Marcos 14

Is Bitiyara Mehitenged te Kedekepa ki Jesus

(Marcos 14:1,2; Mateo 26:1-5; Lucas 22:1,2; Juan 11:45-53)

1Mekezuwa pa zutun, egketuman is Pista te Kedlevayi wey Pista te Kegkeena te Supas he Wazè Din Tapey. Is menge punuan he memumuhat wey is menge menunudlù te kesug̵uan, ebpengahaan dan is paag̵i wey zan mezakep si Jesus he kenà egketuenan te mezakel he menge etew wey mehimetayi. 2Ne ke sikandan te, “Kenè tew edekepen sikandin te timpu te pista su kela ke edsinamuk is menge etew.”

Is Kebpetig̵is te Pehemut

(Marcos 14:3-9; Mateo 26:6-13; Juan 12:1-8)

3Ne sevaha he timpu zutun he ziyà si Jesus te inged he Bitanya, diyà sikandin te valey ni Simon te it-iten he neulian en. Ne zutun te egkaan dan, nekeuma is bahi he ed-uwit te pelenahan he mibeelan puun te vatu he elebastru he midteg̵uan haazà is pelenahan te mehemut he agwa he mahal utew su lunsey he nardu. Ne mid-uvayan si Jesus dutun te vahi ne midrupet din haazà is bivig dutun te pelenahan ne imbusbus din diyà te ulu ni Jesus haazà is agwa. 4Ne is duma he etew he nekeahà dutun, wazè dan ikesuat haaza, ne mibpelelelag̵è dan te, “Maan is mid-us-usikan din heeyan is agwa te wazà pulus? 5Mahal utew heeyan su is bali zin, ne subra he tetelu he g̵atus he elad he selapì. Meupiya pa pezem ke imbelegyà, ne is halin, igkepemeg̵ey ziyà te egkengeayuayu.” Ne midsawey zan haazà is mid-ulaula zutun te vahi. 6Ne migkag̵i zutun si Jesus te, “Pesegdana niw sikandin. Maan is edsewayen niw sikandin? Utew meupiya heini is mid-ulaula zin dini te kediey. 7Layun niw egketevangi is egkengeayuayu su kenè niw mulà sikandan egkesuwey, iyan, siak, meg̵aan ku en sikiyu egkesuwey. 8Sumalà is egkehimu kayi te vahi ne midhimu zin en dini te kedì. Mid-egwahan e zin he zaan wey meteg̵ana is lawa ku te kedlevenga kedì. 9Tenuzi niw he kenà sikandin egkelipatan. Su minsan hendei idsangyew is Meupiya he Tudtulanen dini te tivuuk he kelibutan, egketudtul zaan heini is mid-ulaula zin kedì.”

Is Paag̵i te Kedekepa ki Jesus

(Marcos 14:10,11; Mateo 26:14-16; Lucas 22:3-6)

10Ne zutun, si Hudas he tigKeriyuti, sevaha zutun te sepulù wey zezuwa he menge sumusundan din, midhendiyà sikandin te menge punuan he memumuhat su ibpalad din si Jesus diyà te kandan. 11Ne hein netuenan dutun te menge punuan ke hengkey is inhendutun din, ne utew zan nengesuat. Ne mibpesarig sikandan he ebeg̵ayan dan si Hudas te selapì. Ne puun dutun mibpengahà si Hudas te paag̵i te ked-ekali zin ki Jesus.

Is Kedseulug ni Jesus Duma te Menge Sumusundan Din

(Marcos 14:12-21; Mateo 26:17-25; Lucas 22:7-14,21-23; Juan 13:21-30)

12Ne zutun neume en is nehuna he andew te Pista te Kegkeena te Supas he Wazè Din Tapey. Iyan haazà andew te kedlepaa te menge Hudiyu te ibpemuhat he nati he kerehidu he egkeenen dan dutun te Pista te Kedlevayi. Ne zutun mid-insaan si Jesus te menge sumusundan din te, “Hendei is egkesuatan nu he valey he edhilutuan dey wey zey meteg̵ana is idlavung nu te Pista te Kedlevayi?” 13Ne midsug̵ù ni Jesus is dezuwa zutun te menge sumusundan din ne migkeg̵iyan din te, “Hendiyan kew te inged ne egkeuma niw is maama he ed-uwit te umuy he nepenù te wahig. 14Tundug kew kandin pehendiyà te valey he edselezan din, ne keg̵iyi niw is teg̵ig̵aked dutun te valey te, ‘Ibpeinsà te zatù tew kenikew ke hendei he rug̵u sikandin egkaan duma te menge sumusundan din kayi te Pista te Kedlevayi.’ 15Ne zutun ibpeehè din keniyu is meluag he rug̵u ziyà te zivavew zutun he zaan en nehimani. Ne zutun niw teg̵enaha is idlavung tew.”

16Ne haazà is menge sumusundan din, migenat dan pehendutun te inged ne langun duen te migkag̵i ni Jesus ne iyan en iyan neehè dan ne zutun dan teg̵enaha is idlavung te Pista te Kedlevayi.

17Ne hein mezukilem dutun, si Jesus wey is sepulù wey zezuwa he sumusundan din, nekeuma zan dutun te valey. 18Ne te ziyè dan te lemisahan su kemulu zan pa egkaan, migkag̵i si Jesus te, “Duen egkeg̵iyen ku keniyu. Iyan is: sevaha keniyu kayi te ebpemengaan guntaan he zuma ku is ed-akal kedì wey a mehimetayi.” 19Ne zutun utew nengeseeng haazà is menge sumusundan ni Jesus, ne is kada sevaha zutun, mid-insè dan kandin te, “Kela ke iyan a?” 20Ne ke si Jesus te, “Iyan is sevaha keniyu te sepulù wey zezuwa he ebpekidtug̵en kedì kayi te edtengelan. 21Siak is Kakey te Menusiyà, ebpatey a sumalà te netagnà duen te insurat he Lalag te Megbevayà, iyan, kehizu utew te etew he ed-akal kedì. Meupiya pa ziyà te kandin ke wazè en sikandin ianak.”

Is Kedlavung te Nengazen

(Marcos 14:22-26; Mateo 26:26-30; Lucas 22:15-20; 1 Kurintu 11:23-25)

22Ne zutun te kemulu zan pa egkaan, mid-amì si Jesus duen te supas, ne mibpeselematan din diyà te Megbevayà ne mibpenevìtevì din haazà ne impemeg̵ey zin dutun te menge sumusundan din. Ne ke sikandin te, “Iyan heini lawa ku; keena niw.” 23Ne mid-amì din dutun is tasa he midteg̵uan te vinu he paras ne mibpeselematan din daan te Megbevayà ne induwal zin diyà te kandan. Ne pudu sikandan mid-inum dutun. 24Ne migkag̵i si Jesus te, “Iyan heini lengesa ku he ibpetig̵is wey mepelisi is mezakel he menge etew. Tuus heini te paag̵i te kegkelibri he midtukud te Megbevayà.” 25Benar is egkeg̵iyen ku he puun guntaan, ne kenà ad maan ed-inum kayi te vinu taman dutun te timpu keuzemà he ed-iinumè kiw te veg̵u en he vinu emun edhadì is Megbevayà. 26Ne zutun migkanta zan te kedalig te Megbevayà ne hein nepasad haazà, migawas dan ne midhendiyè dan te vuvungan dutun he egngezanan te Ulivuwan.

Is Kegkeg̵iya ni Jesus te Kebarew ni Pedro

(Marcos 14:27-31; Mateo 26:31-35; Lucas 22:31-34; Juan 13:36-38)

27Ne migkeg̵iyan ni Jesus haazà is menge sumusundan din te, “Is langun te sikiyu, edluyahan is kedsarig niw kediey su zuen insurat he Lalag te Megbevayà he edhenduen te, ‘Edhimetayan ku is ed-elima te menge kerehidu ne ebpekedsusuwey is menge kerehidu.’ 28Iyan,” ke si Jesus, “dutun te kegkevanhew ku, edhuna a keniyu ziyà te prubinsya he Geliliya.” 29Ne zutun migkag̵i si Pedro ziyà te kandin te, “Minsan ke edluyahan is kedsarig kenikew kayi te langun he menge zuma ku ne kenà mulà edluyahan is kedì, minsan egkemenumenu.” 30Ne ke si Jesus diyà te ki Pedro te, “Benar is egkeg̵iyen ku he te kenè pe kan ed-ukarà is manuk te kezezuwa g̵untaan te mezukilem ne ketetelu ke en ebpekekag̵i he kenà a kenikew egkekilala.” 31Ne wazà mevenari zutun si Pedro, ke sikandin te, “Minsan pa ke edhimetayan a zuma kenikew ne kenà a egkag̵i he wazè ku sikew mekilala.” Haazà he lalag, iyan daan pesarig dutun te menge zuma zin he menge sumusundan.

Is Ked-ampù ni Jesus Diyà te Gitsimeni

(Marcos 14:32-42; Mateo 26:36-46; Lucas 22:39-46)

32Ne nekeuma ensi Jesus diyà te lugar he migngezanan te Gitsimeni. Migkeg̵iyan din is menge sumusundan din te, “Kayi kew zà pinuu taman te ebpekepasad a is ed-ampù.” 33Ne zutun miduma zin si Pedro, si Santiago, wey si Juan, ne midlaus dan pa ziyà te egkehunaan dutun. Utew neseeng sikandin wey mibmesakit utew is gehinawa zin. 34Ne migkag̵i sikandin diyà te kandan te, “Utew mesakit is gehinawa ku. Henduen be te egkevidtew en. Kayi kew zà ne kenè kew medlipezeng.” 35Ne midlaus pa sikandin diyà te egkehunaan dutun ne midlangkeb diyà te tanà ne mid-ampù diyà te Megbevayà he ke egkehimu pa ne kenè en kandin ipeseg̵azan haazà is merasey he imbanglis kandin. 36Ke sikandin dutun te ked-ampù din te, “Amey ku, egkehimu nu is minsan hengkey ne emun egkehimu zà ne kenà a kenikew ipehimetayi, iyan, kenà egkesunud is kediey he egkesuatan, kekenà, iyan egkesunud is kenikew.”

37Ne midlikù si Jesus ne neehè din haazà is tetelu he sumusundan din he nemekelipezeng, ne migkeg̵iyan din si Pedro te, “Simon, nekelipezeng ke ve? Wazè nu ve metigker he kenè ka edlipezeng te minsan sengeuras dà?” 38Ne migkeg̵iyan sikandan ni Jesus te, “Kenè kew lipezeng, kekenà, ampù kew wey kew mekelikey te menge penggezam keniyu. Edsunud pezem is gehinawa niw, iyan, meluya is lawa niw.”

39Ne zutun midlikù si Jesus ne mid-uman med-ampù te iyan ded gihapun sikan is in-ampù din. 40Ne zutun midlikuan din haazà is menge sumusundan din, ne neehè din he nemekelipezeng dan su wazè dan maantus is kebpemetpetayi kandan te tuzug. Ne zutun wazè dan egketuenan ke hengkey is ibpengetezengan dan diyà te ki Jesus.

41Ne netegteg̵aad pa zutun midlikuan din en maan sikandan te iketelu, ne ke sikandin diyà te kandan te, “Kemulu kew ves nehurep he ebpemenhidhizeg̵à? Netengkaan en heeyan su iyan en heini timpu he siak is Kakey te Menusiyà, ibpalad a ziyà te menge lalung he etew. 42Enew kew su heini en sikan is etew he ed-akal kedì. Edsinug̵ungen tew.”

Is Kedekepa ki Jesus

(Marcos 14:43-52; Mateo 26:47-56; Lucas 22:47-53; Juan 18:3-12)

43Ne zutun te kemulu pa egkag̵i si Jesus, nekeuma si Hudas is sevaha zuen te sepulù wey zezuwa he menge epustul. Duma zin is menge etew he nengeg̵umeenan te ubpit wey lagkut. Menge sug̵ù haazà te menge punuan te memumuhat wey menge menunudlù te kesug̵uan wey menge ebmeg̵urangen te menge Hudiyu. 44Si Hudas, is giya zan diyà te ki Jesus, migkag̵i zin he zaan ke hengkey is tuus te kegketueni zan ki Jesus, ke sikandin te, “Is etew he edhezekan ku, ne iyan en ebpen-ahaan niw. Ne zekepa niw en ne purungi niw ventayi ke ed-uwiten niw.”

45Ne zutun te kebpekeuma ni Hudas, segugunè din mid-uvayi si Jesus ne migkag̵i te, “Na! Menunudlù!” Ne midhezekan din. 46Ne midakep dutun te menge etew si Jesus ne mibpekehemenan dan te egawed. 47Iyan, sevaha te zaan he etew zutun, midhulavut din is sundang din ne midtibas din is sulug̵uen te lavew he memumuhat ne netenaan haazà diyà te telinga ne nesapla haazà is telinga zin. 48Ne zutun migkag̵i si Jesus diyà te menge edakep kandin te, “Tulisan e ve? Su maan is neg̵umeenan kew te menge ubpit wey lagkut is edakep kedì? 49Kada andew ne zuma a keniyu ziyà te Valey te Megbevayà is ebpenurù ne wazà a keniyu zutun dà dekepa. Iyan, egkeulaula heini su egketuman sikan is menge tagnà diyà te insurat he Lalag te Megbevayà.” 50Ne zutun mid-ewaan sikandin te menge sumusundan din su mibpemelag̵uy zan.

51Ne zuen dutun kenakan he ebmemalung dà is midtelukun ki Jesus. Ne edekepen pezem haazà dutun te menge etew, 52iyan, midleg̵uwat ne nekepelag̵uy sikandin is wazè en seseberen din su netag̵ak haazà is malung din he neg̵ewezan dutun te menge etew.

Is Ked-imbistigaha ki Jesus te Menge Punuan

(Marcos 14:53-65; Mateo 26:57-68; Lucas 22:54,55,63-71; Juan 18:13,14,19-24)

53Mid-uwit dan si Jesus diyà te valey ni Keyipas he iyan lavew he memumuhat, ne zutun netig̵um he zaan is menge punuan he memumuhat, menge menunudlù te kesug̵uan, wey is menge ebmeg̵urangen te menge Hudiyu. 54Ne si Pedro, midtinundug daan asal kenà utew ed-uvey ne ziyè dà medtaman te lama zutun te valey te lavew he memumuhat. Ne mibpinuu sikandin dutun is ed-amur ziyà te menge guwardya ne midhizazang diyà te hapuy zutun. 55Ne is menge punuan te memumuhat wey is langun he nengetig̵um he ebmeg̵urangen te menge Hudiyu, ebpen-ehè dan te salà he id-ulug dan ki Jesus su wey zan mehimetayi, iyan, wazè dan egkeahà. 56Mezakel is menge teruen he midsumbung te menge vaal ni Jesus, iyan, wazà mengeuyun haazà is ebpemenistig̵us dutun.

57Ne zutun duen menge teruen he etew he mid-etuvang ne migkag̵i zan is sumbung dan mehitenged ki Jesus, 58ke sikandan te, “Nezineg dey heeyan he etew he egkag̵i te, ‘Edrundusen ku heini is simbahan he Valey te Megbevayà he vineelan te etew ne seled te tetelu he andew ebpekevangun ad te veg̵u he kenà bineelan te etew,’ ” ke sikandan. 59Iyan, haazà is ebpemenumbung, kenà daan egkeuyun haazà is kedsumbunga zan ki Jesus.

60Ne zutun, midhitindeg diyà te teliwazà is lavew he memumuhat ne migkeg̵iyan din si Jesus te, “Tutuu ve heini is menge sumbung dan mehitenged kenikew? Hengkey is igketavak nu?” 61Ne wazà si Jesus medtavak. Ne mid-uman megkag̵i haazà is lavew he memumuhat te, “Iyan ke ve kes mibpilì he ibpahadì he Anak te Megbevayà?” 62Ne zutun midtavak si Jesus te, “Iyan a, ne keuzemà, egkeahà a keniyu is Kakey te Menusiyà he ziyà ebpinuu te zapit te egkekewanan te Megbevayà. Ne egkeahà a zaan keniyu ziyà te menge g̵apun is ebulus he ebpuun diyà te langit.” 63Ne zutun, haazà is lavew he memumuhat, mibpemindas din is kumbalè din he tuus te utew sikandin nepauk dutun te migkag̵i ni Jesus. Ne ke sikandin te, “Wazè en kinahanglan he zuen pa tistig̵us su sikiyu is langun, 64nezineg niw en is menge lalag din he utew supak te Megbevayà. Hengkey is hukum niw?” Ne zutun migkag̵i is langun he menge zuma zin te zekelà is salà ni Jesus ne kinahanglan he edhimetayan.

65Ne is menge zuma zutun, mid-ilevan dan si Jesus, ne mibedbed dan is mata zin ne midsumbag dan te egkag̵i te, “Tegnaa nu ke hentei is midsumbag kenikew!” Ne migewezan sikandin te menge sundaru zutun ne mibpenabpì dan sikandin.

Is Kebarew ni Pedro

(Marcos 14:66-72; Mateo 26:69-75; Lucas 22:56-62; Juan 18:15-18,25-27)

66Ne si Pedro, kemulu pa zutun te lama te valey ne zuen bahi he sulug̵uen te lavew he memumuhat he mid-uvey ziyà te kandin. 67Ne hein neehè din si Pedro is edhizazang midtengtengan din ne migkag̵i te, “Sikew, duma ka zaan ni Jesus he tigNeserit.” 68Ne si Pedro, mibarew zin haazà te, “Wazè ku hanew ke hengkey is egkeg̵iyen nu ne kenè ku zaan egkesavut ke hengkey is ibpesavut nu.” Ne migawas si Pedro zutun pehendiyà te pultahan te lama. Ne zutun mid-ukarà is manuk. 69Ne neehè en maan si Pedro dutun te vahi ne mid-uman megkag̵i haazà is bahi ziyà te menge etew zutun te, “Heini he etew, duma eni Jesus.” 70Iyan, hein nezineg haazà ni Pedro mibarew zin pa. Ne hein netegteg̵aad dutun, is menge etew he nerivurun dutun, migkeg̵iyan dan si Pedro te, “Tutuu iyan he zuma ke zin. Egketuusan su tigGeliliya ka zaan.” 71Ne zutun, mid-amin-amin si Pedro te sapà, ke sikandin te, “Siluti a te Megbevayà ke tarù is lalag ku he kenè ku egkekilala heeyan he etew is egkeg̵iyen niw.” 72Ne zutundutun mid-ukarà is manuk te ikezuwa ne human metenuzi ni Pedro sikan is migkag̵i kandin ni Jesus he ke sikandin te, “Te kenè pe kan ed-ukarà is manuk te kezezuwa, ne ketetelu ke en ebpekekag̵i he kenà a kenikew egkekilala.” Ne zutun nekelelendag si Pedro su utew mibmesakit is gehinawa zin.

Currently Selected:

Marcos 14: mbbNT

Highlight

Copy