Macitilo 11
11
Petulo okonkhololela mpingo wa ku Yelusalemu vicitika
1Nthumi zala, na enekwawo wonse enze ku Yudeya, ecimvwa kuti ŵanthu ŵa kunja nawo soti epokela Malizu ŵa Mulungu. 2Tetyo, Petulo peciwela ku Yelusalemu, ŵa mu cipani cokoselela pa va msilimuko esushana naye. 3Ŵeve elaŵila kuti, “Mwewo mwiloŵa mu ngʼanda ya ŵanthu wosasilimukiwa, nolyela nawo pamo.”
4Pamene apo Petulo etatika kuŵakonkhololela mwa mndandanda vicitika, elaŵila kuti, 5“Newo nenzolomba mu munzi wa Yopa. Nicita nga nakomoka, nipo niwona ngani kutulo cinthu ciyakine cuseluka pansi kufuma kululu. Cenzowoneka ngani cinyula cikulu comangiwa mu vitwa vake vinayi, nipo cifwika penenze newo. 6Penicilolesha, niwonamo nyama zoŵeta na za msanga nipo soti na vokalaŵa na tunyoni. 7Lomba nicimvwa malizu oniwuzya kuti, ‘Petulo uka, paya, ulye.’
8“Koma newo nelaŵila kuti, ‘Yayi pepani Asikulu, newo na kale konse cinthu cisali cituŵa keno conyansa cikaliyoloŵamo mu kamwa mwangu umu.’
9“Koma malizu ofuma Kululu ŵala elaŵila soti ka ciŵili kuti, ‘Mulungu wavituŵisha wewo osati ulaŵile kuti ni vituŵalini.’ 10Ivi vicitika katatu, nipo vonse ivo vitolewa nakuya kululu.
11“Nsita iyo, kwiwela ŵanthu atatu ku ngʼanda kwenenzonkhala. Etumiwa kwa newo kufumila ku Kayisaliya. 12Mzimu Mtuŵa enze eniwuzya kuti nisakayike, koma nilute nawo. Enekwasu asanu na yumo aŵa nawo soti enipelekezya, nipo ticiyoloŵa mu ngʼanda ya Koloneliyo. 13Yeve ekonkholola mweciwonela mngelo wapanama mu ngʼanda mwake nomuwuzya kuti, ‘Tuma ŵanthu ku Yopa kuti akayite Simoni, woyitiwa Petulo. 14Yeve akakuwuzye malizu ŵatiukapulumuke nawo, na wonse ŵa mu banja mwako.’
15“Tetyo, penitatika kulaŵila, Mzimu Mtuŵa wiŵaponela ŵeve, ngani mwewiponela soti na sewo potatika pala. 16Pamene apo nikumbuka malizu ŵecilaŵila Asikulu kuti, ‘Yohane ebatiza na manzi, koma mwewo muzebatiziwe na Mzimu Mtuŵa.’ 17Lomba keno Mulungu eŵapa cawanzi cecipa sewo peticetekela Asikulu Yesu Kristu, nga newo nine ŵani kuti nimusushe Mulungu?”
18Osushana naye ŵala pecimvwa ivi, eleka misusho yala. Etembezya Mulungu nolaŵila kuti, “Kansi niye mwacilili! Niye kuti Mulungu waŵapa cendi ŵa kunja shuko yakuti ayaluke mtima nopokela moyo!”
Mpingo wa ku Antiyokeya
19Ŵala wocetekela Kristu, enzeemwazyikana cikomo ca manzunzo etatika pa nkhani ya Stefano, efwika mpaka ku Fenisiya, ku Kiplo, nipo soti na ku Antiyokeya. Enzoŵilizyalini malizu ku munthu aliyense, koma kwa Ayuda ŵeka. 20Koma pakati pawo penze ayakine ofumila ku Kiplo nipo soti ku Kilene. Aŵa efwika ku Antiyokeya notatika kulaŵila soti na Agiliki noŵilizya Malizu Aweme olaŵila va Asikulu Yesu. 21Asikulu enzoŵakosesha, mwakuti ŵanthu anyinji ecetekela noyalukila kwa Asikulu.
22Mpingo wa ku Yelusalemu pewicimvwa vicitika, wituma Banabasi ku Antiyokeya. 23Yeve pecifwika uko nowona Mulungu mweciŵashukishila, esangalala, nokosesha wonse ŵala kuti asimikizye mtima kuŵa wocetekela mwa Asikulu. 24Banabasi wala enze munthu wolungama, wozuzyiwa na Mzimu Mtuŵa na cicetekelo. Tetyo, ŵanthu anyinji ngako ekopeka nolitwala kwa Asikulu.
25Pamene apo Banabasi eluta ku Taliso kuyosakila Saulo. 26Pecimufwana, ewela naye ku Antiyokeya. Yeve eciŵa naye pamo mu mpingo wala caka conse, nosambizya ŵanthu anyinji. Ni ku Antiyokeya, asambili kwecitatikila kuyitiwa “Akristu.”
27Pa masiku ŵala kwifwika aneneli ayakine ku Antiyokeya ofumila ku Yelusalemu. 28Yumo mwa ŵeve, zina yake Agabu, epanama, nipo na mphamvu ya Mzimu Mtuŵa elota kuti pazaŵe njala ikulu pa calo conse ca pansi. Njala yala iwela cendi pa nsita ya Kilawudiya. 29Pamene apo Akristu ŵala esimikizya votumizya voyavya kwa enekwawo onkhala ku Yudeya, nipo kuti aliyense atumizye kulingana na ca ali naco. 30Ivo vicitika cendi, nipo etuma Banabasi na Saulo kuyotwala voyavya vala kwa akulu ŵa mpingo.
Currently Selected:
Macitilo 11: GMN
Highlight
Share
Copy
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.
