Popular Bible Verses from Mātiú 6

Share

Ka mou kumi mu‘a ki hono pule‘anga, mo e mā‘oni‘oni ‘a‘ana, pea ‘e ‘atu mo ia foki ‘a e ngaahi me‘a ko ia kotoa.

Ko ia, ‘oua te mou lotomo‘ua koe‘uhi ko e ‘apongipongi, he ‘e mo‘ua ‘a e ‘apongipongi ‘i he me‘a ko ia. ‘Oku lahi pē ki he ‘aho ni ‘a hono kovi ‘o‘ona.

Ko ia ai, ‘oku ou tala kiate kimoutolu, ‘oua na‘a mou lotomo‘ua koe‘uhi ko ho‘omou mo‘ui, ha me‘a te mou kai, pe ha me‘a te mou inu; ‘uma‘ā homou sino, ki ha me‘a te mou ‘ai ki ai. ‘Ikai ‘oku lahi ‘a e mo‘ui ‘i he me‘akai, mo e sino ‘i hono kofu?

Ka ko koe, ‘oka ke ka lotu, hū ki ho loki, pea tāpuni ho matapā, pea fai ho‘o hū ki ho‘o Tamai ‘a ia ‘oku ‘i he lilo: pea ko ho‘o Tamai, ‘a ia ‘oku ne ‘afio‘i ‘a e lilo, te ne totongi kiate koe.

Ko ia ke peheni ha‘amoutolu lotu: Ko ‘emau Tamai ‘oku ‘i Hēvani, ke tāpuhā ho Huafa, ke hoko ho‘o Pule, ke fai ho Finangalo, hangē ko ia ‘i he langi ke pehē foki ‘i māmani.

Ke ke foaki mai he ‘aho ni ha‘amau me‘akai ki he ‘anai

pea fakamolemole homau ngaahi mo‘ua; hangē kuo mau fakamolemole foki ‘a kinautolu ne mo‘ua kiate kimautolu.

Pea ‘oua na‘a ke fakahū kimautolu ki he ‘ahi‘ahi; ka ke fakahaofi kimautolu mei he Fili.

He kapau te mou fakamolemole ‘a e ngaahi hala ‘a e kakai, pea ‘e fakamolemole kimoutolu ‘e ho‘omou Tamai Fakalangi

Vakai ange e fanga manupuna ‘o e ‘atā; he ‘oku nau tūtuu‘i pe tu‘usi, pe fa‘oaki feleoko? Ka ‘oku fafanga kinautolu ‘e ho‘omou Tamai Fakalangi. ‘Ikai ‘oku mou mahu‘inga noa pē ‘iate kinautolu?

‘Oua na‘a fa‘oaki koloa ma‘amoutolu ‘i māmani; he ko e potu ia ‘oku keina ai ‘e he ane mo e ‘ume‘umea, pea haea ‘e he kau kaiha‘a ‘o nau kaiha‘asi: kae fa‘oaki koloa ma‘amoutolu ‘i langi, he ko e potu ia ‘oku ‘ikai keina ai ‘e he ane mo e ‘ume‘umea, pea ‘oku ‘ikai hāea ‘e he kau kaiha‘a ‘o kaiha‘asi: he ko e potu ‘oku ‘i ai ho‘o koloa, ‘e ‘i ai foki mo ho loto.

‘Oku ‘ikai ke lava ‘e ha taha ke ne ‘eiki ‘aki ha ‘eiki ‘e toko ua: he te ne fehi‘a ki he taha kae ‘ofa‘i ‘a e taha, pe te ne piki ki he taha kae ta‘etoka‘i ‘a e taha, ‘oku ‘ikai te mou lava ke ‘eiki ‘aki ‘a e ‘Otua mo Koloa fakatou‘osi.

Pea kapau kuo kofu fakatafu‘ufu‘u pehē ‘e he ‘Otua ‘a e mohuku ‘o e kelekele, ‘a ia ‘oku ‘i ai ni he ‘aho ni, kae tafu ‘aki ‘a e ‘ōvani ‘apongipongi, huanoa ‘a kimoutolu, ‘a e kau tui vaivai.

Ka ko koe, ‘i ho‘o fai ha‘o foaki, ke‘oua na‘a ‘ilo ‘e ho nima to‘ohema ‘a e me‘a ‘oku fai ‘e ho to‘omata‘u: koe‘uhi ke lilo pē ho‘o foaki; pea ko ho‘o Tamai, ‘a ia ‘oku ne ‘afio‘i ‘a e lilo, te ne totongi kiate koe.

KAE vakai, telia na‘a mou fai ho‘omou tō‘onga fakalotu ke hā ki he kakai, koe‘uhi ke nau siofia kimoutolu; he ka pehē, ‘oku ‘ikai ha‘amou totongi mei ho‘omou Tamai ‘oku ‘i Hēvani.

Pea ka mou ka ‘aukai, ‘oua te mou fakamatapeko, ‘o hangē ko e kau mālualoi: he ‘oku nau fakalālāfua‘a honau mata, koe‘uhi ke nau hā ki he kakai ‘oku nau ‘aukai. Ko au ē, ‘oku ou tala atu, Ko hono ngata ia ‘o ‘enau totongi kuo nau ma‘u. Ka ko koe, ‘oka ke ka ‘aukai, pani ho ‘ulu mo fufulu ho mata: koe‘uhi ke ‘oua na‘a hā ho‘o ‘aukai ki he kakai, ka ki ho‘o Tamai pē ‘oku ‘i he fufū: pea ko ho‘o Tamai, ‘a ia ‘oku ne ‘afio‘i ‘a e fufū, te ne totongi kiate koe.