Matiyu 18

Vuzagbayin o tsugono tsu gaɗi

(Mar. 9:33-37; Luk. 9:46-48)

1A ayin a nan lo, mukumitoni ma n ta̱wa̱i u Yesu ɗa e ecei, “Yayi vuza na u kulaꞋa m gbayin o tsugono tsu gaɗi?”

2Ɗa Yesu u ɗekei maku me kenu ma̱ ta̱wa̱ ma shamgba kelime ke le. 3Ɗa u danai, “N dana ɗa̱ mayun, sai i sabaꞋa ka̱ci ka̱ ɗa̱ i bono an muku n wawaꞋa. Ɗababa, yi a kuꞋuwa o tsugono tsu gaɗi ba. 4Adama a nannai, vuza na baci de dem u bonokoi ka̱ci ka̱ ni an maku me kenu ma nam pa, a̱yi ɗa vuzagbayin o tsugono tsu gaɗi.

5“Vuza na kpamu wi isai maku me kenu tsu nam pa n kula ku va̱, mpa ɗa wi isai.”

Kukondo ku na ka kuzuwa vuza u nusa

(Mar. 9:42-48; Luk. 17:1-2)

6Yesu u lyaꞋi kelime ɗa u danai, “Ili ya atakaci i ɗa a̱ ubuta̱ u vuza na u kuzuwa vuza te a̱ ka̱tsuma̱ ka̱ muku n wawaꞋa n na mi o kutono mu a yaꞋan unushi. Uma a nan lo u laꞋa ta̱ n kugaꞋan a taɗuku le a̱ ubuta̱ u na u laꞋi n uga̱vi a mala n kutali ka̱ a̱miki ushiyi e eɗeku e le!

7“Ili ya atakaci i ɗa a̱ ubuta̱ u uma a aduniyan adama i ili i na i tsu zuwa le a yaꞋan unushi. Ili i nan lo i kuyaꞋan ta̱ nannai, amma ili ya atakaci i ɗa a̱ ubuta̱ u vuza na u zuwai ili i nan lo i yaꞋan nannai! 8Kukiye ku nu ko kune ku nu ku zuwa wu baci vi yaꞋan unushi, gbatya ku ɗa ka̱ta̱ vu vakangu. U laꞋa ta̱ n kugaꞋan vu namba ukambu wi ikyamba i nu ka̱ta̱ vi ciya̱ wuma u babu uteku a na va yaꞋan n ekiye e re n ene e re ka̱ta̱ vu uwa akina a na a̱ kukula̱ ko wanai. 9Ka̱shi ka̱ nu ka zuwa wu baci vi yaꞋan n unushi, kongoro kaꞋa ka̱ta̱ vu vakangu. U laꞋa ta̱ n kugaꞋan vi yongo n ka̱shi ke te ka̱ta̱ vi ciya̱ wuma u babu uteku a na vo yongo n a̱shi e re a̱ nu ka̱ta̱ a taɗuku wu a kpaꞋa ka akina.”

Agisana a malala ma na ma̱ puwa̱nka̱i

(Luk. 15:3-7)

10Ɗa Yesu u danai, “YaꞋin cicoꞋo. Ka̱ta̱ i goyo muku n wawaꞋa ma ba. N dana ɗa̱, i ta̱ n alingata gaɗi a na i n Esheku a̱ va̱ ayin tutu. [ 11Mpa, Maku ma Vuma n ta̱wa̱ ta̱ adama a na n la̱nsa̱ ili i na i puwa̱nka̱i.]#18:11 Atagarda a̱ kuku o yoku i n kabaꞋin 11 ba.

12“Maguɓi mi baci nu nlala amangatawun, ɗa me te ma ɓatsai ali ɗa ma̱ puwa̱nka̱i, yi ɗa̱i u kuyaꞋan? Wi ta̱ a̱ kuka̱sa̱kpa̱ amanga̱na̱shinkupa n kuci n na mo okpoi a kalina a nsasan, ka̱ta̱ u bana u la̱nsa̱ ma na ma̱ puwa̱nka̱i va. 13We ene baci maꞋa, mayun, wi ta̱ a kulaꞋa n kuyaꞋan ma̱za̱nga̱ adama a malala me te ma na we enei va, ali ma laꞋa ma̱za̱nga̱ ma na wishi m maꞋa a̱ ubuta̱ wu nlala amanga̱na̱shinkupa n kuci. 14Ta feu ki nannai n Esheku a̱ ɗa̱ a na i gaɗi. U ciga ko vuza te vu muku n wawaꞋa n nam pa m puwa̱nka̱ dem-dem ba.”

Vuza yoku u nusaka wu baci

(Luk. 17:3)

15Yesu u lyaꞋi kelime ɗa u danai, “Vuza nu u nusaka wu baci, bana a̱ ni ka̱ta̱ vi yotsongu yi unushi u ni. Amma yaꞋan nannai usokongi, uteku u ɗa̱ aza e re. Vuza va u pana baci, vu zuwa yi ta̱ i bono i lyaꞋa kelime n kuyongo. 16Amma u iwan baci kupana, doku vu bana wa̱ ni ka̱ta̱ vi ciya̱ vuza te ko aza e re koɓolo n avu. YaꞋan nahannai adama a na vu tono Katagarda ka Ciɗa ka na ka danai, ‘A̱ ubuta̱ wu ngan n uma e re ko a tatsu u ɗaɗa i kushamkpa n kadanshi.’ #K.Wil. 19:15. 17U iwan baci kupanaka le, dana aza e kelime o Kutoni. U doku baci u iwan kupanaka le, to, bonokoi ni an Za̱ka̱yimbi ko kishi ku utafu.”

Kusa̱nka̱ n kushuku

18Yesu u danai feu, “N dana ɗa̱ ta̱ mayun, Ka̱shile gaɗi ki ta̱ a̱ kushuku n ili i na de dem yu ushuki n i ɗa a aduniyan, amma wi ta̱ a̱ kusa̱nka̱ n ili i na de dem i sa̱nka̱i.

19“N dana ɗa̱, aza e re a̱ ɗa̱ a aduniyan a̱ ushuku baci n ili, ɗa a yaꞋin avasa adama i ɗa, Esheku a̱ va̱ a na i gaɗi i ta̱ a kuyaꞋanka ɗa̱ i ɗa. 20Adama a na ubuta̱ u na baci uma e re ko a tatsu o ɓolongi koɓolo a̱ ka̱tsuma̱ ka kula ka̱ va̱, mi ta̱ lo koɓolo n ele.”

Agisana a kagbashi ka na ka iwain kucinukpaka

21Ɗa Biturusu u ta̱wa̱i u Yesu ɗa we ecei, “Vuzagbayin, vuza va̱ u lyaꞋa baci kelime n kunusaka mu, ku yain ku ɗai u gaꞋin n cinukpaka yi? Ali kucindere?”

22Yesu wu ushuki, “A̱Ꞌa̱, kucindere koci ba, amma ali kucindere ugboku amangatatsunkupa.

23“Tsugono tsu gaɗi ci ta̱ nahannai: Mogono mo yoku maꞋa ma na me sheshei kisa ikebe i na wi o kutono agbashi a̱ ni. 24Ana u gita̱ngi kisa ikebe ya, ɗa a̱ tuka̱i ni n kagbashi ko yoku ka na wi o kutono yi ikebe ya azurufa i gbagbaꞋin a̱kpa̱n kupa (10,000).#18:24 Azurufa a̱ viyum a ci ɗeke ta̱ a ɗa “talenti”, talenti ili i te i ɗa n uteku u na vuza u kutsupa vuza vu ulinga a̱ya̱ 15 a̱yi a kuyaꞋan ulinga a kashina. Azurufa a iyum 10,000 a yawa ta̱ ulinga u ayin mbana 50. 25Kagbashi ka ki n ikebe i na i yawai kutsupa kutan ka ba. Ɗa mogono ma ma zuwai e denge ili dem i na kagbashi ka ki n i ɗa, ali n kagbashi ka a̱ ka̱ci ka̱ ni koɓolo n vuka vi ni m muku n ni. Ka̱ta̱ a ɗika ikebe ya a tsupa mogono ma ili i na wi o kutono kagbashi ka.

26“Amma ɗa kagbashi ka ka̱ kuɗa̱ngi ɗa ko folonoi, ‘Reme ka̱ɗu nu mpa, mi ta̱ a kutsupa wu ili dem i na vi o kutono mu.’ 27Ɗa mogono ma ma panai asuvayali adama a̱ ni, ɗa u ka̱sa̱kpa̱i ni ɗa u danai ka̱ta̱ wo oꞋuso ka̱ci ka̱ ni kutsupa yi ikebe ya ba.

28“Ana kagbashi ka ka lazai, ɗa u lyaꞋi agaꞋin n toku kagbashi ko yoku, vuza na wi o kutono ikebe i kenkeꞋen#18:28 La̱na̱ a kaci ku udani “Ikebe”, punu ɗe ka̱ta̱ vu la̱na̱ “Dinari” a̱ Ubuta̱ wi ili i Kuyeve. amangatawun. Ɗa u kpokoi vuza va o kogboroli. Ɗa u gita̱i kugaga yi nu u danai, ‘Tsupa mu kutan ku va̱!’

29“Ɗa toku kagbashi va u kuɗa̱ngi ɗa u folonoi ni, ‘Reme ka̱ɗu nu mpa, ka̱ta̱ n tsupa wu ili dem i na vi o kutono mu.’

30“Amma ɗa kagbashi ka iyain ka ka iwain kupana asuvayali a̱ ni. Ɗa u kucikpa u danai a zuwa toku kagbashi va a ugbashi sapu ayin a na u tsupai kutan ku na wi o kutono yi. 31Ana agbashi a na a buwai e enei ili i nam pa, ɗa a yaꞋin wupa. Ɗa a banai u mogono wa, ɗa a danai ni dem i na i cinai agbashi e re a nan lo a.

32“Ɗa mogono ma me ɗekei kagbashi ka̱ ni ka iyain ka, ɗa u danai, ‘Avu kagbashi ka gbani-gbani! Ɗa n danai nu vo oꞋuso ka̱ci ka̱ nu kutsupa ili ba, adama a na vu folono mu ta̱ n cinukpaka wu ili i na mi o kutono wu. 33U yotso ta̱ feu vi ishi vu pana asuvayali o tovu kagbashi va, uteku u na m panai asuvayali a̱ nu.’ 34Ɗa mogono ma yaꞋin wupa ka̱u, ɗa u zuwai kagbashi ka a ugbashi adama a na a takacika yi sapu u tsupa ili dem i na wi o kutono yi.

35“Mogono ma nam pa ma yaꞋan ta̱ ili i na Esheku a̱ va̱ a na i gaɗi u kuyaꞋanka ɗa̱ i iwan baci kucinukpaka itoku i ɗa̱ punu a̱ a̱ɗu a̱ ɗa̱.”

Currently Selected:

Matiyu 18: asgNT

Highlight

Copy