Yh 19

1Pamene apo Pilato elamula kuti atole Yesu nomukwapula. 2Lomba asilikali eŵila cisote ca minga noyika pa mutu pake. Emuvwalika covwala cisweta ca ufumu, 3nakuza kwa yeve nolaŵila kuti, “Timuwoneni, mfumu ya Ayuda!” Nipo etatika kumunyata.

4Pilato efuma soti nowuzya umba yala kuti, “Wonani, numufumya kuti muziŵe kuti numufwanalini na mlandu uliwonse.” 5Yesu pecifuma, wovwala cisote ca minga cala na covwala cisweta cala, Pilato elaŵila kuti, “Munthu wala uyu.”

6Akulu ŵa Ansembe na asilikali ŵa ku Ngʼanda ya Mulungu ŵala peciwona Yesu, eŵilikizya kuti, “Mpanyikeni! Mpanyikeni!”

Pilato eŵawuzya kuti, “Mutoleni mukamupanyike. Newo numufwanalini na cikomo.”

7Ŵanthu ŵala elaŵila kuti, “Sewo tili na tetulo, nipo pokonkha tetulo yala owamila kufwa, cikomo enze kuti, ‘Nine Mwana wa Mulungu.’”

8Pilato pecimvwa malizu aŵa, ecita wowa ngako. 9Lomba eloŵa soti mu linga ya bwanamkubwa wala nokonsha Yesu kuti, “Kansi wewo, kwanu ni kuni?” Koma Yesu aliyoyasuke kanthu. 10Pamene apo Pilato emukonsha kuti, “Uniyasukalini? Kansi uziŵalini kuti newo nili na mphamvu yokumangulula, nipo soti mphamvu yokupanyika?”

11Yesu elaŵila kuti, “Kuti aliyokupeni mphamvu iyo Mulungu, sembe muliyonkhale nayo mphamvu iyo. Ni cikomo cake wanitwala kwa mwewo ali na ciyipa cikulu kopula.”

12Pecimvwa malizu aŵa, Pilato epangwa cendi kumumangulula Yesu. Koma Ayuda eŵilikizya kuti, “Mukamumangulula uyu, nimwelini muyawo wa Mfumu ya ku Roma. Aliyense woliyesa mfumu, ni woukila Mfumu ya ku Roma kwala.” 13Pilato pecimvwa ivi, efumya Yesu, nakuyonkhala pa mpando wopingulila milandu, pa malo woyitiwa “Nsaka ya Myala” (pa Ciyuda olaŵila kuti “Gabata.”) 14Yenze nsiku yokonzekela cisangalalo ca Pasaka, nipo kuti nsita yenze ngani 12 koloko mzuŵa.

Pilato ewuzya Ayuda kuti, “Iyi Mfumu yanu.”

15Koma ŵeve eŵilikizya kuti, “Mufumyeni! Mufumyeni! Nkhoyani mukamupanyike pa mtanda!”

Pilato eŵakonsha kuti, “Nipanyike mfumu yanu kansi?”

Akulu ŵa Ansembe elaŵila kuti, “Tiliye mfumu iyakine yayi, koma Mfumu ya ku Roma yeka.” 16Pamene apo Pilato etwala Yesu kwa ŵeve kuti akamupanyike pa mtanda.

Yesu opanyikiwa pa mtanda

(Mt 27:32-44; Mk 15:21-32; Lk 23:26-43)

Asilikali ŵala emutola Yesu. 17Efuma naye yeve alutakule mtanda wake, nakuya ku malo oyitiwa “Malo ŵa Cibade ca Mutu” (pa Ciyuda olaŵila kuti “Gologota”). 18Kwamene uko emupanyika pa mtanda. Epanyika soti ŵanthu ayakine aŵili, muyakine ku kwanja yake kwendi, muyakine ku kwanja yake ya manzyele, Yesu pakati.

19Pilato eyikapo colembewa pa mtanda pala. Elembapo kuti, Yesu wa ku Nazaleti, Mfumu ya Ayuda. 20Ayuda anyinji eŵelenga colembewa cala, cikomo pa malo pecipanyikiwapo Yesu penze pafupi na mzinda wa Yelusalemu. Colembewa cala cilembewa mu vilaŵilo va Ciyuda, Ciroma, nipo soti Cigiliki.

21Akulu ŵa Ansembe ewuzya Pilato kuti, “Osalemba kuti ‘Mfumu ya Ayuda’ yayi, koma kuti, ‘Yeve enzolaŵila kuti, “Nine mfumu ya Ayuda.”’”

22Koma Pilato elaŵila kuti, “Vanalemba, nalemba kwasila mphela.”

23Asilikali ŵala pecipanyika Yesu, etola covwala cake, nociyaŵa pa nayi msilikali aliyense na citwa cake. Etola soti mkhanjo wake wa mkati. Mkhanjo wala wenze wolukiwa kutatikila palulu mpaka pansi, paliye msono. 24 Lomba asilikali ŵala ewuzyana kuti, “Osati tiungʼambe, koma ticite mayele kuti tiwone uŵe wa ŵani.” Viyenda tetyo kuti visimikizyike vecilaŵila Malembo kuti,

“Eyaŵana vovwala vangu,

nipo mkhanjo wangu ewucitila mayele.”

Vecicita cendi asilikali ŵala.

25Pafupi na mtanda wa Yesu penzopaname anyina ŵake, na mkwawo wa anyina ŵake ŵala, na Maliya mwanakazi wa Kleopa, na Maliya Magadalena. 26Yesu peciwona anyina ŵake, na msambili wenzotemwa Yeve ngako ali peneme pafupi, ewuzya anyina wake kuti, “Mama, lomba uyu niye mwana wanu.” 27Ewuzya soti msambili wala kuti, “Lomba aŵa niye anyoko.” Nipo kutatikila pamene apo, msambili wala eŵatola anyina ŵala kuya nawo kuyonkhala ku ngʼanda kwake.

Kufwa kwa Yesu

(Mt 27:45-46; Mk 15:33-41; Lk 23:44-49)

28Yesu eziŵa kuti lomba vonse vakwanilishiwa. Lomba kuti vikwanilishiwe vecilaŵila Malembo, yeve elaŵila kuti, “Nili na njota.” 29Pamene apo penze nongo yozuzya na vinyu vosasa. Asilikali ŵala esunsa cinkhupule mu vinyu wosasa wala, nocisomeka ku kamuti ka hisope, nocifwisha pa kamwa pake. 30Yesu pecipokela vinyu wosasa wala elaŵila kuti, “Vonse vakwanilishiwa.” Nipo esondoka mutu notwala mzimu.

Omulasa Yesu mu maŵambo

31Yenze nsiku yokonzekela Sabata. Akulu ŵa Ayuda aliyopangwe kuti mitembo yala iŵe pa mtanda pa nsiku ya Sabata, cikomo Sabata iyo yenze nsiku ikulu. Ni cikomo cake eciyosenga Pilato kuti alamule kuti atyole mendo ŵa ŵanthu wopanyikiwa ŵala, noŵafumyapo. 32Lomba asilikali ewela, notyola mendo ŵa yumo wa ŵala aŵili epanyikiwa pamo na Yesu. Ecita soti cimozi–mozi na muyake wala. 33Koma pecifwika kwa Yesu, powona kuti wafwa kale, aliyotyole mendo ŵake. 34Koma yumo wa asilikali ŵala emulasa mu maŵambo mwake na mkondo, nsita iyo mwifuma milopa na manzi. (35Wala ewona ivi niye ovicitila umboni, kuti namwe soti mucetekele. Umboni wala ni wa vyendi, nipo mwine wake wala oziŵa kuti vakulaŵila ni vyendi.) 36 Ivi vicitika teti kuti vizulikizyiwe vecilaŵila Malembo kuti, “Azeatyolewelini fupa iliyonse.” 37 Nipo payakine soti Malembo olaŵila kuti, “Ŵanthu akokuzomulolesha wecilasa ŵeve.”

Yesu oyikiwa mu manda

(Mt 27:57-61; Mk 15:42-47; Lk 23:50-56)

38Pa vuli pake Yosefe wa ku Alimatiya esenga Pilato kuti amuzomezye kufumya citanda ca Yesu. (Yosefe wala enze msambili wa Yesu, koma mofisika, cikomo coyopa Akulu ŵa Ayuda.) Lomba Pilato pecimuzomezya, yeve eciyofumyapo citanda cala. 39Kwiwela soti Nikodimo, wala enzeewela kwa Yesu usiku potatika pala. Yeve ewela na mafuta wonunkhila ŵa mule oyavizya na aloye, kulemela kwake kwenze ngani makilogilamu makumi atatu (30). 40Ŵanthu aŵili ŵala etola citanda ca Yesu, nocivunga mu nyula za malilo pamo na vonunkhila vala, kulingana na mwambo wa malilo ŵa Ciyuda. 41Yesu kwecipanyikiwa kwenze kufupi na ku munda. Nipo kwala kwenze malo ŵa lomba, kwenze kukaliyoyikiwa munthu. 42Lomba pakuti yenze nsiku yokonzekela Sabata, nipo manda ŵala enze pafupi, eyika Yesu kwala.

Currently Selected:

Yh 19: GMN

Highlight

Copy