Luké 9

Ko e Fakahinohino ‘e Sīsū ‘Ene Kau ‘Apositolo ‘e Toko Hongofulu-Mā-Uá

(Māt 10.5-15; Ma‘ake 6.7-13)

1PEA fakataha ‘e ia ‘a e kau Hongofulumāua, ‘o ne tuku kiate kinautolu ke mālohi mo fa‘iteliha ki he kau tēvolo, pea ke fakamo‘ui mahaki. 2Pea ne fekau ke nau fanongonongo ‘a e Pule‘anga ‘o e ‘Otua, pea ke fai faito‘o. 3Pea ne pehē kiate kinautolu, ‘oua na‘a to‘o ha me‘a ki he hala, ha tokotoko, pe ha kato ‘oho, pe ha mā, pe ha pa‘anga; pe te mou taki sote ‘e ua.#Luk 10.4-11; Ngā 13.51 4Pea ka mou ka hū ki hā fale, mou nofo pē ai, pea hiki pē mei ai ‘i ho‘omou ‘alu ki ha potu kehe. 5Pea ka ai ha ni‘ihi ‘e ‘ikai te nau tali kimoutolu: ka mou ka hū mai mei he kolo ko ia, tūtuu‘i hono efu mei homou va‘e ko e faka‘ilonga kiate kinautolu.

6Pea na‘a nau ō, ‘o ‘alu atu ‘i he vilisi takitaha, ‘o nau tala ‘a e ongoongolelei, mo nau faito‘o ‘i he potu kotoa pē.

Ko e Hoha‘a ‘a Hēlota

(Māt 14.1-12; Ma‘ake 6.14-29)

7Pea na‘e fanongo ‘a e Tu‘i ko Hēlota ki he ngaahi me‘a na‘e fai; ‘o ne toumoua ‘aupito, koe‘uhi ko e pehē ‘e he ni‘ihi, Ko Sione kuo toetu‘u mei he pekia,#Māt 16.14; Ma‘ake 8.28; Luk 9.19 8ka ko e ni‘ihi, Ko ‘Ilaisiā kuo hā; pea ko e ni‘ihi, Ko e toko taha ‘i he kau palōfita mu‘a kuo toetu‘u. 9Pea pehē ‘e Hēlota, Kuo u tu‘usi ‘a e ‘ulu ‘o Sione: ka ko hai nai ‘eni ‘a ia ‘oku ongo mai ‘ene ngaahi fu‘u me‘a pehē? Pea ne feinga ke fe‘iloaki mo ia.

Ko e Fafanga ‘e Sīsu ‘a e Toko Nima Afe

(Māt 14.13-21; Ma‘ake 6.30-44; Sioné 6.1-14)

10Pea na‘e foki mai ‘a e kau ‘Aposetolo, ‘o nau fakamatala kia Sīsū ‘a e ngaahi me‘a kuo nau fai. Pea ne ‘ave kinautolu, ‘o nau ō fakaekinautolu pē ki ha kolo na‘e ui ko Petesaita. 11Ka ka ‘ilo ki ai ‘e he ngaahi kakai, ‘o nau tulimui kiate ia: pea ne tali lelei kinautolu, ‘o ne lea ki ai ‘i he Pule‘anga ‘o e ‘Otua, ‘o ne fakamo‘ui ‘a kinautolu na‘e tangi ki ha faito‘o.

12Pea kamata pale ‘a e la‘ā, pea ‘unu‘unu atu ‘a e kau Hongofulumāua, ‘o nau pehē kiate ia, Tukuange mu‘a ‘a e kakai ke nau fononga ki he ngaahi vilisi takatakai, mo e ngaahi ngoue, ke nau mohe ai mo kumi ‘oho: he ko e potu lala ‘oku tau ‘i ai.

13Ka ka pehē ‘e ia kiate kinautolu, ‘ange ‘e kimoutolu ha‘anau kai.

Pea nau tali, ‘Oku ‘ikai te mau ma‘u ha me‘a, ko e fo‘i mā pē ‘e nima, mo e ika ‘e ua; ka na‘a ko e pehē ke mau ‘alu ‘o fakatau me‘a tokoni ma‘a e kakai kotoa ko eni.

14He ko e tangata na‘e fe‘unga mo e toko nima afe nai.

Pea me‘a ‘e ia ki he‘ene kau ako, Fakatākoto kinautolu, ‘o fakakalasi, ‘o tautau toko nimangofulu nai.

15Pea nau fai pehē, ‘o fakatākoto kinautolu kotoa. 16Pea ne to‘o ‘a e fo‘i mā ‘e nima, pea mo e ongo ika, ‘o ne tāngaki hake ki he langi, mo ne tāpuaki‘i ia; pea ne pakipaki, mo toutou ‘ange ki he‘ene kau ako ke tufaki ki he kakai. 17Pea nau kai, ‘o mākona kotoa pē: pea na‘e tānaki ‘enau mapakipaki‘i mā na‘e toe, ko e ngaahi kato fakahunga ‘e hongofulu mā ua.

Ko Hai ‘a Sīsū?

(Māt 16.13-19; Ma‘ake 8.27-29)

18Pea koe ‘aho ‘e taha, lolotonga ‘ene fai ‘ene lotu toko taha pē, na‘e omi kiate ia ‘a e kau ako; pea ne fehu‘i kiate kinautolu, ‘o pehē, Ko hai au ‘i he lau ‘a e ngaahi kakai?

19Pea nau tali ‘o pehē, Ko Sione Papitaiso; ka ko e lau ‘a e ni‘ihi, Ko ‘Ilaisiā; pea ko e ni‘ihi, Kuo toetu‘u ha taha ‘o e kau palōfita mu‘a.#Māt 14.1-2; Ma‘ake 6.14-15; Luk 9.7-8

20Pea pehē ange ‘e ia, Ka ko hai au ‘i he lau ‘amoutolu?#Sioné 6.68-69

Pea tali ‘e Pita, ‘o ne pehē, KO E MĪSAIA ‘a e ‘OTUA.

Ko e Lea‘aki ‘e Sīsū Hono Fakamamahi‘ímo ‘Ene Pekiá

(Māt 16.20-28; Ma‘ake 8.30–9.1)

21Pea ne lolomi kinautolu, mo tu‘utu‘uni ke ‘oua te nau tala ia ki ha taha; 22‘o ne pehē, Kuo pau ki he Fanautama ‘a Tangata ke lahi hono fakamamahi‘i; pea ke fakatale‘i ia ‘e he kau mātu‘a mo e hou‘eiki taula‘eiki, mo e kau sikalaipe; pea ke tāmate‘i; pea ‘i hono ‘aho tolu ke ne toetu‘u.

23Pea ne lea kiate kinautolu kotoa pē, Ka ai ha taha ‘oku ne fie muimui mai kiate au, ke ne hangē ha mateaki, pea ke ne fua hono kolosi ‘i he ‘aho kotoa pē, pea ke ne hoko ko hoku lahi.#Māt 10.38; Luk 14.27 24He ko ia te ne fai ke kalofaki ‘ene mo‘ui, ko ‘ene tuku ia ke mole: ka ko ia te ne tuku ‘ene mo‘ui ke mole koe‘uhi ko au, ko eni ia ‘oku fakahaofi ia.#Māt 10.39; Luk 17.33; Sioné 12.25 25He ka ne kuo ma‘u ‘e ha tangata ‘i he‘ene ngāue ‘a māmani kātoa, ka kuo ne maumau ai ia, pe kuo ne mole ai, pea ko e hā ha me‘a kuo ne lava? 26He ko ia te ne maa‘i au mo ‘eku ngaahi tala, ‘e maa‘i ‘a e toko taha ko ia ‘e he Fanautama ‘a Tangata, ‘oka hā‘ele mai ia mo hono nāunau ‘o‘ona, pea mo e nāunau ‘o ene Tamai, pea mo e nāunau ‘o e kau ‘āngelo tapu. 27Pea ‘oku ou fakapapau atu, ‘oku ai ha ni‘ihi ‘iate kinautolu ‘oku tutu‘u hena, ‘a ia ‘e ‘ikai te nau momo‘i lave ki he mate, kae‘oua ke nau mamata ki he Pule‘anga ‘o e ‘Otua.

Ko e Lāngilangi Mo‘oni ‘o Sīsuú

(Māt 17.1-8; Ma‘ake 9.2-8)

28Pea fe‘unga nai mo hono valu ‘o e ‘aho, hili ‘ene ngaahi lea ko ia, na‘a ne ‘ave ‘a Pita mo Sione mo Sēmisi, ‘o ne ‘alu hake ki he mo‘unga ke lotu.#2 Pit 1.17-18 29Pea lolotonga ‘ene lotu, ‘iloange na‘e hā kehe hono fōtunga, pea ko hono kofu na‘e hinaekiaki, pea tatapa hangē ko e ‘uhila. 30Pea tā ko e ongo tangata ‘oku na talanoa mo ia, ‘a ia ko Mōsese mo ‘Ilaisiā; 31na‘e hā lāngilangi‘ia kinaua, ‘o nau alea ki he‘ene ‘ekisoto ‘oku ne fakatetu‘a ke lava‘i Selusalema. 32Pea ko Pita mo kinaua na‘e ‘iate ia kuo nau tulemohe; ka ‘i he‘enau ‘ā lelei na‘a nau sio ki he‘ene lāngilangi‘ia, pea mo e ongo tangata ‘oku tutu‘u mo ia. 33Pea ‘i he faifai pea na kamata ‘alu meiate ia, pea pehē ‘e Pita kia Sīsū, ‘ēī, ‘oku sai ‘etau ‘i heni pea mau ngaohi mu‘a ha fakahekeheke ‘e tolu; ‘o taha mo‘ou, pea taha mo‘o Mōsese, pea taha mo‘o ‘Ilaisiā: ko ‘ene lea puna pē.

34Pea lolotonga ‘ene lau pehē, na‘e hoko mai ha ‘ao ‘o fakapūlou kinaua; pea nau manavahē ‘i he ‘ena hū ki he ‘ao. 35Pea na‘e hoko mai ha le‘o mei he ‘ao ‘oku folofola mai, Ko hoku ‘Alo ‘ena kuo u fili; mou fakaongo kiate ia.#‘Ais 42.1; Māt 3.17; 12.18; Ma‘ake 1.11; Luk 3.22

36Pea ‘i he hoko mai ‘a e le‘o, ko Sīsū pē na‘e ‘iloa toko taha pē. Pea na‘a nau fakalongo pē, pea na‘e ‘ikai te nau fakahā ki ha taha ‘i he taimi ko ia ha momo‘i me‘a ‘e taha kuo nau sio ki ai.

Ko e Fakamo‘ui ‘e Sīsū ha Tamasi‘i

(Māt 17.14-18; Ma‘ake 9.14-27)

37Pea pongipongi hake ‘i he‘enau ‘alu hifo mei he mo‘unga, na‘e fakafetaulaki kiate ia ha fu‘u kakai. 38Pea ‘iloange, na‘e kalanga ha tangata mei he ha‘oha‘onga, ‘o pehē, Tangata‘eiki, ‘oku ou kole kiate koe, ke ke me‘a mai ki hoku ‘uhiki; he ko si‘eku me‘a pē taha ia. 39Pea vakai, ‘oku ‘i ai ha fa‘ahikehe ‘oku ne puke ia; pea fakafokifā te ne kaila; pea ‘oku ne fakatekelili‘i ia, ‘o koa hono ngutu; pea ‘oku taiki ‘ene mahu‘i mei ai, he‘ene fu‘u laikina ia. 40Pea u kole ki ho‘o kau ako ke nau kapusi ia, ka na‘e ‘ikai te nau lava.

41Pea tali ‘e Sīsū, ‘o ne pehē, ‘A e fa‘ahinga ta‘etui mo angakehe, ‘e ngata ‘afē ‘eku feangai mo kimoutolu, mo ‘eku kātaki‘i kimoutolu? Taki mai ki heni ho foha.

42Pea lolotonga ‘ene ‘unu‘unu mai, na‘e ha‘aki ia ‘e he tēvolo, ‘o fu‘u fakatekelili‘i. Ka ka lolomi ‘e Sīsū ‘a e fa‘ahikehe, ‘o ne fakamo‘ui ‘a e tama, mo ne ‘ange ia ki he‘ene tamai. 43Pea nau to‘oa fuli pē ‘i he māfimafi ‘o e ‘Otua.

Ko e Toe Lea‘aki ‘e Sīsū ‘Ene Pekiá

(Māt 17.22,23; Ma‘ake 9.30-32)

44Pea lolotonga ‘enau ofoofo ‘i he ngaahi me‘a kehekehe na‘a ne fai, ne ne lea ki he‘ene kau ako, ‘o pehē, Ka ko kimoutolu, mou ‘ai ki homou telinga ‘a e ngaahi lea ko eni; he ‘oku nānāfaki ke tukuange ‘a e Fanautama ‘a Tangata ki he nima ‘o e kakai. 45Ka na‘e ‘ikai te nau ‘ilo hono ‘uhinga ‘o e lea ko ia, pea na‘e tuku fufū ia meiate kinautolu ke ‘oua te nau ‘ilo ia: pea na‘a nau mālū‘ia ke fehu‘i kiate ia ‘i he lea ko ia.

Ko Hai ‘Oku Tu‘ukimu‘a Tahá?

(Māt 18.1-5; Ma‘ake 9.33-37)

46Pea na‘e tupu ‘iate kinautolu ha fakakikihi, pe ko hai nai ‘iate kinautolu ‘e lahi.#Luk 22.24 47Ka ka ‘ilo pē ‘e Sīsū ‘a e fifili ‘a honau loto, ‘o ne puke ha tamasi‘i, ‘o tuku ‘i honau ‘ao, 48pea ne pehē kiate kinautolu, Ko ia te ne tali ‘a e tamasi‘i ni ‘i hoku hingoa ‘oku ne tali au: pea ko ia te ne tali au ‘oku ne tali ia na‘a ne fekau mai au: he ko ia ‘oku nofo kimui ‘aupito ‘iate kimoutolu, ko eni ia ‘oku lahi.#Māt 10.40; Luk 10.16; Sioné 13.20

Ko e Lea‘aki e Huafa ‘o Sīsuú

(Ma‘ake 9.38-40)

49Pea tali ‘e Sione ‘o ne pehē, ‘ēī, na‘a mau ‘ilo ha taha ‘oku ne kapusi tēvolo ‘i he huafa ‘o‘ou; pea mau fai ke ta‘ofi ia, he ‘oku ‘ikai te ne ‘i he lahi fakataha mo kimautolu.

50Ka ka tali ‘e Sīsū ki ai, ‘Oua ‘e ta‘ofi: he ko ia ‘oku ‘ikai ke tu‘u kiate kimoutolu, ‘oku ne tu‘u ma‘amoutolu.

Ko e Fakasītu‘a‘i ‘e he Kau Samēliá ‘a Sīsū

51Pea na‘e faifai pea hokosia ‘a e taimi ‘o hono ‘ohake, pea tutui ‘e ia hono fofonga ke ‘alu ki Selusalema; 52pea ne fekau atu ha kau talafekau ke fakamelomelo kiate ia: pea ‘i he‘enau fononga, na‘a nau hū ki ha vilisi ‘o e kau Samēlia koe‘uhi ke fei tokoni kia Sīsū. 53Ka na‘e ‘ikai te nau fie tali ia, koe‘uhi ko e hanga ‘ene fononga ki Selusalema. 54Pea ‘i he vakai ki ai ‘ene ongo ako, ko Sēmisi mo Sione, na‘a na pehē, ‘Eiki, ko ho loto ke mā tuputupulefanua ke tō hifo ha afi mei he langi, ‘o faka‘auha kinautolu?#2 Tu‘i 1.9-16 #9.54 ‘Oku tānaki mai ‘i he ngaahi hiki fuoloa ‘e ni‘ihi ‘a e pehē: ‘O hangē ko ia na‘e fai ‘e ‘Ilaisiaá.

55Pea ne tafoki ‘o valoki‘i kinaua;#9.55 ‘Oku tānaki mai ‘i he ngaahi hiki fuoloa ‘e ni‘ihi ‘a e pehē: ‘Oku ‘ikai te mou ‘ilo ‘a e fa‘ahinga laumālie ‘oku ‘a‘ana kimoutolú; he na‘e ‘ikai ke hoko mai ‘a e Fanautama ‘a Tangatá ke faka‘auha ‘a e kakaíka ko hono fakamo‘ui kinautolu. 56pea nau ‘alu ki ha vilisi kehe.

Ko e Tokotolu Na‘e Fie Kaungā Fononga mo Sīsū

(Māt 8.19-22)

57Pea lolotonga ‘enau fononga ‘i he hala, na‘e lea ha toko taha kiate ia, ‘o pehē, ‘Eiki, te u muimui kiate koe, neongo pe ko e fē ha potu te ke me‘a ki ai.

58Pea pehē ‘e Sīsū kiate ia, Ko e fanga fōkisi ‘oku ai hanau tafu, mo e fanga manupuna ‘o e ‘atā hanau pununga; ka ko e Fanautama ‘a Tangata ‘oku ‘ikai si‘a potu ke ‘olunga ki ai hono ‘ulu.

59Pea ne me‘a ki ha toko taha kehe, Muimui koe kiate au.

Ka ka tali ‘e ia, ‘Eiki, ke ke tuku mai au ke u lele mu‘a, ‘o tanu si‘eku motu‘a.

60Pea ne pehē ki ai, Tuku ki he kau mate ke nau tanu ‘a e mate ‘anautolu: ka ke ‘alu koe ‘o malanga‘aki ‘a e Pule‘anga ‘o e ‘Otua.

61Pea lea ‘e ha taha kehe foki, ‘Eiki, Te u muimui kiate koe; ka ke tuku mai mu‘a ke u fai ‘eku tatau kiate kinautolu ‘i ‘api.#1 Tu‘i 19.20

62Ka ka pehē ‘e Sīsū kiate ia, Ko ia ‘oku ala ke faka‘uli ‘a e palau, mo kilokilo ki he ngaahi me‘a ‘i mui, ‘oku ‘ikai te ne tuha mo e Pule‘anga ‘o e ‘Otua.

Currently Selected:

Luké 9: TMB

Highlight

Copy