Mātiú 4

Ko Hono Sivi ‘o Sīsū

(Ma‘ake 1.12-13; Luk 4.1-13)

1NA‘E toki ‘ohake ‘a Sīsū ‘e he Laumālie Mā‘oni‘oni ki he toafa ke ‘ahi‘ahi‘i ‘e he Tēvolo.#Hep 2.18; 4.15 2Pea hili ‘ene ‘aukai ‘i he ‘aho ‘e fāngofulu mo e pō ‘e fāngofulu, pea ne toki hālofia. 3Pea ha‘u ‘a e Toko Taha Fakatauvele, ‘o ne pehē kiate ia, “Kapau ko e ‘Alo koe ‘o e ‘Otua, fekau ke hoko ‘a e ngaahi fo‘i maka ni ko e ngaahi fo‘i mā.”

4Ka ka tali ‘e ia ‘o pehē, Kuo tohi, ‘Oku ‘ikai mo‘ui ‘a e tangata ‘i he mā pē, ka ‘i he ngaahi folofola kotoa pē ‘oku ‘alu atu mei he fofonga ‘o e ‘Otua.#Teu 8.3

5Pea toki ‘ave ia ‘e he Tēvolo ki he Kolo Tapu, ‘o ne fokotu‘u ia ki he tu‘ahivi ‘o e Temipale, 6mo ne pehē ki ai, Kapau ko e ‘Alo koe ‘o e ‘Otua, hopo ki lalo; he kuo tohi,#Saame 91.11-12 He kouna ‘e ia ‘ene kau ‘āngelo telia ‘a koe; pea te nau fataki nima koe na‘a pākia ho va‘e ‘i ha maka.

7Pea lea ‘a Sīsū kiate ia, kuo tohi foki, ‘E ‘ikai te ke ha‘aki ‘ahi‘ahi‘i ‘a e ‘Eiki ko ho ‘Otua.#Teu 6.16

8Pea ‘ave foki ia ‘e he Tēvolo ki ha mo‘unga na‘e mā‘olunga ‘aupito, ‘o ne faka‘ali‘ali ki ai ‘a e ngaahi pule‘anga kotoa pē ‘o māmani mo honau nāunau; 9‘o ne pehē kiate ia, ko e ngaahi me‘a ni kotoa pē te u ‘atu mo‘ou, ‘o kapau te ke fakatōmape‘e ‘o lotu kiate au.

10Pea toki pehē ‘e Sīsū, Sētane, fei mo ‘alu! he kuo tohi, Ko e ‘Eiki ko ho ‘Otua te ke lotu ki ai, pea ko ia pē toko taha te ke ‘otua ‘aki.#Teu 6.13

11Pea toki tukuange ia ‘e he Tēvolo: pea ‘iloange na‘e ha‘u ha kau ‘āngelo ‘o fai ha tauhi kiate ia.

Ko e Kamata Ngāue ‘a Sīsū ‘i Kāleli

(Ma‘ake 1.14,15; Luk 4.14,15)

12Pea ‘i he‘ene fanongo kuo tuku ‘a Sione ki he pilīsone, na‘a ne ‘alu ange ki Kāleli.#Māt 14.3; Ma‘ake 6.17; Luk 3.19-20 13Pea ne hiki mei Nāsaleti, ‘o ne ‘alu ‘o nofo ‘i Kāpaneume, ‘a ia ‘oku ‘i he matātahi, ‘i he ngata‘anga ‘o Sepulone mo Nafitalai:#Sioné 2.12 14koe‘uhi ke fakamo‘oni ki he me‘a na‘e lea‘aki ‘e he palōfita ko ‘Aisea, ‘o pehē,

15He fonua ‘o Sepulone,

He fonua ‘o Nafitalai,#‘Ais 9.1-2

He potu hanga ki tahi,

‘A Tu‘a Soatani,

‘A Kāleli ‘o Senitaile; 16Ko e kakai nofo he po‘uli

Na‘a nau mamata ki ha maama lahi;

Pea ko e nofo he fonua tonu mo e malu ‘o Mate

Na‘e hopo ha maama kiate kinautolu.

17Mei he taimi ko ia na‘e kamata ‘a Sīsū ke malanga, ‘o pehē, Mou fakatomala, he kuo ofi ‘a e Pule‘anga ‘o Hēvani.#Māt 3.2

Ko e fili ‘e Sīsū ha Kau Toutai ‘e Toko Fā

(Ma‘ake 1.16-20; Luk 5.1-11)

18Pea ‘i he‘ene ‘eve‘eva ‘i he matātahi ‘o e Tahi Kāleli, na‘a ne vakai ki ha tautehina, ko Saimone ‘oku ui ko Pita, pea mo ‘Anitelū ko hono tehina ‘oku na sili, he ko e ongo toutai. 19Pea pehē ‘e ia kiate kinaua, Mo omi ‘o muimui ‘iate au, pea te u ngaohi kimoua ko e ongo toutai tangata. 20Pea na li‘aki leva hona kupenga, ‘o na muimui kiate ia.

21Pea kuo ne laka atu mei ai, na‘a ne vakai ki ha tautehina kehe, ko Sēmisi ko e foha ‘o Sēpeti, pea mo Sione ko hono tehina, ‘oku nau ‘i he vaka mo Sēpeti ko ‘ena tamai, ‘o fai ‘enau pena kupenga. Pea na‘a ne ui kinaua. 22Pea na tuku leva ‘a e vaka mo ‘ena tamai, ‘o na muimui kiate ia.

Ko e Faiako, Malanga mo e Fakamo‘ui Mahaki ‘a Sīsū

(Luk 6.17-19)

23Pea na‘a ne foli ‘a Kāleli kātoa, he‘ene faiako ‘i honau ngaahi falelotu, mo ne malanga‘aki ‘a e Kōsipeli ‘o e Pule‘anga: pea neongo pe ko e hā ha alangamahaki na‘e ‘i he kakai ‘Isileli, pe ha mahamahaki, na‘a ne fakamo‘ui ia.#Māt 9.35; Ma‘ake 1.39 24Pea mafola atu hono ongoongo ki Sīlia kātoa; pea nau ‘omi kiate ia ‘a e kakai kotoa pē na‘e puke, ‘a kinautolu na‘e mo‘ua, ‘i he ngaahi mahaki kehekehe ‘o fakamamahi, ‘a e ‘āvea mo e puke fakataimi mo e mamatea, pea na‘a ne fakamo‘ui kinautolu. 25Pea na‘e tulimui kiate ia ha ngaahi fu‘u kakai lahi, mei Kāleli, mo Tikapolusi, mo Selusalema, mo Siutea, pea mo Tu‘a Soatani.

Currently Selected:

Mātiú 4: TMB

Highlight

Copy