Yh 18

Yesu okatiwa

(Mt 26:47-56; Mk 14:43-50; Lk 22:47-53)

1Yesu pecilaŵila ivi, eluta na asambili ŵake ku silya kwa mshambo woyitiwa kuti Kediloni. Kwala kwenze munda, nipo eloŵamo mwala. 2Yudasi naye, etwala Yesu kwa alwani wake, enzoŵaziŵa malo ŵala, pakuti Yesu enzopitako kanyinji–kanyinji na asambili ŵake. 3Yudasi wala etola umba ya asilikali ŵa Ciroma, pamo na asilikali ŵa ku Ngʼanda ya Mulungu ŵecituma Akulu ŵa Ansembe na Afalisi. Ŵeve eluta ku munda kwala na nyale na myenje na vida va nkhondo.

4Yesu eziŵilatu vonse venzekuzomuponela. Tetyo, yeve epanama patuŵa, noŵakonsha kuti, “Kansi musakila ŵani?”

5Emuyasuka kuti, “Tusakila Yesu wa ku Nazaleti.”

Yesu elaŵila kuti, “Ni newo, nilipo.”

Yudasi, womutwala kwa alwani ŵake ŵala, enze nawo pamene apo. 6Yesu peciŵayasuka kuti, “Ni newo, nilipo,” ŵeve ewelela ku vuli nopona pansi.

7Yesu eŵakonsha soti kuti, “Kansi musakila ŵani?”

Ŵeve ŵala elaŵila kuti, “Tusakila Yesu wa ku Nazaleti.”

8Yesu elaŵila kuti, “Nakuwuzyani kuti ni newo, nilipo. Lomba keno musakila newo, ŵalekeni aŵa asambili ŵangu alute.” 9(Ecita tetyo kuti vikwanilishiwe vecilaŵila kale yeve kuti, “Niliyotayepo na yumo kumo mwa ŵemwinipa.”)

10Simoni Petulo enze na cingwandali, ecisolola, notema muzya wa Mkulu wa Ansembe, mpaka kumutenda kwatu ya ku kwanja kwendi. Muzya ŵala zina yake enze Malikusi. 11Pamene apo Yesu ewuzya Petulo kuti, “Wezya cingwandali cako mu cinyina. Kansi ukuti nisamwe nthumo ya manzunzo ŵecinipa Atata?”

Yesu kwa Anasi

(Mt 26:57-58; Mk 14:53-54; Lk 22:54)

12Umba ya asilikali ŵa Ciroma yala, pamo na citangulila ŵawo, nipo soti asilikali ŵa Ciyuda, ekata Yesu nomumanga. 13Potatika eluta naye kwa Anasi, cikomo enze sivyala wake wa Kayafa, enze Mkulu wa Ansembe caka cala. 14Kayafa wala niye ewuzya ayake kuti ni ciweme kuti munthu yumo afwe mu malo mwa ŵanthu wonse.

Petulo okana Yesu

(Mt 26:69-70; Mk 14:66-68; Lk 22:55-57)

15Simoni Petulo na msambili muyakine ekonkha Yesu. Msambili muyakine wala enze woziŵika kwa Mkulu wa Ansembe. Lomba yeve eloŵa pamo na Yesu mu luŵanza ya ngʼanda ya Mkulu wa Ansembe wala. 16Koma Petulo epanama pa mulyango kunja. Msambili muyakine wala, enze woziŵika, efuma nakuyolaŵila na msimbi olonda pa mulyango, nomulovya Petulo wala.

17Msimbi wala ekonsha Petulo kuti, “Kansi mwewo nimwe ŵamolini wa asambili ŵa munthu uyu?”

Yeve elaŵila kuti, “Newo? Yayi.”

18Anyanchito pamo na asilikali ŵa Ciyuda ŵala epanama pecikozya mulilo noyota, cikomo kwenze kwizizila. Petulo naye soti epanama pamene apo noyota nawo mulilo wala.

Mkulu wa Ansembe okonsha Yesu

(Mt 26:59-66; Mk 14:55,64; Lk 22:66-71)

19Lomba Mkulu wa Ansembe ekonsha Yesu va asambili ŵake, nipo soti va venzosambizya yeve. 20Yesu elaŵila kuti, “Newo nenzolaŵila mosafisama pa menso pa ŵanthu wonse. Nenzosambizya mu makacisi wonse, nipo soti mu Ngʼanda ya Mulungu, mwenzoungana ŵanthu wonse. Niliyolaŵile kanthu kofisa yayi. 21Nga lomba munikonshelanji? Konshani ecimvwa venenzoŵauzya. Ŵeve ŵala oziŵa venenzolaŵila.”

22Pecilaŵila ivi, yumo mwa asilikali enze peneme pamene apo enyata Yesu mbama imo, elaŵila kuti, “Ungayasuke tetyo kwa Mkulu wa Ansembe?”

23Yesu emuyasuka kuti, “Keno nalaŵila moyifya, citomole coyifya ico. Keno nalaŵila vyendi, uninyatila vinji?”

24Anasi etumizya Yesu ali womangiwa kwa Kayafa, Mkulu wa Ansembe.

Petulo okana soti Yesu

(Mt 26:71-75; Mk 14:69-72; Lk 22:58-62)

25Simoni Petulo enzeakalipeneme oyota nawo mulilo. Lomba ayakine emukonsha kuti, “Kansi wewo soti niwelini yumo mwa asambili ŵa munthu wala?”

Petulo ekana, elaŵila kuti, “Yayi.”

26Muzya muyakine wa Mkulu wa Ansembe, mkwawo wa munthu wala wecitenda kwatu Petulo, emukonsha kuti, “Kansi ni wewolini wanawona wenze naye mu munda mwala?”

27Petulo ekana soti, nipo nsita iyo kombwe elila.

Yesu ku linga ya Pilato

(Mt 27:1-2,11-14; Mk 15:1-5; Lk 23:1-5)

28Emutola Yesu kufuma kwa Kayafa kuya naye ku linga ya bwanamkubwa. Mwenze mu matemwakuca. Akulu–akulu ŵa Ayuda aliyoloŵemo nawo mu linga ya bwanamkubwa wala, kuyopa kuti angayifyiwe, pakuti enzopangwa kulya malyelelo ŵa Pasaka.

29Motetyo, Pilato efuma noŵakonsha kuti, “Mwamufwana mlandu wanji munthu uyu?”

30Ŵeve elaŵila kuti, “Kuti aliyocite ciyipa uyu sembe tiliyomulete kwanu yayi.”

31Tetyo, Pilato eŵawuzya kuti, “Mutoleni lomba mwewo, mukamupingule pokonkha Matetulo ŵanu.”

Koma Ayuda ŵala elaŵila kuti, “Sewo tuzomelezyewalini kupaya munthu yayi.” 32(Vicitika tetyo kuti vikwanilishiwe vecilaŵila Yesu va imfwa yake.)

33Pilato eloŵa soti mu linga yake yala, noyita Yesu. Emukonsha kuti, “Kansi wewo, niwe mfumu ya Ayuda?”

34Yesu elaŵila kuti, “Kansi mulaŵila ivi mwa mwewo mweka, keno ayakine akuwuzyani va newo?”

35Pilato elaŵila kuti, “Newo nine Muyuda kansi? Ŵanthu ŵa mtundu wako, na Akulu ŵa Ansembe, niye akuleta kwa newo. Wecita vinji?”

36Yesu eyasuka kuti, “Ufumu wangu ni wa pano pansilini yayi. Ufumu wangu kuti ni wa pano pansi, sembe asambili ŵangu awusha nkhondo kuti nisatwaliwe kwa Akulu ŵa Ayuda. Koma yayi, Ufumu wangu ni wa pano pansilini.”

37Pilato elaŵila kuti, “Lomba niye kuti niwe mfumu cendi ŵati?”

Yesu elaŵila kuti, “Mwalaŵila mweka kuti nine mfumu. Newo niwela pano pansi nipo nivyalika kuti nizecitile umboni vyendi. Aliyense wa vyendi okumvwa malizu ŵangu.”

38Pilato emukonsha kuti, “Vyendi ni vinji?”

Pilato olamula kuti Yesu apayiwe

(Mt 27:15-31; Mk 15:6-20; Lk 23:13-25)

Pilato pecilaŵila malizu aŵa, efuma soti, noŵawuzya kuti, “Newo munthu uyu numufwanalini na cikomo ciliconse. 39Koma pokonkha mwambo wanu, pa nsita ya cisangalalo ca Pasaka nukumangululilani mkaidi yumo. Lomba kansi mupangwa kuti nikumangululileni ‘mfumu ya Ayuda’ iyi?”

40Pamene apo ŵeve eŵilikizya kuti, “Wamene uyo yayi, koma Balaba.” (Balaba wala enze cinyankapondo.)

Currently Selected:

Yh 18: GMN

Highlight

Copy