Lucas 6

Is Ebayàbayà te Andew te Kedhimeley

(Lucas 6:1-5; Mateo 12:1-8; Marcos 2:23-28)

1Ne zutun te sevaha he andew he Sebadu, ingkevayà eni Jesus is pemuleey. Ne mibpengetu haazà is menge sumusundan din te menge trigu ne mibpengusu zan haazà ne mibpengaan dan is menge veg̵as dutun. 2Ne zutun duen menge Perisiyu he migkag̵i te, “Maan is edsupaken niw is insug̵ù kenitew te Megbevayà he wazà ibpevaal emun Andew te Kedhimeley?” 3Ne midtavak si Jesus te, “Kenà egkehimu he wazè niw mevasa ziyà te ingkesurat dengan kes mid-ulaula ni Hadì David. Sikandin wey is menge sundaru zin ne nengevitil sikandan. 4Ne wazà sikandin mekesalà minsan midseled diyà te simbahan he Valey te Megbevayà ne migkaan din is egkeenen he insavuk diyà te etuvangan te Megbevayà ne impekaan din daan dutun is menge zuma zin. Supak te kesug̵uan is kegkeena zan dutun su iyan dà ebpekekaan dutun he egkeenen is menge memumuhat.” 5Ne impelaus ni Jesus haazà is lalag din, ke sikandin te, “Siak is Kakey te Menusiyà, iyan a zuen keg̵ehem te egkag̵i ke hengkey is hustu he ed-ul-ulahan te etew emun Andew te Kedhimeley.”

Is Kebewii te Minatey is Menge Ug̵at te Zivaluy he Velad Din

(Lucas 6:6-11; Mateo 12:9-14; Marcos 3:1-6)

6Ne sevaha pa zutun he andew he Sebadu, midseled si Jesus duen te simbahan te menge Hudiyu ne nenurù sikandin. Ne zuen dutun etew he minatey is menge ug̵at te kewanan he velad din. 7Ne zuen dutun menge etew he Perisiyu wey menge menunudlù te kesug̵uan. Ne mibentayan dan si Jesus su ed-ehaan dan ke ebewian din be haazà is etew zutun te andew su Andew te Kedhimeley. Iyan ibpurungi zan ibentayi ki Jesus su wey zan mekeahà te paag̵i te kedsumbunga zan kandin he midsupak din is Andew te Kedhimeley. 8Ne si Jesus, netuenan din ke hengkey is netag̵ù diyà te isip dan ne migkeg̵iyan din haazà is etew he nezeetan is belad din te, “Mama, hitindeg ka ne uvey ka zini.” Ne midhitindeg haazà is etew ne mid-uvey ziyà te ki Jesus. 9Ne migkag̵i si Jesus diyà te menge Perisiyu wey menge menunudlù, ke sikandin te, “Hengkey is isip niw? Hendei zapit is intug̵ut kenitew zuen te kesug̵uan tew he ed-ul-ulahan tew kayi te Andew te Kedhimeley? Iyan be is kedtavang te etew he edlised wey ke ebpesipelahan be is etew? Iyan be is kedtavang te etew su wey kenà mebpatey wey ke edhimetayan be?” 10Ne mibpenlangulangu si Jesus dutun te langun he menge etew ne migkeg̵iyan din haazà is etew he nezeetan is belad din te, “Ketenga nu, Mama, is belad nu.” Ne migketeng dutun te etew is belad din ne segugunà neulii. 11Ne zutun, ne utew nengepauk haazà is menge Perisiyu wey haazà is menge menunudlù te kesug̵uan ne mibpelelelag̵è dan ke hengkey is ed-ul-ulahan dan ki Jesus.

Is Kebpilia ni Jesus Duen te Menge Epustul Zin

(Lucas 6:12-16; Mateo 10:1-4; Marcos 3:13-19)

12Ne sevaha he andew zutun midhendiyà si Jesus te vuvungan su ed-ampù diyà te Megbevayà. Ne mid-ampù sikandin dutun te tivuuk he kezukileman. 13Ne hein nepawà dutun ne miburun din is menge sumusundan din ne mibpilì din dutun is sepulù wey zezuwa ne migeraran din haazà he menge epustul. 14Is menge etew he nengepilì din dutun iyan ensi Simon he sikan is migeraran din ki Pedro, wey sikan is hazi ni Simon he si Andres, si Santiago wey si Juan, si Felipe wey si Bartolome, 15si Mateo wey si Tomas, si Santiago he anak ni Alpiyu wey sevaha he etew he egngezanan ded daan ki Simon he nevantug tenged te utew mezesen sikandin he edtuman te imbilinbilin he kesug̵uan, 16ne elin daan si Hudas he anak te sevaha he etew he egngezanan daan ki Santiago wey is sevaha pa he egngezanan ki Hudas he tigKeriyuti. Heini he Hudas, iyan kes mid-akal ki Jesus.

Is Kebewii te Mezakel he Egkengezeruwan

(Lucas 6:17-19; Mateo 4:23-25)

17Ne hein neipus ni Jesus is kebpilia zin kandan midtupang sikandin duma haazà is nengepilì din. Midteren dan dutun te patag ne nengevurun dutun is mezakel he menge sumusundan din wey is medmezakel he menge etew he ebpemuun diyà te menge inged he sakup te Hudiya wey ziyà te inged he Hiruselim. Ne zuen daan menge etew he ziyà ebpemuun te menge inged he Tiru wey Sidun he ziyà te veyvey te zag̵at. Iyan tuyù dutun te menge etew is ebpemineg dan te kebpenurù ni Jesus wey ebpemevawì daan sikandan kandin te menge zaru zan. 18Ne mibewian din is langun he menge etew he ebpenlelungen te menge mezaat he mulin-ulin zutun ne nengeulian sikandan. 19Ne mezakel zutun te menge etew is egkesuat he egawed diyà te ki Jesus, su zuen gehem he ebpuun diyà te kandin ne pinaag̵i zutun egkengeulian is langun te sikandan.

Is Kegkezeyzey he Egkehuna Wey is Egkehuziyan he Kegkeseeng

(Lucas 6:20-26; Mateo 5:1-12)

20Ne mibpenlangulangu si Jesus diyà te menge sumusundan din ne migkag̵i sikandin te, “Utew kew zeyzey is menge ayuayu su iyan kew en edhedian te Megbevayà!

21Utew kew zeyzey is egkengevitil g̵untaan su ebpekehentayen kew keuzemà te Megbevayà! Utew kew zeyzey is egkengeseeng guntaan su egkengelipey kew keuzemà.

22,23Utew kew zeyzey emun egkuntedahan kew te menge etew ne kenè kew zan edewaten he zuma zan, ne ebpeel-elezan kew zan, ne egkeg̵iyen kew zan he memezaat is ulaula niw tenged te midsundan kew kedì te Kakey te Menusiyà. Iyan heini kes mid-ulaula zengan te menge kepuun dan diyà te menge ebpeneuven te Megbevayà. Medlipey kew utew emun egkehitavù heini ziyan te keniyu su utew zekelà is suhul keniyu te Megbevayà he ebpeebuten niw ziyà te langit.

24Iyan, kehizu niw te menge sepian guntaan su emun egkehanew is menge ketig̵eyunan niw wazè en duma pa he igkelipey niw keuzemà.

25Kehizu niw te layun egkengehantey g̵untaan su zuen timpu keuzemà he egkengevitil kew! Kehizu niw te egkengelipey g̵untaan su zuen timpu keuzemà he utew kew egkengeseeng.

26Kehizu niw te edtehuzen guntaan te langun he menge etew su iyan heeyan mid-ulaula zengan te menge kepuun dan diyà te menge kenà tutuu he ebpeneuven te Megbevayà. Umba edtehuzen kew te menge etew su iring kew zutun te menge kenà tutuu he ebpeneuven ne edsilutan kew zaan te Megbevayà.

Is Ketudluanan Mehitenged te Kebpurungi te Zuma

(Lucas 6:27-36; Mateo 5:43-48; 7:12)

27Iyan egkeg̵iyen ku keniyu te menge sumusundan ku he ebpemineg kediey g̵untaan is: kinahanglan he kenà mezaat is gehinawa niw ziyà te menge kuntada niw, kekenà, purungi niw is egkengeepes keniyu. 28Penubtuvazi niw te meupiya is ebpenrawak keniyu. Iampù te Megbevayà is ebpesipala keniyu. 29Emun duen etew he edtebpien din is enaping nu, ne keg̵iyi nu he egkehimu pa ke elin din edtebpien is divaluy. Ne emun duen etew he edluwasen din is kumbalè nu ne keg̵iyi nu te egkehimu pa ke elin din egkuwaan is kemising nu. 30Emun duen ebuyù diyà te kenikew, iveg̵ey nu ziyà te kandin is ebuyuen din, ne emun duen etew he ed-eg̵awen din is menge azen nu ne kenè nu hewia. 31Is meupiya he egkesuatan nu he ed-ul-ulahan te zuma ziyà te kenikew, ne iyan nu ul-ulaha ziyà te kandan.

32Kenè nu isipa he edsuhulan ka te Megbevayà emun iyan nu zà igkesuat is menge etew he igkesuat ke zan daan su minsan is menge mesinupaken he etew, ne igkesuat dan daan is menge etew he egkesuat kandan. 33Ne ke iyan nu zà ebpurungan is menge etew he ebpurungan ke zan daan, kenè nu isipa he edsuhulan ka te Megbevayà su minsan is menge mesinupaken he etew, ne ebpurungan dan daan is ebpurung kandan. 34Ne emun iyan nu zà ibpeutang is etew he netuenan nu he ebpekevayad te ibpeutang nu kandin, kenè nu isipa he edsuhulan ka te Megbevayà su minsan is menge mesinupaken he etew, ibpeutang dan is menge zuma zan he mesinupaken emun egketuenan dan he ebpekevayad dutun te ibpeutang. 35Iyan penurù ku keniyu is: kenà imezaat te g̵ehinawa niw is menge kuntada niw, kekenà, meupiya is ul-ulaha niw ziyà te kandan. Ke zuen etew he ed-utang keniyu, kenè niw itag̵ù diyà te g̵ehinawa niw he kinahanglan he beyazi kew zin. Emun edtumanen niw heini, igkepeehè niw he menge anak kew te utew lavew he Megbevayà. Ne utew zekelà is suhul zin keniyu su minsan is menge etew he memezaat is ulaula wey is menge kenà ebpeselamat kandin, egkehizuwan din sikandan gihapun. 36Iring te nehizu kenitew is Amey tew he Megbevayà, mehizu kew zaan te zuma niw.

Is Kedsawey

(Lucas 6:37-42; Mateo 7:1-5)

37Kenè kew medsawey te zuma niw ne kenè kew zaan edsewayen te Megbevayà. Is duma niw he nekesalà, kenè niw keg̵iya he meupiya ke edsilutan su wey kenè kew mesiluti te Megbevayà. Mebmepeseyluwen kew te zuma niw ne ebpeseyluwen kew te Megbevayà te menge salè niw. 38Mebeg̵ey kew ziyà te menge zuma niw ne is Megbevayà, ebeg̵ayan kew zin daan. Is kezekelà te ibeg̵ey niw ne iyan daan kezekelà te ibeg̵ey keniyu te Megbevayà. Ne is ibeg̵ey zin keniyu, ne utew subra su henduen te utew edhesheseka wey utew ebpenpenua ne egkepeuluwan pa.”

39Ne impezineg ni Jesus is sempità, ke sikandin te, “Is etew he lakap, kenà egkehimu he ed-ag̵ak te sengelelakap daan, su pudu zan is dezuwa, egkeulug diyà te vitu. 40Is ebpepenurù, kenè din isipa he lavew sikandin he edtehuzen kenà te ebpenurù kandin. Ne emun wazè en igkepenurù kandin te ebpenurù, human ebpekedrepeng sikandan is ebpepenurù wey is ebpenurù.”

41Ne mid-uman megkag̵i si Jesus te, “Sikew is layun edsawey te zuma nu, maan is edsawey ka te salà te zuma nu he iring dà te pesek he nekeahuk te mata zin. Ne sikew, duen nu salà he iring kezekelà te vatang he nekevuta te mata nu ne ebpesegdanen nu? 42Ne egkeg̵iyan nu pa sikandin he id-awè nu haazà is nekepesek kandin, iyan, nepesek mulà is kenikew he mata te vatang he ebpesegdanen nu! Utew tarù is ulaula nu! Ihuna nu iawà is batang he nekepesek kenikew ne human ka ebpekeahà. Ne zutun melemu nu zà igkeawà haazà is nekepesek te zuma nu.”

Is Beg̵as te Pinemula

(Lucas 6:43-45; Mateo 7:16-20; 12:33-35)

43Ne ke si Jesus en maan te, “Is kayu he wazè din erat, meupiya is beg̵as din ne kenà ebpemeg̵as te mezaat. Is kayu he zuen din erat, mezaat is beg̵as din ne kenà ebpemeg̵as te meupiya. 44Egketuusan is kada kayu pinaag̵i te veg̵as din, su is banag ne kenà ebpemeg̵as te paras ne is seg̵à ne kenà ebeg̵as te igira. 45Ne iring din ded daan te etew,” ke si Jesus, “su emun meupiya is ulaula zin he etew, memeupiya zaan is nemeketag̵ù diyà te g̵ehinawa zin; meupiya zaan is kebpemèbè din. Iyan, ke mezaat is ulaula zin he etew, memezaat daan is nemeketag̵ù diyà te g̵ehinawa zin, ne mezaat daan is kebpemèbè din. Su is egketag̵ù te g̵ehinawa te etew, iyan daan egkekag̵i zin.”

Is Dezuwa he Mibevaley

(Lucas 6:46-49; Mateo 7:24-27)

46Ne mid-uman megkag̵i si Jesus te, “Maan is egkeg̵iyen niw he iyan a egalen niw, iyan, kenè niw edtumanen is menge sambag ku keniyu. 47Is minsan hentei he sumusundan ku he nekezineg te menge sambag ku ne ebpezumdumahan din, egkeg̵iyen ku keniyu he 48iring sikandin te etew he ebevaley te melig-en diyà te zivavew te zekelà he vatu. Memezalem is bangbang din he mibpesekan din te tukud. Ne nepasad haazà is baley ne mibagyu ne midalem is wahig ne nesug̵at haazà is baley te meseleg he wahig, iyan, wazà merundus su nevig̵eran man. 49Ne is etew he ebpemineg dà te menge sambag ku, iyan, kenè din ebpezumdumahan, ne iring sikandin te etew he ebevaley ziyà te pantad. Ne hein nepasad din haazà is baley zin ne mibagyu ne nesug̵at haazà is baley zin te utew meseleg he wahig ne nerundus haazà is baley he nepurung mewag̵ey.”

Currently Selected:

Lucas 6: mbbNT

Highlight

Copy