KO E SAAME 57
57
Ko e Lotu Kole Tokoni
(Ki he Pule ‘o e Hiva. Ki he fasi ko “‘Oua ‘e faka‘auha.” Ko e Saame Koula ‘a Tēvita ‘i he‘ene hola mei he ‘ao ‘o Saula ‘i he ‘ana.)
1‘OFA MAI, ‘ofa mai, ‘Elohimi ē; He kuo hūfanga atu hoku laumālie:
‘Io, te u hūfanga ki he malu ‘o ho kapakau na,
Kae ‘oua ke tolona ‘a e faka‘auha.
2Te u tautapa ki he ‘Otua Taupotu;
Kia ‘Ela ‘oku taukapo‘i au.
3Te ne fekau mei langi ke fakamo‘ui au,
–Manuki ē ‘a ia ‘oku fie folo au– (Sila)
‘E fekau ‘e he ‘Otua ‘ene ongo me‘a, ‘Ofa mo Totonu.
4‘Oku lotolotoi ‘i ha fanga laione ‘eku mo‘ui;
Kuo pau ke u tokoto mo ha fa‘ahinga ‘oku ina, ko e hako ‘o hou‘eiki,
Ko e tao mo e ngahau honau nifo,
Pea ko e heletā māsila honau ‘elelo.
5‘Ai ke ke mā‘olunga ‘i he ngaahi langi, ‘e ‘Otua:
Mo ho kolōlia ‘i māmani kotoa.
6Na‘a nau teu ha kupenga ki he‘eku ‘alu;
Ne ne ofe‘i hoku laumālie ke tau:
Na‘a nau keli ha luo mei mu‘a;
Kae kokolo ai ‘a kinautolu na. (Sila)
7Kuo pau hoku loto, ‘e ‘Otua, kuo pau hoku loto
Te u hiva mo fai fakamālō.
8‘Ā, hoku kolōlia ē;
‘Ā, helefilo mo e ha‘ape:
Ko au te u fafangu ‘a e ata kei mohe.
9Te u fakafeta‘i kiate koe, ‘e ‘Ātonai,
‘I he lotolotonga ‘o e ngaahi kakai:
Te u hiva fakamālō ki he ‘Afiona ‘i he lotolotonga ‘o e ngaahi fa‘ahinga.
10He ‘oku a‘u ki he langi ho‘o ‘alo‘ofa,
Pea ko ho totonu ki he ngaahi ‘ao na.
‘Ai ke ke mā‘olunga ‘i he ngaahi langi, ‘e ‘Otua;
Ho kolōlia ‘i māmani kotoa.
Currently Selected:
KO E SAAME 57: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
