Amatie 18

Ãne n wʋn dɛna nẽr-kãtɛ Nawẽnnɛ so'olʋm pʋam

(Amarkɩ 9:33-48, Aluki 9:46-48;17:1-2)

1Wakat-ẽŋa tɩ karẽnbiisi la daan lɛm Azezi soke ẽ yetɩ: «Ãne n de nẽr-kãtɛ Nawẽnnɛ so'olʋm pʋam?» 2Tɩ Azezi wi bi-pɩka ze'ele ba tẽŋasʋka, 3dee yele ba yetɩ: «Mam yetɩ ya la sɩra sɩra, tɩ ya sãn ka teege yɛm ãna wʋ kɔma la, ya kãn kẽ Nawẽnnɛ so'olʋm pʋam. 4Bɛla, sɛka woo n sike a mẽŋa ãna wʋ bi-pɩka la, a wʋn dɛna nẽr-kãtɛ Nawẽnnɛ so'olʋm pʋam. 5La sɛka n to'oge bi-pɩka n ãn wʋ ẽna, mam yʋ'ʋrɛ ĩyã, a to'oge la mam mẽŋa.

6La nẽra sãn botɩ kɔm-pɩgsɩ bãna wã n bɔ mam sɩra la ayɩla basɛ Nawẽnnɛ sore, sɩbgrɛ sɛka tɩ a wʋn yẽ la, ba sãn dɩkɛ nẽerɛ kug-kãtɛ lʋ yulse a yugla lobe ẽ basɛ ko-kãtɛ pʋam n sõɩ.

7Toogo boe dũnia zuo, nẽrba n pã'asrɩ nẽrba tɩ ba basrɩ Nawẽnnɛ sore la ĩyã. Dẽnɩ tɩ pã'asgɔ wa'am, la nẽr-sɛka n pã'asrɩ la wʋn yẽ toogo.

8Fʋ nu'ugo bɩɩ fʋ nã'arɛ sãn yetɩ a botɩ fʋ basɛ Nawẽnnɛ sore, wige ba basɛ. Fʋ sãn tara nu'u-yẽŋɔ bɩɩ nã'a-yẽŋɔ dee kẽ Nawẽnnɛ yire vɔa, n sõɩ fõn tarɩ nu'usi bayi, la nãma bayi, dee tɩ ba lobe fʋ basɛ bugum n ka kĩŋri pʋam. 9La fʋ nifo sãn yetɩ a botɩ fʋ basɛ Nawẽnnɛ sore, kɩrgɛ ẽ basɛ. Fʋ sãn tara nin-yẽŋɔ dee kẽ Nawẽnnɛ yire vɔa, n sõɩ fõn tarɩ nini bayi, dee tɩ ba lobe fʋ basɛ bug-tẽŋa.»

Pesgo n bɔɩ makrɛ

(Aluki 15:3-7)

10Azezi le yele ba yetɩ: «Guuse-ya da pɔ'ɔra kɔm-bãna wã baa ayɩla. Mam yetɩ ya tɩ ba malɛkadõma n boe Nawẽnnɛ yire, boe mam Sɔ Nawẽnnɛ nẽŋam mɛ wakatɛ woo.

[ 11Nẽrsaala Dayʋa la wa'am tɩ a fãagɛ la nẽr-sɛba n bɔɩ la.]

12Yãma tẽ'esrɩ la bẽm? Nẽra sãn tara piisi kɔbga, tɩ ayɩla bɔɩ, a kãn basɛ piswɛɩ la awɛɩ la kũnkũnne zuo tɩ ba ɔbra, dee sẽŋɛ ka ɛ ayɩla n bɔɩ la? 13La mam yetɩ ya la sɩra, tɩ a sãn yẽ ẽ, a sũure wʋn ẽŋɛ yẽlʋm mɛ la ayɩla la gãnna piswɛɩ la awɛɩ n ka bɔɩ la. 14Ya Sɔ Nawẽnnɛ mẽ ãn na bɛla, a ka boorɩ tɩ kɔm-pɩgsɩ bãna ayɩla bɔɩ.»

Nẽrba n wʋn malgɛ ba yelle la taaba se'em

15Tɩ Azezi le yetɩ: «Fʋ sɔbia sãn ẽŋɛ be'em, sẽŋɛ ka yẽ ẽ fõn na ẽŋa mã'a, pa'alɛ ẽ a tuure la. A sãn sakɛ fʋ nõorɛ, fʋ to'oge ẽ basɛ. 16La a sãn zagsɛ fʋ nõorɛ la, fʋ doose nẽra ayɩla bɩɩ bayi sẽŋɛ a zẽ'am. Tɩ nẽrba bayi bɩɩ batã dɛna kaset-dõma yelle la mãalgɔ ĩyã, wʋ Nawẽnnɛ gõŋɔ n yele se'em na. 17La a sãn zagsɛ ka selse ba, fʋ yele wẽndeego la nẽrba. La a sãn zagsɛ ka selse wẽndeego la nẽrba, ya bɩsra ẽ wʋ nẽra n ka dolɩ Nawẽnnɛ, bɩɩ tõon-be'ero dãana. 18La mam yetɩ ya la sɩra sɩra, tɩ bõn-sɛka woo tɩ ya wʋn lʋ dũnia wã zuo, wʋn lʋ Nawẽnnɛ yire. La sɛla tɩ ya wʋn lorge dũnia wã zuo, wʋn lorge Nawẽnnɛ yire. 19Mam ken yɛta ya tɩ nẽrba bayi sãn naagɛ nõorɛ dũnia wã zuo sose mam Sɔ Nawẽnnɛ sɛla, a wʋn ẽŋɛ bɔ ba. 20La nẽrba bayi bɩɩ batã sãn lagsɛ taaba mam yʋ'ʋrɛ ĩyã, mam boe la ba lɛ mɛ.»

Tõntõnna n ka bɔ'ɔrɩ sugri makrɛ

21Tɩ Apɩyɛɛrɩ lɛm Azezi soke ẽ yetɩ: «M Zuudãana, mam sɔbia sãn ẽŋɛ mam be'em, nõorɛ wãne tɩ mam wʋn basɛ ẽ taalɛ? Nõorɛ ayopɔɩ bɩɩ?» 22Tɩ Azezi yele ẽ yetɩ: «Mam ka yetɩ nõorɛ ayopɔɩ mã'a, mam yetɩ nõorɛ pisyopɔɩ nõorɛ bʋyopɔɩ.

23La de la bɛla, tɩ Nawẽnnɛ so'olʋm ãna wʋ naba n boorɩ tɩ a tõntõnɩba geele a tõoma pa'alɛ ẽ. 24La ẽn pɔsɛ bɔna mĩ gɛɛla la, tɩ ba tarɩ nẽra ayɩla n di a sãnnɛ lig-kõba yʋ'ʋrɛ n de talã tʋspia wa'am. 25La a daan ka tarɩ sɛla wʋn yɔ, tɩ a zuudãana la bɔ nõorɛ yetɩ, ba koose ẽ, la a pɔga la a kɔma, la a lɔgrɔ wuu yɔ sãnnɛ na. 26Tɩ tõntõnna la ka dũma tẽŋa a zuudãana la nẽŋam sose ẽ yetɩ, a ẽŋɛ sugri tɩ ẽŋa wʋn yɔ sãnnɛ na wuu. 27Tɩ a zuudãana la zoe a ninbãalga, basɛ sãnnɛ na, dee basɛ ẽ tɩ a fõrgɛ.

28La tõntõn-ẽŋa n yesrɩ la, a tʋ'ʋsɛ la a tõntõn-tadãana n di a sãnnɛ lig-kõba yʋ'ʋrɛ n de deniye kɔbga, yõkɛ ẽ kẽkɛ a kõnkɔa, dee yele ẽ yetɩ: ‹Yɔ ma m sãnnɛ na.› 29Tɩ a tõntõn-tadãana la ka dũma tẽŋa a nẽŋam sose ẽ yetɩ, a ẽŋɛ sugri tɩ ẽŋa wʋn yɔ a sãnnɛ na. 30Tɩ a zagsɛ, dee tarɩ ẽ sẽŋɛ ka kẽ'esɛ yʋ'a deem yetɩ, a sãn ka yɔ ẽŋa a sãnnɛ na, a kãn yese.

31La a tõntõn-taaba la n yẽ bɛla la, tɩ ba sũure sã'am zozo'e. Tɩ ba sẽŋɛ ba zuudãana la zẽ'am ka yele ẽ sɛla n ẽŋɛ la wuu. 32Tɩ zuudãana la botɩ ba wi ẽ, tɩ a yele ẽ yetɩ: ‹Tõntõn-be'ego wã, sãn-sɛka wuu tɩ fõn di la, mam basɛ mɛ tɩ la ba'asɛ, fõn sose mam na ĩyã. 33La masɛ nɩ mɛ tɩ fʋ mẽ zoe fʋ tadãana la ninbãalga, wʋ mam n zoe fõn ninbãalga se'em na.› 34La a zuudãana la sũure yĩige mɛ, tɩ a basɛ tɩ ba tarɩ ẽ sẽŋɛ ka kẽ'esɛ yʋ'a deem tɩ ba nãmsɛ ẽ halɩ tɩ a yɔ sãnnɛ na wuu.

35Mam Sɔ Nawẽnnɛ mẽ wʋn ẽŋɛ ya la bɛla, ya sãn ka basɛ ya sɔbiisi tõon-be'ero taalɛ la ya sũure wuu.»

Currently Selected:

Amatie 18: gurDBL

Highlight

Copy