Popular Bible Verses from Lucas 6

Share

Mebeg̵ey kew ziyà te menge zuma niw ne is Megbevayà, ebeg̵ayan kew zin daan. Is kezekelà te ibeg̵ey niw ne iyan daan kezekelà te ibeg̵ey keniyu te Megbevayà. Ne is ibeg̵ey zin keniyu, ne utew subra su henduen te utew edhesheseka wey utew ebpenpenua ne egkepeuluwan pa.”

Ne iring din ded daan te etew,” ke si Jesus, “su emun meupiya is ulaula zin he etew, memeupiya zaan is nemeketag̵ù diyà te g̵ehinawa zin; meupiya zaan is kebpemèbè din. Iyan, ke mezaat is ulaula zin he etew, memezaat daan is nemeketag̵ù diyà te g̵ehinawa zin, ne mezaat daan is kebpemèbè din. Su is egketag̵ù te g̵ehinawa te etew, iyan daan egkekag̵i zin.”

Iyan penurù ku keniyu is: kenà imezaat te g̵ehinawa niw is menge kuntada niw, kekenà, meupiya is ul-ulaha niw ziyà te kandan. Ke zuen etew he ed-utang keniyu, kenè niw itag̵ù diyà te g̵ehinawa niw he kinahanglan he beyazi kew zin. Emun edtumanen niw heini, igkepeehè niw he menge anak kew te utew lavew he Megbevayà. Ne utew zekelà is suhul zin keniyu su minsan is menge etew he memezaat is ulaula wey is menge kenà ebpeselamat kandin, egkehizuwan din sikandan gihapun.

Iring te nehizu kenitew is Amey tew he Megbevayà, mehizu kew zaan te zuma niw.

Kenè kew medsawey te zuma niw ne kenè kew zaan edsewayen te Megbevayà. Is duma niw he nekesalà, kenè niw keg̵iya he meupiya ke edsilutan su wey kenè kew mesiluti te Megbevayà. Mebmepeseyluwen kew te zuma niw ne ebpeseyluwen kew te Megbevayà te menge salè niw.

Iyan egkeg̵iyen ku keniyu te menge sumusundan ku he ebpemineg kediey g̵untaan is: kinahanglan he kenà mezaat is gehinawa niw ziyà te menge kuntada niw, kekenà, purungi niw is egkengeepes keniyu. Penubtuvazi niw te meupiya is ebpenrawak keniyu. Iampù te Megbevayà is ebpesipala keniyu.

Is meupiya he egkesuatan nu he ed-ul-ulahan te zuma ziyà te kenikew, ne iyan nu ul-ulaha ziyà te kandan.

Emun duen etew he edtebpien din is enaping nu, ne keg̵iyi nu he egkehimu pa ke elin din edtebpien is divaluy. Ne emun duen etew he edluwasen din is kumbalè nu ne keg̵iyi nu te egkehimu pa ke elin din egkuwaan is kemising nu. Emun duen ebuyù diyà te kenikew, iveg̵ey nu ziyà te kandin is ebuyuen din, ne emun duen etew he ed-eg̵awen din is menge azen nu ne kenè nu hewia.

Ne ke si Jesus en maan te, “Is kayu he wazè din erat, meupiya is beg̵as din ne kenà ebpemeg̵as te mezaat. Is kayu he zuen din erat, mezaat is beg̵as din ne kenà ebpemeg̵as te meupiya.

Egketuusan is kada kayu pinaag̵i te veg̵as din, su is banag ne kenà ebpemeg̵as te paras ne is seg̵à ne kenà ebeg̵as te igira.