Mako 15

Yesu ku ngʼanda ya milandu ya Pilato

(Mt 27:1-2,11-14; Lk 23:1-5; Yh 18:28-38)

1Mmamawa Akulu ŵa Ansembe na Akulu ŵa Ayuda na Asambizyi ŵa Matetulo, pamo na ayakine wonse ŵa mu Kaupo Kakulu ka Ayuda emvwana. Emumanga Yesu nakuya naye kwa bwanamkubwa Pilato.

2Pilato emukonsha Yesu kuti, “Kansi wewo niwe mfumu ya Ayuda?”

Yesu emuyasuka kuti, “Mwalaŵila mweka.”

3Akulu ŵa Ansembe ŵala emulaŵilila vinyinji. 4Pilato emukonsha soti kuti, “Kansi uliye coyasuka? Ona vonse ivi vakukulaŵilila.”

5Koma aliyoŵayasuke soti kalikonse, tetyo Pilato ekanganishiwa.

Pilato opingula kuti Yesu apayiwe

(Mt 27:15-26; Lk 23:13-25; Yh 18:39—19:16)

6Pa nsita ya cisangalalo ca Pasaka, Pilato enzoŵamangululila yumo wa akayidi wangasenge Ayuda. 7Penze munthu muyakine, zina yake Balaba, enze mu jele pamo na ŵanthu ayakine cikomo coukila boma nopaya ŵanthu. 8Tetyo, winji wa ŵanthu wecizosenga Pilato kuti aŵacitile ceciyoŵelela.

9Pilato aŵakonsha kuti, “Kansi mupangwa kuti nikumangululileni mfumu ya Ayuda iyi?” 10Ecita tetyo cikomo eziŵa Akulu ŵa Ansembe kuti Yesu eyingomutwala cikomo ca luyipilwa. 11Koma Akulu ŵa Ansembe enze ewuzya ŵanthu ŵala kuti aŵamangululile Balaba.

12Tetyo, Pilato eŵakonsha soti kuti, “Lomba mupangwa kuti nicite naye vinji uyu wamukuti ni mfumu ya Ayuda?”

13Eŵilikizya ngako kuti, “Mpanyikeni pa mtanda!”

14Pilato eŵakonsha kuti, “Wayifyanji?”

Koma ŵeve eŵilikizya ngako kuti, “Mpanyikeni pa mtanda!”

15Tetyo, Pilato, popangwa kutemwesha ŵanthu, eŵamangululila Balaba, nolamula kuti Yesu akwapuliwe. Pa vuli pake emutwala kuti akapanyikiwe pa mtanda.

Asilikali ocita Yesu msikila

(Mt 27:27-31; Yh 19:2-3)

16Pamene apo asilikali eloŵesha Yesu ku msumba wa linga wa bwanamkubwa, noleta umba yonse ya asilikali ayawo. 17Emuvwalika covwala cisweta ca mfumu, noluka cisote ca minga noyika pa mutu pake. 18Tetyo, etatika kumupa moni kuti, “Timuwoneni, mfumu ya Ayuda.” 19Enzomunyata mu mutu na ndodo, nomtila mata, nomufukamila momufweya. 20Peciseŵela naye tetyo, emuvula covwala cala, nomuvwalika soti vovwala vake. Emutola, nakuya naye kuti akampanyike pa mtanda.

Yesu opanyikiwa pa mtanda

(Mt 27:32-44; Lk 23:26-43; Yh 19:17-27)

21Pa njila ekumana na munthu muyakine, enzolumpha pamene apo kufuma ku minzi. Uyo munthu enze Simoni wa ku Kilene, na awusu wake ŵa Alekizanda na Lufu. Tetyo, asilikali wala emuyumilizya kuti atakule mtanda wa Yesu. 22Ŵeve eciya naye ku malo woyitiwa Gologota, (niye kuti Malo ŵa Cibade ca Mutu). 23Epangwa kumupa vinyu woyavizya na mule#15:23 vinyu woyavizya na mule enze mankhwala olesha kuŵaŵa mu muŵili kuti amwe, koma yeve ekana.

24-25Emupanyika pa mtanda pa nsita ya 9 koloko mmawa. Eyaŵana vovwala vake nocita mayele kuti awone aliyense vangatolepo. 26Malizu owonesha mlandu wompayila, elemba moteti, Mfumu ya Ayuda.

27Yesu epanyikiwa pamo na vinyankapondo viŵili ciyakine ku kwanja kwendi, na ciyakine ku kwanja ya manzyele. [28 Tetyo, vicitika cendi vecilaŵila Malembo kuti, “Emuyesa muyawo wa ŵanthu ofwaya Matetulo.”]

29Ŵanthu enzopita pamene apo enzomunena. Enzopukusa mitu nolaŵila kuti, “Ha, ni wewolini wenze kuti, ‘Nikapasule Ngʼanda ya Mulungu noyimanga soti pa masiku atatu’? 30Zipulumushe weka, seluka pa mtanda apo!” 31Nawo soti Akulu ŵa Ansembe enzomuseka, owuzyana na Asambizyi ŵa Matetulo kuti, “Epulumusha ŵanthu ayakine, koma okangiwa kulipulumusha yeka! 32Wala enzolaŵila kuti, ‘Nine Mesiya, Mpulumushi Wolayizyiwa, Mfumu ya Aisilayeli,’ aseluke lomba pa mtanda, kuti tiwone nomucetekela!” Nipo epanyikiwa naye pamo wala enzomutafulila.

Kufwa kwa Yesu

(Mt 27:45-56; Lk 23:44-49; Yh 19:28-30)

33Nsita peyikwana 12 koloko mzuŵa, pepona cimfinzi pa calo conse ca pansi kukwana maola atatu. 34 Pa nsita ya 3 koloko mcingulo#15:34 3 koloko mcingulo keno 15:00 hrs, Yesu eŵilikizya ngako kuti, “Eloyi, eloyi, lama sabakatani?” (kulaŵila kuti, “Mulungu wangu, Mulungu wangu, mwanisiyilanji?”)

35Pecimvwa malizu awo ayakine enze peneme pala elaŵila kuti, “Mvwani, oyita Eliya.”

36Tetyo, muyakine ewutuka nosunsa cinkhupule mu vinyu wosasa, nosomeka ku tete nomupa kuti amwe. Ayakine elaŵila kuti, “Panama, tiwone keno Eliya wamene uyo awele kuzomuselusha.”

37Koma Yesu eŵilikizya ngako nosilizyika.

38Cinyula cocingilizya ca mu Ngʼanda ya Mulungu cingʼambika pakati kutatikila kululu mpaka pansi. 39Sentuliyo, mkulu wa asilikali ŵa Ciroma, enze epanama apo kuloleshana naye, ewona kuti Yesu wasilizyika moŵilikizya teti, elaŵila kuti, “Ni cendi uyu munthu enze Mwana wa Mulungu.”

40Patali teti penze pepanama anakazi, enzoyingololesha. Ayakine mwa ŵeve enze Maliya Magadalena, na Salomi, na Maliya anyina ŵa Yakobe mtontho na Yosefe. 41Aŵa anakazi enzomukonkha Yesu penze ku Galileya nomutumikila. Penze soti anakazi ayakine ewela naye kufuma ku Yelusalemu.

Yesu oyikiwa mu manda

(Mt 27:57-61; Lk 23:50-56; Yh 19:38-42)

42-43Pecifwika cingulo kwiwela Yosefe wa ku Alimatiya. Enze munthu wocinzikiwa wa Kaupo Kakulu ka Ayuda, wamene enzolindila Ufumu wa Mulungu. Yenze nsiku ya cisano, yokonzekela nsiku ya Sabata ya Ayuda#15:42-43 yokonzekela nsiku ya Sabata ya Ayuda Ŵeve enzoŵelengela nsiku kutatikila poloŵa zuŵa., tetyo Yosefe etangʼa mtima nakuya kwa Pilato nomusenga kuti amupe citanda ca Yesu. 44Pilato ekanganishiwa kumvwa kuti Yesu wafwa kale. Tetyo, eyita mkulu wa asilikali wala, nomukonsha kuti, “Kansi ni cendi kuti Yesu wafwa kale?” 45Mkulu wa asilikali wala pecizomela, Pilato emulola Yosefe kuti angatole citanda cala. 46Yosefe wala esita nyula ituŵa yosalala, noselusha citanda cala nocivwinikila nyula yamene iyo. Eciyika mmanda wocitosema mu mwala, nokankhilapo cimwala pa mulyango kuvala pa manda. 47Maliya Magadalena, na Maliya anyina ŵa Yosefe, ewona kwecimuyika Yesu.

Currently Selected:

Mako 15: GMN

Highlight

Copy