Mat 27

Yesu otwaliwa kwa Pilato

(Mk 15:1; Lk 23:1-2; Yh 18:28-32)

1Mmawa pekwecica, akulu wonse ŵa ansembe na Akulu ŵa Ayuda emvwana kuti amupaye Yesu. 2Emumanga nakuya naye kwa Pilato, bwanamkubwa wa Ciroma.

Yudasi ozimangilila

(Mc 1:18-19)

3Yudasi, pecimvwa kuti mlandu wamuyipila Yesu, evutika mtima nozyosha ndalama za siliva makumi atatu kwa Akulu ŵa Ansembe na Akulu ŵa Ayuda, 4nolaŵila kuti, “Necimwa potwala munthu wosayifya kuti apayiwe.”

Koma ŵeve emuyasuka kuti, “Sewo tiliye navo nchito. Ivo ni vako.” 5Yudasi ezipoza ndalama zala mu Ngʼanda ya Mulungu nofumapo, nakuyozimangilila.

6Akulu ŵa Ansembe etola ndalama zala nolaŵila kuti, “Matetulo ŵasu otizomezyalini kuyika ndalama mu nkhomwa ya ndalama ya mu Ngʼanda ya Mulungu, pakuti ni za mlopa.” 7Tetyo, emvwana kuti ndalama zala asitile munda kwa owumba manongo, kuti uŵe manda ŵa alwendo. 8Ni cikomo cake mpaka lelo munda wala uyitiwa kuti, “Munda wa mlopa.” 9 Tetyo, vekwanilishiwa vecilaŵila Mneneli Yelemiya kuti, “Etola ndalama za siliva makumi atatu (30) zala, mtengo wecipingula Aisilayeli, 10nositila munda kwa owumba manongo, mwecinilamulila Asikulu.”

Pilato okonsha Yesu

(Mk 15:2-5; Lk 23:3-5; Yh 18:33-38)

11Yesu epanama pa menso pa bwanamkubwa. Pilato emukonsha kuti, “Kansi wewo, niwe mfumu ya Ayuda?”

Yesu eyasuka kuti, “Mwalaŵila mweka.”

12Koma Akulu ŵa Ansembe na Akulu ŵa Ayuda penzomulaŵilila viyipa, Yesu aliyoyasuke kalikonse. 13Apo Pilato emukonsha soti kuti, “Kansi ukumvwalini vonse viyipa vakukulaŵilila?” 14Koma Yesu aliyomuyasuke kanthu, tetyo bwanamkubwa wala ekanganishiwa ngako.

Pilato opingula kuti Yesu apayiwe

(Mk 15:6-15; Lk 23:13-25; Yh 18:39; 19:16)

15Pa nsita ya cisangalalo ca Pasaka, bwanamkubwa enzomangulula mkaidi yumo wenzopangwa ŵanthu. 16Pa nsita iyi penze mkaidi muyakine zina yake Balaba. 17Ŵanthu peciwungana, Pilato eŵakonsha kuti, “Mupangwa kuti nikumangululileni ŵani, Balaba, keno Yesu, woyitiwa kuti Kristu?” 18Elaŵila tetyo cikomo cakuti enzoziŵa kuti Yesu eyingomutwala cikomo ca luyipilwa.

19Pilato peenze nkhezi pa mpando wopingulilapo, mkazi wake emutumizyila malizu, olaŵila kuti, “Musaloŵelepo pa nkhani ya wala munthu wolungama. Newo maloto anitamanisha usiku cikomo ca yeve.”

20Akulu ŵa Ansembe na Akulu ŵa Ayuda etatika kukakamizya ŵanthu kusenga Pilato kuti amangulule Balaba, na kuti Yesu apayiwe. 21Bwanamkubwa wala eŵakonsha kuti, “Mupangwa kuti nikumangululileni ŵani pa aŵa aŵili?”

Ŵanthu ŵala elaŵila kuti, “Balaba.”

22Pilato eŵakonsha soti kuti, “Lomba mupangwa kuti nicite naye vinji Yesu, woyitiwa kuti Kristu?”

Ŵanthu wonse elaŵila kuti, “Apanyikiwe pa mtanda!”

23Pilato eŵakonsha soti kuti, “Eyifyanji?”

Koma ŵanthu ŵala eŵilikizya ngako kuti, “Apanyikiwe pa mtanda!”

24Pilato ewona kuti otolapolini kanthu na kuti ŵanthu enze pafupi kucita vyongo. Tetyo, etola manzi, nosamba ku manja pa menso pa ŵanthu wonse, nolaŵila kuti, “Newo niliye citwa pa imfwa ya uyu munthu. Ivo ni vanu.”

25Ŵanthu wonse elaŵila kuti, “Imfwa iyi mlandu wake uwelele sewo na ŵana ŵasu.” 26Apo Pilato eŵamangululila Balaba, nolamula kuti Yesu akwapuliwe. Pa vuli pake emutwala kuti akapanyikiwe pa mtanda.

Asilikali ocita Yesu msikila

(Mk 15:16-20; Yh 19:2-3)

27Asilikali ŵa bwanamkubwa etola Yesu nakuyoloŵa naye ku linga kwa bwanamkubwa. Ewunganisha umba yonse ya asilikali ayawo nozinga Yesu. 28Emuvula vovwala, nomuvwalika covwala cisweta ca umfumu. 29Emuŵilila cisote ca minga noyika pa mutu pake, nipo emukatisha ndodo ku kwanja kwake kwendi. Notatika kumufukamila, noseŵela naye mwa msikila nolaŵila kuti, “Timuwoneni, mfumu ya Ayuda.” 30Emutila mata, notola ndodo yala nomunyata nayo pa mutu. 31Peciseŵela naye tetyo, emuvula covwala cala nomuvwalika soti vovwala vake. Emutola nakuya naye kuti akampanyike pa mtanda.

Yesu opanyikiwa pa mtanda

(Mk 15:23-32; Lk 23:26-43; Yh 19:17-27)

32Penzofuma mu mzinda wala, ekumana na munthu muyakine, zina yake Simoni wa ku Kilene. Asilikali ŵala emukakamizya kuti atakule mtanda wa Yesu. 33Efwika ku malo oyitiwa kuti Gologota (niye kuti, “Malo ŵa Cibade ca Mutu”). 34Kwamene kwala, ecipa Yesu vinyu woyavizya na ndulu kuti amwe. Koma pecilaŵa, ekana kumwa.

35Pecimpanyika pa mtanda, eyaŵana vovwala vake pocita mayele, 36nonkhala pansi nomulindilila. 37Palulu pa mutu wake elembapo malizu owonesha mlandu wecimupayila kuti, Uyu ni Yesu, Mfumu ya Ayuda. 38Epanyika soti vinyankapondo viŵili, ciyake ku kwanja kwendi, ciyake soti ku kwanja ya manzyele ya Yesu.

39Ŵanthu enzopitapo, enzomutafulila, nozunguzya mitu. 40Enzolaŵila kuti, “Ni wewolini wenze kuti, ‘Nikapasule Ngʼanda ya Mulungu noyimanga soti pa masiku atatu’? Keno niwe cendi Mwana wa Mulungu, zipulumushe noseluka pa mtanda.”

41Akulu ŵa Ansembe na Akulu ŵa Ayuda nawo soti enzomuseka. Enzolaŵila kuti, 42“Epulumusha ŵanthu ayakine, koma okangiwa kulipulumusha yeka. Kansi ni mfumulini ya Aisilayeli? Aseluke pa mtanda lomba kuti timucetekele. 43Enzomekela Mulungu; ampulumushe lomba Mulungu, keno omutemwa cendi. Pakuti elaŵila kuti, ‘Nine Mwana wa Mulungu!’” 44Vinyankapondo vecimupanyika naye pamo navo venzomutafulila.

Kufwa kwa Yesu

(Mk 15:33-41; Lk 23:44-49; Yh 19:28-30)

45Kutatika pa 12 koloko mzuŵa mpaka 3 koloko mcingulo#27:45 3 koloko mcingulo Keno 15:00 hrs, pepona cimfinzi pa calo conse. 46 Lomba nsita peyenze 3 koloko, Yesu eŵilikizya ngako kuti, “Eloyi, Eloyi, lama sabakatani?” kulaŵila kuti “Mulungu wangu, Mulungu wangu, mwanisiyilanji?”

47Pecimvwa malizu awo, ayakine ŵa ŵala enze peneme pala elaŵila kuti, “Munthu uyu oyita Eliya.” 48Tetyo, muyakine ewutuka nakuyotola cinkhupule. Ecisunsa mu vinyu wosasa, nocisomeka ku tete nomupela, kuti amwe.

49Koma ayakine elaŵila kuti, “Panama tiwone keno Eliya awele kuzomupulumusha.”

50Yesu eŵilikizya soti ngako, notwala mzimu wake.

51Pamene apo cinyula cocingilizya ca mu Ngʼanda ya Mulungu cingʼambika pakati na pakati, kutatikila kululu mpaka pansi. Kwenze cisungʼuzyo, nipo myala ingʼambika. 52Manda evulika, nipo atuŵa mtima anyinji enze emwalila kale ewuka kwa akufwa, 53nofuma mu manda. Yesu peciwuka kwa akufwa, ŵeve eloŵa mu Yelusalemu, mzinda wopatulika, ŵanthu anyinji eŵawona.

54Sentuliyo, mkulu wa asilikali ŵa Ciroma, na asilikali ayake ŵenzolindilila Yesu, ewona cisungʼuzyo cala na vonse vecitika. Ecita wowa ngako nolaŵila kuti, “Ni cendi, uyu munthu enze Mwana wa Mulungu.”

55Patali teti penze anakazi anyinji enzololeshesha. Aŵa ni ŵala enzomukonkha Yesu kufuma ku Galileya nomutumikila. 56Pakati pawo penze Maliya Magadalena, Maliya anyina ŵa Yakobe na Yosefe, na anyina wawo wa ŵana ŵa Zebedayo.

Yesu oyikiwa mu manda

(Mk 15:42-47; Lk 23:50-56; Yh 19:38-42)

57Mcingulo pemwifwika, kwiwela munthu muyakine wolemela, ofumila ku Alimateya, zina yake Yosefe. Naye soti enze msambili wa Yesu. 58Yeve eciyosenga citanda ca Yesu kwa Pilato. Pilato eŵawuzya kuti amupe. 59Tetyo, Yosefe etola citanda cala nocivunga mu nyula ituŵa yotelela. 60Eciyociyika mu manda ŵake ŵa lomba ocitoŵaza mu mwala. Egudubulila cimwala pa mulyango, kuti avale pa manda pala, nofumako. 61Maliya Magadalena na Maliya muyake enzepo, enzeenkhala pansi mololeshana na manda ŵala.

Oyika olindilila manda ŵa Yesu

62Pa nsiku yokonkhapo, pa Sabata ya Ayuda, Akulu ŵa Ansembe pamo na Afalisi ewungana noluta kwa Pilato. 63Emuwuzya kuti, “Asikulu, tukumbuka mwenzolaŵilila wala munthu wa wenye akali moyo kuti, ‘Pakayopita masiku atatu, nikawuke.’ 64Pingulani kuti akolindililapo pa manda ŵake mpaka mazo. Tuyopa kuti asambili ŵake angawele kuzoyiŵa citanda cala, nakuzowuzya ŵanthu kuti, ‘Wawuka kwa akufwa.’ Pakuti wenye uyu uzaŵe uyipa kupula wotatika.”

65Pilato eŵawuzya kuti, “Olindilila muli nawo. Nkhoyani, kalindilileni pa manda ngani mwamuziŵila.” 66Ŵeve eluta, novala pa manda ngako noyikapo ciziŵikilo pa cimwala covalilapo. Esiya asilikali olindilila pamene pala.

Currently Selected:

Mat 27: GMN

Highlight

Copy