Yh 12

Maliya ozoza Yesu ku Betaniya

1Pekwesala masiku asanu na imo kuti cifwike cisangalalo ca Pasaka, Yesu ewela ku Betaniya, kwenze Lazalo wala weciwukisha kwa akufwa. 2Emuwamyila Yesu cakulya kwala, nipo Malita enzoŵatumikila. Lazalo enze yumo mwa enzokulya naye pamo. 3Lomba Maliya etola mafuta anyinji wonunkhila ngako ŵa nalido ngawo–ngawo, wa mtengo ngako, notatika kuzoza mendo ŵa Yesu, noŵapukuta na sisi yake. Mu ngʼanda monse mwala mwimvwika gwuu kununkhila na mafuta ŵala.

4Koma Yudasi Isikaliyoti, yumo wa asambili ŵa Yesu, wala enzokuzomutwala kwa alwani wake, elaŵila kuti, 5“Kansi ni cikomo canji mafuta aŵa aliyoŵasitishe ndalama makumi kumi atatu za siliva#12:5 ndalama makumi kumi atatu za siliva Pa Cigiliki malizu aŵa olaŵila kuti “Denalius” otanthauza malipilo ŵa nsiku imo ku munthu wa ganyu. nakuyotwala ndalama izi ku ŵanthu wozingwa?” (6Ecita tetyo ni cikomolini cakuti enzoyika nzelu ku ŵanthu wotamana ŵala, koma ni cikomo cakuti enze kawalala. Yeve enze msungi wa ndalama za asambili wonse, nipo enzoyiŵamo mu nkhomwa.)

7Yesu elaŵila kuti, “Mulekeni. Mafuta aŵa eŵasungila nsiku yakuzoyika malilo ŵangu. 8Pala wozingwa muli nawo nsita zonse, koma newo muŵelini nane nsita zonse.”

Akulu ŵa Ayuda opangana kupaya Lazalo

9Ŵanthu anyinji pecimvwa kuti Yesu enze ku Betaniya, elutako. Aliyoyeko tyala cikomo ca Yesu yeka yayi, koma soti kuti akawone Lazalo weciwukisha kwa akufwa. 10Motetyo, Akulu ŵa Ansembe epangana kuti amupaye na Lazalo kumo, 11pakuti cikomo ca yeve, ŵanthu anyinji enzokuyocetekela mwa Yesu nokana ŵeve.

Yesu oloŵa na mcinzi mu Yelusalemu

(Mt 21:1-11; Mk 11:1-11; Lk 19:28-40)

12Mmawa mwake, ŵanthu anyinji enzeewela ku cisangalalo ca Pasaka cala, ecimvwa kuti Yesu akuza ku Yelusalemu. 13 Motetyo, etola misambo ya kanjeza nofuma kuyomucinguzyila. Enzoŵilikizya kuti, “Mcinzi kwa Mwana wa Davide#12:13Mcinzi kwa Mwana wa Davide Pa Cigiliki malizu aŵa ni “Hosana” kutanthauza kuti “tipulumusheni” ! Ni woshukishiwa akuza mu zina ya Leza! Ishukishiwe Mfumu ya Isilayeli!” 14Lomba Yesu efwana mwana wa bulu nokwelapo, ngani mwakulaŵilila Malembo kuti,

15 “Usayope wewo mzinda wa Ziyoni.

Wona, Mfumu yako ikuza,

yakwela pa mwana wa bulu.”

16Pa nsita iyo, asambili ŵake aliyomvwishe ivi. Koma Yesu peciwuka na ulemelelo, ŵeve ekumbuka kuti ivi vilembewa kulaŵila va yeve, nipo kuti emucitila cendi ivi.

17Pala Yesu peciyita Lazalo kuti afume mu manda kumuwukisha kwa akufwa, penze ŵanthu anyinji ngako. Lomba ŵeve enzolaŵila mweciviwonela. 18Ni cikomo cake ŵanthu wonse ŵala eciyomucinguzyila, pakuti enze ecimvwa kuti yeve ecita ciziŵikilo cokanganisha ici. 19Pamene apo Afalisi etatika kuwuzyana kuti, “Wonani kuti tutolapolini kanthu kalikonse. Wonani ŵanthu wonse omuwutukila.”

Agiliki osakila Yesu

20Lomba penze Agiliki pakati pa ŵanthu eciyolambila pa cisangalalo cala ku Yelusalemu. 21Ŵeve eluta kwa Filipo, wamene kwawo kwenze ku Betisaida wa ku Galileya, nomusenga kuti, “Pepani mwepo, tenze kuti tiwone Yesu.” 22Filipo eciyowuzya Andeleya, nipo Andeleya pamo na Filipo wala eciyowuzya Yesu.

23Yesu elaŵila kuti, “Yafwika nsita yakuti Mwana wa Munthu acinzikiwe. 24Kulaŵila vyendi, mbuto ya tiligu yunkhala imo yeka keno yuponalini mu msili nakufwa. Koma ikafwa, cendi, yutwala vitwalo vinyinji. 25Munthu otemwa moyo wake, azeawutaye, koma wala oyikapolini mtima pa moyo wake pano pansi, azeawusunge ku moyo wosasila. 26Keno munthu onitumikila newo, owamila kunikonkha, kuti kwa newo, akaŵeko soti mtumiki wangu. Munthu akanitumikila newo, Atata azeamucinzike.”

Yesu olaŵila va imfwa yake

27“Lomba mtima wangu wavutika. Nga nilaŵile vinji? Kansi nilaŵile kuti, ‘Atata, munipulumushe ku nsita iyi?’ Yayi, cendi niwela pa calo ca pansi ku nsita ino ya matamano. 28Atata, woneshani ulemelelo wa zina yanu.”

Pamene apo kwimvwika malizu ofumila Kululu olaŵila kuti, “Niwuwonesha kale ulemelelo wala, nipo niwuwoneshe soti.”

29Penze winji wa ŵanthu pamene apo. Lomba pecimvwa malizu awo, elaŵila kuti, “Kwalilima kaleza.”

Koma ayakine elaŵila kuti, “Mngelo walaŵila naye.”

30Yesu eŵawuzya kuti, “Malizu aŵa amvwika ni cikomolini ca newo yayi, koma ni cikomo ca mwewo. 31Lomba niye nsita yakuti ŵanthu ŵa calo cino ca pansi apinguliwe. Lomba Satana, mfumu ya ŵanthu wocimwa ŵa calo cino ca pansi, azeatayiwe kunja. 32Nipo newo akazonipanyika, nizenikokele ŵanthu wonse kwa newo.” (33Elaŵila malizu ŵamene aŵa kuti aŵaziŵishe mwatiazeafwile.)

34Ŵanthu ŵala emuwuzya kuti, “Sewo tiŵelenga mu Matetulo mwasu kuti Mpulumushi Wolayizyiwa wala azeaŵe na moyo wosasila. Nga mwewo mulaŵililanji kuti Mwana wa Munthu owamila kupanyikiwa? Mwana wa Munthu uyo ni ŵani?”

35Tetyo, Yesu eŵawuzya kuti, “Kuŵala kuŵe mphela pakati panu, koma pa nsita itontho tyala. Yendani kuŵala kukali pakati panu, kuti mfinzi ingakuponeleni. Munthu woyenda mu mfinzi owonalini kwakuya. 36Nsita ino kuŵala kukali pakati panu, mucetekele mu kuŵala kwamene kwala, kuti muŵe ŵanthu oyenda mu kuŵala.”

Yesu pecilaŵila ivi, efumapo nakuyofisama.

Ayuda aliyocetekele Yesu

37Cukanga kuti Yesu ecita vokanganisha vinyinji pa menso pawo, koma mphela ŵeve aliyocetekele mwa yeve. 38 Tetyo, malizu ŵa Yesaya ezulikizyiwilatu kuti,

“Asikulu, ni ŵani ecetekela kuŵilizya kwasu?

Ni ŵani oziŵa mphamvu ya Leza pa ivi?”

39Motetyo, ŵeve aliyocetekele, pakuti soti Yesaya elaŵila kuti,

40 “Mulungu efifya menso ŵawo,

nipo ekosesha mitima yawo,

kuti menso ŵawo asawone,

nzelu zawo zisamvwishe,

kuti angayaluke mtima,

nipo newo niŵapozye.”

(41Yesaya polaŵila malizu awo, enzolaŵila va Yesu, cikomo ewona ulemelelo wake.)

42Koma anyinji mwa acitangulila ŵawo ecetekela mwa Yesu. Koma cikomo ca Afalisi ŵeve enzolapalini macimo ŵawo patuŵa. Enzoyopa kuti angaŵafumye mu mpingo. 43Enzotemwa kuti awopokela mcinzi ku ŵanthu kupula kupokela mcinzi kwa Mulungu.

Yesu ewela kuzopulumusha ŵanthu

44Yesu elaŵila moŵilikizya malizu, kuti, “Munthu wocetekela mwa newo, ocetekelalini mwa newo neka yayi, koma ocetekela soti yeve enituma. 45Nipo munthu owona newo, owona soti yeve enituma. 46Newo nine kuŵala, nipo niwela pano pansi kuti munthu aliyense wocetekela mwa newo, osati akoyenda mu mfinzi. 47Munthu akamvwa malizu ŵangu koma oŵaseŵenzeshalini, newo nimupelini mlandu yayi. Pakuti niliyowele kuzokupa ŵanthu milandu, koma kuzoŵapulumusha. 48Munthu okana newo, nipo opokelalini malizu ŵangu, alipo ŵatiazemupingule. Malizu ŵenilaŵila azeamupingule pa nsiku yosilizya. 49Pala niliyolaŵile vofumila mwa newo neka, koma Atata enituma niye enilamula vakuti nilaŵile namolaŵilila. 50Nipo nuziŵa kuti vakunilamula ni volinga ku moyo wosasila. Ni cikomo cake nulaŵila mwakuniwuzyila Atata.”

Currently Selected:

Yh 12: GMN

Highlight

Copy