Matiyu 16

Aza a na i a̱ kula̱nsa̱ urotu

(Mar. 8:11-13; Luk. 12:54-56)

1Afarishi n A̱sa̱dukiya a banai u Yesu adama a na a zuwaka yi maza, a danai ni u yaꞋanka le ili i mereve i na i kuyotsongu a na Ka̱shile ku ushuki n a̱yi u ta̱wa̱ a aduniyan.

2Amma ɗa Yesu wu ushuki, “Kanna ki baci a̱ kuyikpa̱, i tsu dana ta̱, ‘Ci ta̱ a̱ kuciya̱ kanna ka singai mkpaꞋa adama a na ce ene ta̱ gaɗi u shilyamgbai.’ 3N usana ka̱lika̱li kpamu i tsu dana ta̱, ‘Wi ta̱ o kuyoꞋo mini anana, adama a na ye ene ta̱ gaɗi u shilyamgbai n uguyi.’ I ce ene ta̱ urotu u nam pa gaɗi, ka̱ta̱ i yeve i na urotu wa wi. Amma ye ene ta̱ ili i na mi a kuyaꞋan gogo na, amma i yeve ili ya ba. 4Uma a kawasasa n aza a gbani-gbani o gogo na a nam pa a̱ tsu la̱nsa̱ ta̱ ili i mereve i na i kokpo urotu, amma ko urotu n kuneke le ba, sai de urotu u keneki Yunusa.” Ɗa Yesu u ka̱sa̱kpa̱i le ɗa u lazai.

YaꞋin cicoꞋo n kuyotsongusu ka aꞋuwa

(Mar. 8:14-21)

5Ana mukumitoni ma m pasai a kubana a upashi u yoku u mala wa, ɗa a cinukpai kuɗika burodi. 6Yesu u danai le, “Ka̱ta̱ i zuka! I yaꞋan cicoꞋo n kusasu ka Afarishi n A̱sa̱dukiya.”

7Ɗa mukumitoni ma n ka̱na̱i kuyaꞋankpanai kadanshi n a dananai, “Wi ta̱ a kudansa nahannai adama a na ko burodi tsu walaka ba.”

8U yeve ta̱ ili i na i a kudansa, ɗa we ecei le, “Yi ɗa̱i i zuwai ɗa yi a kudansa uteku u ɗa̱ kakuna ku unambi u burodi? Uneki u ka̱ɗu u ɗa̱ u gusa̱ ta̱. 9Ali n gogo na ka̱ta̱ i yeve ba? Ciɓai m burodi vu tawun vu na a̱ cuwa̱ta̱ngi uma a̱kpa̱n a tawun (5,000)? Ka̱ta̱ i ciɓa a na i shatangi mbana n cindere n awazali a na a buwai? 10Ayin a na n cuwa̱ta̱ngi uma a̱kpa̱n a̱ na̱shi (4,000) m burodi vi cindere, mbana m gbagbaꞋin n yain n ɗai i shatangi? 11Mpa kadanshi ko burodi kaꞋa mi a kuyaꞋanka ɗa̱ ba. Yi ɗa̱i i zuwai ɗa i kpa̱ɗa̱i kuyeve i na mi a kudansa? Mi ta̱ a kudana ɗa̱ i yaꞋan cicoꞋo n kusasu ka Afarishi n A̱sa̱dukiya.”

12A kubana ukocishi, ɗa e yevei a na kadanshi ka kusasu ko burodi ka wi a kuyaꞋan ba, amma ukuna u kuyotsongusu ka aꞋuwa ka Afarishi n A̱sa̱dukiya.

Biturusu u danai Yesu Kishi kaꞋa

(Mar. 8:27-30; Luk. 9:18-21)

13Yesu m mukumitoni n ni a nwalu, ana a yawai ɗevu n uɓon u Kasariya Filibi, ɗa we ecei le, “Yayi uma i a kudana Maku ma Vuma mi?”

14Ɗa a̱ ushuki, “Aza o yoku a danai avu Yahaya Vuza vu Kusumbu ka Akucina ɗa. Aza o yoku a danai avu Iliya ɗa. Aza o yoku kpamu a danai avu Irimiya ɗa, ko vuza yoku a̱ ka̱tsuma̱ ke eneki.”

15Ɗa we ecei le, “A̱ɗa̱ tamkpamu, yayi i danai mpa mi?”

16Sima Biturusu wu ushuki, “Avu ɗa Kishi, Maku ma̱ Ka̱shile† ka wuma.”

17Ɗa Yesu wu ushuki, “Ka̱shile ka zuwaka wu una̱singai, Sima maku ma Yunusa, adama a na vuza ɗa u yotsongi nu ili i na lo ba. Esheku a̱ va̱ a na i gaɗi a ɗa o yotsongi nu ko mpa ɗa ya. 18Adama a nannai mi ta̱ e kuɗeke wu Biturusu, ɗaɗa ‘katali.’ A katali ka nam pa kaꞋa n kumaꞋa a̱Ꞌisa̱ a aza o kutoni† a̱ va̱, utsura wu ukpa̱ wa kufuɗa wa̱ la̱nga̱sa̱ a ɗa ba. 19Mi ta̱ e kuneke wu agbaguratsu o tsugono tsu gaɗi. Ili i na baci vi shiyai a aduniyan, ili i nan lo yi ta̱ ushiyi gaɗi. Ili i na baci kpamu vi shikpai a aduniyan i ɗa yi ta̱ a kuyaꞋan ushikpi gaɗi.” 20Ɗa Yesu u kushangi mukumitoni n ni ka̱ta̱ a dana a na a̱yi ɗa Kishi ba.

Yesu u dansai ukuna wu ukpa̱ u ni

(Mar. 8:30—9:1; Luk. 9:22-27)

21A ayin a nan lo, Yesu u gita̱ngi kudana mukumitoni n ni ili i na i kucina yi. U danai, “Mpa mi ta̱ a kubana a Urishelima a̱ ubuta̱ u na aza e kelime a iɗika, anan ganu vu gbagbaꞋin, koɓolo nu nlum n Wila̱ mi. I ta̱ a kuzuwa mu n soꞋo atakaci ka̱u. I ta̱ a kuna mu, amma ayin a tatsu a yaꞋan baci, mi ta̱ a̱ kuɗenga̱ n wuma.”

22Biturusu u ɗekei ni u bankai paki, ɗa u danai ni u ka̱sa̱kpa̱ kuyaꞋan kadanshi nannai, “Vuzagbayin, Ka̱shile ka̱ kuka̱sa̱kpa̱ ili i nam pa i cina wu ba!”

23Yesu u kpatalai u Biturusu ɗa u danai, “MalyaꞋi, ɗenga̱ mu lo! Vi ta̱ a kukpada mu kuyaꞋan ili i na Ka̱shile ka cigai n yaꞋan, adama a na vi ta̱ e kusheshe tsu vuma, amma tsu na Ka̱shile ka cigai ba.”

24Ɗa Yesu u danai mukumitoni n ni, “Vi ciga baci kokpo makumitoni ma̱ va̱, sai vu goyo ka̱ci ka̱ nu. Vi ɗika maɗanga ma atakaci ma̱ nu ka̱ta̱ vu tono mu. 25Adama a na vi ciga baci kisa wuma u nu, vi ta̱ a kunamba u ɗa, amma vu namba baci wuma u nu adama a̱ va̱, vi ta̱ a̱ kuciya̱ u ɗa. 26Ili i gbani i ɗa vi ciya̱ baci aduniyan ra̱ka̱ ɗa vu nambai wuma u nu. Vi ta̱ a kufuɗa va tsupa ili adama a na vi isa wuma u nu? 27Adama a na mpa, Maku ma Vuma, mi ta̱ a̱ kuta̱wa̱ n tsugbayin ce Esheku a̱ va̱ n alingata a̱ ni, ka̱ta̱ n yaꞋanka uma ra̱ka̱ afada uteku u na ulinga u le wi. 28N dana ɗa̱ mayun, a̱ɗa̱ vi yoku na yi kashani na gogo na, yi a̱ kukuwa̱ ba, sai ye ene mu, Maku ma Vuma, a̱ kuta̱wa̱ n tsugono tsu va̱.”

Currently Selected:

Matiyu 16: asgNT

Highlight

Copy