Mātiú 10

Ko e Fili ‘e Sīsū ‘Ene Kau ‘Apōsetoló

(Ma‘ake 3.13-19; Luk 6.12-16)

1PEA ne ui ange ‘a e kau Hongofulumāua ‘o ‘ene ako; ‘o ne tuku kiate kinautolu ke fa‘iteliha ki he ngaahi fa‘ahikehe, koe‘uhi ke nau kapusi kinautolu; mo ne ‘ange ‘a e mafai ke faito‘o ‘a e fa‘ahinga alanga mahaki kotoa pē mo e mahamahaki. 2Pea ko eni ‘a e hingoa ‘o e kau Hongofulumāua ‘Aposetolo. Ko e ‘uluaki ko Saimone, ‘a ia na‘e fakahingoa ko Pita, mo ‘Anitelū ko hono tehina: ko Sēmisi ko e foha ‘o Sēpeti, mo Sione ko hono tehina; 3ko Filipe mo Pātolomiu; ko Tōmasi pea mo Mātiu ko e tānaki tukuhau; ko Sēmisi ko e foha ‘o ‘Alefiusi, mo Lepiusi; 4ko Saimone ‘o e kautaha Mamahi‘i Fonua, pea mo Siutasi ‘Isikāliote, ‘a ia foki na‘a ne lavaki‘i ‘a Sīsū.

Ko e Ngaahi Fakahinohino ‘a Sīsū ki he Kau ‘Apōsetoló

(Ma‘ake 6.7-13; Luk 9.1-6)

5Ko e kau Hongofulumāua ni na‘e fekau atu ‘e Sīsū: ‘o ne na‘ina‘i kiate kinautolu, ‘o pehē, ‘oua te mou afe ‘i ha hala ‘oku ‘alu ki ha Senitaile, pea ‘oua te mou hū ki ha kolo Samēlia: 6ka mou ō mu‘a ki he fanga sipi kuo mole ‘i he hako ‘o ‘Isileli. 7Pea ‘i ho‘omou ō, mou fanongonongo, ‘o pehē, Kuo ofi ‘a e Pule‘anga ‘o Hēvani.#Luk 10.4-12 8Pea mou faito‘o mahaki, mo fokotu‘u ‘a e pekia, mo fakama‘a kilia, mo kapusi tēvolo: kuo mou ma‘u ta‘etotongi pea mou ‘atu ta‘etotongi. 9‘Oua te mou tokonaki ha pa‘anga koula ke fakapona ‘i homou no‘o, pea na‘a mo e siliva ‘e ‘ikai, kae‘uma‘ā e me‘a tēpū, ha pa‘anga kapa. 10‘Oua na‘a kumi ni ha kato ‘oho ki he hala, pe tangi ke ua ha sote, pe ha sū, pea na‘a mo ha tokotoko, ‘oua. Seuke, ‘ilonga ha taha ‘oku ngāue, ‘oku taau ke ne ma‘u hono tauhi.#1 Kol 9.14; 1 Tīm 5.18

11Pea ka mou ka a‘u ki ha kolo, pe ha vilisi, ‘eke pe ko hai ha taha ‘oku taau ke mou ‘alu ki ai: pea nofo pē ai kae‘oua ke mou hiki ki ha potu kehe. 12Pea ‘i ho‘omou hū ki he fale, tāpuaki‘i ia. 13Pea kapau ‘oku taau mo‘oni ‘a e fale, ‘e toka ai ho‘omou tāpuaki; pea kapau ‘oku ‘ikai taau, pea ko ho‘omou tāpuaki ‘e foki mai. 14Pea ‘ilonga ‘a ia ‘e ‘ikai te ne tali kimoutolu, pe ma‘u ho‘omou ngaahi lea, pea ka mou ka hū mai mei he fale ko ia, pe ko e kolo, mou tūtuu‘i hono efu mei homou va‘e.#Ngā 13.51 15Ko au ē, ‘oku ou tala atu, ‘E kātaki ngofua ‘i he ‘Aho Fakamaau ‘a e fonua ‘o Sōtoma mo Komola ‘i he kolo ko ia.#Māt 11.24; Sēn 19.24-28

Ko e Fehangahangai mo e Faingata‘a

(Ma‘ake 13.9-13; Luk 21.12-17)

16Vakai, ‘oku ou tuku atu kimoutolu ke mou hangē ko e fanga sipi ‘i he lotolotonga ‘o e fanga ulofi: ko ia, ke mou fakapotopoto ‘o hangē ko ha ngata, pea vale ‘i he kovi ‘o hangē ko ha lupe.#Luk 10.3 17Ka mou lamalama telia ‘a e kakai: he te nau faka‘ilo kimoutolu ki he ngaahi fakamāu‘anga, pea te nau haha kimoutolu ‘i honau ngaahi falelotu: 18‘io, ‘e ‘ave kimoutolu ki he ngaahi kōvana, mo e ngaahi tu‘i, koe‘uhi ko au, ke ai ha fakamatala kiate kinautolu Siu pea mo e kau Senitaile. 19Pea ‘oka nau ka faka‘ilo kimoutolu, ‘oua te mou loto mo‘ua pe ‘e fēfē ha‘amou tali, pe ki ha me‘a te mou lea‘aki: he ‘e ‘atu kiate kimoutolu ‘i he taimi ko ia ha me‘a ke mou lea‘aki: 20he ‘oku ‘ikai ko kimoutolu ‘e lea, ka ko e Laumālie ‘o ho‘omou Tamai ‘e lea ‘iate kimoutolu.

21Pea ‘e faka‘ilo ‘e he ta‘okete hono tehina, koe‘uhi ke tāmate‘i, pea ko e tamai ‘ene fānau: pea ‘e tu‘u ‘a e fānau ki he‘enau mātu‘a ‘o tāmate‘i kinautolu.#Ma‘ake 13.12; Luk 21.16 22Pea te mou hoko ko e fehi‘anekina ‘e he kakai kotoa pē koe‘uhi ko hoku hingoa: ka ko ia te ne kītaki ‘o a‘u ki he iku‘anga, ko e toko taha ko ia ‘e mo‘ui.#Māt 24.9,13; Ma‘ake 13.13; Luk 21.17 23Pea ka nau ka fakatanga‘i kimoutolu ‘i he kolo ko ē, mou hola ki he kolo ko ē: he ko au ē, ‘oku ou tala atu, ‘i he te‘eki ke mou ‘osiki ‘a e ngaahi kolo ‘o ‘Isileli, kuo ha‘u ‘a e Fanautama ‘a Tangata.

24Tala‘ehai ‘oku mahili ‘a e tama ako ‘i he faiako, ‘uma‘ā ‘a e pōpula ‘i he‘ene ‘eiki.#Luk 6.40; Sioné 13.16; 15.20 25Mālō pē ‘o kapau ‘e fai ki he tama ako ‘o tatau mo ‘ene faiako, mo e pōpula ‘o tatau mo ‘ene ‘eiki. Pea kapau kuo nau hingoa pā‘usi‘i ‘a e tangata‘eiki ko Pelisipupe, huanoa hono kau nofo‘anga.

Ko Hai te ke Manavahē ki ai?

(Luk 12.2-7)

26Ko ia, ‘oua te mou manavahē kiate kinautolu: he ‘oku ‘ikai ha me‘a kuo fufū ‘e ta‘efakahā, pe lilo ‘e ta‘e‘iloa.#Ma‘ake 4.22; Luk 8.17 27Ko e me‘a ‘oku ou tala po‘uli kiate kimoutolu, mou fakahā ‘aho; pea ko e me‘a ‘oku fanafana‘aki ki homou telinga, mou fanongonongo mei he tu‘a fale. 28Pea ‘oua te mou momo‘i manavahē kiate kinautolu ‘oku tāmate‘i ‘a e sino pē, ka ko e laumālie ‘oku ‘ikai te nau lava ke tāmate‘i: ka ke mou manavahē tu‘u kiate IA ‘oku mafai ke faka‘auha ‘i Heli ‘a e laumālie mo e sino fakatou‘osi. 29‘Ikai ‘oku fakatau ha ongo ki‘i misi ‘e toko ua ki ha konga sēniti pē? Ka ‘e ‘ikai patū ki he kelekele hana taha ta‘eme‘a ki ai ‘e ho‘omou Tamai. 30Ka ko e me‘a kiate kimoutolu, ko homou ngaahi tu‘oni lou‘ulu kuo ‘osi lau fakalāutelau. 31Ko ia ‘oua te mou manavahē: ‘oku mou mahu‘inga kimoutolu ‘i ha fanga misi tokolahi.

Ko e Fakamo‘oni kia Kalaisi

(Luk 12.8,9)

32Pea ‘ilonga ‘a ia te ne fakahā ‘i he ‘ao ‘o e kakai ‘ene kau kiate au te u fakahā foki ‘e au ‘eku kau kiate ia ‘i he ‘ao ‘o ‘eku Tamai ‘oku ‘i Hēvani. 33Ka ‘ilonga ‘a ia te ne fakafisinga au ‘i he ‘ao ‘o e kakai, te u fakafisinga foki ‘e au ‘a e tangata ko ia ‘i he ‘ao ‘o ‘eku Tamai ‘oku ‘i Hēvani.#2 Tīm 2.12

Ko e Fakatupu Moveuveu ‘o ‘Ikai o e Fakatupu Melino

(Luk 12.51-53; 14.26,27)

34‘Oua te mou mahalo na‘a ku ha‘u ke velo mai ha melino ki he fonua: na‘e ‘ikai te u ha‘u ke veloaki mai ha melino, ka ko ha heletā. 35Seuke, na‘a ku ha‘u ke fakavahavaha‘a ha tangata ki he‘ene tamai, ha fefine ki he‘ene fa‘ē, ha ta‘ahine ki he fa‘ē hono husepāniti;#Maiká 7.6 36pea ‘e hoko ai ko e ngaahi fili ‘o ha tangata ‘a hono kau nofo‘anga.

37Ko ia ‘oku lahi ‘ene ‘ofa ki he‘ene tamai, pe ko ‘ene fa‘ē, ‘i he‘ene ‘ofa kiate au, ‘oku ‘ikai taau ia mo au; pea ko ia ‘oku lahi ‘ene ‘ofa ki hono foha, pe ko hono ‘ōfefine ‘i he‘ene ‘ofa kiate au, ‘oku ‘ikai taau ia mo au: 38pea ko ia ‘oku ‘ikai te ne puke hono kolosi ‘o muimui ‘iate au, ‘oku ‘ikai taau ia mo au.#Māt 16.24; Ma‘ake 8.34; Luk 9.23 39Ko ia te ne kalofaki ‘ene mo‘ui, ‘oku ne tuku ia ke mole: ka ko ia ‘oku ne tuku ‘ene mo‘ui ke mole koe‘uhi ko au, ‘oku ne kalofaki ia.#Māt 16.25; Ma‘ake 8.35; Luk 9.24; 17.33; Sioné 12.25

Ko e Ngaahi Pale

(Ma‘ake 9.41)

40Ko ia ‘oku ne tali kimoutolu ‘oku ne tali au, pea ko ia ‘oku ne tali au, ‘oku ne tali ia ‘a ia na‘a ne fekau mai au.#Ma‘ake 9.37; Luk 9.48; 10.16; Sioné 13.20 41Ko ia ‘oku ne tali ha palōfita, koe‘uhi pē ko ‘ene palōfita, te ne ma‘u ‘a e totongi fakapalōfita; pea ko ia ‘oku ne tali ha tangata lotu, koe‘uhi pē ko ‘ene lotu, te ne ma‘u ‘a e totongi ‘o ha tangata lotu. 42‘Io, ko ia te ne ‘ange ha inu ki ha taha ‘i si‘i fānau ni, koe‘uhi pē ko e toko taha ia ‘i he‘eku kau ako, neongo ko ha hu‘a vai momoko pē, ko au ē, ‘oku ou tala atu, ‘e ‘ikai ‘aupito mole ‘ene totongi ‘a‘ana.

Currently Selected:

Mātiú 10: TMB

Highlight

Copy