Amarkɩ 16

Azezi vo'ore

(Amatie 28:1-8, Aluki 24:1-12, Azã 20:1-10)

1Zifdõma vo'osgo daarɛ n daan tole, tɩ Amaari n ze'ele Magdala, la Azakɩ ma Amaari, la Asalome da tɩdarɛ yũuŋo n ãn sõŋa tɩ ba tarɩ sẽŋɛ ka ẽŋɛ Azezi ĩyã. 2Tɩ Lasrɩ daarɛ bulika wẽnnɛ n doorɩ se'em mã'a la, tɩ ba wɛ'ɛsa yɔɔm na, 3dee tɔgra la taaba sore yetɩ: «Ãne n wʋn bilge kugre la yɔɔgɔ la nõorʋm bɔ tɔ?» 4La ban paagɛ la, ba yẽ tɩ kugre la n ba ãna kãtɛ la põn bilge mɛ gã. 5Tɩ ba kẽ yɔɔgɔ la pʋam, yẽ budib-polle n yɛ fu-pɛɛlga zẽa zʋʋgɔ bɔba, tɩ ba palẽŋa ẽkɛ. 6Tɩ a yele ba yetɩ: «Da basɛ-ya tɩ ya palẽŋa ẽgra, mam mi tɩ ya eerɩ la Azezi n ze'ele Nazarɛtɩ, tɩ ba ka dɔ-puurŋa zuo kʋ la. A vo'oge mɛ, a ka boe kalam. Bɩsɛ-ya zẽ'e-sɛka tɩ ba daan bĩŋe ẽ na n wãna. 7Sẽŋɛ-ya ka yele Apɩyɛɛrɩ, la a karẽnbiisi basɛba la yetɩ: ‹A wʋn dẽŋɛ ya nẽŋa sẽŋɛ Galile. Bilam tɩ ya wʋn yẽ ẽ, wʋ ẽn daan yele ya se'em na.› » 8Tɩ ba yɛm bɔɩ, tɩ ba ĩyã gõgra, tɩ ba yese yɔɔgɔ la pʋam zoe, la ba daan ka yele nẽra nẽra sɛla, se'ere n soe la, dabeem n tarɩ ba.

Azezi dɩkɛ a mẽŋa pa'alɛ nẽrba

(Amatie 28:9-10,16-20, Aluki 24:13-49, Azã 20:11-23)

[ 9Azezi n daan vo'oge Lasrɩ daarɛ bulika yʋ'ʋŋɔ yʋ'ʋŋɔ la, a dẽŋɛ dɩkɛ a mẽŋa pa'alɛ la Amaari n ze'ele Magdala. La de la ẽŋa tɩ kʋlkã'arsɩ bayopɔɩ daan dolɩ ẽ tɩ Azezi dige ba, tɩ ba yese la. 10Tɩ a sẽŋɛ ka yele nẽr-sɛba n daan dolɩ Azezi la. Ba daan zĩ la sũ-sã'aŋɔ la nintãm. 11La ban daan wõm tɩ Azezi vo'oge mɛ tɩ Amaari yẽ ẽ na, ba daan ka sakɛ.

12Bɛla poorʋm tɩ Azezi le teege nẽŋa ayẽma dɩkɛ a mẽŋa pa'alɛ a karẽnbiisi bayi n daan boe sore wɛ'ɛsa tẽn-pɩka ayɩla. 13Tɩ ba lebe ka yele ba taaba la, tɩ ba ka sakɛ.

14La bɛla poorʋm, tɩ a karẽnbiisi pia la ayɩla la daan zẽa dita, tɩ Azezi dɩkɛ a mẽŋa pa'alɛ ba. Dee zɛbɛ ba, ban daan ka bɔ sɩra, la ba sũure n kɛ la ĩyã. Se'ere n soe la, ba daan ka sakɛ sɛba n daan yẽ ẽ yetɩ a vo'oge mɛ na yetɔga. 15A yele bɛla, dee yele ba yetɩ: «Sẽŋɛ-ya dũnia zẽ'a woo ka mõolɛ Nawẽnnɛ kõ-yẽlga la bɔ nẽrba wuu. 16Sɛka woo n bɔ sɩra, botɩ ba mise ẽ ko'om pʋam, a wʋn yẽ fãarɛ. La sɛka woo n ka bɔ sɩra, ba wʋn di a sarɩya sɩbgɛ ẽ. 17La sɛba n wʋn bɔ mam sɩra la, wʋn ɩta la bõn-yãlma bãna pa'alɛ Nawẽnnɛ pãŋa: Ba wʋn dɩkɛ la mam yʋ'ʋrɛ digra kʋlkã'arsɩ, dee tɔgra yetɔg-zãŋsɩ. 18La ba sãn yõgɛ bõnsɛ'ɛdõma, bɩɩ yũ yabga, la kãn ẽŋɛ ba sɛla. La ba wʋn dɩkɛ ba nu'usi paglɛ bã'adõma zuto, tɩ ba yẽ ĩmã'asʋm.»

Azezi zom Nawẽnnɛ yire

(Aluki 24:50-53, Tõoma 1:9-11)

19Zuudãana Azezi n daan tɔgɛ la ba kɩ'ɩlɩm na, a zẽkɛ mɛ zom Nawẽnnɛ yire, ka zĩ'ire Nawẽnnɛ zʋʋgɔ. 20Tɩ a karẽnbiisi la sẽŋɛ ka mõolɛ kõ-yẽlga la zẽ'esɩ wuu. Tɩ Zuudãana la sõŋɛ ba, botɩ ba tõm tõon-yãlma pa'alɛ tɩ ba kõa la mõolgɔ de la sɩra.]

Currently Selected:

Amarkɩ 16: gurDBL

Highlight

Copy