‘Apositoló 6

Ko e Kau Ngāue ‘e Toko Fitu Ma‘á e Siasí

1KA ‘i he kuonga ko ia, ‘a ia na‘e fakatokolahi ai ki he kau ako, na‘e hoko ha lāunga ‘i he kau ‘Elinisito ki he kau Hepelū, koe‘uhi na‘e ta‘etokanga‘i ‘a e kau uitou ‘onautolu ‘i he tufa tokoni na‘e fai ‘i he ‘aho kotoa pē. 2Pea fakataha ‘e he kau Hongofulumāua ‘a e kau ako kātoa, ‘o nau pehē, ‘Oku ‘ikai te mau loto ke tuku li‘aki ‘a e folofola ‘a e ‘Otua ka mau nofo ke fai ‘a e tufa ‘i he ngaahi tēpile. 3Ko ia, kāinga, ke mou fili ha toko fitu meiate kimoutolu, ha kau tangata kuo fakaongo lelei mai, ‘o mātu‘aki fakalaumālie mo poto, pea te mau fakanofo kinautolu ki he ngāue ko ia. 4Ka ko kimautolu, te mau faka‘utumauku ‘a e fai ‘o e hūfia, mo e tufa ‘o e folofola.

5Pea na‘e hā lelei ‘a e lea ko ia ki he fakataha kotoa: pea nau fili ‘a Sitīveni, ko e tangata na‘e fonu ‘i he tui mo e Laumālie Mā‘oni‘oni, pea mo Filipe, mo Pōkolo, mo Naikano, mo Taimoni, mo Pāmina, pea mo Nīkola ko e motu‘a ‘Aniteoke ne tafoki ‘o lotu faka-Siu. 6Pea nau fokotu‘u kinautolu ‘i he ‘ao ‘o e kau ‘Aposetolo; pea hili ‘enau lotu na‘a nau hilifaki nima kiate kinautolu.

7Pea na‘e tupu ma‘u pē ‘a e folofola ‘a e ‘Otua; pea fakatokolahi ‘aupito ‘a e lau ‘o e kau ako ‘i Selusalema; kae‘uma‘ā ko e fu‘u tokolahi ‘o e kau taula‘eiki na‘a nau fakavaivai‘i kinautolu ‘o tui.

Ko Hono Puke Fakamālohi‘i ‘o Sitīveni

8Pea ko Sitīveni, na‘a ne fai ‘i he lotolotonga ‘o e kakai ‘a e ngaahi ngāue fakaofo, mo e ngaahi faka‘ilonga na‘e mamafa, he‘ene fonu kelesi mo mafai ‘aupito. 9Ka na‘e tu‘u hake ha ni‘ihi na‘e kau ki he falelotu na‘e ui ko e falelotu ‘o e kau Lipataine,#6.9 Lipataine; Ko e kau Siu eni na‘e hoko ko e kau pōpula, ka na‘a nau totongi, pe na‘e foaki ange honau fakatau‘atāina‘i. mo e kau Sailine, mo e kau ‘Ālekisānitia, mo e ni‘ihi ‘i he kakai mei Silisia mo ‘Ēsia, ‘o nau fakakikihi mo Sitīveni. 10Ka na‘e ‘ikai te nau lava ke tali ‘a e poto mo e fakalaumālie ‘o ‘ene lea. 11Pea nau toki fale‘i ha kau tangata ke nau lau‘i ia, ‘o pehē, Na‘a mau fanongo ki he‘ene laukovi kia Mōsese pea mo e ‘Otua. 12Pea na‘a nau o‘i ‘a e kakai, kae‘uma‘ā ‘a e kau mātu‘a, mo e kau sikalaipe; pea nau toki mo‘utāmakia ia, ‘o puke, ‘o taki ki he Sanetalimi. 13Na‘a nau ‘omi foki ha kau fakamo‘oni loi, ‘a ia na‘a nau pehē, Ko e tangata ni ‘oku ‘ikai ke ava ‘ene tuki ‘a e Fale Tapu mo e Lao: 14he kuo mau fanongo ki he‘ene pehē, tokua ko Sīsū, ko e siana mei Nāsaleti, te ne vete ‘a e potu ko ia, pea fakakehe ‘a e ngaahi tu‘utu‘uni na‘e tuku ‘e Mōsese kiate kitautolu. 15Pea sio fakamama‘u kiate ia ‘a e kakai kotoa pē na‘e nofo ‘i he Sanetalimi, pea tā ko hono fofonga na‘e hangē ko e fofonga ‘o ha ‘āngelo.

Currently Selected:

‘Apositoló 6: TMB

Highlight

Copy