Luka 10

Yesu otuma ŵanthu

1Pa vuli pake Asikulu esalula ŵanthu ayakine makumi asanu na aŵili na mphuzyo ziŵili (72), noŵatuma aŵili–aŵili kuti atangule kuya ku munzi uliwonse na ku malo kulikonse yeve kwenze kuti aluteko. 2Tetyo, eŵawuzya kuti, “Munda ni ukulu, koma oseŵenza ni atontho. Ni cikomo cake lombani mosavupa kwa Asikulu ŵene ŵa munda kuti atumizye anyanchito mu vitwalo vake. 3Nkhoyani lomba. Nukutumani nga nimwe ŵana ŵa mbelele pakati pa mimbulu. 4Osatola cikwama ca ndalama, keno thumba ya pa ulwendo, keno soti nkhwaŵilo za pa mbali yayi. Osapanama nsita itali kuti mutwale moni pa njila.

5“Mu ngʼanda iliyonse mwatimukaloŵe, mukatatike mwalaŵila kuti, ‘Mtendele unkhale mu ngʼanda muno.’ 6Keno mu ngʼanda mwala muli munthu wopangwa mtendele, mtendele wamwalaŵila uŵe pali yeve. Koma keno muliye munthu wopangwa mtendele, mtendele wamene wamwalaŵila ukawelele kwanu. 7Muŵe mu ngʼanda yamene iyo. Mulye na kumwa vakukupani, pakuti nyanchito owamila malipilo ŵake. Osafumako kwa mwafwikila nakuyoloŵa mu ngʼanda ziyakine yayi.

8“Mukaloŵa mu munzi, ŵanthu nomupokelani, mulye vatiakuwamyileni. 9Mupozye ŵanthu wonse olwala ali mu munzi mwala, nipo muŵauzye kuti, ‘Lomba Ufumu wa Mulungu uli pafupi.’ 10Koma ku munzi kwatimukaloŵe, ŵanthu osamupokelelani luweme, mukayende mu misewu ya munzi wala, nolaŵila kuti, 11‘Tukukunkhumulilani cukanga lukungu ya mu munzi mwanu muno yenze yakangamila ku mendo kwasu. Koma ziŵani kuti Ufumu wa Mulungu uli pafupi.’ 12Nukuwuzyani, kuti pa nsiku yala, cikaŵeko luweme cipingulo ku Sodomu kupula munzi uyo.”

Shamu ya minzi yosayaluka mitima

(Mt 11:20-24)

13“Uli na shamu, wewo Kolazini! Uli na shamu, wewo Betisaida! Cikomo ca mphamvu zicitika mwa mwewo, kuti zicitikila ku Tilo na ku Sidoni, sembe ŵanthu ŵawo evwala kale viguduli nozitila milota, kuwonesha kuti ayaluka mtima. 14Koma kuzaŵe luweme kupula Tilo na Sidoni, nopula mwewo pa nsiku ya cipingulo. 15Nipo wewo Kapilinamu, uyezya kuti akakukwezeke mpaka Kululu? Yayi, akakuselushe mpaka ku Gehena.”

16Yesu ewuzya asambili ŵake kuti, “Omumvwilani mwewo, omvwila newo wamene. Ukukanani mwewo okana newo wamene. Nipo wonikana newo, okana soti wamene enituma.”

Nthumi zala zuwelako

17Ŵanthu ŵala makumi asanu na aŵili na aŵili ewelako na cisangalalo elaŵila kuti, “Asikulu, cukanga viŵanda venzotimvwila keno tuvilamulila mu zina yanu.”

18Yesu eŵawuzya kuti, “Niwona Satana opona ngani kaleza kufuma Kululu. 19Nakupani mphamvu kuti muwokanda njoka na nkhanila, nocimfya mphamvu zonse za mulwani wala. Paliye kanthu kangakucenekeni. 20Koma osasangalala cikomo cakuti viŵanda mwevicimfya, tetyo muwosangalala kuti mazina ŵanu elembewa Kululu.”

Yesu osangalala

(Mt 11:25-27; 13:16-17)

21Nsita yamene iyo Mzimu Mtuŵa ezuzya Yesu na cisangalalo, mwakuti elaŵila kuti, “Numutembezyani Atata, Asikulu wa Kululu na pansi, na kuti mwifisa ivi vinthu kufuma kwa ŵa nzelu na womvwisha noviwululila ku ŵana atontho. Eee Atata, uku kwenze kupangwa kwanu kuweme.”

22Yesu ewuzya ŵanthu kuti, “Atata eyika vonse mu manja mwangu. Paliye muyakine woziŵa Mwana kupatula Atata ŵeka. Paliye soti muyakine woziŵa Atata kupatula Mwana yeka, nipo wamene Mwana wala wakupangwa kumuwululila.”

23Pa vuli pake peenze ŵeka, Yesu ewuzya asambili ŵake kuti, “Ni woshukishiwa menso owona vamuwona. 24Kulaŵila vyendi aneneli anyinji na mafumu anyinji enze epangwisha kuwona vamuwona mwewo, koma aliyoviwone. Epangwisha kumvwa vamukumvwa mwewo, koma aliyovimvwe.”

Linganizyo ya Msamaliya wa lusungu

25Kaswili wa Matetulo epanama kuti ayese Yesu. Emukonsha kuti, “Asambizyi, kansi nicite vinji kuti niŵe na moyo wosasila?”

26Yesu elaŵila kuti, “Kansi mu Matetulo mwilembewa vinji? Muŵelengamo votyani?”

27 Yeve eyasuka kuti, “Uwotemwa Leza, Mulungu wako, na mtima wako wonse, na moyo wako wonse, na mphamvu zako zonse, na nzelu zako zonse, nipo uwotemwa muyako ngani mwaulitemwela wemwine.”

28Yesu elaŵila kuti, “Mwayasuka luweme. Mukacite ivo nipo muzaŵe na moyo.”

29Koma munthu wala popangwa kuliwonesha kuti ni wolungama, ekonsha Yesu kuti, “Nga muyangu uyo ni ŵani?”

30Apo Yesu elaŵila kuti, “Penze munthu enzokuya ku Yeliko kufumila ku Yelusalemu. Pa njila anyankapondo emukata. Emuvula vovwala, nomunyata, nomusiya ali thasa, ali pafupi kufwa.

31“Wansembe enzopita pa njila yamene iyo. Peciwona munthu wala, eyingolambalala. 32Cimozi–mozi Mlevi efwika pa malo pamene apo, nipo peciwona munthu uyo, naye soti eyingolambalala.

33“Koma Msamaliya enze pa ulwendo wake, efwika soti pa malo pamene apo. Pecimuwona munthu wala, ecimvwa lusungu. 34Eluta penze wocitiwa, notila mankhwala pa vilonda vake novimanga. Pecicita tetyo emukwezeka pa bulu wake, nakuya naye ku ngʼanda ya alwendo, nomusamalila luweme.

35“Mmawa mwake efumya ndalama ziŵili za siliva, nozitwala ku mwine wa ngʼanda ya alwendo. Emuwuzya kuti, ‘Msamalileni luweme, nipo mukataya ndalama ziyakine, za pa mbali nizenikuwezyeleni powela.’”

36Tetyo, Yesu ekonsha kaswili wa Matetulo wala kuti, “Kansi mwewo mulingililapo tyani? Pa ŵanthu atatu aŵa, ni ŵani muyake wa munthu uyu wecikata anyankapondo?”

37Yeve elaŵila kuti, “Wala emucitila lusungu.”

Apo Yesu emuwuzya kuti, “Nkhoyani lomba, namwe mukocita cimozi–mozi.”

Yesu otandala kwa Malita na Maliya

38Yesu na asambili ŵake peenze pa ulwendo wawo, eloŵa mu munzi uyakine. Mwanakazi, zina yake Malita, emupokela ku ngʼanda kwake. 39Yeve enze na msaza wake, zina yake Maliya, wamene ecizokuwa pansi pa mendo ŵa Asikulu, na kumvwa malizu ŵake. 40Koma Malita enze etangwanika na nchito zinyinji. Tetyo, eciya kwa Yesu elaŵila kuti, “Asikulu, muyikakolini nzelu kuti msaza wangu uyu onilekelela neka nchito yowamya cakulya ca alwendo? Muwuzyeni azeaniyavye.”

41Asikulu elaŵila kuti, “Malita, Malita wewo, ukopewa novutika na vinthu vinyinji, 42koma cupangwika ni cinthu cimo tyala. Maliya niye wasalula cinthu copula, koma ici paliye munthu muyakine angampoke yayi.”

Currently Selected:

Luka 10: GMN

Highlight

Copy