Luké 8

Ko e Kau Fefine Na‘e Tokoni Kia Sīsū

1PEA hoko mo ia ‘ene fakatotofu ‘a e kolo mo e vilisi, ‘i he‘ene fanongonongo ‘a e Pule‘anga ‘o e ‘Otua, mo ne tala hono ongoongolelei. 2Pea na‘e ‘iate ia ‘a e kau Hongofulumāua; mo ha tu‘unga fafine ‘a ia kuo fakamo‘ui mei he ngaahi fa‘ahikehe, mo e ngaahi vaivai‘anga; ko Mele ‘oku ui ko e Mele mei Makitala, ‘a ia na‘e ‘alu mei ai ‘a e tēvolo ‘e toko fitu,#Māt 27.55-56; Ma‘ake 15.40-41; Luk 23.49 3mo Sioana ko e uaifi ‘o Kusa ko e mu‘a ‘a Hēlota, mo Sūsana, mo e tokolahi kehe: pea ko e fa‘ahinga ko ia na‘a nau tauhi kinautolu ‘aki ‘enau koloa.

Ko e Talanoa ki he Tangata Ngoue

(Māt 13.1-9; Ma‘ake 4.1-9)

4Pea ‘i he fetautaulaki mai ha fu‘u kakai lahi, pea ha‘u mo ha‘u ha ni‘ihi mei he kolo takitaha, na‘a ne hanga ‘o lea fakatātā kiate kinautolu.

5Na‘e ‘alu atu ha tangata tūtuu‘i ke tūtuu‘i ‘ene tenga: pea ‘i he‘ene tūtuu‘i, ne tō ha me‘a ‘i he ve‘ehala; pea mala ai ‘a e kakai, pea kai ‘o ‘osi ia ‘e he fanga manupuna ‘o e ‘atā. 6Pea tō ha me‘a ‘e taha ki he funga maka; pea ‘i he‘ene tupu na‘e mate ia ko e ‘ikai mālūlū. 7Pea tō ha me‘a ‘e taha ki he tu‘unga ‘o ha ngaahi ‘akau talatala; pea tupu fakataha mo ia ‘a e ‘akau talatala, ‘o nau kāsia ia. 8Pea tō ha me‘a ‘e taha ki he kelekele kuo taau, pea ‘i he‘ene tupu na‘a ne fua, ‘o fuo teau.

Pea ‘i he ‘ai atu ‘e Sīsū ‘a e me‘a ko ia na‘a ne kalanga, Ko ia ‘oku ‘i ai hano telinga ke ongo‘aki, pea ke ne ongo‘i.

Ko e ‘Uhinga ‘o e Fai Talanoa Fakatātā ‘a Sīsuú

(Māt 13.10-17; Ma‘ake 4.10-12)

9Pea fakafehu‘i kiate ia ‘e he‘ene kau ako, ‘o pehē, Ko e hā nai ‘a e fakatātā ni? 10Pea ne pehē, Kuo tuku kiate kimoutolu ke ‘ilo ‘a e ngaahi misiteli ‘o e Pule‘anga ‘o e ‘Otua; ka ‘oku fai fakatātā pē ki hono toe ‘o e kakai; koe‘uhi ke nau sio, kae ‘ikai tokanga, pea fanongo, kae ‘ikai ongo‘i.#‘Ais 6.9-10 (LXX)

Ko e Faka‘uhinga ‘e Sīsū ‘Ene Talanoa Fakatātā ki he Pulopulá

(Māt 13.18-23; Ma‘ake 4.13-20)

11Ko eni pē ‘a e fakatātā ko ia: Ko e tenga ko e folofola ‘a e ‘Otua. 12Pea ko kinautolu ‘i he ve‘ehala, ko e kakai ia ‘oku fanongo; pea toki ha‘u ‘a e tēvolo, ‘o ne ‘ave ‘a e folofola mei honau loto, na‘a nau tui pea mo‘ui. 13Pea ko kinautolu ‘i he funga maka, ko e kakai ia ‘oku fanongo leva mo tali fiefia ‘a e folofola; ka ‘oku ‘ikai fai aka ‘a kinautolu ni, ka ‘oku nau tui pē ‘i he taimi ko ia, pea ‘i ha taimi ‘ahi‘ahi ‘oku nau hiki. 14Pea ko ia na‘e tō ki he ‘akau talatala, ko kinautolu ia na‘e fanongo, ka ‘i he‘enau fai atu ‘oku ngāpulou kinautolu ‘e he ngaahi mo‘ua ‘o e mo‘ui ni, mo hono koloa, mo hono ngaahi mālie; pea ‘oku ‘ikai ai te nau tō a‘u. 15Pea ko ia ‘oku ‘i he kelekele kuo lelei, ko e fa‘ahinga ia ‘oku nau tali ‘a e folofola‘aki ‘a e loto kuo lelei mo taau, ‘o nau pukenima‘i ia, pea nau fua he‘enau kītaki.

Ko e Maama

(Ma‘ake 4.21-25)

16Pea tala‘ehai ‘oku tutu ha maama, pea pulonga ‘aki ha kumete, pe ‘ai ki ha lalo mohenga; ka ‘oku ne ‘ai ki ha tu‘unga maama, koe‘uhi ke sio ki hono maama ‘e kinautolu ‘oku hū mai.#Māt 5.15; Luk 11.33

17He ‘oku ‘ikai ha me‘a ‘oku lilo, ka ‘e faifai pea e‘a; ‘uma‘ā ha me‘a ‘oku fufū ka ‘e ‘iloa pē, pea hoko ‘o fu‘u e‘a.#Māt 10.26; Luk 12.2

18Ko ia mou tokanga ki he anga ‘o ho‘omou fanongo: he ka ai ha taha te ne ma‘u ha me‘a, ‘e ‘ange ki ai mo ha me‘a; pea ka ai ha taha ‘oku ‘ikai ke ma‘u, na‘a mo e me‘a ‘oku ne matamata ma‘u ‘e to‘o meiate ia.#Māt 25.29; Luk 19.26

Ko e Fa‘ē mo e Kāinga ‘o Sīsū

(Māt 12.46-50; Ma‘ake 4.31-35)

19Pea na‘e ‘alu ange kiate ia ‘ene fa‘ē mo hono ngaahi tokoua, pea na‘e ‘ikai te nau lava ke fe‘iloaki mo ia koe‘uhi ko e fu‘u kakai. 20Pea na‘e fakahā ange kia Sīsū, ‘o pehē, Ko ho‘o fa‘ē mo ho ngaahi tokoua ‘oku tutu‘u mei tu‘a, ‘oku nau fie fe‘iloaki mo koe.

21Ka ka tali ‘e ia kiate kinautolu ‘o pehē, Ko ‘eku fa‘ē mo hoku ngaahi tokoua, ko eni ia; ‘a kinautolu ‘oku fanongo ki he folofola ‘a e ‘Otua, ‘o fai ki ai.

Ko e Vaka Afāngia

(Māt 8.23-27; Ma‘ake 4.35-41)

22Pea ko e ‘aho ‘e taha, na‘e heka ‘e ia mo ‘ene kau ako ki ha vaka; pea ne pehē kiate kinautolu, Tau ō ki he kau ano ‘e taha. Pea nau tuku atu. 23Pea na‘e mohe ia lolotonga ‘enau folau: pea hifo mai ha ‘ahiohio ki he anovai; pea nau kamata ngoto, pea hangē ka tu‘utāmaki. 24Pea nau ‘unu‘unu atu ‘o fafangu ia, ‘ēī, ‘ēī, ‘oku tau tu‘utāmaki! Pea ne tu‘u, ‘o lolomi ‘a e matangi mo e hou ‘o e tahi: pea fakalolo ia ‘o tofu.

25Pea ne pehē kiate kinautolu, Kofa‘ā ia ho‘omou tui?

Pea nau ofo mo ilifia, ‘o nau fepehē‘aki, Uoi! ko hai nai ‘eni! he ‘oku ne tu‘utu‘uni me‘a ki he matangi mo e tahi, pea nau fakaongo ki ai!

Ko e Tangata Na‘e Ma‘u ‘e ha Tēvolo

(Māt 8.28-34; Ma‘ake 5.1-20)

26Pea nau tau atu ki he fonua ‘o e kakai Kēlasa,#8.26 Kēlasa: ‘Oku pehē ‘i hono ngaahi hiki fuoloa ‘e ni‘ihi: Katala, (vakai kia Māt 8.28); ka ‘i he ni‘ihi: Kelekesa. ‘a ia ko ha fonua ‘oku fevaha‘anaki mo Kāleli. 27Pea ‘i he‘ene hifo ki ‘uta, na‘e fakafetaulaki kiate ia ha tangata ‘o e kolo, ‘a ia kuo iate ia ha fanga tēvolo, pea kuo fuoloa mo e ‘ikai te ne tui ha kofu, pea na‘e ‘ikai te ne nofo ki ha fale, ka ko e ngaahi fonualoto pē. 28Pea ‘i he‘ene ‘ilo ‘a Sīsū, na‘a ne kaila, ‘o ne hinga atu ki ai, ‘o ne lea le‘o lahi ‘o pehē, Ko ho hā au, ‘e Sīsū, ko e ‘Alo ‘o e ‘Otua Taupotu? ‘oku ou kole kiate koe, ‘oua na‘a ke fakamamahi‘i au. 29He kuo ne kamata fekau ki he fa‘ahikehe ke mahu‘i mei he tangata. He kuo fuoloa hono ‘āvea, pea na‘e fa‘a ha‘i seini ia, pea ma‘u kii‘i hono va‘e; ka ka motuhi ‘e ia hono ha‘i, kae fakaoma ia ‘e he tēvolo ki he toafa.

30Pea fehu‘i ‘e Sīsū kiate ia, Ko hai ho hingoa? Pea ne tali, ko Kongakau au: he na‘e tokolahi ‘a e tēvolo kuo hū kiate ia.

31Pea nau kole kiate ia ke ‘oua te ne tu‘utu‘uni ke nau ‘alu mei ai ki Luo.#8.31 Luo; Na‘e tui ‘a e kakai ‘o e kuonga ko iá ‘e tuku pōpula ‘a e ngaahi laumālie ‘ulí‘i lolofonua mama‘o kae‘oua ke fai honau tautea faka‘osí.

32Pea na‘e ai ha fanga puaka tokolahi ‘oku nau huhua ‘i he mo‘unga: pea kole ‘e he ngaahi fa‘ahikehe kiate ia ke ne tuku ke nau hū ki he fa‘ahinga ko ia. Pea ne tukuange. 33Pea ‘alu atu ‘a e fanga tēvolo mei he tangata, ‘o nau hū ki he puaka; pea ‘oho ‘a e fanga manu ‘i he tahifohifo ki he anovai, ‘o nau melemo ai.

34Pea hola ‘a e kakai na‘e tauhi kinautolu, ‘i he‘enau sio ki he me‘a kuo fai, pea nau ongoongoa ia ki he kolo mo e ngoue‘anga. 35Pea na‘e ‘alu atu ‘a e kakai ke vakai ‘a e me‘a kuo fai; pea nau ha‘u kia Sīsū, pea nau ‘ilo ‘a e tangata, ‘a ia na‘e ‘alu mei ai ‘a e fanga tēvolo, ‘oku ne ta‘utu ‘i he va‘e ‘o Sīsū, kuo kofu, pea kuo poto: pea nau ilifia. 36Pea talanoa‘ia kiate kinautolu ‘e he kakai na‘e mamata ki ai ‘a e anga ‘o e fakamo‘ui ‘o e ‘āvea. 37Pea kole kia Sīsū ‘e he kakai kotoa ‘o e feitu‘u ‘o Kēlasa ke ne ‘alu meiate kinautolu; he na‘a nau mo‘u manavahēa ‘aupito: ko ia, na‘a ne heka vaka, ‘o ne foki atu. 38Pea ko e tangata, ‘a ia ne ‘alu mei ai ‘a e fanga tēvolo, na‘a ne kole kia Sīsū ke na ō mo ia: ka ka tekaki ia ‘e Sīsū, ‘o ne pehē.

39Foki pē ki ho fale, pea fakamatala ki he ngaahi fu‘u me‘a kuo fai ‘e he ‘Otua ma‘au.

Pea ‘alu ange ia, ‘o ongoongoa ‘i he kolo kotoa ‘a e ngaahi fu‘u me‘a kuo fai ma‘ana ‘e Sīsū.

Ko e Finemui Na‘e Tei Mate mo e Fefine ‘Au Toto

(Māt 9.18-26; Ma‘ake 5.21-43)

40Pea ‘i he foki atu ‘a Sīsū, na‘e tali fiefia ia ‘e he kakai; he kuo nau nofo‘aki ‘amanaki kotoa pē kiate ia. 41Pea ‘iloange na‘e ha‘u kiate ia ha tangata, ‘a ia na‘e hingoa ko Sailosi, pea ko e toko taha ia na‘e pule ki he falelotu: pea ne tōmape‘e ‘i he va‘e ‘o Sīsū, ‘o ne kole kiate ia ke ‘alu ange ki hono ‘api: 42he ‘oku taha tofu pē ‘ene me‘a, ko e ta‘ahine, fe‘unga nai hono ta‘u mo e hongofulu mā ua, pea ‘oku fakatau ni ia ke pekia. Pea ‘i he‘ene ‘alu ange na‘e ‘efitu‘ua ia ‘i he kakai.

43Pea na‘e ai ha fefine kuo hongofulu mā ua ta‘u ‘ene ‘au toto, kae‘uma‘ā kuo mole ‘ene me‘a kotoa ki he kau faito‘o,#8.43 kae‘uma‘ā… faito‘o; ‘Oku ‘ikai ke ‘asi ‘a e kupu‘i lea ko ení‘i he ngaahi hiki fuoloa ‘e ni‘ihi. kae ‘ikai lava ‘e ha taha hano faito‘o; 44pea ‘unu‘unu atu ia ‘i hono tu‘a, ‘o ne ala ki he pao ‘o hono kofu: pea tuku fakafokifā ‘ene ‘au toto. 45Pea lea ‘a Sīsū ‘o pehē, Ko hai ia ne ala kiate au?

Pea ‘i he‘enau faka‘ikai kotoa pē, na‘e pehē ‘e Pita mo kinautolu na‘e ‘iate ia, ‘ēī, ‘oku kāpui koe ‘e he kakai, mo feta‘omi mai.

46Ka ka lea ‘e Sīsū, ‘o pehē, Ka na‘e ai ha taha na‘e ala mai: he ‘oku ou ‘ilo kuo ‘alu meiate au ha mālohi. 47Pea ‘i he hā ki he fefine ‘oku ‘ikai te ne puli, na‘a ne ha‘u tetetete, ‘o ne hinga atu ‘i hono ‘ao, ‘o ne fakahā ‘i he ‘ao ‘o e kakai kotoa ‘a e ‘uhinga ‘o ‘ene ala kiate ia, pea mo ‘ene mo‘ui ai leva. 48Pea pehē ‘e Sīsū ki ai, Nga‘ata, kuo fakamo‘ui koe ‘e ho‘o tui: ‘alu atu, ‘o fiemālie pē ā.

49Pea lolotonga ‘ene kei lea mo e ha‘u ha taha mei he fale ‘o e pule ‘o e falelotu, ‘o ne pehē kiate ia, Kuo pekia ho ‘ōfefine; ‘oua ‘e fakaongosia ‘a e Tangata‘eiki.

50Kae fanongo ‘e Sīsū ‘o ne tali ki ai, ‘oua ‘e lotosi‘i; kehe pē ke ke tui, pea ‘e fakamo‘ui ia.

51Pea ‘i he‘ene hū ki fale, na‘e ‘ikai te ne tuku ha taha ke hū mo ia, ko Pita pē, mo Sione, mo Sēmisi, pea mo e tamai ‘a e ki‘i fefine mo ‘ene fa‘ē. 52Pea ‘oku fai ‘e he kakai kotoa pē hono tēngihia, mo nau tangi fetuki. Pea pehē ‘e Sīsū, ‘Oua ‘e tēngihia; he ‘oku ‘ikai te ne pekia, ka ‘oku mohe.

53Pea nau luma kiate ia, he‘enau ‘ilo kuo ne pekia: 54ka ka hanga ‘e ia ‘o puke hono nima, mo ne lea ‘o pehē, Ta‘ahine, tu‘u. 55Pea foki mai hono laumālie, ‘o ne tu‘u hake leva: pea tu‘utu‘uni ‘e Sīsū ke nau ‘ange ha me‘a ke ne kai. 56Pea fu‘u ‘oho ‘ene mātu‘a: ka ka fekau ‘e ia kiate kinaua, ke ‘oua na‘a na tala ki ha taha ‘a e me‘a kuo fai.

Currently Selected:

Luké 8: TMB

Highlight

Copy