KO E SAAME 56
56
Ko e Lotu ki he ‘Otuá mo e Loto Falala
(Ki he Pule ‘o e Hiva. Ke fai‘aki ‘a e fasi “Ko e Lupe noa ‘i he ngaahi potu mama‘o.” Ko e Saame Koula ‘a Tēvita: ‘i he taimi na‘e puke ia ‘e he kau Filisitia ‘i Kati.)
1‘OFA MAI, ‘Elohimi, he ‘oku fie folo au ‘e he tangata:
Ko e ‘aho kotoa ‘oku nau tau‘i au, ‘o fakamālohia.
2‘Oku fie folo au ‘e hoku ngaahi fili ‘i he ngaahi ‘aho kotoa:
He ‘oku tokolahi ‘oku fai tau mai, ‘o tā mei ‘olunga.
3Ko e taimi ‘o ‘eku ilifia,
Te u falala ki he ‘Afiona.
4‘Ia ‘Elohimi te u pōlepole ‘i he‘ene folofola:
‘Ia ‘Elohimi te u falala ‘o ‘ikai te u ilifia;
‘E lava ha me‘a koā kiate au ‘e ha‘a kakano ‘atā?
5Ko e ‘aho kotoa ‘oku nau nofo ko e piko‘i ‘eku fai:
Ko ‘enau ngaahi fakakaukau kiate au, ha me‘a pē ke u kovi ai.
6‘Oku nau fakataha–
Ko e malumu ‘oku nau tuku ai–
Ko hoku topuva‘e ‘oku lama ‘e kinautolu na,
Hangē ai pē ‘enau feinga‘i ‘eku mo‘ui.
7Te nau hao koā ‘i he funga ‘o ‘enau kovi?#56.7 Te nau… kovi; ‘Oku ngali tonu ange hono hiki ‘o pehē: Tautea kinautolu, ‘e ‘Otua, koe‘uhí ko ‘enau koví. Ka ‘oku pehē ‘i he faka-Hepeluú: Fakahaofi kinautolu koe‘uhí ko ‘enau koví.
‘E ‘Otua, ke ke hifo ki lalo ‘a e fu‘u kakai na ‘i ho‘o tuputāmaki.
8Ko ‘eku ‘āunoa ni ‘oku fakalau ‘e he ‘Afiona–
‘Ē, ke ke ‘ai hoku lo‘imata ki ho‘o hina na–
‘Ikai ‘oku tu‘u ‘i ho‘o tohi na?
9Toki fakafoki ki mui ai hoku ngaahi fili, ‘oka u ka tautapa atu:
Kehe ko e me‘a ni ‘oku ou ‘ilo ki ai: ‘oku kau ‘a e ‘Otua ma‘aku.#56.9 ‘oku kau ‘a e ‘Otua ma‘aku; pe he ‘oku ‘ou ‘ilo ‘oku kau ‘a e ‘Otuá mo au.
10‘Ia ‘Elohimi ‘oku ou pōlepole ‘i he folofola
‘Ia Sihova ‘oku ou pōlepole ‘i he folofola.
11‘Ia ‘Elohimi ‘oku ou falala, ‘o ‘ikai te u ilifia;
Ko e hā ‘e lava kiate au ‘e ha tangata?
12‘Oku ‘iate au ‘a e ngaahi tukumo‘ui na‘a ku fai atu, ‘Elohimi:
Te u fakaai ki he ‘Afiona ‘eku ngaahi fakafeta‘i.
13He kuo ke hamusi hoku laumālie mei he mate:
‘Ikai te ke tauhi mei he hinga hoku va‘e?
Ke u taka ‘i he ‘ao ‘o ‘Elohimi ‘i he maama ‘o e mo‘ui.
Currently Selected:
KO E SAAME 56: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
