KO ‘AISEA 41
41
1MOU tu‘u fakalongo pē ‘i hoku ‘ao, ‘a e ngaahi motu; pea ko e me‘a ki he ngaahi fa‘ahinga, ke nau kumi ivi fo‘ou, ke nau ‘unu‘unu ‘o toki lea: ke tau hopo fakataha ‘i he fakamaau. 2Ko hai kuo ne langa‘i mei hahake ‘a e toko taha ko ia ne ui ‘e Totonu#41.2 ‘a e… Totonu; Ko Kōlesi is, ko e Tu‘i Fakaleveleva ‘o Pēsiá (vakai ki he 45.1). ke muimui kiate ia? ‘Oku ne tukuange kiate ia ‘a e ngaahi kakai, pea ‘oku ne tuku ke ne ikuna ‘a e ngaahi tu‘i; ‘oku ne tuku ke nau hangē ha efu ki he‘ene heletā, pea hangē ko e kau‘i koane vilingia ki he‘ene kaufana. 3‘Oku ne tuli kinautolu, ‘o ne hao lelei atu; ‘i ha hala ta‘elavea ‘e hono va‘e. 4Ko hai kuo ne fokotu‘u, ‘o fai ia, he‘ene ui mai ‘a e ngaahi to‘utangata mei he kamata‘anga? Ko au Sihova, ‘a e ‘Uluaki, pea ‘oku ‘i he kimui; ko au ia. 5Na‘e vakai ‘e he ngaahi motu, ‘o nau manavahē; na‘e tetetete ‘a e ngaahi ngata‘anga ‘o māmani: na‘a nau fe‘unu‘i mai ‘o ha‘u. 6Na‘e tokoni ē ‘a ē; pea pehē ‘e Me‘a ki hono kaungā ngaue, Kātaki pē. 7Pea na‘e tokoni ‘e he tufunga haka ki he tufunga teuteu, mo ia na‘e tuki pōpooki kiate ia na‘e tuki hahau, ‘o ne lau ki he pulusi, Kuo sai: ‘o ne fakama‘u ia ‘aki ‘a e ngaahi fa‘o ke ve‘e ma‘u. 8Ka ko e me‘a kia koe, ‘Isileli, ‘a ‘eku sevāniti,#2 Kal 20.7; Sēm 2.23 si‘i Sēkope kuo u fili ki ai, ‘a e hako ‘o ‘Epalahame ko hoku takanga; 9‘a koe kuo u puke ki ai mei he ngata‘anga ‘o māmani, ‘o ui mei hono ngaahi tuliki, pea kuo u pehē atu, Ko si‘eku sevāniti koe, kuo u fili koe, ‘o ‘ikai li‘aki. 10‘Oua ‘e manavahē, he ‘oku ou ‘iate koe ‘e au; ‘oua ‘e kilokilo holo, he ko ho ‘Otua au: te u poupou koe ‘e au; ‘io, te u tokoni kiate koe; ‘io, te u pukepuke koe ‘aki ‘a e to‘omata‘u ‘o ‘eku faitotonu. 11Vakai, ko kinautolu kotoa ‘oku lili kiate koe te nau mā mo puputu‘u: te nau hoko ko e koto ‘ikai; ‘io, te nau ‘auha–‘a ho kau veipā vaivai na. 12Te ke kumi kinautolu, ‘o ‘ikai ‘ilo–ho kau fili vaivai na: te nau hoko ko e koto ‘ikai mo ha koto mole–‘a e kau vaivai na ‘oku fai tau kiate koe. 13He ko au Sihova ko ho ‘Otua te u puke ho to‘omata‘u, ‘a au ‘oku ou pehē atu, ‘Oua ‘e manavahē; ko au ‘oku ou tokoni‘i koe.
14‘Oua ‘e manavahē, si‘i tu‘unga fefine ko Sēkope, ‘a momo‘i ‘Isileli; te u tokoni‘i koe ‘e au–ko e folofola ia ‘a Sihova–pea ko ho koeli ko e Tāpuhā ‘o ‘Isileli. 15Vakai ‘oku ou ngaohi koe ko e lula ‘au‘au fo‘ou, māsila, fakatoumata; te ke laiki mo‘unga ke lailai, pea ko e ngaahi tafungofunga te ke ‘ai ke hangē ha kafukafu. 16Te ke lulu veteki kinautolu, kae ‘ave ‘e he matangi, pea punakaki holo ‘e he ‘ahiohio; ka ko koe te ke hākahaka ‘ia Sihova, te ke viki ‘i he Tāpuhā ‘o ‘Isileli, 17si‘i kau fāiekina mo masiva, si‘enau kumi vai, ka ‘oku ‘ikai, pea pakupaku honau ‘elelo ‘i he fie inua! ko au Sihova te u tali kinautolu; ko e ‘Otua ‘o ‘Isileli au, ‘e ‘ikai te u li‘aki kinautolu. 18Te u fakapuna vaitafe ‘i he ngaahi mo‘unga molemole, moni fauniteni ‘i he loto lautoka: te u ngaohi ‘a e toafa ko e tokanga vai, pea ko e fonua mamate ko e koto vai mapunopuna. 19Te u tō ‘i he toafa ‘a e sita, mo e sitimi, mo e maile, mo e ‘akau lolo: te u ‘ai ‘i he ‘Alapā ‘a e paini, ‘a e tita‘a, mo e tasua fakataha: 20koe‘uhi ke nau sio leva, mo tokanga‘i, mo fakakaukau, mo ‘ilo kānokano ‘a ‘eni, ko e nima ‘o Sihova kuo ne fai ‘a e me‘a ni, pea kuo fakatupu ia ‘e he Tāpuhā ‘o ‘Isileli.
21Fai mai ha‘amou fakamatala–ko e folofola ē ‘a Sihova–fokotu‘u mai ‘a e ngaahi me‘a ‘oku mou falala ki ai–ko e folofola ē ‘a e Tu‘i Sēkope. 22Ke nau fokotu‘u ia, ‘o tala mai ‘a e me‘a ‘e hoko. Mou tala mai pe ko e hā ‘e hoko mu‘omu‘a, hono anga, ka mau fakakaukau ki ai, ‘o ‘ilo hono iku‘anga; pe tuku ke mau fanongo ki he me‘a ‘e hoko tuai. 23Mou faka‘ilo mai ‘a e ngaahi me‘a ‘e hoko ‘amui, ke mau ‘ilo ko e ngaahi ‘otua kimoutolu. Kehe pē ke fai ha lelei pe ha kovi, ka tau fesiofaki mu‘a, ‘o fakatou hā. 24Tā ko e koto ‘ikai kimoutolu, pea ko ho‘omou ngāue ko e koto matangi pē: ko e koto fakalielia ‘a ia ‘oku ne fili kimoutolu. 25Kuo u langa‘i ha taha mei he tokelau, pea kuo ne ha‘u; ha taha mei he hopo‘anga la‘ā#41.25 ha… la‘aá; Vakai ki he 41.2. ‘oku ne takua hoku hingoa; pea te ne malaki ‘a e ngaahi kōvana hangē ha kele, ‘io, hangē ha hakaluku ‘umea ‘a ha tufunga ngaohi ipu. 26Ko hai na‘a ne kikite ki ai ‘i he kamata‘anga ‘o e me‘a, ka mau fakamo‘oni ia? ‘o sinaki tala, ka mau pehē, Totonu ia? ‘Ā, ‘oku ‘ikai ha taha ‘oku tala ha me‘a, ‘ā, ‘oku ‘ikai ha taha ‘oku tuku ke ongona hono le‘o; ‘ā, ‘oku ‘ikai ha taha ne fanongo ki ha‘amou lea. 27Ko e ‘uluaki au na‘a ku lea ki Saione, Ko ena! ko ena kinautolu! ‘o u tuku atu ki Selusalema ha tala ongoongolelei.#41.27 ‘Oku ‘ikai ke mahino ‘a e faka-Hepelū ‘o e veesi 27. 28Pea u vakai, ‘oku ‘ikai ha taha; ‘io, ‘iate kinautolu na, ‘oku ‘ikai ha taha ke fale‘i ia; ha taha ke u fehu‘i atu ha me‘a ka ne tali. 29Vakai, ko e koto muna kinautolu kotoa, ko e koto noa ‘enau ngāue, ko e koto matangi mo nge‘esi honau tamapua.
Currently Selected:
KO ‘AISEA 41: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
