‘Efesō 5

Ko e Mo‘ui ‘i he Māmá

1Ka ko e me‘a ki he fe‘auaki mo e anga ‘uli kotoa pē, ‘uma‘ā ‘a e mānumanu, 2na‘a mo e lau ki ai ke mou faka‘ehi‘ehi mei ai, telia ‘a e taau ‘o e feangai ‘a e kakai lotu;#‘Eki 29.18; Saame 40.6 3kae‘uma‘ā ‘a e anga mousa‘a, mo e lau fakasesele pe ko e fie ngutuhua, ko e ngaahi me‘a ‘oku ‘ikai ngali; ka ‘oku tau mu‘a ha fakafeta‘i, 4seuke, ‘oku mahino ia kiate kimoutolu, he ‘oku mou ‘ilo, ‘ilonga ha fe‘auaki, pe ha anga‘uli, pe ha mānumanu, (ko e toko taha tauhi ‘aitoli ia ‘oku ‘ikai hano tofi‘a ‘i he Pule‘anga ‘o Kalaisi mo e ‘Otua. 5‘Oua na‘a tuku ke kākaa‘i kimoutolu ‘e ha taha ‘aki ha koto lau pē: 6he ‘oku hoko mo‘oni ‘i he ngaahi me‘a pehē ‘a e houhau ‘a e ‘Otua ki he hako ‘o talangata‘a. 7Ko ia ‘oua te mou kaume‘a mo kinautolu: 8he neongo ko e koto po‘uli kimoutolu ‘i mu‘a, ka ‘i onopooni ko e koto maama kimoutolu ‘i he ‘Eiki: mou laka ‘o taau mo e fānau ‘a maama; 9(he ko e fua ‘o e maama#5.9 maama; ‘Oku pehē ‘i hono ngaahi hiki fuoloa ‘e ni‘ihi: Laumālié. ‘oku fou ‘i he lelei kotoa pē mo e totonu mo e mo‘oni): 10mo mou sivi ‘o ‘ilo, pe ko e hā ‘a e me‘a ‘e hōifua ai ‘a e ‘Eiki. 11Pea ‘oua na‘a mou kau ‘i he ngaahi ngāue ta‘efua ‘o e fakapo‘uli; kaekehe, mou valoki ki ai mu‘a. 12Seuke, ko ‘enau ngaahi me‘a ‘oku fai fufū, na‘a mo e lea ki ai ko e me‘a fakamā. 13Ka ko e ngaahi me‘a ko ia kotoa pē, ‘oka valokia, ‘oku fakae‘a ‘e he maama ko ia; he ‘ilonga ha me‘a kuo fakae‘a ko e maama ia.#5.13 he… ia; pe ko e māmá ‘oku fakae‘a ‘aki ‘a e me‘a kotoa pē. 14Ko ia ‘oku ne folofola mai–

‘Ā, ‘a koe ‘oku mohe,

Pea tu‘u hake mei he kau mate;

Pea ‘e ulo mai ‘a Kalaisi kiate koe.

15Ko ia, mou tokanga ki ho‘omou laka fakatu‘utu‘uni, pe ‘oku fēfē hono anga, ‘o ‘oua te mou ngali ta‘epoto ai, kae ngali poto: 16mo mou lamalama ke ngāue‘aki ‘a e faingamālie, koe‘uhi ‘oku kovi ‘a e ngaahi ‘aho.#Kol 4.5 17Ko ia, ‘oua te mou hoko ko e kau ta‘eloto, ka ko e kakai ‘oku mahino ki ai ‘a e finangalo ‘o e ‘Eiki.

18Pea ‘oua te mou konā ‘i he uaine, he ‘oku ‘i ai ha fakalusa ‘i he fai pehē; ka ke fakafonu kimoutolu ‘aki ‘a e Laumālie: 19‘o mou fealēlea‘aki ‘aki ‘a e ngaahi saame, mo e himi, mo e hiva fakalaumālie, mo mou hiva mo tā ‘i homou loto ki he ‘Eiki;#Kol 3.16-17 20mo mou fakafeta‘i ma‘u pē ‘i he me‘a kotoa pē ki he ‘Otua ko e Tamai ‘i he huafa ‘o hotau ‘Eiki ko Sīsū Kalaisi;

Ko e Kau Mātu‘a Malí

21mo mou feanganofo‘aki ‘i he ‘apasia kia Kalaisi. 22‘a e kau fefine, mou anganofo ki si‘omou ngaahi husepāniti, ‘o hangē ki he ‘Eiki.#Kol 3.18; 1 Pit 3.1 23He ko e husepāniti ko e ‘ulu ‘o e uaifi, ‘o hangē foki ko Kalaisi ko e ‘ulu ‘o e Siasi; ‘io, ko ia ia ko e fakamo‘ui ‘o e sino. 24Ka neongo ia, kae hangē ‘oku anganofo ‘a e Siasi kia Kalaisi, ke pehē foki mo e kau fefine ki honau ngaahi husepāniti ‘i he me‘a kotoa.

25‘a e kau tangata, mou ‘ofa ki homou ngaahi uaifi, ‘o hangē foki ko Kalaisi ne ne ‘ofa‘i ‘a e Siasi, ‘o ne li‘oa ‘a ‘Ene ‘Afio koe‘uhi ko ia:#Kol 3.19; 1 Pit 3.7 26koe‘uhi ke ne fakamā‘oni‘oni‘i ia ‘aki ‘a e folofola, hili ‘ene fufulu ia ‘i he pālutu‘anga ko ia ko e vai; 27koe‘uhi ke ne ‘omi ‘e ia ‘a e Siasi kiate ia ‘oku fetapatapaki, ‘o ‘oua na‘a ai hano ‘ila pe fe‘ufe‘u, pe ha me‘a pehē ‘e taha, kaekehe ke ne mā‘oni‘oni mo ta‘emele. 28‘Oku totonu ke pehē foki ‘a e ‘ofa ‘a e ngaahi husepāniti ki si‘onau ngaahi uaifi, he ko si‘onau sino kinautolu. Ko ia ‘oku ne ‘ofa ki hono uaifi ‘oku ne ‘ofa kiate ia. 29Seuke, ‘anefe‘ia ‘a e fehi‘a ‘a ha taha ki hono kakano ‘o‘ona? kaekehe ‘oku ne fafanga mo tauhi ia, ‘e hangē foki ko e fai ‘a Kalaisi ki he Siasi. 30He ko e ngaahi kupu kitautolu ‘o hono sino. 31“Ko ia ‘e tukuange ‘e he tangata ‘a e tamai mo e fa‘ē kae pīkitai ki hono uaifi; pea te na hoko ko e kakano pē taha.”#Sēn 2.24 32Ko e misiteli taumama‘o ‘eni; ka ‘oku kau ‘eku lea ‘a‘aku kia Kalaisi mo e Siasi. 33Ka ko kimoutolu foki fakafo‘itangata–‘ē, ke takitaha ‘ofa ki si‘ono uaifi ‘o hangē ko ‘ene ‘ofa kiate ia; pea ko e uaifi ke ne faka‘apa‘apa ki hono husepāniti.

Currently Selected:

‘Efesō 5: TMB

Highlight

Copy