Ma‘aké 13

Ko e Fakahā ‘e Sīsū e Pau ke ‘Auha ‘a e Temipalé

(Māt 24.1-2; Luk 21.5-6)

1PEA ‘i he‘ene fononga atu mei he Temipale, na‘e lea ange ha toko taha ‘i he‘ene kau ako, Tangata‘eiki, vakai ange ‘a e ngaahi maka mo e ngaahi fale! hono ‘ikai ko e me‘a fakamanavahē!

2Pea pehē ange ‘e Sīsū, ‘oku mou tokanga koā ki he ngaahi fu‘u fale ni? ‘e ‘ikai ‘aupito tuku ‘i heni ha fo‘i maka ‘o ta‘eholoki.

Ko e Fakatokanga ki ha Faingata‘a ‘Amui

(Māt 24.3-14; Luk 21.7-19)

3Pea ‘i he‘ene nofo hifo ‘i he funga mo‘unga ko ‘Ōlive, ‘o hanga ki he Temipale, na‘e fehu‘i kiate ia ‘a Pita, pea kau ai ‘a Sēmisi mo Sione mo ‘Anitelū, fakaekinautolu pē, ‘o pehē, 4Tala mai pe ‘e hoko fakakū ‘a e ngaahi me‘a ko ia, pea ko e hā ‘a e faka‘ilonga ‘oka ene hono faka‘osi kotoa.

5Pea hanga ‘e Sīsū ‘o lea kiate kinautolu, Vakavakai na‘a taki hē kimoutolu ‘e ha taha. 6‘E ai ha tokolahi te nau ha‘u ‘i he hingoa ‘o‘oku, mo nau pehē, Ko au ia; pea te nau taki hē hā tokolahi. 7Pea ‘oka mou ka fanongo ki ha ngaahi tau mo ha ngaahi tala tau, ‘oua na‘a fakamanavasi‘i ai kimoutolu: kuo pau ke hoko ia, kae kei tuai pē ‘a e ngata‘anga. 8Koe‘uhi ‘e tu‘u ha kakai ki ha kakai, mo ha pule‘anga ki ha pule‘anga: ‘e ai ha ngaahi mofuike ‘i he ngaahi potu kehekehe, ‘e ai ha ngaahi honge: ko e ngaahi kamata pē ia ‘o e langa.

9Ka mou vakavakai telia kimoutolu. Te nau faka‘ilo kimoutolu ki he ngaahi Fakamāu‘anga; pea taki ki he ngaahi falelotu ke haha; pea ‘e fakahopo kimoutolu ‘i he ‘ao ‘o e ngaahi Kōvana mo e ngaahi tu‘i koe‘uhi ko au, ke ai ha fakamatala kiate kinautolu.#Māt 10.17-20; Luk 12.11-12 10Pea kuo pau ke tomu‘a fanongonongo ‘a e ongoongolelei ki he ngaahi kakai kotoa pē. 11Pea ‘oka nau ka taki kimoutolu ke faka‘ilo, ‘oua te mou fua lotomo‘ua pe ko e hā ha‘amou lea ‘e fai: ka ko e me‘a ‘e ‘atu kiate kimoutolu ‘i he taimi ko ia, mou lea‘aki ia; he ‘oku ‘ikai ko kimoutolu ‘e lea, ka ko e Laumālie Mā‘oni‘oni. 12Pea ‘e faka‘ilo ‘e he ta‘okete hono tehina koe ‘uhi ke tāmate‘i, pea ko e tamai ‘ene fānau; pea ‘e tu‘u ‘a e fānau ki he‘enau mātu‘a, ‘o tāmate‘i kinautolu. 13Pea te mou hoko ko e fehi‘anekina ‘e he kakai kotoa pē ko e me‘a ‘i he hingoa ‘o‘oku: ka ko ia te ne kītaki ‘o a‘u ki he ngata‘anga, ko e toko taha ko ia ‘e mo‘ui.#Māt 10.22

Ko e Me‘a Fakalilifu Ange Fau

(Māt 24.15-21; Luk 21.20-24)

14Ka ‘oka mou ka vakai ki he me‘a fakalielia ‘o e faka‘auha ‘oku tu‘u ‘i he potu ‘oku tapu ki ai; (‘ilonga ha taha ‘oku lau, pea ke ne tokanga ki ai) pea ke toki hola ki he mo‘unga ‘a kinautolu ‘oku ‘i Siutea:#Tān 9.27; 11.31; 12.11 15pea ko ia ‘oku ‘i he tu‘a fale ke ‘oua te ne ‘alu hifo ki fale, ‘uma‘ā ha‘ane hū ki ai ke ‘ave ha me‘a:#Luk 17.31 16pea ko ia kuo ne ‘alu ki he ngoue ke ‘oua te ne foki ki he ngaahi me‘a kuo tuku ‘i ‘api ke ‘ave hono kofu. 17Ka ‘oiauē ‘a kinautolu ‘oku feitama mo kinautolu ‘oku toutama ‘i he taimi ko ia! 18Pea mou lotua ke ‘oua na‘a hoko ia ‘i he fa‘ahita‘u momoko. 19He ko e ngaahi ‘aho ko ia ko e koto mamahi; te‘eki ai hano tatau talu mei he kamata ngaohi ‘e he ‘Otua ‘a māmani ‘o a‘u mai ki he taimi ni, ‘io, pea ‘e ‘ikai ‘aupito toe ‘i ai.#Tān 12.1; Fkhā 7.14 20Pea ka ne ta‘e‘oua ‘a e fakanounou ‘e he ‘Eiki ‘a e taimi ko ia, pehē ‘e ‘auha ‘a e kakano kotoa pē: ka e telia ‘a e kakai fili, ‘a ia kuo ne fili, ko ia kuo ne fakanounou ai ‘a e taimi.

21Pea kapau ‘e toki pehē atu ‘e ha taha, ‘Ē, ko e Mīsaia ‘oku ‘i heni; ‘Ē, ‘oku ‘i hena; ‘oua te mou tui ki ai: 22koe‘uhi ‘e tupu hake ha kau mīsaia loi, mo ha kau palōfita loi, pea te nau fai ha ngaahi faka‘ilonga, mo ha ngaahi me‘a fakaofo, ‘o fai ke taki he ‘a e kakai fili, ‘oka ne lava. 23Ka mou tokanga kimoutolu; he kuo u sinaki tala atu hono kotoa.

Ko e Hoko Mai ‘a e Foha ‘o e Tangatá

(Māt 24.29-31; Luk 21.25-28)

24Ka ‘i he taimi ko ia, hili ‘a e mamahi ko ia, ‘e fakapo‘uli ‘a e la‘ā, pea ‘e tuku ‘e he māhina ‘ene huhulu,#‘Ais 13.10; ‘Isi 32.7; Sioelí 2.10,31; 3.15; Fkhā 6.12 25pea ko e ngaahi fetu‘u te nau ngangana mei he langi, pea ‘e ngatōtō ‘a e ngaahi mālohinga ‘oku ‘i he ngaahi langi. 26Pea te nau toki sio ki he Fanautama ‘a Tangata ‘oku hoko mai ‘i he ngaahi ‘ao, pea ha‘u mo ia ‘a e fakangeingei mo e nāunau lahi.#Tān 7.13; Fkhā 1.7 27Pea te ne toki fekau atu ‘ene kau ‘āngelo, pea te nau tānaki ‘a e kakai fili mei he matangi ‘e fā, mei he ngata‘anga ‘o māmani ‘o a‘u ki he ngata‘anga ‘o e langi.

Ko e Ako mei he Fu‘u Fikí

(Māt 24.32-35; Luk 21.29-33)

28Pea mou ma‘u mei he fiki hono fakatātā: Na‘a mo ia, ‘oka muimui leva hono muka, pea ne kamata lau, ‘oku mou ‘ilo ai ‘oku ofi ‘a e fa‘ahita‘u māfana: 29Pehē foki kimoutolu, ka mou ka vakai kuo hoko ‘a e ngaahi me‘a ko eni, pea mou ‘ilo kuo panaki ia, ‘io, kuo a‘u ki he matapā.#13.29 kuo panaki… matapaá; pe kuo ofi mai ia, kuo teu ha‘u. 30Ko au ē, ‘oku ou tala atu, ‘e ‘ikai ‘aupito mole ‘a e to‘utangata ko eni, kae‘oua ke hoko ‘a e ngaahi me‘a ko ia kotoa pē. 31‘E mole ‘a e langi mo māmani: ka ko ‘eku ngaahi lea ‘e ‘ikai mole.

Ko e ‘Ikai ke ‘Ilo Hono Houá

(Māt 24.36-44)

32Ka ko e me‘a ki he ‘aho ko ia, mo hono houa, ‘oku ‘ikai ha taha ‘oku ‘ilo ki ai; ‘io, pe ko ha ‘āngelo ‘i he langi; pea na‘a mo e ‘Alo ‘oku ‘ikai; ngata pē ‘i he Tamai toko taha.#Māt 24.36 33Mou tokanga, mou ‘ā pē: he ‘oku ‘ikai te mou ‘ilo pe ‘e fakakū hono taimi. 34‘O hangē ko ha tangata ‘oku teu ‘alu ki muli, hili ‘ene tukuange hono ‘api, mo ‘ene tu‘utu‘uni ki he‘ene kau tamaio‘eiki takitaha ‘a hono tu‘unga mo ‘ene ngāue, ‘oku ne na‘ina‘i foki ki he tauhi matapā ke le‘o.#Luk 12.36-38 35Ko ia, mou le‘o: he ‘oku ‘ikai te mou ‘ilo pe ‘e hoko fakakū mai ‘a e ‘Eiki ‘o e ‘api; pē efiafi, pe tu‘uapō, pe ‘i he ‘u‘ua ‘a e moa, pe hengihengi: 36na‘a ha‘u fakafokifā pē ia, ‘o ne ‘ilo kimoutolu ‘oku mou mohe. 37Pea ko e me‘a ‘oku ou tala kiate kimoutolu ‘oku ou tala ki he kakai kotoa pē, MOU LE‘O.

Currently Selected:

Ma‘aké 13: TMB

Highlight

Copy