Luka 18

Agisana a vuka n keyevikafada

1Yesu u danai mukumitoni agisana adama a na a zuwa le kuyaꞋan ka avasa babu kuvuka. 2U danai, “A yaꞋan ta̱ keyevikafada ko yoku a̱ likuci i yoku, vuza na u tsu pana wovon u Ka̱shile ba, benle u vuma. 3Vuka vu na vali vi ni vu kuwa̱i vi yoku vi ta̱ lo a̱ likuci ya, vuza na u bansai wa̱ ni n ufolu u na u ciya̱ wuta̱ki u vuza na wi a tsurala n a̱yi.

4“Ali n ayin n a̱bunda̱i n u iwain, amma a kubana megeshe, ɗa u sheshei n ka̱ɗu ka̱ ni, ‘Ko an n tsu pana wovon u Ka̱shile, n u vuma ba, 5amma uteku u na vuka vu nam pa vo oꞋusoi mu ka̱u na, n kukondo ta̱ me ene u ciya̱ wuta̱ki, adama a na ka̱ta̱ wo oꞋuso mu kpamu n kuta̱wa̱sa̱ ku ni ba.’ ”

6Ɗa Vuzagbayin u danai, “Panai ili i na keyevikafada ka gbani-gbani ka nan lo ka dansai. 7Ka̱shile kaꞋa ka̱ tuka̱i n wuta̱ki a̱ ubuta̱ wa aza a na u zagbai ɗa i a̱ ma̱shi kanna n kayin ba? U kuyongo ta̱ a kudana le a lazasa biꞋi? 8N dana ɗa̱, sai we ene a̱ ciya̱ wuta̱ki gogo kpamu. Gogo na, mpa Maku ma Vuma m bono baci, n kuciya̱ ta̱ wo aza a uneki wa̱ a̱ɗu a iɗika ya?”

Agisana a Kafarishi n kishi ku utafu

9Ɗa Yesu u yaꞋankai aza o yoku agisana a nam pa, aza a na i a kinda ka̱ci ke le i ta̱ n usuɓi† derere, amma o tsu goyo aza a na a buwai. Ɗa u danai: 10“Uma e re o yoku a ɗa a banai kuyaꞋan kavasa a̱ A̱Ꞌisa̱ a Gbayin: vuza te Kafarishi, vuza te kpamu kishi ku utafu. 11Kafarishi ka̱ ɗenga̱i kashani endeꞋen ni, ɗa u yaꞋin kavasa, ‘Ka̱shile, n cikpa wu ta̱ adama a na mi tsu uma o yoku a na i: oboki, n aza a kagbani-gbani, n aza a tsugbani, ko ci kishi ku utafu ka nam pa ba. 12N tsu ka̱na̱ ta̱ una̱ kure a̱ ka̱tsuma̱ ke kuden ku te. N doku kpamu n takpa i te a̱ ka̱tsuma̱ ka kupa ki ili i na n ciya̱i dem ka̱ta̱ n neke wu.’

13“Amma kishi ku utafu ka shamgbai daꞋin. Wi inda biꞋi gaɗi gbani ba, amma u lapai ma̱ka̱nga̱ ma̱ ni adama a̱ una̱mgbuka̱tsuma̱. Ɗa u danai, ‘Mpa vuza vu unushi ɗa, Ka̱shile, pana asuvayali a̱ va̱.’

14“N dana ɗa̱, vuza vu unushi vu nam pa u bonoi a kpaꞋa ku ni n unushi u ni ucinikpi a̱ ubuta̱ u Ka̱shile, amma Kafarishi ka ka lazai n unushi u ni. Adama a na vuza na baci de dem u cikpai ka̱ci ka̱ ni i ta̱ o kugoyo yi. Vuza na u goyoi ka̱ci ka̱ ni kpamu u ciya̱ ucikpi.”

Yesu u zuwakai muku una̱singai

(Mat. 19:13-15; Mar. 10:13-16)

15Uma a̱ kutuka̱ muku n wawaꞋa u Yesu, adama a na u saꞋwa le. Ana mukumitoni me enei nannai, ɗa a dansukai le. 16Amma Yesu u ɗekei muku ma n ka̱ci ka̱ ni, ɗa u danai, “Ka̱sa̱kpa̱i muku n ta̱wa̱ wa̱ va̱, ka̱ta̱ i sa̱nga̱ le ba, adama a na aza a na i n uneki u ka̱ɗu ci le i ta̱ a̱ kuda̱sa̱ngu o tsugono tsu Ka̱shile. 17N dana wu mayun, vuza na baci wi isai tsugono tsu Ka̱shile tsu maku ba, wa kuꞋuwa tsu ɗa ta na ba.”

Vuzagbayin vu uciyi

(Mat. 19:16-30; Mar. 10:17-31)

18Vuzagbayin vi yoku ɗa we ecei ni, “Malum ma singai, nini ɗai n kuyaꞋan adama a na n ciya̱ wuma u na u kukotso ba?”

19Ɗa Yesu wu ushuki, “Yi ɗai i zuwai ɗa vi ɗekei mu vuza singai? Babu vuza singai, sai Ka̱shile endeꞋen. 20Vi yeve ta̱ ɗe Wila̱ wa: ‘Ka̱ta̱ vi yaꞋan tsugbani ba. Ka̱ta̱ vu una vuza ba. Vi yaꞋan uboki feu ba. Ka̱ta̱ vu dansa aꞋuwa ba. Vi cikpa eshevu n a̱na̱vu dem.’ ”#Kut. 20:12-16; K.Wil. 5:16-20.

21U danai, “M ɓa̱na̱ ta̱ ɗe ili i nam pa ali mpa maku me kenu.”

22Ana Yesu u panai nannai, ɗa u danai ni, “Vu buwa ta̱ n ili i te. Denge ili i na vi n i ɗa ra̱ka̱, ka̱ta̱ vu peceke aza a unambi. Vi ta̱ a̱ kuciya̱ uciyi na ɗe gaɗi. Ka̱ta̱ vu ta̱wa̱ vu tono mu.”

23Ana u panai nannai, ɗa u na̱mgba̱i ka̱tsuma̱, adama a na a̱yi vuma vu uciyi ɗa ka̱u. 24Yesu wi indai ni, ɗa u danai, “Dikyai ɗa vuma vu uciyi u kuꞋuwa o tsugono tsu Ka̱shile. 25U laꞋa ta̱ n ɗevu karakuma ka uwa a̱ vunu vu vubele, an vuza vu uciyi u kuꞋuwa o tsugono tsu Ka̱shile.”

26Aza a na a panai kadanshi ka, ɗa e ecei, “Ta baci nannai, yayi wo tamkpamu u kuciya̱ wishi?”

27Ɗa Yesu wu ushuki, “Ili i na ya kuyaꞋan a̱ ubuta̱ u uma ba, i ta̱ a kuyaꞋan a̱ ubuta̱ u Ka̱shile.”

28Biturusu u danai, “Tsu ka̱sa̱kpa̱ ta̱ ili i na ci n i ɗa ra̱ka̱ adama a na tsu tono wu.”

29-30Yesu u danai le, “N dana ɗa̱ mayun, vuza na baci u ka̱sa̱kpa̱i ili i yoku, adama o tsugono tsu Ka̱shile, u kuciya̱ ta̱ katsupu ka̱ ni n a̱bunda̱i a̱ ka̱tsuma̱ ka ayin a nam pa. Nannai kpamu u ka̱sa̱kpa̱ baci kpaꞋa ku ni ko vuka vi ni, u kuciya̱ ta̱ katsupu ka nam pa. Ta kpamu nannai vuza yoku u ka̱sa̱kpa̱ baci isheku i ni, ko nkoshi n ni, ko muku n ni. Ayin a na kpamu a̱ kuta̱wa̱, u kuciya̱ ta̱ wuma u na u kukotso ba.”

Kadanshi ku ukpa̱ ke Yesu ka tatsu

(Mat. 20:17-19; Mar. 10:32-34)

31Yesu u ɗekei Kupanazere a nan lo paki, ɗa u danai le, “Ci ta̱ a kubana a Urishelima a̱ ubuta̱ u na ili ra̱ka̱ i na eneki a ɗanai adama a ukuna u Maku ma Vuma i kushana. 32I ta̱ e kuneke yi e ekiye a Aza̱ka̱yimbi. Ka̱ta̱ a̱ ka̱na̱ kuzoꞋoso yi, ka̱ta̱ kpamu a shika yi, n a̱ ciꞋikpa̱i ni ntsa̱n. A lapa yi, ka̱ta̱ a una yi. 33A kanna ka tatsu, wi ta̱ kpamu a̱ kuɗenga̱ n wuma.”

34Mukumitoni ko ili i te i na u dansai e yeve i ɗa ba. Ili i na kadanshi ka ka kudana i ɗa yi ta̱ usokongi we le, benle e yeve ili i na wi a kudansa.

Yesu u potsokpoi ka̱yimba̱

(Mat. 20:29-34; Mar. 10:46-52)

35Yesu a kuyawa ɗevu n Jeriko, ka̱yimba̱ ko yoku lo tamkpamu ida̱shi a uye paki a kuyaꞋan ufolu. 36Ana u panai ka̱bunda̱i ka uma a nwalu, ɗa we ecei ili i na yi lo. 37Ɗa a danai ni, “Yesu vu Nazara ɗa wi lo a nwalu.”

38Ɗa u ɗekei ka̱u, “Yesu, Maku ma Dawuda, pana asuvayali a̱ va̱!”

39Aza a na i lo a nwalu kelime ka, a dansukai ni, a dana u paɗa bini, amma u doku wo orukpoi meɗevile ma ka̱u, “Maku ma Dawuda, pana asuvayali a̱ va̱!”

40Yesu u shamgbai, ɗa u danai a̱ tuka̱ yi n vuma va. Ana u yawai ɗevu, ɗa Yesu we ecei ni, 41“Yi ɗa̱i vi cigai n yaꞋanka wu?”

Ɗa wu ushuki, “Vuzagbayin, n ciga ta̱ me ene ubuta̱.”

42Yesu u danai ni, “Ene! Uneki u ka̱ɗu u nu u potsokpo wu ta̱.” 43Gogo va lo, ɗa we enei ubuta̱, ɗa u tonoi Yesu n u cikpai Ka̱shile. Ana uma e enei nannai dem, ɗa a cikpai Ka̱shile feu.

Currently Selected:

Luka 18: asgNT

Highlight

Copy