Mātiú 3

Ko e Malanga ‘a Sione Papitaiso

(Ma‘ake 1.1-8; Luk 3.1-18; Sioné 1.19-28)

1‘I he kuonga ko ia na‘e ha‘u ‘a Sione Papitaiso, ‘o malanga ‘i he toafa ‘o Siutea, 2‘o ne pehē, Mou fakatomala, he kuo ofi ‘a e Pule‘anga ‘o e Langi.#Māt 4.17; Ma‘ake 1.15 3He ko eni ia na‘e lea ki ai ‘e he palōfita ko ‘Aisea, ‘o pehē,#‘Ais 40.3 (LXX)

Ko e le‘o ‘o ha toko taha ‘oku kalanga he toafa,

Mou teuteu ‘a e hā‘ele‘anga ‘o Sihova;

Fakatonutonu hono ngaahi hala.

4Pea ko e kofu ‘o Sione ko ia na‘e ngaohi mei he fulufulu‘i kāmeli, pea fakama‘u leta ‘i hono kongaloto: pea ko ‘ene me‘akai ko e he‘e mo e honi ‘o e vao.#2 Tu‘i 1.8 5Pea na‘e toki ‘alu atu kiate ia ‘a Selusalema, mo Siutea kotoa, pea mo e feitu‘u kotoa ‘o Soatani: 6pea nau papitaiso ‘iate ia ‘i he vaitafe ko Soatani, he vete ‘enau ngaahi angahala.

7Pea ‘i he ene vakai ki he tokolahi ‘o e kau Fālesi mo e Sātusi ‘oku nau ha‘u ki he papitaiso, na‘a ne pehē kiate kinautolu, ‘a e hako‘i ngata fekai, ko hai ne fale‘i kimoutolu ke hola mei he houhau ‘oku tu‘unuku mai?#Māt 12.34; 23.33 8Kapau ko ia, pea mou fua ‘o taau mo ha fakatomala. 9Pea ‘oua te mou hanga ‘o fuataki ‘i homou loto, ‘o pehē, Ko ‘Epalahame ‘a ‘emau tamai: he ‘oku ou tala atu, ‘oku mafai ‘e he ‘Otua ke fokotu‘u mei he ngaahi maka ni ha fānau kia ‘Epalahame.#Sioné 8.33 10Pea ‘oku lolotonga tu‘u ni ‘a e toki ‘i he tefito ‘o e ngaahi ‘akau: ko ia ‘ilonga ha ‘akau ‘oku ‘ikai fua lelei, ‘oku tā ‘o laku ki he afi.#Māt 7.19 11Ko au ‘oku ou papitaiso vai kimoutolu ki he fakatomala: ka ko ia ‘oku muimui mai ‘oku ne mālohi ‘iate au, ko e Toko Taha ia ‘oku ‘ikai te u taau ke takitaki hono topuva‘e: ‘e papitaiso kimoutolu ‘e ia ‘i he Laumālie Mā‘oni‘oni mo e afi. 12Ko e Toko Taha ia ‘oku ‘i hono nima ‘a e ī, pea te ne tapili ke ‘osi ‘a ‘ene ‘au‘au‘anga: pea te ne tānaki ‘ene ngaahi fo‘i uite ki he feleoko, ka te ne tutu ‘a e kafukafu ‘aki ‘a e afi ‘oku ‘ikai matāmate‘i.

Ko Hono Papitaiso ‘o Sīsū

(Ma‘ake 1.9-11; Luk 3.21-22)

13Pea toki ha‘u ‘a Sīsū mei Kāleli ki Soatani kia Sione ke papitaiso ‘iate ia. 14Ka ka teke‘i ia ‘e Sione, ‘o ne pehē, Na‘e totonu mu‘a ke u papitaiso ‘iate koe, pea ‘oku ke ha‘u koā kiate au?

15Pea tali ‘e Sīsū ‘o ne pehē kiate ia, Tukuange pē ‘i he taimi ni: he ‘oku taau pehē mo kitaua ke fakakakato ‘a e tu‘utu‘uni kotoa pē. Pea ne toki tukuange ia.

16Pea kuo papitaiso ‘a Sīsū, na‘a ne ‘alu hake leva mei he vai; pea vakai, na‘e matangaki ‘a e langi kiate ia, pea ne mamata ki he Laumālie ‘o e ‘Otua ‘oku ‘alu hifo ‘i he tatau ‘o ha lupe, ‘o ne a‘u kiate ia 17Pea ‘iloange, na‘e ai ha le‘o mei he langi na‘e pehē mai, Ko Hoku ‘Alo Pele ‘ena, ‘a ia kuo u hōifua ai.#Sēn 22.2; Saame 2.7; ‘Ais 42.1; Māt 12.18; 17.5; Ma‘ake 1.11; Luk 9.35

Currently Selected:

Mātiú 3: TMB

Highlight

Copy