Mātiú 2

Ko e ‘A‘ahi mei Hahake

1PEA hili ‘a e ‘alo‘i ‘o Sīsū ‘i Pētelihema ‘i Siutea, ‘i he kuonga ‘o e tu‘i ko Hēlota, ‘iloange na‘e hoko ki Selusalema ‘ani Maki mei Hahake, 2‘oku nau fehu‘i, Kofa‘ā ia kuo ‘alo‘i ko e Tu‘i ‘o e kakai Siu? he na‘a mau mamata ‘i Hahake ki hono fetu‘u pea kuo mau omi ke hū kiate ia.

3Pea ‘i he fanongo ki ai ‘a e tu‘i ko Hēlota, na‘a ne puputu‘u, ‘a ia mo Selusalema kātoa. 4Pea na‘a ne fakataha ‘a e hou‘eiki taula‘eiki kotoa pē, mo e kau sikalaipe faka-Siu; ‘o ne ‘eke kiate kinautolu pe ‘e ‘alo‘i ‘i fē ‘a e Mīsaia.

5Pea nau tali kiate ia, ‘i Pētelihema ‘i Siutea; he ‘oku pehē hono tohi ‘e he palōfita, 6Pea ko koe, Pētelihema, konga ‘o Siuta,#Maiká 5.2 ‘oku ‘ikai ‘aupito ko e si‘i taha koe ‘i he hou‘eiki ‘o Siuta; koe‘uhi ‘e ha‘u meiate koe ha takimu‘a ‘a ia te ne pule‘i hoku kakai ko ‘Isileli.

7Pea toki ‘omi fakafufū ‘e Hēlota ‘a e kau Maki, ‘o ne ‘eke kiate kinautolu ke mahu‘ingamālie ‘a e taimi ‘o e hā ‘a e fetu‘u. 8Pea ne fekau ke nau ō ki Pētelihema, ‘o ne pehē, Mou ‘alu ‘o ‘eke fakatotolo ki he tamasi‘i; pea ka mou ka ‘ilo pea mou tala mai, koe‘uhi ke u ‘alu mo au ‘o hū kiate ia.

9Pea kuo nau ma‘u ‘a e fekau ‘a e Tu‘i pea nau ‘alu; pea ‘iloange, ko e fetu‘u na‘a nau mamata ki ai ‘i Hahake, na‘a ne tataki kinautolu ‘o a‘u atu ki he potu na‘e ‘i ai ‘a e tamasi‘i, ‘o ne tu‘u ai mei ‘olunga. 10Pea ‘i he‘enau sio ki he fetu‘u, na‘a nau fiefia ‘aupito, ‘aupito. 11Pea ‘i he‘enau hū ki he fale, na‘a nau ‘ilo ‘a e tamasi‘i, ‘oku ‘i he‘ene fa‘ē ko Mele; pea nau fakatōmape‘e ‘o hū kiate ia: pea na‘a nau tangaki ‘enau ngaahi ‘angame‘a, ‘o nau ‘atu kiate ia ‘a e ngaahi me‘a‘ofa, ko e koula mo e laipeno mo e mula.

12Pea ‘i he valokia kinautolu ‘i ha misi ke ‘oua te nau foki kia Hēlota, ne nau ‘alu ki honau fonua ‘i ha hala kehe.

Ko e Hola ki ‘Isipite

13Pea kuo nau ‘alu, ‘iloange, na‘e hā kia Siosifa ha ‘āngelo ‘a e ‘Eiki ‘i ha misi, ‘o ne pehē, ‘Ā hake, ‘o to‘o ‘a e tamasi‘i mo ‘ene fa‘ē, pea ke holataki ki ‘Isipite; pea ke nofo ai kae‘oua ke u toki fakahā atu; he ‘oku teu kumi ‘e Hēlota ‘a e tamasi‘i ke fakapoongi.

14Pea ‘ā hake ia, ‘o ne to‘o ‘a e tamasi‘i mo ‘ene fa‘ē ‘i he pō ko ia, ‘o nau ‘alu ki ‘Isipite; 15pea na‘a nau nofo ai ‘o a‘u ki he pekia ‘a Hēlota: koe‘uhi ke fakamo‘oni ki he me‘a na‘e folofola‘aki ‘e he ‘Eiki ‘i he palōfita, ‘o pehē, Na‘a ku ui mai hoku foha mei ‘Isipite.#Hōs 11.1

Ko e Tāmate‘i ‘o e Fānau Iiki

16Pea ‘i he toki hā kia Hēlota kuo va‘inga‘aki ia ‘e he kau Maki, na‘a ne tuputāmaki ‘aupito; ‘o ne fekau ke tāmate‘i ‘a e tamaiki kotoa pē ‘i Pētelihema mo e ngaahi ‘api na‘e kau ki ai, ‘o ngata meiate kinautolu na‘e ua ta‘u ‘o fai ki mui; ‘o fakatatau ki he taimi na‘a ne ma‘u mei he kau Maki.

17Pea na‘e toki fakamo‘oni ki he me‘a na‘e lea‘aki ‘e he palōfita ko Selemaia, ‘o pehē, 18Na‘e ongona ‘i Lama ha le‘o,#Sel 31.15 ko e tangi mo e fu‘u tangilāulau; ko e tēngihia ‘e Lesieli ‘ene fānau, pea ‘ikai te ne tali ha fakafiemālie koe‘uhi kuo nau mole.

Ko e Foki Mei ‘Isipite

19Pea ‘i he hili ‘a e pekia ‘a Hēlota, ‘iloange, na‘e hā mai kia Siosifa ‘i ‘Isipite ha ‘āngelo ‘a e ‘Eiki ‘i ha misi, 20‘o ne pehē, ‘Ā hake, pea to‘o ‘a e tamasi‘i mo ‘ene fa‘ē, pea ‘alu ki he fonua ‘o ‘Isileli; he kuo mate ‘a kinautolu na‘e kumi ki he tamasi‘i ke fakapoongi. 21Pea ‘ā hake ia, ‘o ne to‘o ‘a e tamasi‘i mo ‘ene fa‘ē, pea ne ‘alu atu ‘o hū ki he fonua ‘o ‘Isileli.

22Ka ‘i he‘ene fanongo ko ‘Akileosi ‘oku pule ‘i Siutea, ko e fetongi ‘o ‘ene tamai ko Hēlota, na‘a ne manavahē ke ‘alu ki he potu ko ia: pea na‘e valokia ia ‘i ha misi, ko ia na‘a ne fononga ki he ngaahi feitu‘u ‘o Kāleli. 23Pea ne ‘alu ‘o nofo ‘i he kolo ‘oku hingoa ko Nāsaleti; koe‘uhi ke fakamo‘oni ki he me‘a na‘e lea‘aki ‘e he kau Palōfita, ‘o pehē, ‘E ui ia ko ha Nāsaleti.#Ma‘ake 1.24; Luk 2.39; Sioné 1.45

Currently Selected:

Mātiú 2: TMB

Highlight

Copy