Yh 13
13
Yesu osambika mendo ŵa asambili ŵake
1Cisangalalo ca Pasaka cenze pafupi, Yesu eziŵilatu kuti nsita yake yafwika yakuti afume pano pansi kuya kwa Atata. Yeve enzoŵatemwa wala enze ŵake pano pansi, nipo eŵatemwa mokwanilisha ngako.
2Lomba Yesu na asambili ŵake enzokulya cakulya ca mcingulo. Apo niye kuti Satana wayika kale mu mtima mwa Yudasi, mwana wa Simoni Isikaliyoti, malingililo ŵakuti atwale Yesu kwa alwani wake. 3Yesu enzoziŵa kuti Atata etwala vinthu vonse mu manja mwake. Enzoziŵa soti kuti efumila kwa Mulungu, nipo kuti owelela kwa Mulungu. 4Tetyo, penzokulya, Yesu epanama, novula mkhanjo wake, notola nyula yopukutila noyimanga mu luwunda. 5Pecicita tetyo etila manzi mu mbale, notatika kusambika mendo ŵa asambili ŵake, noŵapukuta na nyula yecimanga mu luwunda.
6Pamene pecifwika pa Simoni Petulo, yeve elaŵila kuti, “Asikulu, mwewo kunisambika newo ku mendo?”
7Yesu emuyasuka kuti, “Ivi vanucita, uviziŵalini lomba, koma uzeuviziŵe ku nthangu.”
8Petulo elaŵila kuti, “Muzenisambikekolini mendo.”
Yesu emuyasuka kuti, “Keno nikusambikelini, niye kuti cako paliye.”
9Simoni Petulo elaŵila kuti, “Asikulu, keno ni tetyo, musambike osati mendo ŵangu ŵeka, koma soti manja ŵangu na mutu wamene.”
10Yesu emuwuzya kuti, “Munthu wasamba, watuŵa konse. Paliye cikomo catiasambile soti, koma kuyingosamba mendo ŵeka mphela. Lomba mwewo mwatuŵa, koma ni monselini yayi.” (11Yesu enzoziŵa munthu watiazemutwale kwa alwani ŵake, ni cikomo cake elaŵila kuti, “Ni monselini muli atuŵa.”)
12Yesu pecisambika mendo ŵa asambili ŵake, evwala soti mkhanjo wake nakuyonkhala polyela pala. Eŵakonsha soti kuti, “Kansi mwavimvwisha vanakucitilani ivi? 13Pala mwewo munitomola kuti, ‘Asambizyi,’ nipo soti ‘Asikulu.’ Apo mukonkholola, pakuti nine wamene. 14Lomba keno newo Asikulu ŵanu na Msambizyi wanu nakusambikani mendo ŵanu, niye kuti namwe soti muwamila kusambikana mendo. 15Nakupani cisanzo, kuti namwe soti muwocita ngani newo mwanakucitilani mwewo. 16Cendi, nyanchito opulalini asikulu ŵake, nthumi soti opulalini wamutuma. 17Keno muziŵa ivi, nimwe ŵa shuko keno muvicita.
18 “Malizu aŵa nulaŵililalini monse mwewo yayi. Nuŵaziŵa ŵanasalula. Koma vuwamila kucitika cendi vecilaŵila Malembo kuti, ‘Enzokulya nane pamo, niye eniwukila.’ 19Nukuwuzyilantoni ivi lomba pavikaliyocitika, kuti vikazocitika, muzecetekele kuti ‘Newo nine Nilipo.’ 20Nulaŵilisha cendi kuti wopokela aliyense wanutuma, opokela newo. Nipo wopokela newo, opokela yeve enituma.”
Yesu olaŵililatu kuti azeatwaliwe
(Mt 26:20-25; Mk 14:17-21; Lk 22:21-23)
21Yesu pecilaŵila ivi, etatika kuvutika mu mtima nipo elaŵila kuti, “Nulaŵila vyendi: yumo wa mwewo anitwale kwa alwani ŵangu.”
22Asambili ŵala etatika kuloleshana, osaziŵa kuti olaŵila ŵani. 23Msambili muyakine, Yesu wenzotemwa ngako, enkhala pafupi na Yesu, 24tetyo Simoni Petulo emucewula na kuti, “Uŵakonshe, kansi olaŵila ŵani?”
25Pamene apo yeve esamila pa nganga pa Yesu nomukonsha kuti, “Asikulu, kansi ni ŵani?”
26Yesu elaŵila kuti, “Wanitinipe kadunswa aka ka mkate ni wamene uyo.” Lomba pecitoŵela mkate wosuniwa wala ewupa Yudasi, mwana wa Simoni Isikaliyoti.
27Yudasi peciyingopokela kadunswa ka mkate kala, Satana eloŵa mwa yeve. Yesu emuwuzya kuti, “Vaupangwa kucita, nkhoya ucite mmangu.” 28Koma ŵenzokulya nawo penzeve cukanga yumo emvwisha vecimuwuzya vala. 29Pakuti Yudasi enzosunga nkhomwa ya ndalama, ayake eyesa kuti Yesu enzomuwuzya kuti, “Nsita vopangwika pa malyelelo pano,” keno kuti akatwale kanthu kwa wozingwa. 30Yudasi pecipokela mkate wala, pamene apo efuma, mwenze usiku.
Tetulo ya lomba
31Yudasi pecifuma, Yesu elaŵila kuti, “Lomba nsita yafwika kuti Mwana wa Munthu acinzikiwe, na kuti Mulungu acinzikiwe mwa yeve. 32[Keno Mulungu wacinzikiwa mwa yeve,] Mulungu mwine naye soti azeamucinzike Mwana wa Munthu, nipo acite ivi lombapano apa.
33“Ŵana ŵangu, nikali namwe pa kansita katontho. Munisakile–sakile, koma nukuwuzyani lomba, ngani mwaniwuzyila soti Akulu ŵa Ayuda kuti, ‘Kwamene kwanukuya newo, mwewo mungafwikekolini.’ 34Nukupani tetulo ya lomba, yakuti muwotemwana. Ngani mwanikutemwelani newo, namwe soti muwotemwana. 35Potemwana, ŵanthu wonse azeaziŵe kuti nimwe cendi asambili ŵangu.”
Yesu olaŵililatu kuti Petulo azeamukane
(Mt 26:20-25; Mk 14:17-21; Lk 22:21-23)
36Simoni Petulo emukonsha Yesu kuti, “Asikulu, mukuya kuni?”
Yesu elaŵila kuti, “Kwanukuya, ungatweshelini kunikonkha lomba yayi, koma uzeunikonkhe pa nsita yake iweme.”
37Petulo emukonsha kuti, “Asikulu, ni cikomo canji ningatweshelini kukukonkhani lomba? Newo ningatweshe kutaya cukanga moyo wangu cikomo ca mwewo.”
38Pamene apo Yesu elaŵila kuti, “Kansi wewo ungataye moyo wako cikomo ca newo? Yayi. Nulaŵila vyendi kuti, kombwe akaliyolila, unikane katatu kuti newo uniziŵalini.”
Currently Selected:
Yh 13: GMN
Highlight
Share
Copy
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.
