Mat 28
28
Yesu owuka kwa akufwa
(Mk 16:1-8; Lk 24:1-12; Yh 20:1-10)
1Nsiku ya Sabata ya Ayuda peyipita, Maliya Magadalena na Maliya muyake wala, ewela kuzowona manda ku matemwakuca. 2Movundumukizya kwecita cisungʼuzyo cikulu, nipo mngelo wa Asikulu eseluka kufumila Kululu, nofumyapo cimwala cala, nonkhalapo. 3Mawonekelo ŵake enze ngani ŵa kaleza, na covwala cake cenze cituŵa ngako. 4Pamene apo olindilila ŵala ecita wowa notatika kututumila, noyuma ngani akufwa.
5Koma mngelo wala elaŵila na anakazi ŵala noŵawuzya kuti, “Mwewo musayope. Nuziŵa kuti mupangwa Yesu, wala wecipanyika pa mtanda. 6Muliye muno, yayi. Wawuka ngani mwecilaŵilila. Welani, wonani peenzelala. 7Nkhoyani mmangu, kawuzyeni asambili ŵake kuti, ‘Yeve wawuka kwa akufwa, nipo watangula kuya ku Galileya, mukamuwone kwamene kwala.’ Kumbukani vanakuwuzyani.”
8Apo anakazi ŵala efumako ku manda mmangu, ali na wowa koma soti na cisangalalo cikulu, nowutuka kuyowuzya asambili ŵake.
9Movundumukizya Yesu ekumana nawo nolaŵila kuti, “Moni mwewo anakazi!” Ŵeve ewela pafupi, nokata mendo ŵake, nomulambila. 10Apo Yesu eŵawuzya kuti, “Osayopa. Nkhoyani, mukawuzye enekwasu kuti alute ku Galileya. Akaniwone kwamene kwala.”
Veciyolaŵila olindilila
11Anakazi ŵala penzokuya, ayakine mwa olindilila eciyofwika ku munzi, nowuzya Akulu ŵa Ansembe vonse vecitika. 12Akulu ŵa Ansembe ŵala na Akulu ŵa Ayuda ewungana nopangana nzelu. Ecipa olindilila ŵala ndalama zinyinji, 13noŵawuzya kuti, “Mukolaŵila kuti, ‘Asambili ŵake ewela usiku nakuzoyiŵa citanda sewo tili mtulo.’ 14Tetyo, bwanamkubwa akamvwa ivi, sewo timunkhazike mtima pansi, nipo paŵelini ciliconse cokutamanishani.” 15Olindilila ŵala pecitola zala ndalama, ecita mweciŵawuzyila. Tetyo, mbili iyi yeŵilikila pakati pa Ayuda mpaka lelo.
Yesu otuma asambili ŵake
(Mk 16:14-18; Lk 24:36-49; Yh 20:19-23; Mc 1:9-11)
16Asambili kumi na yumo ŵala eluta ku Galileya ku lupili kwecipangana na Yesu kuti akakumane. 17Pecimuwona emulambila, koma ayakine enzokayika. 18Yesu ewela pafupi noŵawuzya kuti, “Mphamvu zonse zapewa kwa newo Kululu na pano pansi. 19Ni cikomo cake, mwewo nkhoyani ku ŵanthu ŵa mitundu yonse, mukaŵayalushe asambili ŵangu. Mukoŵabatiza mu zina ya Atata, na Mwana, na Mzimu Mtuŵa. 20Mukoŵasambizya kusunga vonse venikulamulilani. Nipo newo nili namwe masiku wonse, mpaka kusila kwa calo cino ca pansi.”
Currently Selected:
Mat 28: GMN
Highlight
Share
Copy
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.
