Jooni 20

Jiisu' Boo'keta Daa'aru'na'

1Aung aa' tee, tero maatanang Saandei-na'mung mme' tane'puko, Meeri' Ma'dala-nani kuvi dako'doma nanuu', ee'noko tee ku'nung kapang-koong diiri'ario' karanaang-eta oovuu'. 2Ee'noko oovurai'nange teni kua'paru' nee'anko, Saimoni' Piita-anko ee'noko ning Jiisuu' ba'maiko'. Ee'noko naumurema aa'muretu', “Tee Ovoring kuvi-eta nkavaing. Ee'noko sipainoo' noru'ampia'.” 3Teketa tee enang nee'ke Piita naankai simaretai'nange kuvi dako'doma kua'maresi meretu'; 4Ee'noko aa'na' kua'mari Piita divu'amira kuvi-koo tutung tavo'maru'. 5Ee'noko kinkinamirai'nange ooantu' baaronanka. Nka kuvi dako'doma tumarava'. 6Ee'noko Saimoni' Piita porai'nange koonto' tee kuvi dako'doma tumparu', ee'noko baaronanka oovuu' te' tamung otoko. 7Ee'noko tenaa' baarong-nanaa' Jiisuu'koong bore' dai'au'nanaa', tenaa' oovunoo' otoko, nii'ning baaronanka ninka deea', baka kai'ari otoko. 8Teketa ning dama'ke tumaru', ee'noko ooamirai'nange deeko' Kumponinge boo'keta daa'uu'nung masika'antavantu'. 9Nka nee'koo mme' siraka'parava' tee kara Daari Meekung-koo otoing Jiisuu' boo'keta daa'aravaing-koong, bane noru'ampesi naumuru'noo'. 10Ee'noko teketa tee nee' osi toromaretu'.

Jiisuu' Meeri' Ma'dala-nani-anko Tavo'kuu'na'

(Mat 28:9-10; Mak 16:9-11)

11Aung aa' tee, Meeri' kuvi dako'doma dama'du donkonui biromparako', ee'noko biromparama kinkinura ookuu' kuvi-koo kuung. 12Ee'noko teka kuvi-koo kuunga koosinunka kenaankara oovuretu' kakaarai duaanavaresi, te' ba'namparesio' Jiisuu'koong mono tero otou'noo', nii'nung bore'kanoo' ee'noko nii'nung kau'kanoo'. 13Koosinungkai˜ aa'puretu', “Ani ee, da' aming-koo birontaramang?” Ee'noko tenie maku'urema aa'puretu', “Tee aa' ning nkaang Ovoring nkavaara tokoo sipaio', ee'noko sipainoo' noru'ampa'.”

14Ee'noko tenie tee' minkuvurai'nange torotoroarama Jiisuu' oovuu' te' donkonui otoko, nka tasi'pua' tenie tee Jiisuu'. 15Ee'noko Jiisuu'ke aa'puu', “Ani ee, da' aming-koo birontaramang? Dake baa besi'emaang?” Tenie mintoong tarenara-pina' noru'uma aa'puu', “Ee aung, dake nkaveing deeko' ning naumeaing sipeinoo', ninge mera nkavampaina'.”

16Jiisuu'ke miring tampuma aa'puu' teni, “Meeri'.” Ee'noko koonto' tee-anko toroarama tero Ju'nupoong urikupoong biikaang karai karoma tenie aa'puu', “Rabonai.” Aung miru'noo' ee' oro', Nau-anta Ovoring.

17Jiisuu'ke teni aa'puu', “Ana'antameauka', ai' ning mme' Mma'anko deto toromarava'. Bera mmaikori' ee'noko ntara'mainkaang-anko nanira naueriaing ning nanamang Mma'anko ee'noko diuma-anko, nkaang Kumponing-anko ee'noko diikaang Kumponing-anko.”

18Ee'noko Meeri' Ma'dala-nanie nii' bakaning barevare-nupoong naumurima aa'muru', “Ninge ooansing Ovoring, ee'noko tee kara naurampiring naumui.”

Jiisuu' Bakaning Barevare-nupoong-anko Tavo'kuu'na'

(Mat 28:16-20; Mak 16:14-18; Luk 24:36-49)

19Ee'noko te'mung ee'na'mung Saandei-na'mung muung-aapenang nava-koo nii' bakaning barevare-nupoong oosimariru'. Da'marira o'noru' Ju'koong ovontung-koo amorompima. Ee'noko tenang Jiisuu' pou'. Pora nii'koo meu' donkonuma aa'muru', “Tampara, ee aing! Mooa tee dii'koo otoaing!” 20Ee'noko tee' minkuvurai'nange bakaang bireng nau-antamuru' ee'noko manto'nang. Ee'noko nii' bakaning barevare-nupoong bakei aa'na' dotumariru' Ovoring ooampira. 21Ee'noko Jiisuu'ke napo' aa'muru', “Mooa-po'nupoong otoriaing. Mma'ke ning botomuu'na' ninge dii' botorampimang.” 22Tee' minkuvura domaange nii' uupumurira aa'muru', “Tanuaang Meekung nkaveriaing. 23Dii'ke nantoong biikaning oreng aarumo tonta'evurereriko tonta'ari otoaing, ee'noko dii'ke tonta'evurereriaruko tonta'arava' otoainge.”

Toomasie Jiisuu' Oovura Masika'antavuu'na'

24Narung nii'koong Kivora-ita Kenaanka-koong Toomasi, nii'noo' Pauroong tampampiko'nung nii' ninka otoaruko Jiisuu' pou'. 25Ee'noko nii'ke nauampima aa'pampiru', “Nii'ke Ovoring ooampiring.” Toomasie maku'murima aa'muru', “Ninge niiri-koong taamu ooamparura bireng-koo, napo' tanka' dusi'amparura niirie tupu'uu'nung-koo taamu-koo, ee'noko nkaang bireng mato'nang-koo dusi'amparura deeko' ninge masika'antavampauka'nung.”

26˜Beenang-taa doong tankinuio' napo' nii' ookara bakaning barevare-nupoong naro'marira o'noriko' pava-koo kuung, Toomasi nari'. Bane ku'nung pinka'ario' Jiisuu' nii'koo meu' donkonura aa'muru', “Mooa-po'nupoong otoriaing!” 27Ee'noko Jiisuu'ke Toomasi aa'puu', “Dakaang bireng a' dusi'eai, ee'noko nkaang bireng oomeai. Bireng tovoro'darara a' ning-koo manto'nang-koo dusi'eai. Noru' keekoo'koong bakerarara masika'anta oto'derui otoai.” 28Toomasie maku'uma aa'puu', “Keei, nkaang Ovoring ee'noko nkaang Kumponing Da'!” 29Jiisuu'ke aa'puu', “Da' ee ning oomera masika'antameng? Nka biraankenanka masikeng teing nantoong oomaava' masika'antamaavaining.”

Aung Buuku-koong Okora'noo'

30Ee'noko tee, Jiisuu'ke nii'ning oovuning taa'ni'anta nkovuu' nii'ke bakaning barevare-nupoonge ooampirio' aung-koo buuku-koo daariarava'. 31Aing daariampirining otomaung dii'ke masika'antaverii'naang Jiisuu' tee Kumponinge Pako'pari'nii' nii' domang-anta-koo, Kumponing Bauring ee'nara. Ee'noko tee, tee' masika'antaverima dii' domaang-po'nupoong otorii'naang bakaang miring-koo.

Currently Selected:

Jooni 20: nasNTpo

Highlight

Copy