Yh 17
17
Yesu olilombela
1Yesu pecilaŵila ivi, elolesha Kululu nolaŵila kuti, “Atata, yafwika nsita. Cinzikani Mwana wanu, kuti Mwana wala acinzike mwewo. 2Pakuti mwemupa ulamulilo pa ŵanthu wonse, kuti atwale moyo wosasila ku ŵanthu wonse ŵemwimupa. 3Moyo wosasila wala ni wakuti akuziŵeni mwewo, kuti mwewo mweka nimwe Mulungu ngaye–ngaye, nipo aziŵe soti Yesu Kristu wemwituma. 4Nakucinzikani pano pansi posilizya nchito yemwinipa. 5Nipo lomba mwewo Atata, municinzike pa menso panu na ulemelelo wala wenenze nawo kwa mwewo pecenze cikaliyolengewa calo ca pansi.”
Yesu olombela asambili ŵake
6“Ŵamwisalula mwa ŵanthu wonse nonipa newo, naŵaziŵisha va mwewo na unkhalo wanu. Enze ŵanu, mwewo mwiŵatwala kwa newo, nipo esunga malizu ŵanu. 7Lomba oziŵa kuti vonse vemwinipa vufumila kwanu. 8Pakuti neŵapa malizu ŵemwiniwuzya nipo aŵapokela. Oziŵa cendi kuti nifumila kwanu, nipo kuti ni mwewo mwinituma.
9“Newo nuŵalombela. Nulombelalini ŵanthu ayakine wonse, koma nulombela ŵala ŵemwinipa, cikomo ni ŵanu. 10Ŵangu wonse ni ŵanu nipo ŵanu wonse ni ŵangu. Tetyo, nucinzikiwa mwa ŵeve. 11Nukuza kwanu. Newo nunkhalalini soti pano pansi yayi, koma ŵeve onkhala pano pansi.
“Atata atuŵa, ŵasungeni aŵa mu zina yanu yemwinipa, kuti aŵe ŵamo ngani sewo. 12Penenze nawo pamo, nenzoŵasunga na mphamvu ya zina yanu, yemwinipa. Niŵasunga luweme, nipo paliye na yumo kumo etayika, kupatulako wala yeka enzekuyotayika, kuti vikwanilishiwe vecilaŵililatu Malembo.”
13Mu malombelo ŵake Yesu elaŵila kuti, “Lomba nukuza kwa mwewo. Nulaŵila ivi panili pano pansi, kuti cisangalalo cangu ciŵe soti cozula mwa ŵeve. 14Neŵasambizya malizu ŵanu. Ŵanthu omekela va pano pansi otinkha ŵala ŵasakatizyana nawo, cikomo ŵeve ni ayawolini, ngani newo nine muyawolini. 15Nusengalini kuti muŵafumyepo pano pansi yayi, koma kuti muŵacinjilizye kwa Muyipa wala. 16Ŵeve ni ŵa calolini ca pansi, ngani newo soti nililini wa calo ca pansi. 17Ŵapangeni kuŵa ŵanthu atuŵa na lizu yanu. Lizu yanu ni ya vyendi. 18Ngani mwemwinitumila newo pano pansi, newo soti nuŵatuma pano pansi. 19Nulitwala newo neka ngani nsembe ituŵa pa ŵeve, kuti apangiwe atuŵa pa vyendi vanu.”
Yesu olombela wonse ŵatiazeamucetekele
20“Nulombelalini awo ŵeka yayi, koma soti ŵatiazeanicetekele cikomo ca malizu ŵawo. 21Nuŵalombela kuti ŵeve wonse aŵe ŵamo. Ngani mwewo Atata mukuŵa mwa newo, na newo mwa mwewo, nawo soti aŵe mwa sewo. Motetyo, ŵanthu wonse azeacetekele kuti mwenituma. 22Niŵapa ulemelelo wala wemwinipa kuti aŵe ŵamo ngani mwewo na newo tili ŵamo. 23Newo niŵe mwa ŵeve, mwewo mwa newo, kuti aŵe ŵamo ngawo–ngawo. Motetyo, ŵanthu wonse azeaziŵe kuti mwenituma ni mwewo, nipo kuti muŵatemwa ngani mwemunitemwela newo.
24“Atata, nupangwa kuti ŵemwinipa, nawo soti aŵe pamo na newo kwanili. Nupangwa kuti awone ulemelelo wangu wemwinipa, cikomo mwinitemwa calo ca pansi cikaliyolengewa.
25“Atata wolungama, ŵanthu omekela va pano pansi omuziŵanilini yayi, koma newo nukuziŵani, nipo aŵa ali pano, oziŵa kuti ni mwewo mwinituma. 26Niŵaziŵisha va mwewo, nipo nipitilizye kuŵaziŵisha kuti cinthemwa camuli naco mwa newo ciŵe mwa ŵeve, na kuti nane niŵe mwa ŵeve.”
Currently Selected:
Yh 17: GMN
Highlight
Share
Copy
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.
