‘Apositoló 7

Ko e Malanga ‘a Sitivení.

1PEA me‘a mai ‘a e Taula‘eiki Lahi, ‘Oku mo‘oni koā ‘a e ngaahi me‘a ni?

2Pea pehē ‘e ia, kāinga Matāpule mo Hou‘eiki, mou me‘a mai: Ko e ‘Otua hā ‘i he Sikaina na‘a ne fakahā ia ki he‘etau kui ko ‘Epalahame, lolotonga ‘ene nofo ‘i Mesopotēmia, pea te‘eki ke ne nofo ‘i Kālana.#Sēn 12.1 3Pea ne folofola kiate ia, Hiki mei ho fonua, pea mei ho kāinga, pea ha‘u ki he fonua te u toki fakahā atu. 4Toki ‘alu atu ia mei he fonua ‘o e kakai Kalitia, ‘o ne nofo ‘i Kālana; pea hili ‘a e pekia ‘a ‘ene ‘eiki, na‘e hiki ia mei ai ‘e he ‘Otua ki he fonua ko eni, ‘a ia kuo hiki ki ai ‘e kimoutolu foki, ‘o mou nofo ki ai ni.#Sēn 11.31; 12.4 5Ka na‘e ‘ikai te ne foaki kiate ia ‘i ai ha konga kelekele ke fe‘unga mo hono topuva‘e, huanoa hano tofi‘a; ka na‘a ne tala‘ofa te ne mātu‘aki tuku ia mo‘ona, pea mo hano hako ‘amui, ‘osi ‘oku ‘ikai ha‘ane fānau.#Sēn 12.7; 13.15; 15.18; 17.8 6Pea na‘e folofola ‘e he ‘Otua, tokua ‘e nofo muli hono hako ‘i he fonua ‘o ha kakai kehe, ‘a ia te nau fakapōpula‘i kinautolu, mo ngaohikovi‘i, ‘o fāngeau ta‘u.#Sēn 15.13-14 7Pea me‘a mai ‘a e ‘Otua, Te u fakamāu‘i ‘a e kakai ko ia te nau hopoate ki ai; pea hili ia te nau hiki atu mei ai, pea te nau fai ‘enau lotu kiate au ‘i he potu ko eni.#‘Eki 3.12 8Pea na‘a ne tuku kiate ia ‘a e fuakava kamu; pea ‘i he‘ene pehē, na‘a ne ma‘u ha foha ko ‘Aisake, pea ne kamu ia ‘i hono ‘aho valu; pea ma‘u ‘e ‘Aisake ‘a Sēkope; pea ma‘u ‘e Sēkope ‘a e kau Hongofulu-mā-ua Pēteliake.#Sēn 17.10-14; 21.2-4; 25.26; 29.31; 35.18

9Pea meheka ‘a e kau Pēteliake kia Siosifa, ‘o nau fakatau ia ki ‘Isipite: ka na‘e ‘iate ia ‘a e ‘Otua,#Sēn 37.11,28; 39.2,21 10‘o ne fakahaofi ia mei he‘ene faingata‘a‘ia kotoa pē, ‘o ne tuku ke ne hā faka‘ofo‘ofa mo ngali poto kia Felo ko e Tu‘i ‘Isipite; ‘a ia na‘a ne fakanofo ia ko e pule ‘o ‘Isipite, kae‘uma‘ā ‘a e ha‘a tu‘i kotoa.#Sēn 41.39-41 11Pea na‘e tō ha honge ki ‘Isipite kotoa mo Kēnani, pea na‘e lahi ‘a e faingata‘a: pea ko ‘etau ngaahi kui na‘e ‘ikai te nau ma‘u ‘a e me‘akai ‘a manu.#Sēn 42.1-2 12Ka ‘i he ma‘u talanoa ‘e Sēkope ‘oku mā‘ia ‘a ‘Isipite, na‘a ne fekau atu ki ai ‘etau ngaahi kui, ko e ‘uluaki ‘alu ia. 13Pea ‘i hono tu‘o ua na‘e ‘ilo ‘a Siosifa ‘e hono ngaahi tokoua; pea e‘a kia Felo ‘a e tupu‘anga ‘o Siosifa.#Sēn 45.1,16 14Pea fekau ange ‘e Siosifa ke ‘omi ‘a Sēkope ko ‘ene ‘eiki, mo hono kāinga kotoa, ko e toko fitungofulu mo e toko nima.#Sēn 45.9-10,17-18; 46.27 15Pea na‘e ‘alu hifo ‘a Sēkope ki ‘Isipite, pea na‘e pekia ai ‘e ia mo ‘etau ngaahi kui:#Sēn 46.1-7; 49.33 16pea na‘e hiki kinautolu ki Sikemi, ‘o telio ‘i he fonualoto na‘e fakatau pa‘anga ‘e ‘Epalahame mei he fānau ‘a Hēmoa ‘i Sikemi.#Sēn 23.3-16; 33.19; 50.7-13; Sios 24.32

17Pea ‘i he faka‘a‘au ke ofi mai ‘a e taimi ‘o e tala‘ofa, ‘a ia ne fai ‘e he ‘Otua kia ‘Epalahame, pea tupu ‘a e kakai ‘i ‘Isipite, ‘o fu‘u tokolahi ‘aupito.#‘Eki 1.7-8 18Ka na‘e faifai pea mālohi ‘i ‘Isipite ha tu‘i na‘e fa‘ahinga kehe, ‘a ia na‘e ‘ikai te ne ‘ilo kia Siosifa. 19Pea fāsi‘a‘i ‘e ia hotau tutupu‘anga, mo ne ngaohikovi‘i ‘etau mātu‘a; ko ia ne nau laku kitu‘a ‘enau kau valevale ke ‘oua na‘a nau mo‘ui.#‘Eki 1.10-11,22 20Ko e kuonga pē ia na‘e fanau‘i ai ‘a Mōsese; pea ko e toko taha pē ia ke toulekeleka‘ia ai ‘a e ‘Otua; pea na‘e tauhi ia ‘o māhina tolu ‘i he fale ‘o ‘ene tamai:#‘Eki 2.2 21pea ‘i hono lī ia kitua‘ā, na‘e fakahake ia ‘e he ‘ōfefine ‘o Felo, ‘o ne tauhi ia ma‘ane tama ‘a‘ana.#‘Eki 2.3-10 22Pea na‘e ako‘i ‘a Mōsese ‘i he fa‘ahinga poto kotoa ‘o e kakai ‘Isipite, pea kaukaua ‘ene ngaahi lea mo ‘ene ngaahi ngāue.

23Pea ‘i he‘ene a‘u ki hono fāngofulu ta‘u, pea ake ‘i hono loto ke ‘a‘ahi ki hono kāinga ko ha‘a ‘Isileli.#‘Eki 2.11-15 24Pea ‘i he‘ene sio ki ha toko taha ‘oku ngaohikovi‘i, na‘a ne langomaki‘i ia, ‘o ne fai ha sauni ma‘a e fakamālohia, ‘o ne taa‘i ‘a e tangata ‘Isipite: 25pea na‘a ne mahalo ‘e ‘ilo leva ‘e hono kāinga ‘oku nima‘aki ia ‘e he ‘Otua ke ‘omi hanau fakamo‘ui: ka na‘e ‘ikai te nau ‘ilo. 26Ko e ‘aho foki na‘a na feholoi, na‘a ne fakahā ia ki hanau tokoua na‘e kē, pea na‘a ne feinga ke fakalelei kinaua, he‘ene pehē, ‘Oku mo kāinga; ka ko e hā ‘oku mo fekainaki ai? 27Ka ko e tangata na‘e tupu ai ‘a e kovi na‘a ne teke‘i ‘a Mōsese, ‘o ne pehē, Ko hai na‘e fakanofo koe ko homau pule mo e fakamaau? 28Na‘a ko ho loto ke fakapoongi au, ‘o hangē ko ho‘o fakapoongi ‘a e ‘Isipite ‘aneafi, ‘ō? 29Pea hola ‘a Mōsese ‘i he lea ko ia, pea ‘āunofo ia ‘i he fonua ko Mitiani, ‘o ne ma‘u ai ha ongo foha ‘e tokoua.#‘Eki 18.3-4

30Pea ‘osi ai ha ta‘u ‘e fāngofulu; pea toki hā kiate ia ‘i he toafa ‘o e mo‘unga ko Sainai, ha ‘āngelo ‘oku ne ‘afio ‘i ha afi na‘e ulo ‘i ha vao talatala‘āmoa.#‘Eki 3.1-10 31Pea ‘i he sio ki ai ‘a Mōsese, na‘a ne ofo ‘i he me‘a na‘e hā; pea ‘i he‘ene ‘unu‘unu atu ke fakasio ki ai, ‘iloange ko e le‘o ‘o e ‘Eiki ‘oku ne pehē mai, 32Ko au ko e ‘Otua ‘o ho‘o ngaahi kui, ko e ‘Otua ‘o ‘Epalahame mo ‘Aisake mo Sēkope. Pea mo‘utetetetea ‘a Mōsese, ‘o ne manavahē ke fakasio. 33Pea folofola ‘a e ‘Eiki kiate ia, To‘o ho sū mei ho va‘e; he ko e potu ‘oku ke tu‘u ai ko e kelekele tapu. 34Kuo u mātu‘aki mamata ki he ngaohikovi‘i ‘o hoku kakai ‘oku ‘i ‘Isipite, pea kuo ongo mai ‘enau to‘e, pea ko ‘eku ‘alu hifo ‘eni ke fakahaofi kinautolu. Pea ko eni, ha‘u ā ‘o fai ‘eku fekau ki ‘Isipite.

35‘a e Mōsese ko ia na‘a nau fakafeinga‘i, he‘enau pehē, Ko hai na‘e fakanofo koe ko homau pule mo e fakamaau? ko eni ia tangata ne fekau atu ‘e he ‘Otua mo‘onau pule mo e huhu‘i, ‘o ne fakafai ‘ene fekau ‘i he ‘āngelo na‘e hā kiate ia ‘i he talatala‘āmoa.#‘Eki 2.14 36Ko eni ia na‘a ne taki kitua‘ā kinautolu, hili ‘ene fai ‘a e ngaahi me‘a fakaofo, mo e ngaahi mana, ‘i he fonua ko ‘Isipite, mo e Tahi Kulokula, kae‘uma‘ā ‘a e Toafa, ‘o fāngofulu ta‘u.#‘Eki 7.5; 14.21; Nōm 14.33 37Ko eni ia ‘a e Mōsese na‘e me‘a ki ha‘a ‘Isileli, ‘o pehē, ‘E fokotu‘u ‘e he ‘Otua ma‘amoutolu mei homou kāinga ha palōfita ‘oku hangē ko au.#7.37 ‘oku… au; pe ‘o hangē ko ‘ene fekau mai aú. #Teu 18.15,18 38Ko eni ia na‘a ne ‘i he siasi ‘i he Toafa, ‘o ne feangai mo e ‘Āngelo, he‘ene folofola mai kiate ia ‘i he mo‘unga ko Sainai; ‘o ne feangai foki mo ‘etau ngaahi kui: ko ia ia taha na‘a ne ma‘u ‘a e ngaahi folofola mo‘ui tuputupu‘a ke ‘omi mo‘otautolu.#‘Eki 19.1; 20.17; Teu 5.1-33

39Ko ia ia na‘e ‘ikai fie talangofua ki ai ‘etau ngaahi kui; ka na‘a nau teke‘i ia, ‘o nau foki loto he‘enau sio ki ‘Isipite, 40‘o nau pehē kia ‘Ēlone, Ngaohi mai hatau ngaahi ‘otua ke takihala kiate kitautolu; he ko e me‘a ki he siana ni ko Mōsese, ‘a ia na‘a ne ‘omeia kitautolu mei ‘Isipite, ‘oku ‘ikai te mau ‘ilo pe ko e hā kuo hoko kiate ia.#‘Eki 32.1 41Pea nau ngaohi pulu ‘i he taimi ko ia, pea nau ‘ohake feilaulau ki he ‘aitoli, ‘o nau hākahaka ‘i he me‘a ne ngaohi ‘e he nima ‘onautolu.#‘Eki 32.2-6 42Pea liliu ai ‘a e ‘Otua, ‘o ne tukuange kinautolu ke nau ‘otua ‘aki ‘a e hōsitē ‘o langi; ‘o hangē ā ko ia ‘oku tu‘u ‘i he Tohi Palōfita,#‘Ēmosi 5.25-27 (LXX) ‘o pehē, ‘E ha‘a ‘Isileli, he na‘a mou tauhi mai ha ngaahi feilaulau, mo ha ngaahi me‘a‘ofa ‘i he ta‘u ‘e fāngofulu ko ia ‘i he toafa! 43Kae‘uma‘a na‘a mou neke fano ‘a e Tāpanekale ‘o Moloke, mo e fetu‘u ‘o e ‘otua ko Lēfana, ko e ongo fakatātā na‘a mou ngaohi ke lotu ki ai–‘io, te u hiki kimoutolu kitu‘a Pāpilone.

44Na‘e ma‘u ‘e he‘etau ngaahi kui ‘a e Tāpanekale tukunga fakamo‘oni lolotonga ‘enau ‘i he Toafa, ‘o hangē ko e tu‘utu‘uni ‘e ia na‘e folofola kia Mōsese, ‘o fekau ke ne ngaohi ia ke hangē ko e fakatātā kuo ne mamata ki ai.#‘Eki 25.9,40 45Ko ia ia na‘e tukufakaholo ki he‘etau ngaahi kui na‘e ‘ia Siosiua, ‘o nau ‘omi ki heni lolotonga ‘enau ma‘u mai ‘a e fonua ‘o e ngaahi fa‘ahinga Senitaile, ‘a ia na‘e fakateka atu kinautolu ‘e he ‘Otua mei he ‘ao ‘o ‘etau ngaahi kui; ‘o nau fai‘aki ia ‘o a‘u ki he kuonga ‘o Tēvita:#Sios 3.14-17 46‘a ia ‘i he‘ena mālie mo e ‘Otua, na‘a ne kole ke tuku ma‘ana ke kumi ha me‘i fakahekeheke mo‘o e ‘Otua ‘o Sēkope:#7.46 ‘Otua ‘o Sēkope; ‘Oku pehē ‘i hono ngaahi hiki fuoloa ‘e ni‘ihi: kakai ‘Isilelí. #2 Sām 7.1-16; 1 Kal 17.1-14 47pea langa ‘e Solomone mo‘ona ha fale hau.#1 Tu‘i 6.1-38; 2 Kal 3.1-17

48Ka neongo ia, ka tala‘ehai ‘oku ‘afio ‘a e ‘Eiki Taupotu ‘i ha me‘a ‘oku ngaohi ‘e he nima. Vakai ki he lea ‘a e palōfita, 49‘Oku folofola mai ‘a e ‘Eiki,#‘Ais 66.1-2

Ko e Langi ko hoku taloni pē,

Pea mo Māmani ko hoku tu‘ungava‘e pē:

Pea ko e hā ai ‘a e anga ‘o e fale te mou langa mai?

Pea ko e fē ‘a e potu ke u ta‘utu ai?

50‘Ikai na‘e ngaohi ‘e hoku nima

‘a e ngaahi me‘a ko ia kotoa?

51‘Ā, ‘a e fa‘ahinga kia kekeva, mo ta‘ekamu homou loto mo e telinga, ‘oku mou malele ma‘u ai pē ke teke‘i ‘a e Laumālie Mā‘oni‘oni: na‘e pehē ho‘omou ngaahi kui, pea pehē foki mo kimoutolu.#‘Ais 63.10 52Ko e fē ha taha ‘o e kau palōfita na‘e ‘ikai fakatanga‘i ‘e ho‘omou ngaahi kui? ‘Io, na‘a nau tāmate‘i ‘a kinautolu na‘e sinaki tala ‘a e hā‘ele mai ‘a e Toko Taha Angatonu; ‘a ia kuo mou hoko kimui ni ko hono kau lavaki mo hono kau fakapoongi: 53ko e fa‘ahinga na‘a mou ma‘u ‘a e Lao ‘i hono talafono‘aki ‘e ha kau ‘āngelo, ka na‘e ‘ikai te mou tauhi ki ai.

Ko e Tolomaka‘i ‘o Sitīveni

54Pea ‘i he‘enau fanongo ki he me‘a ko ia, na‘e hangē kuo kilisi ‘o fahiua honau loto, ‘o nau ‘ūtaki kaunifo kiate ia. 55Ka kuo fonu ia ‘i he Laumālie Mā‘oni‘oni; pea ‘i he‘ene sio fakamama‘u ki he langi na‘a ne ‘ilo ‘a e Sikaina ‘o e ‘Otua, pea mo Sīsū ‘oku ne tu‘u mei he to‘omata‘u ‘o e ‘Otua; pea ne pehē, 56‘Oku ou sio ni ki he ngaahi langi kuo matangaki, pea ko e Fanautama ‘a Tangata ‘oku ne tu‘u mei he to‘omata‘u ‘o e ‘Otua.

57Pea nau fu‘u kālou, ‘o nau tāpuni honau telinga, pea nau ‘oho taha kiate ia. 58‘O nau kapusi kitua‘ā kolo, ‘o kamata tolomaka‘i; pea ko e kau tukuaki na‘a nau laku atu honau ngaahi kote ki he va‘e ‘o ha talavou na‘e hingoa ko Saula. 59Pea nau fai ‘a e tolongi ‘o Sitīveni ‘oku ne tautapa ange ‘o pehē, ‘Eiki Sīsū, ke ke ma‘u atu hoku laumālie. 60Pea ne tū‘ulutui, ‘o kalanga le‘o lahi, ‘Eiki, ‘oua na‘a lau ‘a e angahala ni kiate kinautolu. Pea ‘i he‘ene lea pehē na‘a ne mohe.

Currently Selected:

‘Apositoló 7: TMB

Highlight

Copy