ke aa'muru', “Napo' sionung dua'eriaing bakaasi-koo tampanaang-aapei nii'ning barankiriaina'.” Ee'noko tee'puio' nii'ke sionung napo' dua'ampiru' ntong-koo, ee'noko dua'ampira mmau' kapa'nara' dau'pampira intampampiaruu'. 7Ee'noko ning Jiisuu' ba'maiko'ke Piita aa'pantu', “Tee aung Ovoring.” Ee'noko Saimoni' Piita tee Ovoring taaravura bakaang mononopa'ke io' kiru'aru'nunge nopa'arara dinkitoo'aru' ntong-koo. 8Ee'noko nii' nii'ning bakaning barevare-nupoong piisi'koo duumumpiru' sionung kapa'nara'ke maanto'uio' taari'marira barampampiri; te' tavi' dau'pampiru'noo' baru' isipo' kansi'keta deea'noo', pa'noko' kivora daanga'pina'.

9Teketa piisi'koo simarirai'nange ooampiru', tavi' ee'noko berete' nta'koo dau otoko. 10Jiisuu'ke nii' aa'muru', “Nii'ning tavi'koo tavo'eriaing teing-koo barampererining-koo.” 11Teketa Saimoni' Piita enang bakaasi-koo aa'earu', ee'noko sionung barampuu' piisi'aape tavi' pankainankai maanto'uio'. Teing tavi'ning narung daaku'keta pa'noko' kivora-ita beenaumo [153]. Nka bane tavi' mmau', nka sionung dere'arava'. 12Jiisuu'ke nii' aa'muru', “Porira mamompiai.” Ee'noko nii' maia'moru' ee' nia'koo “Da' baa?” noru'ampiritaa' tee tee Ovoring. 13Teka Jiisuu' porai'nange berete' nkavura amuru', tavi'ke tee' siong-antavui.

14Te'mung ee'na'mung beenana' taa'ni'poi sira'antavaru'na'mung Jiisuu' baka nii'koo bakaning barevare-nupoong-koo boo'keta daa'ararai'nange.

Jiisuu'ke Piita Tautauvuu'na'

15Aung aa' tee, taamang bakemarirai'nange Jiisuu'ke Saimoni' Piita aa'puu', “Saimoni', Jooni bauring, dake ee ning piaamemang aing-koo dau basinoo'?” Teie maku'uma aa'puu', “Ee'. Dake noru'mei otong, ninge piaaramang.” Ee'noko Jiisuu'ke aa'puu', “Nkaning sipisipi'koong sie'nanka tanataveriaing.”

16Ee'noko napo' kemu'kana' Jiisuu'ke aa'puu', “Saimoni', Jooni bauring, dake ee ning piaamemang?” Teie maku'uma aa'puu', “Ee', Ovoring, dake noru'ei otong ninge da' piaaramang.” Jiisuu'ke aa'puu', “Nkaning sipisipi'nanka tareveriaing.” 17Aung aa' beemu'pina' Jiisuu'ke aa'puu', “Saimoni', Jooni bauring, dake ee ning piaamemang?” Piita oraka' dee'ou' Jiisuu'ke beemu'pie niania' nia'uio', aa'puma, “Dake ee ning piaamemang?” Ee'noko Jiisuu' aa'puu', “Ovoring, da' ookara kapoo' noru'ei otong. Dake ning noru'mei o'nong da' ninge piaaransi o'nong.” Jiisuu'ke aa'puu', “Nkaning sipisipi'nanka tanataveriaing. 18Masika' nauramaang, da' nemaa'daritaa'nange tokonii' pinka'darama avitoitoi naniko' piaroko'na', ee'noko panka'darara dakaang bireng tovoro'daravaing, ee'noko nii'nunge bireng pinka'dura tokoo nkaruaing piaroauka'noo'.” 19Tee' aa'barata'koo Piita booaina' Jiisuu'ke minkuvuma nauvuu', Kumponing-anko meenasi tavo'uma. Ee'noko Jiisuu'ke aa'puu', “Ning siomeaing.”

Jiisuu'ke Jooni Tautauvuu'na'

20Piita dama'du-aape toroarama ning Jiisuu' ba'maiko' oomuu', ning ee'nara taamang naiampima Jiisuu'koo darimaritaa' nia'ama aa'pantu'nung, “Da' baie kare-nupoong-koo sing-antaruu'naang?” 21Ee'noko Piitai ning oomurai'nange Jiisuu' aa'puu', “Ovoring, arekee' tee aung naning?” 22Jiisuu'ke maku'uma aa'puu', “Tee domampari otoaing bera ning napo' moainoo' miru'ampaing deeko' tee dakaang kapoo' deea'. Ning siomeaing dake.” 23Tee' minkuvuio' minkunaa beremparu' Jiisuu' bakaning barevare-nupoong-koo ning moompauka'nung. Nka Jiisuu'ke minkuvua' ning moompauka'nung. Teeo aa'puu', “Tee domampari otoaing bera ning moainoo' miru'ampaing deeko' tee dakaang kapoo' deea'.”

24Ning tee ee'nara bakaning barevare-nupoong-koonge aing kapoo' minkuansing ee'noko daariansi. Ee'noko nii'ke noru'ampiri otong tee kapoo' ninge minkuansing tee masikung.

Botunanaare

25Ee'noko tee nii'ning oovuning kapoo' mmau' Jiisuu'ke nkovuu' a' otoaing. Ookara naruna' naruna' daari-koo ookara kansi' makotuarupeu' pa teing buuku kong-koo tee daariaapeu'ning.

Currently Selected:

Jooni 21: nasNTpo

Highlight

Copy