Matiyu 17

Tsugbayin tsu mayun ci Yesu

(Mar. 9:2-13; Luk. 9:28-36)

1Ana kuden ku te ku lazai,#17:1 Udani u Cihelene na ɗaɗa “an ayin a̱ ta̱li a lazai.” ɗa Yesu u ɗikai Biturusu koɓolo n Yahaya n Yakubu mokoshi ma̱ ni. A livanki gaɗi vu kusan ku dunduꞋun ubuta̱ u na o kuyongo uteku u le. 2Ana i lo a kinda, ɗa ikyamba i Yesu i sabaꞋi gbende. Kuca̱n n a̱shi a̱ ni a kutasa an kanna, ɗa aminya a̱ ni o bonoi wa̱ri pushe-pushe. 3GogoꞋo lo, Musa† n Iliya a yawai lo, ɗa a̱ gita̱ngi kuyaꞋan kadanshi n a̱yi.

4Ɗa Biturusu u danai ni, “Vuzagbayin, u gaꞋan ta̱ an ci na! YaꞋan ci yaꞋan a̱pa̱m a tatsu, ke te ka̱ nu, ke te ka Musa, ke te kpamu ka Iliya.”

5A̱yi biꞋi a kadanshi, ɗa keleshu ka kutashi wa̱ri puu ce egele ku uta̱i ɗe ɗa ka palai le. Ɗa ka̱la̱ka̱tsu ku uta̱i punu e keleshu ka ɗa ka danai, “Na va Maku ma̱ va̱ maꞋa ma na n cigai, ɗa mi a kupana uyoꞋo n a̱yi mayin. Panakai ni!”

6Ana mukumitoni ma m panai ka̱la̱ka̱tsu ka, ɗa a panai wovon ali ɗa a̱ yikpa̱i a iɗika. 7Amma ɗa Yesu u ta̱wa̱i lo ɗa u saꞋwai le. U danai, “Ɗenga̱i ka̱ta̱ i pana wovon ba!” 8Ɗa a̱ ɗenga̱i amma e ene lo vuza ba, sai Yesu.

9Ele a̱ kucipa̱ a̱ kasaun ka, ɗa Yesu u danai le, “Ka̱ta̱ i dana vuza ko ili i na ye enei ba, sai mpa, Maku ma Vuma, n ɗenga̱ a kasaun.”

10Ɗa mukumitoni ma me ecei ni, “Yi ɗa̱i i zuwai ɗa nlum n Wila̱ n danai sai Iliya u ta̱wa̱ biꞋi kafu Kishi ka̱ ta̱wa̱?”

11Ɗa Yesu u danai le, “Mayun ɗa Iliya u kuta̱wa̱, ka̱ta̱ u foɓuso ili dem. 12Mayun, u ta̱wa̱ ta̱ ɗe. Amma uma e yeve yi ba, ɗa a yaꞋankai ni uteku u na a cigai. Na kelime kenu i ta̱ a kuzuwa Maku ma Vuma mo soꞋo atakaci tsu nan lo tsa feu.” 13Ɗa mukumitoni ma n yevei a na kadanshi ka Yahaya Vuza vu Kusumbu va Akucina ɗa Yesu wi a kuyaꞋanka le.

Yesu u lokoi wunla̱i u gbani-gbani u maku

(Mar. 9:14-29; Luk. 9:37-43a)

14Ana Yesu m mukumitoni n ni n cipa̱i a kusan ka, ka̱bunda̱i ka uma lo a kuvana le. Ɗa vuma vi yoku u yawai lo ɗa u kuɗa̱ngi wa̱ ni. 15Ɗa u danai, “Vuzagbayin, pana asuvayali a maku ma̱ va̱! Wi ta̱ n wunla̱i u gbani-gbani wi ipoyo u na u tsu oꞋuso yi u tsu zuwa yi ta̱ u yikpa̱ a akina ko a̱ mini. 16N tuka̱ yi ta̱ a̱ ubuta̱ u mukumitoni n nu, amma ko vuza te u fuɗa u potsokpo yi ba.”

17Yesu u danai, “A̱ɗa̱ uma a ugbawansuvu a ɗa, yi kpamu n uneki wa̱ a̱ɗu ba. Ali wanai ɗai n kuyongo n a̱ɗa̱? Ali wanai ɗai n kulyaꞋa kelime n kureme ka̱ɗu n a̱ɗa̱? Tuka̱i mu m maku ma na.” 18Ɗa Yesu u ɓarangi wunla̱i u gbani-gbani u na wi a kutakacika maku ma, ɗa u ka̱sa̱kpa̱i ni. A ayin a nan lo a derere ɗa ta na maku ma mo potsoi.

19Ana megeshe ma yaꞋin, ɗa mukumitoni ma n ta̱wa̱i u Yesu a ayin a na wi endeꞋen, ɗa e ecei ni, “Yi ɗa̱i i zuwai ɗa tsu kpa̱ɗa̱i kufuɗa kuloko wunla̱i u gbani-gbani wa?”

20Ɗa Yesu wu ushuki, “Adama a na uneki u ka̱ɗu u ɗa̱ u gusa̱ ta̱. N dana ɗa̱ mayun, uneki u ka̱ɗu u ɗa̱ u yawa baci icuꞋu i musta† m gbayin, yi ta̱ a kudana kusan ku nam pa, ‘Sherewengu punu a̱ ubuta̱ u nam pa wa, ka̱ta̱ vu bana na ɗe,’ wi ta̱ ta na e kusherewengu. Ili i nam pa ra̱ka̱ yi lo a̱ kulaꞋa ɗa̱ ba. [ 21Kuka̱na̱ ku una̱ n avasa ɗaɗa u kuloko ili i nam pa, ili i yoku yi lo ba.”]

Yesu u doki u yaꞋin kadanshi ku ukpa̱ u ni

(Mar. 9:30-32; Luk. 9:43b-45)

22Kanna ke te ana o bonoi a̱ Ga̱lili, ɗa Yesu u danai le, “Vuza vi yoku wi ta̱ e kudenge Maku ma Vuma. 23A kuna yi ta̱, amma ayin a tatsu a yaꞋan baci, wi ta̱ a̱ kuɗenga̱ a kasaun.” Ɗa mukumitoni ma n na̱mgba̱i a̱tsuma̱ ka̱u.

Kutsupa ku utafu

24Ana Yesu m mukumitoni n ni a yawai Kafarnahum, aza a kisa utafu a̱ A̱Ꞌisa̱ a Gbayin a̱ ta̱wa̱i u Biturusu ɗa e ecei ni, “Malum ma̱ ɗa̱ ma tsu tsupa ta̱ utafu a̱ A̱Ꞌisa̱ a gaji?”

25Wu ushuki, “E, u tsu tsupa ta̱.”

Ɗa u uwai punu asuvu a kpaꞋa a, amma kafu u yaꞋan kadanshi, ɗa Yesu we ecei ni, “Ngono n ci isa ta̱ utafu u uma e le ko wo omoci a na i o kuyongo n ele?”

26Wu ushuki, “A ci isa ta̱ utafu wo omoci.”

Ɗa Yesu wu ushuki, “Ashe sai uma e le a tsupa ba. 27Amma ci a kuciga kula̱nsa̱ unushi ba. Adama a nannai, bana a mala ka̱ta̱ vi yaꞋan karaɗa. Kadan ka na vi gita̱i kuraɗukpa, ka̱ta̱ vu la̱na̱ punu una̱ u ni. Vi ta̱ a kucina punu ikebe ya azurufa i na i yawai kutsupa utafu u va̱ n u ɗa̱ a̱ A̱Ꞌisa̱ a. Ɗika i ɗa ka̱ta̱ vu bana vu tsupa le utafu u tsu.”

Currently Selected:

Matiyu 17: asgNT

Highlight

Copy