Mātiú 9

Ko e Fakamo‘ui ‘e Sīsū ha Tangata Mamatea

(Ma‘ake 2.1-12; Luk 5.17-26)

1PEA heka vaka ia ‘o ‘alu ki he kauvai, ‘o ne a‘u ki hono kolo ‘o‘ona.#9.1 hono kolo ‘o‘ona; Ko Kāpaneume ia (vakai ki he 4.13). 2Pea ‘iloange na‘a nau ‘omi kiate ia ha tangata mamatea, kuo ‘ai ki ha mohenga. Pea ‘i he vakai ‘e Sīsū ‘enau tui, pea ne pehē ki he tangata mamatea, Fiemālie, nga‘ata; kuo fakamolemole ho‘o ngaahi angahala.

3Pea tā na‘e ai ha ni‘ihi ‘i he kau sikalaipe na‘a nau pehē ‘i honau loto, ‘oku lea fie ‘otua ‘a e siana ni.

4Pea ‘ilo ‘e Sīsū ‘enau mahalo, ‘o ne pehē, Ko ho‘omou mahalo kovi ‘i homou loto koe‘uma‘ā? 5He ko e fē ‘oku faingofua; ‘a e pehē, Kuo fakamolemole ho‘o ngaahi angahala: pe ko e pehē, Tu‘u ‘o ‘eve‘eva? 6Ka koe‘uhi ke mou ‘ilo ‘oku mafai ‘e he Fanautama ‘a Tangata ke fakamolemole angahala ‘i māmani, (pea toki hanga ia ‘o lea ki he tangata mamatea), Tu‘u, pea to‘o ho mohenga, pea mole ki ho ‘api.

7Pea ne tu‘u, ‘o ‘alu ki hono ‘api. 8Pea ‘i he sio ki ai ‘a e kakai na‘a nau manavahē; pea nau fakamālō ki he ‘Otua, he‘ene tuku ha fu‘u mafai pehē ki he tangata.

Ko e Fili ‘e Sīsū ‘a Mātiu

(Ma‘ake 2.13-17; Luk 5.27-32)

9Pea ‘i he ‘alu ange ‘a Sīsū mei ai, na‘a ne sio ki ha tangata ‘oku nofo ‘i he fale tute, ‘a ia na‘e hingoa ko Mātiu: pea ne pehē kiate ia, Muimui kiate au.

Pea ne tu‘u ‘o muimui kiate ia.

10Pea ‘i he keinanga ‘e Sīsū ‘i he fale,#9.10 ‘i he falé; ‘a ia ko e fale ‘o Mātiú, pe ko e fale ‘o Sīsuú. tā na‘e ai ha tokolahi ‘o e kau pōpilikane mo e kau angahala, na‘a nau ha‘u ‘o fetākoto‘i mo ia mo ‘ene kau ako ‘i he kai.#Luk 15.1-2 11Pea ‘i he mamata ki ai ‘a e kau Fālesi, na‘a nau pehē ki he‘ene kau ako, Ko e hā ‘oku kai fakataha ai ho‘omou tangata‘eiki pea mo e kau Pōpilikane mo e kau angahala?

12Ka ka ongo‘i ‘e ia, ‘o ne pehē, Ko e tangata faito‘o ‘oku ‘ikai ma‘a e mālohi, ka ma‘a e mahaki. 13Ka mou ‘alu ‘o kumi ki he ‘uhinga ‘o e me‘a ni, Ko e meesi ‘oku ou tangi ki ai, ‘o ‘ikai ko e feilaulau: he na‘e ‘ikai te u ha‘u ke ui ‘a e angatonu, ka ko e angahala.#Māt 12.7; Hōs 6.6

Ko e Mahu‘inga ‘o e ‘Aukaí

(Ma‘ake 2.18-22; Luk 5.33-39)

14Pea toki ha‘u kiate ia ‘a e kau ako ‘a Sione, ‘o nau pehē, Ko e hā ‘oku mau fa‘a ‘aukai ai ‘e kimautolu, mo e kau Fālesi; ka ko e kau ako ‘a‘au ‘oku ‘ikai te nau ‘aukai?

15Ka ka pehē ‘e Sīsū kiate kinautolu, He lava ‘e he kakai ‘o e fale ta‘ane ke fakamamahi, lolotonga ‘oku ‘iate kinautolu ‘a e tangata ta‘ane? Kae tokaange ha taimi ‘e hiki meiate kinautolu ‘a e tangata ta‘ane, pea te nau toki ‘aukai.

16Pea ‘oku ‘ikai ha taha te ne ‘oposi ha kofu motu‘a ‘aki ha konga tupenu fo‘ou: he ko e me‘a ‘oku ‘oposi ‘aki ‘oku ne maikiiki‘i ‘a e kofu motu‘a, pea ‘oku hoko ai ha fu‘u mahae ‘oku lahi ange. 17Pea ‘oku ‘ikai te nau ‘utu uaine fo‘ou ki he ngaahi hina leta ‘oku motu‘a: he ka pehē, ‘e mahae ‘a e ngaahi hina; pea mahua ai ‘a e uaine, ‘o maumau mo e hina. Ka ‘oku nau ‘ai uaine fo‘ou ki he ngaahi hina fo‘ou, pea fakatou tolonga.

Ko e Finemui Na‘e Mate mo ha Fefine Mahamahaki

(Ma‘ake 5.21-43; Luk 8.40-56)

18Pea lolotonga ‘ene lea‘aki ‘a e ngaahi me‘a ni kiate kinautolu, ‘iloange na‘e ha‘u kiate ia ha matāpule, ‘o ne tū‘ulutui kiate ia, ‘o ne pehē, Ko e ki‘i fefine ‘a‘aku kuo toki pekia ni: ka ke me‘a mai, ‘o ‘ai ho nima kiate ia, pea te ne mo‘ui.

19Pea tu‘u hake ‘a Sīsū ‘o muimui atu, ‘a ia mo ‘ene kau ako.

20Pea tā ko ha fefine, kuo ‘au toto ‘o ta‘u hongofulu mā ua, na‘a ne ‘unu‘unu atu ‘i hono tu‘a, ‘o ne ala ki he pao ‘o hono kofu: 21he na‘a ne pehē ‘i hono loto, kapau te u ala pē ki hono kofu, ‘e fakamo‘ui au.

22Ka ka tafoki ‘a Sīsū ‘o ‘ilo ia, ‘o ne pehē ki ai, ‘oua te ke manavahē, nga‘ata; kuo fakamo‘ui koe ‘e ho‘o tui. Pea na‘e mo‘ui ‘a e fefine mei he taimi ko ia.

23Pea ‘i he hū ‘a Sīsū ki he fale ‘o e matāpule, mo ne mamata ki he kau ifi fangufangu, mo e fu‘u kakai ‘oku vālau, 24na‘a ne pehē, Mou mātuku atu: he ‘oku ‘ikai pekia ‘a e ta‘ahine, ka ‘oku mohe pē. 25Pea nau luma kiate ia. Pea kuo kapusi ‘a e kakai, na‘a ne ‘unu‘unu atu ‘o puke hono nima; pea tu‘u ‘a e ta‘ahine. 26Pea pavake atu hono ongoongo ‘o e me‘a ki he fonua kotoa ko ia.

Ko e Faka‘ā ‘e Sīsū ha Ongo Tangata Kui

27Pea ‘i he ‘alu ange ‘a Sīsū mei ai, na‘e toupili ‘i mui kiate ia ha ongo kui, ‘oku na kalanga ‘o pehē, Hako ‘o Tēvita, ‘alo‘ofa mai.

28Pea ‘i he‘ene hū ki fale, na‘e ‘unu‘unu atu kiate ia ‘a e ongo kui: pea pehē ‘e Sīsū kiate kinaua, ‘oku mo tui te u lava ‘a e me‘a ni?

Pea na pehē ki ai, ‘Io, ‘Eiki.

29Toki ala ‘e ia ki hona mata, mo ne pehē, Ke fai kiate kimoua ‘o fakatatau ki ho‘omo tui. 30Pea ‘ā ai hona mata: pea na‘ina‘i mamafa ‘e Sīsū kiate kinaua, ‘o pehē, Tokanga ke ‘oua na‘a ‘ilo ia ‘e ha taha.

31Ka ka ‘alu kinaua, ‘o na ongoongoa atu ‘a Sīsū ‘i he fonua ko ia kotoa.

Ko e Fakalea ‘e Sīsū ha Noa

32Pea ‘i he‘ena ‘alu atu, vakai na‘e ‘omi kiate ia ha noa kuo ‘āvea. 33Pea ‘i he kapusi ‘a e tēvolo na‘e lea ‘a e noa: pea ofo ‘a e kakai, ‘o nau pehē, Kuo te‘eki hoko pehē ‘a e me‘a ko ia ‘i ‘Isileli.

34Ka ko e Fālesi na‘a nau pehē, Ko e Pule ‘o e kau tēvolo ‘oku ne fai ai ‘ene kapusi tēvolo.#Māt 10.25; 12.24; Ma‘ake 3.22; Luk 11.15

Ko e Langa e ‘Ofa ‘a Sīsū ki he Kakai

35Pea foli ‘e Sīsū ‘a e ngaahi kolo mo e ngaahi vilisi, ‘o ne faiako ‘i honau ngaahi falelotu, mo ne malanga‘aki ‘a e Kōsipeli ‘o e Pule‘anga: pea neongo pe ko e hā ha alangamahaki, pe ha mahamahaki na‘a ne fakamo‘ui ia.#Māt 4.23; Ma‘ake 1.39; Luk 4.44 36Pea ‘i he‘ene sio ki he ngaahi fu‘u kakai, na‘e langa hono fatu ‘i he ‘ofa kiate kinautolu: he na‘a nau nofo ongosia mo tukuhāusia, ‘o hangē ko ha fanga sipi ta‘ehanau tauhi.#Nōm 27.17; 1 Tu‘i 22.17; 2 Kal 18.16; ‘Isi 34.5; Ma‘ake 6.34 37Pea toki pehē ‘e ia ki he‘ene kau ako, Kuo lahi ‘a e ta‘u kuo motu‘u, ka ‘oku kaungatāmaki ‘a e kau ngāue;#Luk 10.2 38ko ia mou kole ki he ‘Eiki ‘oku ‘a‘ana ‘a e ta‘u, ke ne kouna atu mo ha kau ngāue ke utu ‘ene ta‘u.

Currently Selected:

Mātiú 9: TMB

Highlight

Copy