Marcos 13

Is Egkeuma he Pesipala

(Marcos 13:1-23; Mateo 24:1-28; 10:17-22; Lucas 21:5-24)

1Ne zutun te ked-awà ni Jesus dutun te zekelà he simbahan he Valey te Megbevayà migkag̵i ziyà te kandin is sevaha te menge sumusundan din te, “Ahaa nu heini is simbahan. Utew zezekelà is menge vatu he imbevaley kayi ne utew meupiya is kegkeveeli zin.” 2Ne migkag̵i si Jesus diyà te kandin te, “Heeyan is dekelà he simbahan, he vatu is imbevaley zuen, wazà keuzemà minsan sevaha he vatu he ebpekeuntud diyà te sevaha su egkewag̵ey heeyan is langun.”

3Ne hein diyè dan te vuvungan he egngezanan te Ulivuwan, egkepantew zan sikan is dekelà he simbahan. Ne mid-insaan si Jesus eni Pedro, Santiago, Juan, wey Andres dutun te wazè dan duma, 4ke sikandan te, “Keg̵iyi key ke keenu egkehitavù heini is langun wey ke hengkey is egkeulaula he tuus he iyan en timpu he egketuman sikan is langun he migkag̵i nu g̵eina.”

5Ne migkag̵i si Jesus diyà te kandan te, “Mebpekevantey kew wey kenè kew mekesundan te teruen he etew 6su mezakel is ebpemenlepew he egamit te ngazan ku he egkag̵i is kada sevaha zutun he iyan sikandin sikan is mibpilì te Megbevayà he ibpahadì. Ne mezakel is ebpeketuu te menge tarù dan. 7Ne emun egkezineg niw ziyà te uvey niw is meg̵urub tenged te gira ne egkezineg niw zaan is tudtul te menge gira ziyà te meziyù he tanà, kenè kew mahandek su kinahanglan he egkeulaula is iring kayi te kenè pa edtepusen heini is timpu. 8Su ebpekidtebek is sengeinged te zuma zin he inged ne egira is sengeg̵inhedian te zuma zin he g̵inhedian. Egkehitavù is linug diyà te mezakel he menge inged ne zuen menge inged he ebitilen. Iyan, heini he egkehitavù, ne iring te ed-anak he sikan pa ebpuunà is belilit din.

9Ne sikiyu, kinahanglan he purungi niw endama is gehinawa niw, su edekepen kew te menge etew ne ed-uwiten kew zan diyà te hukmanan ne ebug̵elen kew ziyà te menge simbahan dan. Ebpekeetuvang kew te menge gubirnedur wey menge hadì tenged te kedtuu niw kediey wey niw ikewali is Meupiya he Tudtulanen diyà te kandan. 10Su te kenè pa egketapus haazà is timpu, kinahanglan he ihuna ipesavut is Meupiya he Tudtulanen diyà te menge etew ziyà te langun he menge g̵inhedian. 11Ne zutun te kedekepa keniyu su ed-uwiten kew ziyà te hukmanan, kenè niw igkesamuk ke hengkey is egkeg̵iyen niw su emun dutun kew en, iyan niw egkekag̵i is ibpekag̵i keniyu te Megbevayà su is menge lalag he egkekag̵i niw zutun ne kenè en keniyu, kekenà, lalag he ibpekag̵i keniyu te Wag̵as he Mulin-ulin. 12Ne zutun he timpu zuen menge etew he ibpehimetayan dan is menge suled dan. Ne zuen daan menge amey he ibpehimetayan dan is menge anak dan. Ne zuen menge etew he egkuntedahan dan wey ibpehimetayan dan is menge lukes dan. 13Egkuntedahan kew te langun tenged te sumusundan ku sikiyu. Iyan, sikan is edhamen te kedtuu zin kedì taman te ketepusan dutun te menge kemeresayan, ebeg̵ayan te untung he wazè din pidtemanan.

14Ne is egngezanan te melimezang he ebpekekaid, emun egkeehè niw he ziyè en haazà te simbahan he Valey te Megbevayà he wazà itug̵ut kandin, ne sikan is diyà te prubinsya he Hudiya, mebpelag̵uy zan pehendiyà te vuntud. (Is ebpekevasa kayi te tagnà dengan mehitenged kayi, kinahanglan he sevuta zin.) 15Ne sikan is etew he egkeserengà diyà te g̵awas te valey zin, kenè en med-usik-usik pa te timpu te kedseled diyà te valey he egkuwa te minsan hengkey te azen din. 16Sikan is etew he ziyà egkeserengà te pemuleey zin, kenè en med-ulì pa ziyà te valey zin te kegkuwa te malung din. 17Ne zutun he andew, kehizu utew te menge vahi he memeg̵ingey wey ebpemenleg̵imu su utew zan egkengereg̵enan he ebpelag̵uy. 18Iampù niw ziyà te Megbevayà he kenà heini mekeserengà is kebpelag̵uy zutun te timpu te meg̵enew. 19Su wazè en ebpekerepeng te kemeresayan he egkehitavù dutun he andew. Ne puun pa te aney en kedlimbag̵a te kelibutan wazè pa meeg̵iyi is iring dutun. Ne emun egkehitavù en haazà ne kenè en egkehitavù pa maan is iring dutun minsan keenu. 20Midterinan en te Nengazen haazà is timpu te kemeresayan su emun wazà, ne egkelimas dutun is tivuuk he menusiyà. Iyan, tenged te hizu zin te menge pinilì din he menge etew, midterinan din haazà is timpu te kemeresayan.

21Ne ke zuen egkag̵i keniyu te, ‘Ahaa niw, heini en kes hadì he mibpilì te Megbevayà,’ wey ke zuen be egkag̵i te, ‘Heeyan en sikandin,’ ne kenè kew mebpemineg dutun te egkag̵i. 22Su ebpenlepew is teruen he etew he egkeg̵iyen dan he iyan sikandan sikan is hadì he mibpilì te Megbevayà wey ke egkeg̵iyen dan be he ebpeneuven sikandan te Megbevayà. Ne ebpemeehè dan te egkengein-inuwan wey menge singyal su ibpetuu zan pezem te menge tarù dan, ke egkehimu, is menge pinilì te Megbevayà. 23Umba mebpekevantey kew su midtudtul ku en keniyu heini is langun he egkehitavù te wazè pa meulaula.

Is Kedlikù ni Jesus

(Marcos 13:24-37; Mateo 24:29-44; Lucas 21:25-33)

24Ne emun egkeiwas haazà is timpu te kemeresayan, kenè en edsilà is andew ne kenè en daan ed-anlag is bulan. 25Ne egkengeulug is menge vituen diyà te langit ne egkengehuyung is menge kedesenan diyà te hewhewanan. 26Ne zutun, siak is Kakey te Menusiyà, egkeahà a ziyà te menge g̵apun is ebpekeuma he utew zekelà is gehem ku wey utew merayag is ked-anlag ku. 27Ne zutun edsug̵uen ku is menge velinsug̵uen ku pehendiyà te heepat he pesag̵ì kayi te kelibutan. Ne edtig̵umen dan is menge pinilì ku he etew he ebpuun te minsan hendei kayi te lumpad te kelibutan.

28Isipa niw heini is impenurù ku keniyu pinaag̵i te sempità he kayu he igira. Dini te kenita, emun ebpeneringsing en is subpang din ne ebpenlumbey en, egketuenan ta he meg̵aan en is gulavung. 29Ne iring din ded daan, emun egkeehè niw he egkengetuman en is langun kayi te migkag̵i ku, egketuenan niw he meg̵aan a ebpekelikù. 30Tenuzi niw is egkeg̵iyen ku keniyu: he emun egkeehè niw he egkengetuman en heini kenè kew pa egkeamin ebpatey taman te kenè pa egkengetuman heini is langun. 31Egkehanew is langit wey tanà, iyan, heini is migkag̵i ku, kenà mulà egkehanew te minsan keenu.

32Is Amey tew he Megbevayà, iyan dà nesayud ke keenu egketuman heini is langun. Ne g̵awas kandin wazè en nesayud te andew wey uras ke keenu heini egkehitavù. Is menge velinsug̵uen te Megbevayà diyà te langit, wazè dan mesayud wey minsan siak is Anak te Megbevayà, wazà a zaan mesayud. 33Ne tenged kayi, mebpekevantey kew ne tag̵amtag̵am kew su kenè niw heini egketuenan ke keenu. 34Su iring a te sevaha he etew he midhipanew he wazè din teleena ke keenu ed-ulì. Is menge sulug̵uen din ne impevantey zin te menge azen din. Ne mibpemeg̵ayan din is kada sevaha kandan te ketengdanan he ed-ul-ulahan dan dutun te kedhipanew zin. Ne migkeg̵iyan din is etew he impevantey zin te g̵emawan he kenà sikandin medlipezeng. 35Umba, purungpurung kew su wazè niw metueni ke keenu a ebpekeuma is teg̵ig̵aked te valey, ke mahapun be, ke liwazè be te kezukileman, wey ke egkepkepawè be wey ke edsilè en be is andew. 36Kinahanglan he kenè ku sikiyu egkeumahan he nekelipezeng dutun te kedtekewtekew ku kedlikù. 37Heini is egkeg̵iyen ku keniyu, egkeg̵iyen ku zaan diyà te langun he etew he mebpekevantey is kada sevaha.”

Currently Selected:

Marcos 13: mbbNT

Highlight

Copy