KO E SAAME 46
46
‘Oku Kau mo Kitautolu ‘a e ‘Otuá
(Ki he Pule ‘o e Hiva, Ma‘a Ha‘a Kola. Ke fai ‘e he kau ta‘ahine, Ko e Hiva.)
1KO E hūfanga ‘a e ‘Otua kiate kitautolu, mo ha mālohi,
Ko e tokoni ‘i he mamahi mātu‘aki ofi.
2Ko ia ai, ‘e ‘ikai te tau manavahē neongo ‘e liliu ‘a māmani,
Pea hiki ‘a e ngaahi mo‘unga ki loto tahi;
3Neongo ‘e ‘u‘ulu mo hou hono ngaahi peau na,
Mo tetetete ‘a e ngaahi mo‘unga ‘i he‘ene fakapupula. (Sila)
4‘Oku ai ha vaitafe, pea ko hono ngaahi manga‘i vai
‘Oku ma‘u fiefia ai ‘a e kolo ‘a ‘Elohimi,
‘Io, ‘a e potu tapu ko e nofo‘anga ‘o ‘Elioni.
5‘Oku ‘i kolo ‘a ‘Elohimi, ‘e ‘ikai fa‘a uea;
‘E tokoni ki ai ‘a ‘Elohimi ‘oka ‘aho leva
6Na‘e ‘u‘ulu ‘a e ngaahi kakai; na‘e hiki ‘a e ngaahi pule‘anga;
Na‘a ne ‘ai atu hono le‘o; na‘e vai ‘a e fonua.
7Ko Sihova Sāpaoti ‘oku ‘iate kitaua,
Ko e ‘Otua ‘o Sēkope ko hota mo‘unga. (Sila)
8Ha‘u ‘o mamata ki he ngaahi ngāue ‘a Sihova,
Hono kuo ne fai me‘a fakailifia ‘i he fonua!
9‘Oku ne lolololo ‘a e ngaahi tau ‘o a‘u ki he ngata‘anga ‘o māmani,
‘Oku ne fesi‘i kaufana, mo tu‘utu‘u tao, mo tutu sāliote ‘i he afi.
10“Mou tuku, ‘o ‘ilo ko au ‘Elohimi,
Te u hiliō ‘i he ngaahi kakai, te u hiliō ‘i māmani.”
11Ko Sihova Sāpaoti ‘oku ‘iate kitaua,
Ko e ‘Otua ‘o Sēkope ko hota mo‘unga! (Sila)
Currently Selected:
KO E SAAME 46: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
