Mātiú 6

Ko e Foaki

1KAE vakai, telia na‘a mou fai ho‘omou tō‘onga fakalotu ke hā ki he kakai, koe‘uhi ke nau siofia kimoutolu; he ka pehē, ‘oku ‘ikai ha‘amou totongi mei ho‘omou Tamai ‘oku ‘i Hēvani.#Māt 23.5

2Ko ia, ‘oka ke ka fai ha foaki, ‘oua na‘a ke ifi ha me‘alea ke fakahā koe, ‘o hangē ko e fai ‘e he kau mālualoi ‘i he falelotu mo e hala, koe‘uhi ke nau ma‘u ‘a e fakamālō ‘a e kakai. Ko au ē, ‘oku ou tala atu, Ko hono ngata ia ‘o ‘enau totongi kuo nau ma‘u. 3Ka ko koe, ‘i ho‘o fai ha‘o foaki, ke‘oua na‘a ‘ilo ‘e ho nima to‘ohema ‘a e me‘a ‘oku fai ‘e ho to‘omata‘u: 4koe‘uhi ke lilo pē ho‘o foaki; pea ko ho‘o Tamai, ‘a ia ‘oku ne ‘afio‘i ‘a e lilo, te ne totongi kiate koe.

Ko e Lotu ki he Tamaí

(Luk 11.2-4)

5Pea ‘oka mou ka lotu, ‘e ‘ikai te mou hangē ko e kau mālualoi; he ‘oku nau manako ke tu‘u ‘i he falelotu mo e tuliki ‘o e mala‘e ke fai ‘enau lotu, koe‘uhi ke nau hā ki he kakai. Ko au ē, ‘oku ou tala atu, Ko hono ngata ia ‘o ‘e nau totongi kuo nau ma‘u.#Luk 18.10-14 6Ka ko koe, ‘oka ke ka lotu, hū ki ho loki, pea tāpuni ho matapā, pea fai ho‘o hū ki ho‘o Tamai ‘a ia ‘oku ‘i he lilo: pea ko ho‘o Tamai, ‘a ia ‘oku ne ‘afio‘i ‘a e lilo, te ne totongi kiate koe.

7Pea ‘i ho‘omou ngaahi lotu, ‘oua te mou fakafanafana mo launoa, ‘o hangē ko e hīteni: he ‘oku nau mahalo ‘e ongo atu ‘enau me‘a ko e lahi ‘o ‘enau lau. 8Ko ia, ‘oua na‘a fakatatau kimoutolu kiate kinautolu: he ‘oku mui ho‘omou kole, ka kuo toka mea‘i ‘e he Tamai ‘amoutolu ‘a e ngaahi me‘a ‘oku mou masiva ai. 9Ko ia ke peheni ha‘amoutolu lotu: Ko ‘emau Tamai ‘oku ‘i Hēvani, ke tāpuhā ho Huafa, 10ke hoko ho‘o Pule, ke fai ho Finangalo, hangē ko ia ‘i he langi ke pehē foki ‘i māmani. 11Ke ke foaki mai he ‘aho ni ha‘amau me‘akai ki he ‘anai,#6.11 ha‘amau… ‘anai; pe ki he ‘ahó ni; pe ki ‘apongipongi; pe ‘a e me‘akai ‘oku ‘aonga ke mau ma‘u. 12pea fakamolemole homau ngaahi mo‘ua; hangē kuo mau fakamolemole foki ‘a kinautolu ne mo‘ua kiate kimautolu. 13Pea ‘oua na‘a ke fakahū kimautolu ki he ‘ahi‘ahi; ka ke fakahaofi kimautolu mei he Fili.#6.13 ‘Oku tānaki mai ki heni ‘i he ngaahi hiki fuoloa ‘e ni‘ihi mo e pehē: he ‘oku ‘o‘ou ‘a e pulé mo e mālohí mo e kolōliá, ‘o ta‘engata, ‘Ēmeni.

14He kapau te mou fakamolemole ‘a e ngaahi hala ‘a e kakai, pea ‘e fakamolemole kimoutolu ‘e ho‘omou Tamai Fakalangi:#Ma‘ake 11.25-26 15pea ka ‘ikai te mou fakamolemole ‘a e ngaahi hala ‘a e kakai, pea ‘e ‘ikai foki fakamolemole ‘e ho‘omou Tamai ho‘omou ngaahi hala.

Ko e ‘Aukai

16Pea ka mou ka ‘aukai, ‘oua te mou fakamatapeko, ‘o hangē ko e kau mālualoi: he ‘oku nau fakalālāfua‘a honau mata, koe‘uhi ke nau hā ki he kakai ‘oku nau ‘aukai. Ko au ē, ‘oku ou tala atu, Ko hono ngata ia ‘o ‘enau totongi kuo nau ma‘u. 17Ka ko koe, ‘oka ke ka ‘aukai, pani ho ‘ulu mo fufulu ho mata: 18koe‘uhi ke ‘oua na‘a hā ho‘o ‘aukai ki he kakai, ka ki ho‘o Tamai pē ‘oku ‘i he fufū: pea ko ho‘o Tamai, ‘a ia ‘oku ne ‘afio‘i ‘a e fufū, te ne totongi kiate koe.

Ko e Tānaki Koloa ‘i Langi

(Luk 12.33,34)

19‘Oua na‘a fa‘oaki koloa ma‘amoutolu ‘i māmani; he ko e potu ia ‘oku keina ai ‘e he ane mo e ‘ume‘umea, pea haea ‘e he kau kaiha‘a ‘o nau kaiha‘asi:#Sēm 5.2-3 20kae fa‘oaki koloa ma‘amoutolu ‘i langi, he ko e potu ia ‘oku ‘ikai keina ai ‘e he ane mo e ‘ume‘umea, pea ‘oku ‘ikai hāea ‘e he kau kaiha‘a ‘o kaiha‘asi: 21he ko e potu ‘oku ‘i ai ho‘o koloa, ‘e ‘i ai foki mo ho loto.

Ko e Māma‘anga ‘o e Sinó

(Luk 11.34-36)

22Ko e māma‘anga ‘o e sino ko e mata: ko ia kapau ‘oku hu‘ufataha ‘a e sio ‘a ho mata, ‘e maama pē ho sino kotoa: ka ka kovi ho mata, pea ‘e fakapo‘uli ho sino kotoa. 23Pea kapau ko e koto po‘uli ia, ‘a e me‘a ‘iate koe na‘e ngaohi ke fakamaama, huanoa ‘a e me‘a ‘iate koe ‘a ia ko hono anga ke po‘uli.

Ko e Koloa

(Luk 16.13; 12.22-31)

24‘Oku ‘ikai ke lava ‘e ha taha ke ne ‘eiki ‘aki ha ‘eiki ‘e toko ua: he te ne fehi‘a ki he taha kae ‘ofa‘i ‘a e taha, pe te ne piki ki he taha kae ta‘etoka‘i ‘a e taha, ‘oku ‘ikai te mou lava ke ‘eiki ‘aki ‘a e ‘Otua mo Koloa fakatou‘osi.

25Ko ia ai, ‘oku ou tala kiate kimoutolu, ‘oua na‘a mou lotomo‘ua koe‘uhi ko ho‘omou mo‘ui, ha me‘a te mou kai, pe ha me‘a te mou inu; ‘uma‘ā homou sino, ki ha me‘a te mou ‘ai ki ai. ‘Ikai ‘oku lahi ‘a e mo‘ui ‘i he me‘akai, mo e sino ‘i hono kofu? 26Vakai ange e fanga manupuna ‘o e ‘atā; he ‘oku nau tūtuu‘i pe tu‘usi, pe fa‘oaki feleoko? Ka ‘oku fafanga kinautolu ‘e ho‘omou Tamai Fakalangi. ‘Ikai ‘oku mou mahu‘inga noa pē ‘iate kinautolu? 27Pea neongo ho‘omou lotomo‘ua ki ai, ka tala‘ehai ‘e lava ai ‘e ha taha ke tolo‘i atu hono ta‘u#6.27 ke… ko ha; pe ‘ai ke ne lōloa ange ‘aki. ko ha momo‘i hanga pē ‘e taha.

28Pea ko ho‘omou loto mo‘ua ki he kofu koe‘uma‘ā? Mou sivi ‘a e ngaahi lile ‘o e kelekele, pe kuo fēfē ‘enau tupu: he ‘oku nau fiu ‘a ngāue, pe ‘oku nau filo? 29Ka ‘oku ou tala atu, Na‘a mo Solomone, ‘i he‘ene ‘ai hono nāunau kotoa, na‘e ‘ikai ke vaha‘a teunga‘ia ai ha taha ‘o e ngaahi lile ni.#1 Tu‘i 10.4-7; 2 Kal 9.3-6 30Pea kapau kuo kofu fakatafu‘ufu‘u pehē ‘e he ‘Otua ‘a e mohuku ‘o e kelekele, ‘a ia ‘oku ‘i ai ni he ‘aho ni, kae tafu ‘aki ‘a e ‘ōvani ‘apongipongi, huanoa ‘a kimoutolu, ‘a e kau tui vaivai.

31Ko ia, ‘oua te mou lotomo‘ua, ‘o mou pehē, Te tau kai ai e hā mo inu e hā? Mo kofu ‘aki ‘a e hā? 32He ko e ngaahi me‘a ko eni ‘oku hehenga ki ai ‘a Senitaile: pea ‘oku mea‘i ‘e ho‘omou Tamai Fakalangi ‘oku taau mo kimoutolu ‘a e ngaahi me‘a ko ia kotoa. 33Ka mou kumi mu‘a ki hono pule‘anga, mo e mā‘oni‘oni ‘a‘ana, pea ‘e ‘atu mo ia foki ‘a e ngaahi me‘a ko ia kotoa. 34Ko ia, ‘oua te mou lotomo‘ua koe‘uhi ko e ‘apongipongi, he ‘e mo‘ua ‘a e ‘apongipongi ‘i he me‘a ko ia. ‘Oku lahi pē ki he ‘aho ni ‘a hono kovi ‘o‘ona.

Currently Selected:

Mātiú 6: TMB

Highlight

Copy